მუჭო ოხვარუნა უხუცესეფ თინეფს, მით მეტო ვა რენა იეჰოვაშ მოწმეეფ?

1, 2. ა) მუჭო უჯინე იეჰოვა თის, მით აშენს დო ვა ნარღენს? ბ) მუ ოკო იეჰოვას, დუმაშებელეფქ გაკეთანინ?

ᲘᲔᲰᲝᲕᲐᲡ ჯოგჷ ცოდა დო თიშე მუთუნით ვა წკურუნს თოლს (ფსალმ. 5:4—6). ღორონთ ჩქინდე ითხინს, მივაჸუნათ თიშ სამართლიან ნორმეფს, ნამდგას მუშ სიტყვაშ საშვალებათ მოგებაფუანა. მუშო ოკო რაგად, თინა ველჷ, ნამდა არასრულყოფილ ადამიანეფ თეს სრულყოფილო გუვაკეთენთ (ფსალმ. 130:3, 4). მარა იეჰოვას ვამაძირე, მუჟამსით „უღორონთე კათა ღორონთიშ ჭყოლოფათ ამართლენს მუშ უონჯღორე საქციელს“ (იუდ. 4). მუჭოთ ბიბლიაშე ბგებულენთ, უღორონთე ადამიანეფ არმაგედონიშ ომს გენადგურებუნა (2 პეტ. 3:7; გამოცხ. 16:16).

² მარა იეჰოვას მითინიშ განადგურება ვაკო. მუჭოთ წოხოლენ სტატიაშე გებგით, ბიბლიაშე არგამათ იძირე, ნამდა ღორონთის ოკო, „არძაქ ინარღას დაშებულ“ (2 პეტ. 3:9). იეჰოვაცალო, უხუცესეფ ხოლო მოთვინებათ მეურენა დუმაშებელს, ნამდა ქიმეხვარან გიშასწორებას დო იეჰოვაშ მოწონაშ დორთინაფას. სანარღოთ, არძა ვა ღებულენს მოხვარას დო აგრძელენს არასწორიშ კეთებას, თიშ უმკუჯინუო, ნამდა უხუცესეფ ირნერო ოცადუნა, დაშებულიშ ნარღებაშა ქიმიჸუნან (ეს. 6:9). მუქ ოკო იკეთინას თე დროს?

„ᲕᲔᲓᲘᲢᲣᲐᲗ ᲣᲑᲐᲓᲝ ᲙᲝᲩ ᲗᲥᲕᲐᲜ ᲨᲥᲐᲡ“

3. ა) მუჭოთ ბიბლიაშე იძირე, მუქ ოკო მოხვადას მუჟამსით შემცოდველ ვა ნარღენს დაშებულს? ბ) მუშენ შემლებუნა თიშ რაგად, ნამდა, მით ვა ნარღენს დაშებულს, ფაქტობრივო, მუშით გინმოჭყვიდუნს, ვა დოსქიდას კრებას?

³ მუჟამსით პიროვნება ვა ნარღენს დაშებულს, უხუცესეფს შხვა შარა ვასქიდუნა 1 კორინთელეფიშ 5:13-ს ინოჭარილ მითითებას ვემიაჸუნანინ, სოდეთ ჭარჷ: „ვედიტუათ უბადო კოჩ თქვან შქას!“. შემცოდველს ხომ ქოუჩქუდ, ნამდა დაშებულს ვენარღენდ-და, კრება დატებელ აჸიდ?! გიშურს, მუქ გინოჭყვიდ, თაშ ქუმოხვადუკონ. თე გაგებათ, თიქ მუთ თასუნ, თინა მიღჷ (გალ. 6:7). მუშენ იფჩიებუთ თეს? მუშენდა, უხუცესეფქ ბრელშა ეცადეს, ქიმეხვარესკო თის დო დაშებულიშ ნარღებაშა ქიმიჸუნესკო, მარა თიქ ვეთირ (2 მეფ. 17:12—15). თიქ მუშ საქმეეფით ქაძირუ, ნამდა ვაკოდ იეჰოვაშ ნორმეფიშ მეჸუნა (კან. 30:19, 20).

4. მუშენ გიმიცხადებ კრებას, ნამდა მიდგარენ მეტო ვა რე იეჰოვაშ მოწმე?

⁴ მუჟამსით დაშებულს ვა ნარღენსინ ფერ პიროვნებას კრებას ვეტენა, განცხადება იკეთებ, ნამდა თინა მეტო ვა რე იეჰოვაშ მოწმე.a თე განცხადებაშ მიზან ვა რე, ნამდა შემცოდველს ონჯღორე დუგურინუან დო უხერხულს ქინაჸათან. თენა თიშენ იკეთებ, ნამდა კრებაქ ქიმიაჸუნას ბიბლიას ინოჭარილ მითითებას: „ვაიღუდან მუთუნნერ ურთიერთობა თიწკუმა . . . თეცალეფწკუმა ართო ოჭკუმალ ხოლო ვა ჭკუმათ“ (1 კორ. 5:9—11). თე მითითებას მუშ მიზან უღჷ. მოციქულ პავლექ ჭარჷ: „აკაბცხა ცომიშ ეიოჸუნაფალ მთელ ცომს ეიჸუნანს“ (1 კორ. 5:6). თაშ ნამდა, დაშებულს ვა ნარღენსინ ფერ პიროვნება კინ კრებას ქუდოსქიდუნ-და, შილებე თექ შხვეფს ჭიე-ჭიეთ გურ გეუჸოთას იეჰოვაშ სამართლიან ნორმეფიშ მეჸუნაშა (იგავ. 13:20; 1 კორ. 15:33).

5. მუჭო ოკო უჯინედათ თის, მიდგას კრება დატებაფუეს, დო მუშენ ოკო მიფქცუათ თაშ?

⁵ მუჭო ოკო უჯინედათ თის, მიდგას კრება დატებაფუეს? მართალ რე, ურთიერთობა ოკო ვა მიღუდან თიწკუმა, მარა ჩქინო დინაფილ შხურცალ ოკო რდასჷ დო ოკო ვეფიფქრათ, ნამდა დღას ვეშიალებე დორთა. მუჭოთ დინაფილ შხურქ შილებე ართ დღასით კინ დართას ოჭყიშალს, თეშ თე პიროვნებაქ ხოლო შილებე დართას იეჰოვას. ვაგგოჭყორდან, თის დუდ აფჷ მეძღვინელ ღორონთშა. მართალ რე, ამდღა ვა ცხოვრენს მეძღვინუაშ აღთქმაშ თანახმას დო თენა მანგარ გლახა რე, მუშენდა თაშ გაგრძელენს-და, შილებე მარადიულ ცხოვრებაშ საშვალება მიოდინუას, მარა, ონდო იეჰოვა საშვალებას არზენს ადამიანეფს, ინარღან დაშებულ, თის შეულებ დართას ღორონთის (ეზეკ. 18:31). მუჭო მეხვარებ თეშ იმენდ უხუცესეფს, თიშ უკულ ხოლო გაგრძელან შემცოდველიშ მოხვარა, მუთ კრებას ქუდატებაფუანა?

ᲛᲣᲭᲝ ᲝᲮᲕᲐᲠᲣᲜᲐ ᲣᲮᲣᲪᲔᲡᲔᲤ ᲗᲘᲜᲔᲤᲡ, ᲛᲘᲗ ᲙᲠᲔᲑᲐᲡ ᲕᲔᲓᲘᲢᲣᲔᲡ?

6. მუს ორთუნა უხუცესეფ თინეფიშ მახვარებელო, მით კრებას ვედიტუეს?

⁶ მოხვარაშ უმშო იტენანო უხუცესეფ შემცოდველს, თიშ უკულ, მუთ ურაგადუნა, ნამდა მეტო ვეჸუაფ იეჰოვაშ მოწმე? მუშო ოკო რაგად, ვარ. მუჟამსით უხუცესეფიშ კომიტეტ პიროვნებას ქუგაგებაფუანს, ნამდა კრებას დოსქილადაშ უფლება მეტო ვა უღჷ, თის ხოლო გეუნწყუნს, მუ ნაბიჯეფ ოკო გინოდგას კრებაშა დართინალო. მარა ჯიმალეფ ხვალე თეს ვეგეჯერდუნა; უმენტაშ შემთხვევას, თინეფ ქოუწინა თე პიროვნებას, ნამდა მზათ რენა, მუსხირენ თუთაშა კინ ქეშეხვადან თიშ გაგებელო, ქაფუნ დო ვარ აზროვნება თირელ. თინა თეშ მოვარიე ვეჸინ-და, უკულიან შეხვალამას უხუცესეფ ჸოროფათ ელუჩანა თის, ინარღას დაშებულ დო დართას იეჰოვას. თიმწკუმა ხოლო, მუჟამსით იძირე, ნამდა კრება დატებაფუესინ ფერ პიროვნებას დიო ხოლო ვა აფჷ თირელ აზროვნება, ჯიმალეფ პერიოდულო კინ ეცადებუნა თიწკუმა თეცალ შეხვალამას.

7. მუჭო მეჸუნა უხუცესეფ იეჰოვაშ მაგალითის? (იერ. 3:12).

⁷ იეჰოვაცალო, უხუცესეფ ხოლო მიშულა თი ადამიანიშ მდგომარეობაშა, მიდგას კრებას დოსქილადაშ უფლებაქ ვემიაჩ. მაგალთო, იეჰოვა ვა უჯინედ, მუნეფიშით მუჟამ მუკართუდეს თის უდუჯერებელ ისრაელეფ. თეშ მანგიორო, მუ გინოდგუნდჷ პირველ ნაბიჯის, თიშ უმკუჯინუო, ნამდა თინეფს ნარღებაშ მუთუნ ვეგიოხედეს. მუჭოთ თე ჟურნალს მოჩამილ მაჟია სტატიაშე გებგით, იეჰოვაქ ოსიაშ დო თიშ ოსურიშ მაგალითით ქაძირუ მუშ ხალხის, მუჭო მიშეშ თინეფიშ მდგომარეობაშა. იეჰოვაქ ოსიას უწუ, გერიგუკო მუშ ოსურს, თიშ უმკუჯინუო, ნამდა თინა დიო ხოლო აგრძელენდჷ დაშებას (ოს. 3:1; მალ. 3:7). იეჰოვაცალო, უხუცესეფს ხოლო მთელ გურით ოკონა, კრებაქ დატებელქ აჸუნ ფერ შემცოდველქ მიკირთას ღორონთჸურე. ათეშენ ირფელს ორთუნა, ნამდა თის ძნელქ ვაჸუას თეშ კეთებაქ (წეკითხით იერემიაშ 3:12).

8. მუჭო იძირე შარასეჩილათირ სქუაშ იგავშე, ნამდა იეჰოვა მიშურს შხვეფიშ მდგომარეობაშა დო მოჭყოლოფე რე? (ლუკ. 15:7).

⁸ მაჟია სტატიას იესოშ იგავ ხოლო რდჷ მოჩამილ შარასეჩილათირ სქუაშ გურშენ. ქიგიშინით, მუჟამსით მუმაქ თოლ ქუმუკინდუ ჸუდეშა დორთელ სქუას, „ირულ, გურშა ქიხუტოლუ დო გოჯუნ“ (ლუკ. 15:20). დეკვირით, მუმას ვა უჯინუ, მუჟამ დოუჭყანდ სქუა ხვეწებას, ქუმაპატია. თეშ მანგიორო, მუქ გეგნოდგჷ პირველ ნაბიჯ დო გაკეთ თინა, მუდგას არძა მოჸოროფე მუმა ქიმინუნდ. უხუცესეფ ხოლო ირნერო ოცადუნა, ზუსტას თაშ მეუდირთან შარასეჩილათირ შხურს დო მანგარო ოკონა, თიქ ჸუდეშა დირთას (ლუკ. 15:22—24, 32). მუჟამსით შემცოდველ ირთუ კრებაშა, სასწაულ ხიოლ რე მუჭოთ ზეცას, თეშ დედამიწას (წეკითხით ლუკაშ 15:7).

9. მუნერ დამოკიდებულება უღჷ იეჰოვას თინეფიშ მიმართ, მიდგას კრებას დოსქილადაშ უფლებაქ ვემიაჩ?

⁹ მუჭოთ ბძირით, იეჰოვა თოლს ვა წკურუნს ცოდაშე დო მუთუნით ვა დუშვენს, კრებას ქუდოსქიდას თიქ, მით ვა ნარღენს დაშებულს. მარა თენა ვა ნიშნენს, ნამდა იეჰოვა ოჭიშის ურთინუანს თეცალ პიროვნებას. თის მთელ გურით ოკო, თეცალეფქ დართან. ოსიაშ 14:4-შე ჯგირო იძირე, მუს გინაფლენს იეჰოვა, მუჟამსით დუმაშებელ ნარღენს მუშ საქციელს. თექ ჭარჷ: „გეგშვაჯგირენქ თინეფს, ნამდა ართგურეფქ ქიჸუან. ჩქიმ ნებათ ქიპჸოროფუანქ თინეფს, მუშენდა მეტო ვა ვორექ თინეფშე გარისხებულ“. თიშ რჩქინა, მუჭო უჯინე იეჰოვა თეცალ კათას, უხუცესეფს მეხვარებ, დუმაშებელწკუმა ნარღებაშ ნიშან გორან, თე ნიშან გვალო აკაბცხა რდასინ ხოლო. იეჰოვაშ თე სიტყვეფ დუმაშებელს ხოლო ქაგინაფუანს თიშ ჸოროფას დო მეხვარებ, დრო ვეღასინ თეშ დართას ღორონთის.

10, 11. მუჭო ოხვარუნა უხუცესეფ თინეფს, მით ბრელ ხან რე, ვა რე იეჰოვაშ მოწმე?

¹⁰ მუშ რაგად შილებე თიცალეფშე, მით ბრელ წანა რე, ვა რე იეჰოვაშ მოწმე? ნამთინეს შილებე მეტებულ აფუდას თიშ კეთება, მუდგაშ გურშენ კრებას დოსქილადაშ უფლებაქ ვემიაჩ. ნამთინეს შილებე შურო თინა ხოლო ვა შუდას, მუ რდჷ თიშ მიზეზ, ნამდა კრებაქ აჸუ დატებელქ. მუჭოდგა ვა რდასინ, უხუცესეფ ირნერო ეცადებუნა, დოგორან დო ქიმიაკითხუან თეცალეფს. ქეშეხვადუნან, თინეფ ქილოცენა თიწკუმა ართო დო ჸოროფათ ელუჩანა, დართას კრებას. მუშო ოკო რაგად, წანეფ რე, კრებას ვა რენ ფერ კოჩ სულიერო ხოლო მოსუსტებულ იჸი. ათეშენ თის კრებაშა დორთა ქულამუნ-და, უხუცესეფ დაგეგმენა, ნამდგაინ ქრისტიანქ ბიბლიაშ გურაფა ჩაუტარას თის, თიშ უმკუჯინუო, ნამდა დიო ხოლო ვა რე დორთინაფილ კრებაშა. არძა შემთხვევას უხუცესეფქ ოკო გინოჭყვიდან, იჸუას დო ვარ ბიბლიაშ გურაფაქ ჩატარებულქ თეცალ პიროვნებაწკუმა დო მიქ ოკო ჩაუტარას.

¹¹ უხუცესეფ ხოლო იეჰოვაცალო მიშულა შხვეფიშ მდგომარეობაშა დო ოცადუნა, ქიმიგორუან არძა, მიდგას ვემიაჩ კრებას დოსქილადაშ უფლებაქ, დო ქიმეხვარან იეჰოვაშა დორთას. მუჟამსით შემცოდველ თირანს აზროვნებას დო საქმეეფით ოძირანს, ნამდა ნარღენს დაშებულს, საჭირო ვა რე დროშ ღალა თიშ კრებაშა დართინაფალო (2 კორ. 2:6—8).

12. ა) მუჟამ ოკო რდანჷ უხუცესეფ განსაკუთრებულო ფრთხილას? ბ) მუშენ ოკო ვეფიფქრათ, ნამდა შხვეფს უდუნდებელო მექცუესინ ფერ ადამიანეფს ვემიაღებენა იეჰოვაშ ჭყოლოფა? (ქოძირით სქოლიო).

¹² რე სიტუაციეფ, მუჟამსით უხუცესეფს განსაკუთრებულ სიფრთხილე ოსაჭირუნა მიდგაინიშ კრებაშა დორთინაფაშ საკითხიშ გინოჭყვიდუაშ დროს. თინეფს ოთხილარ აფუნა კრება, ათეშენ, უხუცესეფ ბოლოშა ოკო რდანჷ დარწმუნებულ, ნამდა პიროვნება მართალო ნარღენს დაშებულს, მაგალთო, მუჟამსით თის კრება ბაღანაშე ძალადობაშ, განდგომილებაშ ვარდა თიშ გურშენ დატებაფუეს, ნამდა ირფელ თეშ დაგეგმჷ, მეუღლეწკუმა ჩათხიაქ შეიალებუკონ, მაგალთო, გარძახ იმრუშ (მალ. 2:14; 2 ტიმ. 3:6). მარა, თეწკუმა ართო, თიქ ხოლო ოკო ვაგმოჭყორდან, ნამდა იეჰოვა გურშა იხუტოლუანს არძას, მით მთელ გურით ნარღენს დაშებულს დო მიოტენს გლახაშ კეთებას. მართალ რე, უხუცესეფ ფრთხილას ოკო რდანჷ დო დერწმუნან, ნამდა შხვას უდუნდებელო მექცუნ ფერ ადამიანქ ბოლოშა გეგშესწორ, მარა ვართ თინა ოკო იფიქრან, ნამდა თეცალ აფჷ დაშებულინ ფერ პიროვნებას დღას ვემიაღებე იეჰოვაშ ჭყოლოფაb (1 პეტ. 2:10).

ᲛᲣᲨ ᲙᲔᲗᲔᲑᲐ ᲨᲔᲣᲚᲔᲑ ᲙᲠᲔᲑᲐᲡ?

13. მუჭო ოკო მივექცუათ თის, მიდგაქ შეგონება მიღჷ, დო თის, მიდგას კრებას დოსქილადაშ უფლებაქ ვემიაჩ?

¹³ მუჭოთ წოხოლენ სტატიაშე გებგით, მინშა კრებას განცხადება იკეთებ, ნამდა მიდგაინქ შეგონება მიღჷ, მუთ თიშ მაძირაფალ რე, ნამდა თიქ ინარღჷ დაშებულ დო გეგშესწორ, ათეშენ შემლებუნა თიწკუმა ურთიერთობაშ გაგრძელება (1 ტიმ. 5:20). თინა კინ სქიდუ კრებას დო თანაქრისტიანეფწკუმა ურთიერთობა დო გურიშ ელაკინა ოსაჭირ (ებრ. 10:24, 25). მარა საქმე შხვანერო რე, მუჟამსით განცხადება იკეთებ, ნამდა მიდგაინს ვემიაჩ კრებას დოსქილადაშ უფლებაქ. ბიბლია მირაგადუნა, ნამდა „[ვა მიღუდან] მუთუნნერ ურთიერთობა თიწკუმა . . . თეცალეფწკუმა ართო ოჭკუმალ ხოლო ვა [პჭკუმათ]“ (1 კორ. 5:11).

14. მუშ კეთება შეულებ ქრისტიანს ბიბლიათ გურაფილ სინდისით? (ქოძირით სურათ).

¹⁴ ნიშნენსო 1 კორინთელეფიშ 5:11-ის მოჩამილ მითითება, ნამდა გვალო ოკო დუვაიგნორათ თი პიროვნება, მიდგას კრება დატებაფუეს? იშენდოიშენ ვარ. მართალ რე, ჩქი თავისფალ დრო ოკო ვა გუვატარათ თეცალ კოჩწკუმა, მარა ბიბლიათ გურაფილ სინდისით შემლებუნა გინოპჭყვიდათ, კრებაშ შეხვალამაშა ქუდვაპატიჟათ დო ვარ თინა, მაგალთო, ჩქინ ნათესე ვარდა ხოლოს ვორდითინ ფერ პიროვნება. მარა, მუჭო ოკო მიფქცუათ კრებაშ შეხვალამაშ დროს? აიშახ გამარჯობას ხოლო ვა ურაგადუდით თინეფს, მით მეტო ვა რე იეჰოვაშ მოწმე, მარა ასე თე საკითხის ხოლო თითოულ ქრისტიან ბიბლიათ გურაფილ სინდისით გინმოჭყვიდუნს. ნამთინექ შილებე ისხუნუას, ნამდა გამარჯობა ქოუწუას დო გემუანო ქეშეხვადას თეცალ პიროვნებას. მარა მუშო ოკო რაგად, ჩქი ვართ ამბეშ ჩიებას დიპჭყანთ თიწკუმა დო ვართ შხვანერო მაღვენუნა ურთიერთობა.

15. მუნერ კატეგორიაშ შემცოდველეფშე მეურს ჩიება 2 იოანეშ 9—11-ის? (ქოძირით ჩარჩო „ართნერ ცოდაშე იჩიებუდესო იოანე დო პავლე?“).

¹⁵ მიდგაინქ შილებე გიკვირუას: ქო მარა, ბიბლიას ხომ ქოჭარ, ნამდა მით შემცოდველს გამარჯობას უწინს, თიშ უბადო საქმეეფიშ მონაწილეთ გინმირთუნია? (წეკითხით 2 იოანეშ 9—11). თე მუხლეფიშ კონტექსტშე იძირე, ნამდა თაქ ჩიება მეურს განდგომილეფშე დო თინეფშე, მით აქტიურო ოცადუნა, შხვეფ ხოლო გეიჸუნუან გლახაშ კეთებაშა (გამოცხ. 2:20). ათეშენ უხუცესეფ ვემიაკითხანა თიცალ პიროვნებას, ნამუთ აქტიურო ავრცელენს განდგომილეფიშ გურაფეფს ვარდა ოცად, შხვეფ ხოლო გეიჸუნუას გლახაშ კეთებაშა. მუშო ოკო რაგად, თეცალ პიროვნებაქ შილებე ქიმეხვადას, ნამდა არასწორო იქციებ დო ინარღას დაშებულ. მარა, ონდო თენა მოხვადუ, ჩქი ვართ გამარჯობას უწინთ თეცალეფს დო ვართ კრებაშ შეხვალამაშა დუვაპატიჟენთ.

ᲒᲔᲒᲛᲘᲠᲩᲥᲘᲜᲘᲗ ᲭᲧᲝᲚᲝᲤᲐ ᲘᲔᲰᲝᲕᲐᲪᲐᲚᲝ

16, 17. ა) მუ ოკო იეჰოვას, არძა შემცოდველქ გაკეთასინ? (ეზეკ. 18:32). ბ) მუჭო თანამშრომლენა უხუცესეფ იეჰოვაწკუმა?

¹⁶ მუ დიბგურეთ თე ჟურნალს მოჩამილ ხუთ სტატიაშე? გებგით, ნამდა იეჰოვას მითინიშ ღურა ვაკო (წეკითხით ეზეკიელიშ 18:32). ჩქინ მოჸოროფე მუმას ოკო, არძა შემცოდველქ გერიგას თის (2 კორ. 5:20). ზუსტას ათეშენ ოცადუდ იეჰოვა ირო, ქიმეხვარუკო მუშ შარასეჩილათირ მსახურეფს, ინარღესკო დაშებულ დო დართესკო თის. უხუცესეფს უღუნა პატი, ითანამშრომლან იეჰოვაწკუმა დო ირნერო ოცადუნა, ქიმეხვარან შემცოდველს, დაშებულიშ ნარღებაშა ქიმერთას (რომ. 2:4; 1 კორ. 3:9).

¹⁷ წერმიდგინით, მუშმადიდა ხიოლ რე ზეცას, მუჟამსით შემცოდველ ნარღენს დაშებულს! ჩქინ ზეციერ მუმას, იეჰოვას, გურ ეხარებ ირ დინაფილ შხურიშ კრებაშა დორთაშ დროს. მუჟამსით ფიფქრენთ, მუნერ მოჸოროფე დო მოჭყოლოფე რე იეჰოვა, ხოლო უმოსო მეჸოროფებუნა თინა (ლუკ. 1:78).