ᲝᲒᲣᲠᲐᲤᲐᲚ ᲡᲢᲐᲢᲘᲐ 30
ᲝᲑᲘᲠᲔᲨᲘ 36 დოფთხილუათ ჩქინ გური
მუს ბგურაფლენთ ისრაელიშ მეფეეფშე?
„კინ ქოძირუნთ განსხვავებას მართალ დო უბადო შქას, ღორონთიშ მსახურ დო თიშ შქას, მით თის ვამსახურ“ (ᲛᲐᲚ. 3:18).
ᲛᲘᲖᲐᲜ
ისრაელიშ მეფეეფიშ მაგალითეფიშ გარჩიება ქიმმეხვარებუნა, ქიგებგათ, მუ ოკო ვაკეთათ, ნამდა ღორონთიშ მოსაწონ ვორდათ.
1, 2. მუს მოგებაფუანა ბიბლია ისრაელიშ ნამთინე მეფეშ გურშენ?
ᲑᲘᲑᲚᲘᲐᲡ მოშინაფილ რე ჟარნეჩშე უმოს მეფე, მით ისრაელს მმართველენდეს.a თე წიგნშე ბრელ მუდგარენს ბგებულენთ თე ქომოლკათაშ გურშენ. მაგალთო, თის, ნამდა მინშა ჯგირ მეფეეფ ხოლო აშენდეს იეჰოვაშ თოლს. ქიგიფშინათ მეფე დავითიშ შემთხვევა. მუჭოთ მიჩქუნა, თიქ გათხილ ოსურწკუმა იმრუშ დო თიშ ქომონჯ ხოლო დაჸვილაფუ (2 სამ. 11:4, 14, 15). მარა, თეშ უმკუჯინუო, იეჰოვაშ თოლს თინა იშენით ჯგირ მეფე რდჷ, ნამდგაშეთ თქუ: „ჩქიმ მსახურ [დავით] მთელ გურით ფცენდჷ თაყვანს დო თის ორთუდ, მუთ სწორ რდჷ ჩქიმ თოლს“ (1 მეფ. 14:8).
2 ბიბლია თის ხოლო მოგებაფუანა, ნამდა თი მეფეეფ, მით იეჰოვაშ ართგურეფ ვა რდესჷ, კანკალეშა ჯგირ მუდგარენეფს ხოლო ორთუდეს. მაგალთო, რობოამიშ შემთხვევა გეპჭოფათ. ბიბლიას თიშ გურშენ ჭარჷ, ნამდა „უბადოთ იქციებუდ“ (2 მატ. 12:14). მარა თიქ ჯგირ მუდგარენეფ ხოლო აკეთ. მაგალთო, ქუდაჸუნ იეჰოვაშ ნარაგადის, ნამდა ვეგშართუკო ისრაელიშ ვით ტომიშ წინააღმდეგ დო ქიმეჩუკო უფლება, მუნეფიშ მეფე გეგშეგორესკო. თეწკუმა ართო, თე მეფექ მუშ სამეფოშ ქალაქეფ ხოლო გამანგარ, ნამდა ღორონთიშ ხალხ ნტერეფშე დოთხილუკო (1 მეფ. 12:21—24; 2 მატ. 11:5—12).
3. მუ კითხვა რჩქინდუ დო მუს გუვარჩიენთ თე სტატიას?
3 ჯგირ მეფეეფ ხოლო გლახას ქართუდეს დო გლახა მეფეეფ ხოლო მინშა ჯგირო ქიქციებუდეს-და, იმწკუმა მუშ მიხედვით გინოჭყვიდუნდ იეჰოვა, ქორდჷ დო ვარ მეფე ართგურ? თე კითხვაშ პასუხიშ გაგება ქიმმეხვარებუნა, ქობძირათ, ჩქი მუ ოკო ვაკეთათ, ნამდა ღორონთშო მოსაწონ ვორდათ. თე სტატიას გუვარჩიენთ სუმ მხარეს, ნამდგას იეჰოვა ოკვირუდ. პირველ, გურიშ მდგომარეობა, მაჟია, ნარღენდეს დო ვარ დაშებულს დო მასმა, ართგურო ქუკინენდეს დო ვარ ხუჯის ჭეშმარიტ თაყვანიშმცემლობას.
ᲗᲘᲜᲔᲤ ᲛᲗᲔᲚ ᲒᲣᲠᲘᲗ ᲠᲓᲔᲡᲷ ᲘᲔᲰᲝᲕᲐᲬᲙᲣᲛᲐ
4. მუჭოთ ბიბლიაშე ვორწყეთ, მუ რდჷ ართ-ართ განსხვავება ჯგირ დო გლახა მეფეეფ შქას?
4 თი მეფეეფ, მით ღორონთიშ მოსაწონეფ რდესჷ, მთელ გურითb ომსახურუდეს იეჰოვას. მაგალთო, მეფე იეჰოშაფატიშ გურშენ ბიბლიაშე ბგებულენთ, ნამდა თინა „მთელ გურით ომსახურუდ იეჰოვას“ (2 მატ. 22:9). იოშიაშ გურშენ პკითხულენთ: „თიშახ ვა ჸოფე თიცალ მეფე, მიდგაქ თეშნერო . . . მთელ გურით . . . დართჷ იეჰოვას“ (2 მეფ. 23:25). მუს იჩიებ ბიბლია თი მეფეეფშე, მით იეჰოვაშ თოლს ვა რდესჷ ართგურეფ? მაგალთო, სოლომონიშ გურშენ, ნამდგაქ მოხუცებულობას იეჰოვაშ მოწონა მიოდინუ, ღორონთიშ სიტყვას ჭარჷ, ნამდა „მთელ გურით ვამსახურუდ იეჰოვას“ (1 მეფ. 11:4). ხოლო ართ მეფეშ, აბიამიშ გურშენ, ნამუთ იეჰოვაშ ართგურ ვა რდჷ, ბიბლიას პკითხულენთ: „მთელ გურით ვა რდჷ იეჰოვაწკუმა“ (1 მეფ. 15:3).
5. მუს ნიშნენს იეჰოვაშ მთელ გურით მსახურება? გენწყით.
5 მუს ნიშნენს იეჰოვაშ მთელ გურით მსახურება? თინა, მით მთელ გურით ომსახურ იეჰოვას, თეს ხვალე თიშ გურშენ ვართჷ, ნამდა უჩქჷ, ოკეთებელ აფუნ. ღორონთიშ მსახურებაშა თეცალ პიროვნებას ძალიერ ჸოროფა დო პატიცემა აღძრენს. თეწკუმა ართო, თე ჸოროფას დო პატიცემას მთელ ცხოვრებას გიმირჩქინანს იეჰოვაშ მიმართ.
6. მუ ოკო ვაკეთათ, ნამდა მთელ გურით ვემსახურათ იეჰოვას? (იგავ. 4:23; მათ. 5:29, 30).
6 მუ მიმეხვარებუნა, ართგურ მეფეეფცალო ვა ვოდინუათ იეჰოვაშ ჸოროფა დო მთელ გურით ვემსახურათ თის? თეშო საჭირო რე, დუდ დიფთხილუათ თი ირფელშე, მუთ მეცილებუნა, ბოლოშა იეჰოვაშ ართგურეფქ ქუდოფსქიდათ. მაგალთო, ჯგირო ოკო ქიდვეკვირათ, მუნერ გართობას ქიშებგორუნთ, მიწკუმა მიღუნა ურთიერთობა დო ირო ფარაშ შიბა ხომ ვერთუ ჩქინ დუდის. მუჟამსით ვატყუაფუთ, ნამდა მუდგარენ ჭიე-ჭიეთ იეჰოვაშ ჸოროფას მიდინუანა, ხეთეშე ოკო იმოფქმედათ დო ჩეფთხინუათ თი ირფელ, მუთ ჩქინ გურს აკორთუნს (წეკითხით იგავეფიშ 4:23; მათეშ 5:29, 30).
7. მუშენ რე მნიშვნელოვან, დუდ დიფთხილუათ თიშე, მუთ იეჰოვაშ ჸოროფას მიმოდინაფუანა?
7 მუთუნს ოკო ვემეფჩათ ჩქინ გურიშ გორთუალაშ უფლება. ფრთხილას ვეპჸით-და, შილებე დუდ დებღორათ დო იფიფქრათ, ნამდა რახანს იეჰოვაშ მსახურებათ ვორეთ დაკავებულ, გლახა მუდგარენეფს ვეშიალებე, განკმოჸოთან თიშ ჸოროფას. თეს უჯგუშო ქინვანჭათინ, წერმიბდგინათ თეცალ სიტუაცია: მანგარ ჩხურ რე დო სასწაულ ბორია იწანწალ. ჸუდეშა მოულა დო ხეთეშე დაჩხირ ქუდარზით. თეცალ დროს ოთახიშ კარს გონჯამილო ქიდიტენდითო? ალბათ ვარ, მუშენდა ხეთეშე ჩხურ გამნოსოფუნს ჸუდეშა. მუშენ მიპჸუნით თე მაგალით? ფეჩქ ოტიბუანს ოთახისინ თეშ, სულიერ საზრდოშ მეღება ხოლო, თაშ ქოფთქუათინ, „ოტიბუანს“ იეჰოვაწკუმა ჩქინ ურთიერთობას. მარა ხვალე თენა ვა რე დასაბაღ. სატანაშ ქვეყნიერებას კარს ქუდუტენთ-და, თიშ „ჩხურ“ — ქვეყნიერებაშ აზროვნება — ხეთე გამნოსოფუნს, გარგილუანს ჩქინ გურს დო ვეშმალებენა მთელ გურით ვემსახურათ იეჰოვას (ეფეს. 2:2).
ᲗᲘᲜᲔᲤ ᲜᲐᲠᲦᲔᲜᲓᲔᲡ ᲓᲐᲨᲔᲑᲣᲚᲡ
8, 9. მუჭო მიქცუეს მეფე დავითიქ დო მეფე ხიზკიაქ, მუჟამსით ქოუწუეს, მუჭო უჯინედ იეჰოვა თინეფიშ საქციელს? (ქოძირით სურათ).
8 ჟიშე ფთქვითინ თეშ, მეფე დავითიქ მანგარ სერიოზულო დაშუ. მარა მუჟამსით წინასწარმეტყველ ნათანქ ქიმერთჷ თიშა, პირდაპირ ქოუწუ, მუ აფუდ დაშებულ დო მუჭო უჯინედ იეჰოვა თიშ საქციელს, თანდაბლურო მიქცუ დო მანგარო ინარღჷ, მუთ დაშუ (2 სამ. 12:13). დავითის ნათანიშ ოძირაფალო ვა დუჭყაფ წუხება დო ვართ თიშენ, ნამდა ვედესაჯუკო. 51-ა ფსალმუნს ინოჭარილ თიშ სიტყვეფშე ჯგირო იძირე, ნამდა თინა მართალო მთელ გურით ნარღენდჷ (ფსალმ. 51:3, 4, 17, ეპიგრაფ).
9 მეფე ხიზკიაქ ხოლო მანგარო დაშუ იეჰოვაშ წოხოლე. ბიბლიას პკითხულენთ: „[ხიზკიაქ] გეამაყ. ათეშენ გერისხჷ იეჰოვაქ თიშე დო იუდას დო იერუსალიმს მახორუეფშე“ (2 მატ. 32:25). მუქ გაამაყ ხიზკია? შილებე თიქ, ნამდა იეჰოვაქ მანგარ დიდ ქონება მეჩჷ, ასურელეფშა გიორჯგინაფუ ვარდა თიქ, ნამდა სასწაულით ოსქილიდუ ლახალაშე. შილებე ზუსტას სიამაყეშ გურშენ ოძირუ თიქ ბაბილონელეფს მთელ მუშ ქონება. წინასწარმეტყველ ესაიაქ თეშ გურშენ თის პირდაპირ უწუ, ნამდა მანგარო დაშუ დო იეჰოვა დასაჯენდ (2 მეფ. 20:12—18). მარა ხიზკიაქ, დავითცალო, თანდაბლობა გიმირჩქინ დო მთელ გურით ინარღჷ მუშ საქციელ (2 მატ. 32:26). მუჭოთ ბიბლიაშე ბგებულენთ, ბოლოს თინა იშენ ღორონთიშ მოსაწონ მეფე რდჷ დო „სწორას იქციებუდ . . . იეჰოვაშ თოლს“ (2 მეფ. 18:3).
მეფე დავითიქ დო მეფე ხიზკიაქ შეგონებაშ მეღებაშ უკულ მთელ გურით ინარღეს დაშებულ (ქოძირით აბზაცეფ 8, 9)
10. მუჭო მიქცუ ამაციაქ, მუჟამსით უწუეს, ნამდა არასწორო იქციებუდ?
10 თე ართგურ მეფეეფიშ გინაწონს, იუდაშ მეფე ამაცია სწორას იქციებუდ, „მარა მთელ გურით ვარ“ (2 მატ. 25:2). მუ დაშუ თიქ? თიშ უკულ, მუთ იეჰოვაქ ედომელეფშა გიორჯგინაფუ, ამაციაქ თინეფიშ ღორონთეფიშ თაყვანიშცემა ქიდიჭყჷ.c მუჟამსით იეჰოვაშ წინასწარმეტყველქ ქიმერთჷ დო უწუ, ნამდა არასწორო იქციებუდ, მეფექ შურო ვა მურჩქილუ დო გეგნორაჸ თინა (2 მატ. 25:14—16).
11. მაჟია კორინთელეფიშ 7:9, 11-იშ თანახმას, მუ ოკო ვაკეთათ იეჰოვაქ ქუმაპატუანინ? (ქოძირით სურათეფ).
11 მუს ბგურაფლენთ თე შემთხვევეფშე? მუჟამსით სერიოზულო ვაშენთ იეჰოვაშ წოხოლე, საჭირო რე, მთელ გურით ბნარღენდათ ჩქინ საქციელს დო ირნერო ვოცადუდათ, ვეგემეობრათ თინა. თიმწკუმა მუჭო ოკო მიფქცუათ, მუჟამსით უხუცესეფ თიცალ საკითხშე მარზენა რჩევას, ნამუთ იშენდოიშენ სერიოზულო ვემმორჩქუნა? მუთუნით ოკო ვეფიფქრათ, ნამდა იეჰოვას დო უხუცესეფს ვა უჸორთ ვარდა ჯიმალეფს აკიბირაფილ ვაფუთ. ხომ ქორშუნა, მინშა ისრაელიშ ჯგირ მეფეეფს ხოლო ოსაჭირუდეს რჩევა დო შეგონება?! (ებრ. 12:6). მუჟამსით რჩევას მარზენა, სუმ მუდგარენ ოკო ვაკეთათ: 1) მიბღათ თანდაბლურო, 2) დოფთირუათ, მუთ ოთირალ მაფუნა დო 3) მთელ გურით გუვაგრძელათ იეჰოვაშ მსახურება. დაშებულს მთელ გურით ქიბნარღენთ-და, იეჰოვა აუცილებერო ქუმაპატიენა (წეკითხით 2 კორინთელეფიშ 7:9, 11).
მუჟამსით რჩევას მარზენა: 1) ოკო მიბღათ თანდაბლურო, 2) დოფთირუათ, მუთ ოთირალ მაფუნა დო 3) მთელ გურით გუვაგრძელათ იეჰოვაშ მსახურება (ქოძირით აბზაც 11)f
ᲗᲘᲜᲔᲤ ᲐᲠᲗᲒᲣᲠᲝ ᲣᲙᲘᲜᲔᲜᲓᲔᲡ ᲮᲣᲯᲘᲡ ᲭᲔᲨᲛᲐᲠᲘᲢ ᲗᲐᲧᲕᲐᲜᲘᲨᲛᲪᲔᲛᲚᲝᲑᲐᲡ
12. მუს ორთუდეს იეჰოვაშ ართგურ მეფეეფ?
12 თი მეფეეფ, მით იეჰოვაშ თოლს ართგურეფ რდესჷ, ჭეშმარიტ თაყვანიშმცემლობას უკინენდეს ხუჯის დო ხალხის ხოლო თეს ოგურუანდეს. მართალ რე, მუჭოთ ბძირით, კანკალეშა შეცდომეფ ხოლო მალედეს, მარა მუთ მთავარ რე, თინეფ ხვალე იეჰოვას ომსახურუდეს დო ირნერო ოცადუდეს, კერპთაყვანიშმცემლობას ვა გაფალაფუესკო.d
13. მუშენ რდჷ ახაბ გლახა მეფე იეჰოვაშ თოლს?
13 მუჭო იქციებუდეს იეჰოვაშ თოლს გლახა მეფეეფ? ვერაგადე, ნამდა თინეფ ირფელს გლახას ორთუდეს. თიცალ უბადო მეფექ ხოლო, მუნერით ახაბ რდჷ, ართ მომენტის თანდაბლობა გიმირჩქინ დო მანგარო გენიცად, ნამდა ნაბოთ მუშ გურშენ უსამართლოთ დოჸვილეს (1 მეფ. 21:27—29). თეწკუმა ართო, თიქ ქალაქეფ აშენ დო ბრელ ჩხუპ მიგჷ ისრაელეფიშ სახელით (1 მეფ. 20:21, 29; 22:39). მარა თე ჯგირ საქმეეფს მუთუნ ფას ვა უღუდ, მუშენდა მუშ გლახა ოსურს, იზებელს, დოჸუნდჷ დო ტყურა ღორონთეფს ომსახურუდ. თის დღას ვა უნარღებ თენა დო ვამკორთე ღორონთჸურე (1 მეფ. 21:25, 26).
14. ა) მუშენ ვა რდჷ რობოამ ღორონთიშ თოლს ართგურ მეფე? ბ) მუ რდჷ მთავარ, მუდგას თი მეფეეფიშ უმენტაშ აშენდჷ, მით ღორონთიშ ართგურ ვა რდჷ?
14 გუვარჩუათ ხოლო ართ მეფეშ შემთხვევა, ნამუთ ვა რდჷ იეჰოვაშ ართგურ. თენა რე რობოამ. მუჭოთ ჟიშე მიფშინეთ, თიქ ბრელ ჯგირ საქმე აკეთ მუშ მმართველობაშ დროს. მარა მუჟამსით „გემანგარ თიშ მეფობაქ“, მიოტუ იეჰოვაშ კანონიშ მეჸუნა დო ტყურა ღორონთეფიშ მსახურება ქიდიჭყჷ (2 მატ. 12:1). თეშ უკულ თინა მინ ჭეშმარიტ ღორონთის ართუდ დო მინ ტყურა ღორონთეფიშ მსახურებას აგრძელენდჷ (1 მეფ. 14:21—24). ხვალე რობოამ დო ახაბ ვარ, ისრაელიშ შხვა ბრელ მეფე ხოლო იქციებუდ თაშ. მუჭოთ ვორწყეთ, თი მეფეეფიშ უმენტაშ, მით ღორონთიშ თოლს ვა რდესჷ ართგურეფ, ტყურა ღორონთეფს ომსახურუდეს დო შხვეფს ხოლო თეს ელუჩანდეს. არგამა რე, ჭეშმარიტ თაყვანიშმცემლობაშ ხუჯიშ დაკინება რდჷ მთავარ, მუდგაშ მიხედვით იეჰოვა გინოჭყვიდუნდჷ, მეფე ჯგირ რდჷ თიშ თოლს დოვარ გლახა.
15. მუშენ რე იეჰოვაშო მნიშვნელოვან ჭეშმარიტ თაყვანიშმცემლობაშ საკითხ?
15 მუშენ რდჷ ჭეშმარიტ თაყვანიშმცემლობაშ საკითხ თეცალ მნიშვნელოვან იეჰოვაშო თიშ გინოჭყვიდუაშ დროს, ქორდჷ დოვარ მეფე ართგურ? ართ თიშენ, ნამდა ზუსტას მეფეშ მოვალეობაშა მიშეშ, ხალხიქ ჭეშმარიტ თაყვანიშმცემლობას ვეიოჩირთუკო. მეფე ტყურა ღორონთეფს ქემსახურებუდ-და, ხალხ ხოლო თეს გაკეთენდჷ. თეწკუმა ართო, ტყურა ღორონთეფიშ მსახურებას შხვა ბრელ სერიოზულ ცოდაშა ხოლო მეჸუნდჷ ხალხ დო ღორონთის მოჩილათირ ადამიანეფ ართიანს მანგარ გლახათ ოქცუდეს (ოს. 4:1, 2). მუთ არძაშ უმოს მთავარ რე, ქოთ მეფეეფ დო ქოთ ხალხ იეჰოვაშ მეძღვინელ მსახურეფ რდესჷ. ათეშენ რე, ნამდა ჭეშმარიტ ღორონთიშ ღალატის დო ტყურა ღორონთეფიშ თაყვანიშცემაშ დოჭყაფას ბიბლია მრუშობაწკუმა ადარენს (იერ. 3:8, 9). თინა, მით მრუშენს ღალატენს დო გურს უწყუნუანს მეუღლეს, ადამიანს, ნამდგაშ ართგურ არძაშ უმოსო ოკო რდასჷ. თეშნერო, ღორონთშა მეძღვინელ მსახურ, ნამუთ ტყურა ღორონთეფიშ თაყვანიშცემას ღებულენს მონაწილებას, ღალატენს დო გურს უწყუნუანს იეჰოვას, პიროვნებას, ნამდგაშ ართგურ არძაშ უმოსო ოკო რდასჷe (კან. 4:23, 24).
16. მუთ გენესხვავებ იეჰოვაშ თოლს მართალ უბადოშე?
16 მუს ბგურაფლენთ თავრეშე? მუშო ოკო რაგად, ოკო ვემკვანჭათ მუთუნს, მუთ ტყურა თაყვანიშმცემლობაწკუმა რე დაკავშირებულ. მარა თეწკუმა ართო, მნიშვნელოვან რე, წმინდა თაყვანიშმცემლობას უკინენდათ ხუჯის დო იეჰოვაშ მსახურებათ ვორდათ დაკავებულ. წინასწარმეტყველ მალაქიაშ სიტყვეფშე ჯგირო იძირე, მუნერ ადამიან რე იეჰოვაშ თოლს ჯგირ დო მუნერ — გლახა. თიქ თქუ: „კინ ქოძირუნთ განსხვავებას მართალ დო უბადო შქას, ღორონთიშ მსახურ დო თიშ შქას, მით თის ვამსახურ“ (მალ. 3:18). ჩქი მოკონა, იეჰოვაშ თოლს მართალეფ ვორდათ. ათეშენ, მუთუნს, ვართ ჩქინ არასრულყოფილებას დო ვართ ჩქინ შეცდომეფს, ოკო ვემეფჩათ საშვალება, განკმოჸოთან ღორონთიშ მსახურებას, მუშენდა იეჰოვაშ მსახურებაშე ვარიაშ რაგად სერიოზულ ცოდა რე.
17. მუშენ ოკო ვორდათ ფრთხილას მომავალ მეუღლეშ გიშაგორუაშ დროს?
17 დაქორწინებას ქოფიქრენქ-და, მალაქიაშ სიტყვეფ მიგეხვარებ, სწორას გეგშაგორე მომავალ მეუღლე. დეფიქრ: მიდგარენ შილებე გვალო ჯგირ პიროვნება რდასჷ დო ჯგირ თვისებეფ უღუდას, მარა ჭეშმარიტ ღორონთის ვამსახურუნ-და, ქირაგადენო, ნამდა იეჰოვაშ თოლს მართალ კოჩიშ სახელ უღჷ? (2 კორ. 6:14). თეცალ ადამიანშა დექორწინებუქ-და, მუჭო ფიქრენქ, ქიმგეხვარებუნო თინა, ვადინუე იეჰოვაშ ართგურობა? ქიგიშინ სოლომონიშ შემთხვევა: თიშ უცხოტომელ ოსურეფს ჯგირ თვისებეფ ხოლო აღვენუდეს, მარა თინეფ ვამსახურუდეს იეჰოვას დო ჭიე-ჭიეთ სოლომონს ხოლო ქუდაჭყაფუეს ტყურა ღორონთეფიშ მსახურება (1 მეფ. 11:1, 4).
18. მუ ოკო დაგურუან მშობლეფქ სქუალეფს?
18 მშობლეფ, ისრაელიშ მეფეეფიშ მაგალითეფიშ გიმორნაფა მიგეხვარებუნა, სქუალეფს იეჰოვაშ მსახურებაშ სურვილ გურჩქინათ. ქაძირეთ თქვან სქუალეფს, ნამდა იეჰოვა ხვალე თი მეფეეფს მირჩქინანდჷ მართალეფო, მით ჭეშმარიტ თაყვანიშმცემლობას უკინენდეს ხუჯის დო ხალხის ხოლო თეს ოგურუანდეს. ქუდაგურეთ დო თქვან მაგალითით ხოლო ქაძირეთ, ნამდა ცხოვრებას შხვა არძა საკითხშე უმოს მნიშვნელოვან თიცალ საქმეეფიშ კეთება რე, მუთ იეჰოვაწკუმა მაახლოვენა. მაგალთო, მუნერით რე, ბიბლიაშ კითხირ, შეხვალამეფშა დასწრება დო მსახურება (მათ. 6:33). თაშ ვემიქციებუთ-და, თინეფს პირად ურთიერთობა ვაღვენუნა იეჰოვაწკუმა დო ხვალე თქვან ხათრით ომსახურუდან იჸი თის. შედეგო, შილებე თინეფიშ ცხოვრებას შხვა მუდგარენქ ქიდეკინას პირველ ადგილ ვარდა ართ დღასით გვალო მიოტუან იეჰოვაშ თაყვანიშცემა.
19. ქეშულებუნო იეჰოვაშა დორთა თის, მიდგაქ მიოტუ თიშ მსახურება? (ქოძირით ჩარჩო „შეილებ დართე იეჰოვას!“).
19 მუშ რაგად შილებე თიშე, მიდგაქ მიოტუ იეჰოვაშ მსახურება? დღას ვეშიალებენო კინ იეჰოვაშ მეგობარ რდასჷ? მუშო ოკო რაგად, ქო. დაშებულს მთელ გურით ქინარღენს-და, შეიალებე დართას ღორონთის დო გაგრძელას თიშ მსახურება. თეშო შილებე საჭიროქ იჸუას, გეგნაბიჯგუას სიამაყეს დო მოხვარა მიღას კრებაშ უხუცესეფშე (იაკ. 5:14). თეშ კეთება მუდგა რთულ ვა რდასინ, იეჰოვაწკუმა მეგობრობაშ დორთინაფა ირფელშა ღირჷ.
20. ართგურ მეფეეფცალ ქიპჸით-და, მუს თქუანს იეჰოვა ჩქინდე?
20 მუ დიბგურეთ ისრაელიშ მეფეეფშე? იეჰოვას მთელ გურით ქივემსახურებუთ-და, თინა ჩქი ხოლო ისრაელიშ მეფეეფცალ ართგურეფო მემრჩქინანა. მორთ ირიათო დიბგურუათ ჩქინ შეცდომეფშე, მთელ გურით იბნარღათ დაშებულ დო დოფთირუათ, მუთ ოთირალ მაფუნა. დღას ვაგმოჭყორდან, მუსხით მნიშვნელოვან რე, ხუჯ ქუდუკინათ ჭეშმარიტ თაყვანიშმცემლობას დო ვემსახურათ ხვალე ართ ჭეშმარიტ ღორონთის, იეჰოვას. ღორონთიშ ართგურ ქიჸით-და, იეჰოვას თქვანდე ხოლო არაგადე, ნამდა სწორას იქციებუთ თიშ თოლს.
ᲝᲑᲘᲠᲔᲨᲘ 45 ჩქიმ გურიშ აზრეფი
a თე სტატიას მოშინაფილ „ისრაელიშ მეფეეფშა“ მიშურს არძა მეფე, მით ღორონთიშ ხალხშა მმართველენდჷ, იჸუაფუდუო თენა იუდაშ ჟირტომიან სამეფოს, ისრაელიშ ვითტომიან სამეფოს დოვარ ისრაელიშ ვითოჟირხოლო ტომს.
b ᲒᲐᲜᲛᲐᲠᲢᲔᲑᲐ: ბიბლია სიტყვა „გურს“ ხშირას ირინუანს ადამიანიშ შინაგან პიროვნებაშ ეიოჭარალო, მუდგაშა მიშურს სურვილეფ, ფიქრეფ, ხასიათ, განწყობა, უნარეფ, მოტივეფ დო მიზნეფ.
c მუჭოთ იძირე, წარმართ ერეფიშ მეფეეფს უღუდეს თეცალ წეს, ნამდა ნამდგა ერს გიორჯგინანდესინ, თინეფიშ ღორონთეფიშ თაყვანიშცემას იჭყანდეს.
d ასაქ სერიოზულ შეცდომეფ დუშვჷ (2 მატ. 16:7, 10). მარა ბიბლია თის ჯგირ მეფეთ მიშინუანს. მუჭოთ იძირე, თიქ დუდშე ველერჩქილუ წინასწარმეტყველიშ შეგონება, მარა უკულ ინარღჷ მუშ საქციელ. საბოლათ, ასაშ ჯგირ თვისებეფქ გეგნოწონ თიშ შეცდომეფ. თიქ ხოლო ოკო ირაგადუას, ნამდა ასა ხვალე იეჰოვას ცენდჷ თაყვანს დო ირნერო ოცადუდ, ქიანას კერპთაყვანიშმცემლობას ვა გაფალაფუკო (1 მეფ. 15:11—13; 2 მატ. 14:2—5).
e მოსეშ კანონს მოჩამილ პირველ ჟირ მცნებაშე, სოდეთ ჭარჷ, ნამდა იეჰოვაშ მეტ მითინს დო მუთუნს ოკო ვა ფცათჷ თაყვან, ჯგირო იძირე, მუსხით მნიშვნელოვან რე ჭეშმარიტ თაყვანიშმცემლობა იეჰოვაშო (გამ. 20:1—6).
f ᲡᲣᲠᲐᲗᲘᲨ ᲔᲭᲐᲠᲣᲐ: ახალგაზრდა უხუცეს რჩევას არზენს ართ ჯიმას, ნამდგას შუმაშ პრობლემა უღჷ. თე ჯიმა თანდაბლურო ღებულენს რჩევას, თირანს, მუთ ოთირალ აფჷ დო ართგურო აგრძელენს იეჰოვაშ მსახურებას.