ირიათო კურცხას რდათჷ, ნამდა ვემეჩირთათ

1, 2. ა) მუ გაფრთხილება მეჩჷ იესოქ მუშ მოწაფეეფᲡ? ბ) მუშენ ორჯგინ მოწაფეეფს ადამიანურ სისუსტექ? (ქოძირით სურათეფ).

„ᲒᲣᲠ მონდომებულ რე, მარა სხეულს ძალა ვა უბაღ“a (მათ. 26:41ბ). იესოშ თე სიტყვეფშე იძირე, ნამდა თის ჯგირო არჩქილედ, მუნერ რე არასრულყოფილ კოჩ. მარა თე სიტყვეფს მნიშვნელოვან გაფრთხილება ხოლო ინოძ: მუთუნით ოკო ვამღუდან ჩქინ დუდიშ ნაბეტან იმენდ. თექ ჯგირო ქიძირ იესოშ მოწაფეეფიშ შემთხვევაშე. იესო თე სიტყვეფს უწინდუკონ თეიშახ გვალო მუსხირენ საათით ადრე მოწაფეეფქ თის პირობა მეჩეს, ნამდა, მუდგაქ ვა მოხვადუკონ, ვემიოტენდეს (მათ. 26:35). მუშო ოკო რაგად, თენა თქუესინ თიმწკუმა მართალო თაშ ულამუდეს, მარა თინეფს ვარჩქილედეს, მუჭო გაუჭირდუდეს რთულ სიტუაციაშ დროს მუნეფიშ სიტყვაშ შესრულება. ათეშენ, იესოქ თინეფ გაფრთხილ: „კურცხას რდათჷ დო ირიათო ილოცით, ნამდა ვემეჩირთათ“ (მათ. 26:41ა).

² მუ გლახა რე, ნამდა მოწაფეეფს ვაკეთებუეს თიქ, მუთ იესოქ უწუ. ქორშუნანო, მუჭო მიქცუეს თინეფქ, მუჟამსით იესო ჭოფეს? თიწკუმა დოსქიდეს დო ბოლოშახ ელუდირთესო დოვარ შიშიქ ორჯგინ თინეფს დო ინტეს? კურცხას ვა რდესინ თიშენ, მოწაფეეფქ ზუსტას თინა გაკეთეს, მუდგაშენ გვალო ჭიჭე ხანიშ წოხოლე დუდის დვანდეს, მუთუნით ვა ვაკეთენთია — თინეფქ მიოტუეს იესო (მათ. 26:56).

3. ა) იეჰოვაშ ართგურეფქ ქუდოფსქიდათინ, მუშენ ოკო ვამღუდან ჩქინ დუდშა ნაბეტან იმენდ? ბ) მუს გუვარჩიენთ თე სტატიას?

³ არასრულყოფილ ადამიანს მუშ დუდიშ იმენდ ვა დაკინებე. მართალ რე, გურით მოკონა, მუთუნ თიცალ ვა ვაკეთათ, მუდგათ იეჰოვას ვოწყინუანთ, მარა არასრულყოფილებაშ გურშენ მიჭირა, ქუგურზათ ცდუნებას (რომ. 5:12; 7:21—23). ათეშენ, კურცხას ვეპჸით-და, შურო აზრშა ვამმართინენან თეშ შილებე ქიგებდირთათ ცდუნებაშ წოხოლე. იეჰოვაშ დო თიშ სქუაშ ართგურეფქ ქუდოფსქიდათინ, იესოშ თე რჩევა ოკო გეფთვალისწინათ დო კურცხას ვორდათ. ზუსტას თეშ კეთებას მიმეხვარებუნა თე სტატია. დუდშე გუვარჩიენთ, მუ სიტუაციეფს ოკო ვორდათ განსაკუთრებულო კურცხას. უკულ ქობძირუნთ, მუჭო შემლებუნა ფთხილუათ ჩქინ დუდ ცდუნებაშე დო ბოლოს თიშე ქიფჩიებუთ, მუჭო შემლებუნა ვა ვოდინუათ სიკურცხა.

ᲜᲐᲛ ᲡᲘᲢᲣᲐᲪᲘᲔᲤᲡ ᲝᲙᲝ ᲕᲝᲠᲓᲐᲗ ᲙᲣᲠᲪᲮᲐᲡ?

4, 5. მუშენ ოკო იფთხილუათ დუდ ჭიჭე ცოდეფშე ხოლო?

⁴ თიცალ ცოდეფს ხოლო, ნამუთ ართ მეჯინათ ჭიჭეთ ირწყებე, შეულებ გილამლუან იეჰოვაწკუმა ურთიერთობა. თეწკუმა ართო, თინეფქ შილებე უმოს სერიოზულ ცოდეფშა ქიმემიჸუნან.

⁵ მართალ რე, მინშა არძა გებდირთუთ ცდუნებაშ წოხოლე, მარა არძას შხვადოშხვა სისუსტე მიღუნა. მიდგარენს შილებე თიცალ სერიოზულ ცოდაშ ცდუნებაშა აფუდას გარზებელ, მუნერით რე, სექსუალურ უზნეობა. მიდგარენს შილებე უწმინდურ საქციელშე უჭირდას დუდიშ ჭოფუა, მუნერით რე, მასტურბაცია ვარდა პორნოგრაფიაშ ჯინა. ნამთინეს ხოლო შილებე კოჩიშ შიშშა, სიამაყეშა, სიფიცხეშა ვარდა შხვა მუდგაინშა აფუდას გარზებელ. თენა ოძირანს, ნამდა მართალ რე, მუთ იაკობიქ ღორონთიშ შთაგონებათ ჭარჷ: „თითოულს გიმოცადუნს მუშ სურვილ, ნამუთ ეიჸუნუანს დო ოჩილითუანს თის“ (იაკ. 1:14).

6. მუშე ოკო ვა პწკურათ თოლ?

⁶ ქუგაფუნო ნაფიქრებ, სქანო მუ რე არძაშ უმოს დიდ სისუსტე, ნამდგაწკუმა ბრძოლა გიხვადუ? მუთუნით ოკო ვედებღორათ დუდ დო ჩქინ სისუსტეეფშე თოლ ვა პწკურათ ვარდა ვეფიფქრათ, ნამდა თიცალ მანგარეფ ვორეთ, ჩქინ სისუსტეს დღას ვემვაჩილითეთ (1 იოან. 1:8). გალატელეფშა მეჭარილ პავლეშ სიტყვეფშე იძირე, ნამდა კურცხას ვეჸინ-და, სულიერო მოწიფულ ადამიანქ ხოლო შილებე გეიაჸუნას ცდუნებას (გალ. 6:1). ათეშენ, ოკო გოუტირხათ ჩქინ დუდის დო მიჩქუდან, მუ რე ჩქინ სისუსტე (2 კორ. 13:5).

7. ნამ მხარეეფს ოკო ვორდათ არძაშ უმოს კურცხას? ქიმიჸუნით მაგალით.

⁷ მუ ოკო აკეთე, მუჟამსით გიჩქჷ, მუ რე სქან სისუსტე? მამზად დო უმოსო გამანგარ სქან დუდ, ნამდა ქუგურზე ცდუნებას. მაგალთო, ჯვეშო ქალაქიშ არძაშ უმოს სუსტ წერტილ კარმინოლ რდჷ. ათეშენ, არძაშ უმოსო თის თხილანდეს დო ირიათო ყარულენდეს. თეშნერო, ჩქი ხოლო არძაშ უმოსო თი მხარეეფს ოკო ვორდათ კურცხას, ნამუთ ჩქინო სისუსტე რე, ნამდა ცდუნებაშ წოხოლე ქიგებდირთუთინ, ქეშმალებუან გარზებაქ (1 კორ. 9:27).

ᲛᲣᲭᲝ ᲘᲤᲗᲮᲘᲚᲣᲐᲗ ᲓᲣᲓ ᲪᲓᲣᲜᲔᲑᲐᲨᲔ ᲓᲝ ᲪᲝᲓᲐᲨᲔ

8, 9. მუშ კეთება შეულებუდ იგავეფიშ მა-7 დუდის მოშინაფილ ახალგაზრდას, ნამდა სერიოზულ ცოდაშა ვემიჸუნუკო მუშ დუდ? (იგავ. 7:8, 9, 13, 14, 21).

⁸ მუჭო შემლებუნა დუდიშ თხილუა? თეშ გაგებას იგავეფიშ მა-7 დუდის მოშინაფილ ახალგაზრდაშ შემთხვევაშ გარჩიება ქიმმეხვარებუნა. მუჭოთ მიჩქუნა, თიქ უზნეობა ჩედინ გარყვნილ ოსურწკუმა. რახანს 22-ა მუხლის ჭარჷ, ახალგაზრდაქ თე ოსურს „ხეთეშე“ ქეკაჸუნუა, შილებე იფიფქრათ, ნამდა თე ირფელქ თაშ უცფას მოხვად. მარა წოხოლეიან მუხლეფს ქიდვეკვირებუთ-და, ქობძირუნთ, ნამდა თიქ თეიშახ ხოლო დაუშვჷ მუსხირენ შეცდომა, მუდგაქ ჭიე-ჭიეთ ქიმიჸუნ თე სერიოზულ ცოდაშა.

⁹ მუს ჩირთჷ თე ახალგაზრდაქ? დიო თიქ ონჯუას „თი ოსურიშ ქუჩაშა მიშურთუ“. უკულ „თიშ ჸუდეჸურე მიდართჷ“ (წეკითხით იგავეფიშ 7:8, 9). მუჟამსით თე ოსურ ქოძირ, დუდ ვაურიდუ დო უფლება ქიმეჩ თის, ქაჯუნუკო. თეშ უკულ ქოურჩქილ თის, მუჟამსით ეჩიებუდ, მშვიდობაშ მსხვერპლ შეპწირია. შილებე თე ოსურ თეს თიშენ ურაგადუდ, ნამდა თე ბოშის ოფიქრებაფუკო, მა გლახა ადამიან ვა ვორექია (წეკითხით იგავეფიშ 7:13, 14, 21). თე ახალგაზრდა დროულო გოკურცხინაფედუკო დო თეზმა საფრთხეშე თოლ ვა უწკურუდუკონ, დუდის დითხილანდ ცდუნებაშე დო სერიოზულ ცოდაშა ვემიშ.

10. იგავეფს მოშინაფილ ახალგაზრდაცალო, მუქ შილებე ქრისტიანს აღოლას?

¹⁰ ღორონთიშ ნებისმიერ მსახურს შილებე აღოლას თიქ, მუდგაქ სოლომონიშ იგავს მოშინაფილ ახალგაზრდას აღოლ. შილებე მიდგაინქ სერიოზულ ცოდა ჩედინას დო უკულ იფიქრას, ნამდა თექ „ხეთეშე“ მოხვად; ველუდუნ თეშ თიცალ ცდუნებაშ წოხოლე ქიგედირთჷ, ნამდა დუდიქ ვაჭოფ დო „ქაღოლ თექ“. მარა გურს ჯგირო ქუგუჩანს-და, ალბათ ქიმეხვადუ, ნამდა თენა ართუცფას ვა მოხვალამე. თინა უკვე უშვენდუკონ იჸიდ შეცდომეფს, მუდგაქ ჭიე-ჭიეთ სერიოზულ ცოდაშა ქიმიჸუნ. მაგალთო, შილებე თის გლახა საზოგადოებაწკუმა უღუდ ურთიერთობა, გლახა გართობას გიშეგორუნდჷ დო ხშირას თიცალ ადგილეფშა გილეშ ვარდა თიცალ ვებგვერდეფშა მიშეშ, ნამდგას ქრისტიან დუდის ოკო ურიდანდას. ვარდა ხოლო შილებე მეტებულ აფუდ ბიბლიაშ კითხირ, ლოცვა, კრებაშა გილულა დო მსახურება. თაშ ნამდა, მუჭოთ წესინ, თეცალ ამბე „ართუცფას“ ვა ხვადუ. იგავეფს მოშინაფილ ახალგაზრდას აღოლუნ თეშ, სერიოზულ ცოდას ხშირას აწოჸუნს მუდგარენ შეცდომეფ.

11. მუ ოკო ვაკეთათ, ნამდა ცოდაშე დიფთხილუათ დუდ?

¹¹ მუს ბგურაფლენთ თე იგავშე? ხვალე ცოდაშე ვარინ, თი შეცდომეფშე ხოლო ოკო დიფთხილუათ დუდ, ნამდგაქ შილებე თიშა მემიჸონან. იგავიშ თებაშ უკულ სოლომონს ხოლო ზუსტას თე დასკვნა გიშუღ. გარყვნილ ოსურიშ გურშენ თინა იჩიებ: „ვეგლართა თიშ ბილიკეფს“ (იგავ. 7:25). წიგნ „იგავეფს“ გარყვნილ ოსურიშ გურშენ თინა თეცალ მუდგარენს ხოლო იჩიებ: „დუდ შორს დეკინ თიშე დო თიშ ჸუდეშ მინაულარს ვემკანჭა“ (იგავ. 5:3, 8). ცოდაშე დუდიშ თხილუა ქუმოკონან-და, თიშა მიმაჸუნაფალ სიტუაციეფს ხოლო ოკო მუთხილუათ.b თეშა შილებე მიშეშას თიცალ მუდგარენეფშე ვარიაშ რაგად ხოლო, მუთ ქრისტიანეფშო ვა რე აკრძალულ, მარა მიჩქუნა, ნამდა ჩქი ქიგმორინუანა ცდუნებაშ წოხოლე (მათ. 5:29, 30).

12. მუ პირობა მეჩჷ იობიქ მუშ დუდის დო მუჭო მეხვარებუდ თინა, ცდუნებაშე დითხილუკო დუდ? (იობ. 31:1).

¹² ცოდაშა მიმაჸუნაფალ სიტუაციეფს დუდ გეუჩილითუათინ, თინა ხოლო რე საჭირო, ნამდა მტკიცას მაფუდან გინოჭყვიდილ სწორას მოქციება. ზუსტას თენა აკეთ იობიქ. თიქ პირობა მეჩჷ მუშ თოლეფს, ნამდა „ძღაბის შხვა თოლით“ ვემკაჯინედ (წეკითხით იობიშ 31:1). მუშ დუდწკუმა დოდვალირ თე პირობაშ შესრულება მეხვარებუდ იობის, უზნეობაშა ვემიჸუნუკო მუშ დუდ. ჩქი ხოლო იობცალო გინოჭყვიდილ ოკო მაფუდან, დუდ ეუჩილითუათ ირფელს, მუთ ცდუნებაშა ქიმემიჸუნანა.

13. მუშენ ოკო გუვაკონტროლათ ჩქინ ფიქრეფ? (ქოძირით სურათეფ).

¹³ მნიშვნელოვან რე ფიქრეფიშ გაკონტროლება ხოლო (გამ. 20:17). ნამთინე იჩიებ: გლახაშ ფიქრ დო წარმოდგენა მუ პრობლემა რე, სინამდვილეს ხომ ვართუქ. მარა თენა ვა რე სწორ აზრ. მუჟამსით ადამიან ფიქრენს მუდგაინ გლახაშე, უმოსო ოკო, სინამდვილეს გაკეთას თინა. თეშნერო თინა ძალით გირინუანს დუდის ცდუნებაშ წოხოლე, ნამდგაშა ობრძოლებერ აჸი. მართალ რე, გასაკვირ ვა რე, კოჩის გლახა აზრეფქ მოურთას, მარა მთავარ რე, ხეთეშე ჩეთხინუას დო ჯგირ აზრეფით დოთირუას. თაშ ქიმიფქციებუთ-და, გლახა ფიქრეფს ვემეფჩანთ საშვალებას, ძალიერ სურვილო გინირთას, ნამდგაშ ჭოფუა გამჭირდუნა დო შილებე სერიოზულ ცოდაშა ქიმემიჸონან (ფილ. 4:8; კოლ. 3:2; იაკ. 1:13—15).

14. ხოლო მუ მიმეხვარებუნა, დუდ დიფთხილუათ ცდუნებაშე?

¹⁴ ხოლო მუ ოკო ვაკეთათ, ნამდა დუდ დიფთხილუათ ცდუნებაშე? ბოლოშა ოკო ვორდათ დარწმუნებულ, ნამდა იეჰოვაშ კანონეფიშ მორჩილება ირო ჯგირ შედეგეფს მომღანა. მართალ რე, მინშა შილებე მიჭირდან, ჩქინ ფიქრეფ დო სურვილეფ იეჰოვაშ მოსაწონ რდასჷ, მარა თი სიმშვიდე დო კმაყოფილება, მუთ ღორონთიშ კანონიშ მორჩილებას მოჸუნს, მართალო ღირჷ მონდომაშა.

15. მუჭო დოფთხილანა ჯგირიშ კეთებაშ სურვილ ცდუნებაშე?

¹⁵ მნიშვნელოვან რე, გუვავითარათ ჯგირიშ კეთებაშ სურვილ. გლახა ქობჯოგუნა დო ჯგირ ქომიჸორან-და, უმოსო მოკოდან იჸი, სწორას მიფქცუათ დო დუდ ეუჩილითუათ ცოდაშა მიმაჸუნაფალ სიტუაციეფს (ამოს. 5:15). ჯგირიშ კეთებაშ სურვილ მიღუნან თიმწკუმა, თიცალ ცდუნებეფშა გერჯგინა ხოლო უმოს ადვილ რე, ნამდგაშ წოხოლე უცფას, ვეველუთინ თეშ გებდირთუთ.

16. მუჭო ფთხილანა სულიერ საქმეეფ ცდუნებაშე? (ქოძირით სურათეფ).

¹⁶ მუ მიმეხვარებუნა ჯგირიშ კეთებაშ სურვილიშ გავითარებას? სულიერ საქმეეფს მუთ შილებენ აქტიურ მონაწილება. მუჟამსით კრებას ვარდა მსახურებას ვორეთ, ნაკლებო მირჩქინდუნა გლახაშ კეთებაშ სურვილ. თეშ მანგიორო, უმოსო იეჰოვაშ გურიშ გახარება მოკონა (მათ. 28:19, 20; ებრ. 10:24, 25). ღორონთიშ სიტყვაშ კითხირ, გიმორკვიება დო თიშე ფიქრ ხოლო უმოსო მიჸოროფუანა თის, მუთ ჯგირ რე დო უმოსო მიჯოგუანა გლახას (იეს. 1:8; ფსალმ. 1:2, 3; 119:97, 101). ქიგიფშინათ იესოშ ნარაგად ხოლო. თიქ მუშ მოწაფეეფს უწუ: „ირიათო ილოცით, ნამდა ვემეჩირთათ“ (მათ. 26:41). თაშ რე, მუთ უმოსო მიღუნა ჩქინ ზეციერ მუმაწკუმა ურთიერთობა ლოცვათ, საშვალებას ვარზენთ თის, ქიმმეხვარან დო იმამნგარენთ სურვილს, ნამდა გურ გუხარათ თის (იაკ. 4:8).

ᲓᲦᲐᲡ ᲕᲐᲓᲘᲜᲣᲐᲗ ᲡᲘᲙᲣᲠᲪᲮᲐ

17. მუ სისუსტეს ობრძოლუდ პეტრე?

¹⁷ შილებე ჩქინ ნამთინე სისუსტეს ბოლოშა გივორჯგინათ დო ჩეფთხინუათ, მარა ნამთინეშა ბრელ ხანს მაჸუან ობრძოლებერქ. თენა ჯგირო ირწყებე პეტრე მოციქულიშ შემთხვევაშე. თის კოჩიშ შიშ უღუდ, მუდგაშ გურშენ სუმშა თქუ, ნამდა ვეჩინენდჷ იესოს (მათ. 26:69—75). დროშ მიკულაწკუმა ართო, თეშ იძირედ, ითამ პეტრექ გიორჯგინ თე სისუსტეს, მუშენდა სინედრიონიშ წოხოლე გაბედულო იჩუ (საქ. 5:27—29). მარა მუსხირენ წანაშ უკულ პეტრეს კინ დართჷ მუშ სისუსტექ დო „წინადაცვეთილეფიშ შიშით“ მიოტუ უცხოტომელ ქრისტიანეფწკუმა ართო ჭკუმუა (გალ. 2:11, 12). მის უჩქჷ, ეგება პეტრეს ვართ დღას გიარჯგინუ თე სისუსტეშა.

18. მუქ შილებე მოხვადას თიმწკუმა ხოლო, მუჟამსით ფიფქრენთ, ნამდა ჩეფთხინეთ სისუსტე?

¹⁸ პეტრეცალ სიტუაციას შილებე ჩქი ხოლო მოფხვადათ დო თი სისუსტექ, ნამდგაშე ფიფქრენდით, ნამდა ჩათხინაფილ მაფუდეს, კინ მუკმართან. თექ მოხვად ართ ჯიმაშ შემთხვევას, ნამუთ ალალას იჩიებ: „ვით წანას ვამჯინუ პორნოგრაფიაშა დო ფიფქრენდჷ, ნამდა ჩეფთხინე თე სისუსტე. მარა, სინამდვილეს, ჩათხინაფილ ვარინ, ჩქიმ სისუსტე მხეცცალო ჸოფე მიკოტყობინელ, ნამუთ მომენტის გეუხედ, ნამდა დუდის ქიგმანთხუკო“. მუშმაჯგირა რე, ნამდა თე ჯიმაქ გაგრძელ ბრძოლა მუშ სისუსტეწკუმა. თიქ ქიმეხვად, ნამდა ირდღას ოკო ებრძოლას მუშ სისუსტეს დო შილებე თექ თე ქვეყნიერებაშ ბოლოშახ აჸუას ოკეთებელქ. მუშ ოსურიშ დო უხუცესეფიშ მოხვარათ, თინა ობრძოლ მუშ სისუსტეს დო ხოლო უმოს კურცხას რე.

19. მუჭო ვებრძოლათ სისუსტეს, ნამდგაქ დიო ხოლო ვაჩმათხინეს?

¹⁹ მუშ კეთება შემლებუნა, ნამდა ვევაჸუნათ სისუსტეს, ნამდგას დიო ხოლო ვობრძოლუთ? თინა ოკო ვაკეთათ, მუთ იესოქ თქუ: „კურცხას რდათჷ“. თიმწკუმა ხოლო, მუჟამსით წარმატებულო ობრძოლუქ სქან სისუსტეს, ვემუთამამუა თის დო იშენით მუთხილე თიცალ სიტუაციეფს, ნამდგაქ შილებე ცდუნებაშ წოხოლე ქიგგორინუას (1 კორ. 10:12). გაგრძელ თი ირფელიშ კეთება, მუთ აიშახ გოხვარუდ სისუსტეწკუმა ბრძოლას. იგავეფიშ 28:14-ის ჭარჷ: „ბედნერ რე კოჩ, ნამუთ ირო ფრთხილას რე“ (2 პეტ. 3:14).

ᲡᲘᲙᲣᲠᲪᲮᲐ ᲙᲣᲠᲗᲮᲔᲕᲔᲤᲡ ᲛᲝᲛᲦᲐᲜᲐ

20, 21. ა) მუ ჯგირ შედეგეფს მიბღენთ, კურცხას ქიპჸით-და? ბ) ცდუნებაწკუმა ობრძოლებერო ჩქინ ოკეთებელს გუვაკეთენთ-და, მუჭო მიმეხვარებუნა იეჰოვა? (2 კორ. 4:7).

²⁰ შემლებუნა ბჯერდან, ნამდა კურცხას ქიპჸით დო ცდუნებას ვევაჸუნუთ-და, თენა არძაშ უჯგუშ შედეგეფს მომღანა. ცოდაშ მოღალირ წუთიერ სიამოვნებას ხოლოშა ხოლო ვემიართე თი ბედნერობაშა, ნამდგას იეჰოვაშ ნორმეფიშ მეჸუნა მომღანა, მუშენდა ჩქი ზუსტას თე ნორმეფით ოცხოვრებელო ვორეთ გოჭყაფილ (ებრ. 11:25; ფსალმ. 19:8; დაბ. 1:27). შედეგო, მაღვენუნა სუფთა სინდის დო მიბღენთ მარადიულ სიცოცხლეს (1 ტიმ. 6:12; 2 ტიმ. 1:3; იუდ. 20, 21).

²¹ იესოქ თქუნ თეშ, არასრულყოფილ „სხეულს ძალა ვა უბაღ“. მარა თენა ვა ნიშნენს, ნამდა ჩქინ სისუსტეეფშა ვემირიებე დო მუთუნ ვემიხვარებე, მუშენდა იეჰოვა რე ჩქინწკუმა დო თინა მზათ რე, ქომუჩან საჭირო ძალეფ (წეკითხით 2 კორინთელეფიშ 4:7). მართალ რე, იეჰოვა მარზენა ძალას, ნამუთ ჩვეულებრივშე უმოს რე, მარა ჩქი დიო ჩქინ ჩვეულებრივ ძალა ოკო გეგმიბრინუათ — მონდომა ვადვარკათ ცდუნებაწკუმა ბრძოლას. ჩქინ ოკეთებელს გუვაკეთენთ-და, იეჰოვა ქუპასუხენს ჩქინ ლოცვეფს დო მუშ ძალას ხოლო ქიგემძინანა (1 კორ. 10:13). თაშ ნამდა, შემლებუნა ბჯერდან, ღორონთიშ მოხვარათ ირნერ ცდუნებას გივორჯგინანთ.