მუშ კეთება შეილებნა, თქვან მეუღლე პორნოგრაფიას ქუჯინენ-და?

• „თიცალ გრძნობა მიღუდ, ითამ ჩქიმ ქომონჯ ირიათო ბღალატენდჷ“.

• „დუდის უღირსო ბგინაფლენდჷ დო ფიფქრენდჷ, ნამდა ჩქიმ ქომონჯის ვა ვოკოდ დო თიშო მიმზიდველ ვა ვორდჷ“.

• „მითინწკუმა ვამაჩიებედ თეშ გურშენ, ათეშენ თე ჭუაშა ხვალე მაფუდ გარზებელ“.

• „ფიფქრენდჷ, იეჰოვას ვაინტერესუდ ჩქიმ მდგომარეობა“.

თე სიტყვეფ ჯგირო ოძირანს, მუშმადიდა გურჭუას გინაფლენს ოსურ, მუჟამსით მუშ ქომონჯ პორნოგრაფიას უჯინე. ქომონჯ თეს ტყობაშე, თუთეფიშ ვარდა წანეფიშ დინახალე ქართუნ-და, ოსურქ შილებე გვალო მიოდინუას ნდობა, თიშ მიმართ. ართ ოსურ თეცალ სიტყვეფს იჩიებ: „იფიფქრჷ, ნამდა შურო ვა ნოფჩინებუექ ჩქიმ ქომონჯის დო თიშე ხოლო მაფიქრუაფუდ, ხოლო მუთუნს ვამფულუნდას-მაქ“.

თე სტატიაქ, მომზადებულქ იჸუ თინეფშო, მიდგაშ ქომონჯეფ პორნოგრაფიას უჯინენა.a თაქ გარჩიებულ იჸუაფ ბიბლიურ პრინციპეფ, ნამუთ გურშა ელუკინანს ოსურეფს, დარწმუნენს, ნამდა იეჰოვა ელურე თინეფს დო მეხვარებ, დირთინუან ემოციურ დო სულიერ წონასწორობა.b

ᲛᲣᲨ ᲙᲔᲗᲔᲑᲐ ᲨᲔᲣᲚᲔᲑ ᲝᲡᲣᲠᲡ?

მართალ რე, თქვან ქომონჯიშ არძა ნაბიჯ ვა გაკონტროლებენა, მარა შეილებნა გაკეთათ თიცალ მუდგარენ, მუთ გურჭუას ჭიჭეთ ეიქექუანა დო მიგეხვარებნა, გიღდან შინაგან სიმშვიდე. გუვარჩუათ, მუშ კეთება შეილებნა.

თქვან დუდის ვეკაბრალათ მოხვალამირ. ოსურ შილებე ფიქრენდას, ნამდა მუშ ქომონჯ პორნოგრაფიას უჯინენ თინა, მუდგარენ გაგებათ მუშ ბრალ ხოლო რე. ალისა,c მით დუდის თეშ გინაფლენდჷ, ითამ მუშ ქომონჯშო მიმზიდველ ვა რდჷ, ფიქრენდჷ: „მუშენ უსხუნ ჩქიმ ქომონჯის, ჩქიმ მანგიორო შხვა ოსურს უჯინას?“. ნამთინე ოსურ მუშ დუდის ბრალს გედვანს თიშ გურშენ, ნამდა ქომონჯიშ საქციელშენ ემოციეფს გიმოხანტუნს დო ფიქრენს, ნამდა თეშნერო სიტუაციას აუფრაშენს. დანიელა იჩიებ: „მინშა მანგარ გურმოულირ ვორდჷ დო იბრისხებუდ, ათეშენ ფიფქრენდჷ, ნამდა ზუსტას ჩქიმ თეცალ ემოციეფ აუფრაშენდჷ მდგომარეობას“.

თქვა ხოლო დუდის თაშ ქოგინაფლენთ-და, დარწმუნებულ რდათ, ნამდა იეჰოვა თქვან ქომონჯიშ საქციელიშ გურშენ თქვა ვა რთხინა პასუხის. იაკობიშ 1:14-ის ბკითხულენთ: „თითოულს გიმოცადუნს მუშ სურვილ, ნამუთ გეიჸუნუანს დო ოჩილითუანს თის“ (რომ. 14:12; ფილ. 2:12). რჯერდან, იეჰოვა ბრალს ვეგერდვანა. პირიქით, მანგარო აფასენს, ნამდა თიშ მიმართ ართგურობას გიმირჩქინანთ (2 მატ. 16:9).

ოსურქ შილებე იფიქრას, ნამდა ქომონჯშო მიმზიდველ ვა რე დო ათეშენ უჯინე თინა პორნოგრაფიას, მარა თენა ვა რე სიმართლე. მუჭოთ ექსპერტეფ იჩიებნა, პორნოგრაფიაშ ჯინა ქომოლკოჩის თიცალ გაუკუღმართებულ სურვილეფს უვითარენს, ნამდგაშ დაკმაყოფილება ნამთინ ოსურს ვეშიალებე.

ვეგნაჸუნათ წუხებას. ართ და, კატერინა, მიდგაშ ქომონჯ პორნოგრაფიას უჯინედ, იჩიებ, ნამდა დღაშ დო სერით თეშე აფიქრუაფუდ. ხოლო ართ და, ფრენცის, რაგადანს: „ნერვიანობას იბჭყანქ, მუჟამსით ზუსტას ვა მიჩქჷ, სო რე ჩქიმ ქომონჯ. მთელ დღას განერვიანებულ დო გაღიზიანებულ ვორექ“. შხვა ოსურეფ ალალას იჩიებნა, ნამდა დუდის უხერხულო გინაფლენა დო ონჯღორე უჩქნა, მუჟამსით თი თანაქრისტიანეფ შქას რენა, მიდგას შილებე უჩქუდან თინეფიშ ქომონჯეფიშ პრობლემა. ნამთინე დუდის ხვალახეთ გინაფლენს, მუშენდა ფიქრენს, მითინ ვენანჭუ, მუ გინუღ დო მუშა აფჷ გარზებელ თის.

მუშო ოკო რაგად, თეცალ გრძნობეფ ბუნებრივ რე, მარა თე ირფელშე დღაშ დო სერით ქიფიქრენთ-და, ხოლო უმოსო გენერვიანებუთ. თეშ მანგიორო, ეცადით, მთელ ყურადღება იეჰოვაწკუმა თქვან ურთიერთობაშა გეგნიღათ. თეშ კეთება გუგამანგარენა დო ქიმგეხვარებნა გარზებას (ფსალმ. 62:2; ეფეს. 6:10).

ბიბლიას მოჩამილ რე ღორონთიშ ბრელ ართგურ ოსურკათაშ შემთხვევა, მით მანგარო იტანჯებდეს. თინეფ ლოცვას მუნეფიშ ოწუხებელიშ გურშენ ალალას ეჩიებდეს იეჰოვას დო მოხვარას თხინდეს. შილებე თე შემთხვევეფიშ კითხირქ დო თინეფშე დაფიქრებაქ მანგარო მიგეხვარან. მართალ რე, იეჰოვა ირიათო ვა უთხინუანდჷ თინეფს პრობლემას, მარა შინაგან სიმშვიდეს არზენდჷ. მაგალთო, ხანა, მით „შურგანწარებულ“ რდჷ, მუშ პრობლემაშ გურშენ „ბრელ ხანს ლოცულენდჷ იეჰოვაშ წოხოლე“, მუდგაშ უკულ შინაგან სიმშვიდე იგინ, თიშ უმკუჯინუო, ნამდა დიო ხოლო ვა უჩქუდ, მუ მოხვადუდ მომავალს დო მუჭო დითირუდ თიშ სიტუაცია (1 სამ. 1:10, 12, 18; 2 კორ. 1:3, 4).

ქოთხით მოხვარა კრებაშ უხუცესეფს. თინეფქ თქვანო შილებე იჸუან „დუდიშ გითაფორაფალქ ბორიას დო გითაფორაფალქ ქარბორიას“ (ეს. 32:2). უხუცესეფქ შილებე თინა ხოლო ელაიჩან, ნამ დას შეილებნა ალალას ეჩუათ თქვან სიტუაციაშ გურშენ დო თეშნერო, ჭიჭეთ გურშა ეიქექუათ (იგავ. 17:17).

ᲛᲣᲨ ᲙᲔᲗᲔᲑᲐ ᲨᲔᲘᲚᲔᲑᲜᲐ ᲗᲥᲕᲐᲜ ᲥᲝᲛᲝᲜᲯᲘᲨ ᲛᲐᲮᲕᲐᲠᲔᲑᲔᲚᲝ?

შილებე შეგალებუან თქვან მეუღლეშა მოხვარაქ, ნამდა ჩეთხინუას პორნოგრაფიაშ ჯინაშ ჩვევა. ბიბლიაშე ბგებულენთ, ნამდა მუდგაინ სირთულეშა ვარდა პრობლემაშა გიორჯგინალო „ჟირიშ ართო რინა უჯგჷ ხვალე რინას“ (ეკლ. 4:9—12). მუჭოთ გიმორკვიებეფქ ოძირუ, მუჟამსით ჩილ დო ქომონჯ ართო ხანდენა თე სირთულეშა გიორჯგინალო, ხშირ შემთხვევას, ქომონჯეფ ითხინუანა პორნოგრაფიაშ ჯინაშ ჩვევას დო ოსურეფ კინ ირთინუანა მუნეფიშ მეუღლეშ მიმართ ნდობას.

მუშო ოკო რაგად, ბრელ მუდგარენ დამოკიდებულ იჸუაფ თქვან ქომონჯიშ მონდომაშა დო თიშა, მუსხით მტკიცას აფჷ გინოჭყვიდილ, ჩეთხინუას პორნოგრაფიაშ ჯინაშ ჩვევა. მაგალთო, ქოთხუო თიქ იეჰოვას ძალა თე ჩვევაშა გიორჯგინალო დო ქიმერთუო უხუცესეფშა მოხვარაშ მიოღებელო? (2 კორ. 4:7; იაკ. 5:14, 15). ქაფუნო ჯგირო მოფიქრებულ, მუს გაკეთენს, მუჟამსით ცდუნებაშ წოხოლე ქიგედირთუ? მაგალთო, მუჭო გიმირინუანს ელექტრონულ მოწყობილობას დო მუჭო აურიდანს დუდის თიცალ სიტუაციას, ნამდგაშ დროს შილებე ცდუნებას გეიაჸუნას? (იგავ. 27:12). ქორენო მზათ, მიღას თქვანდე მოხვარა დო მუთუნ ვაიფულანინ თეშ ალალას იჩუას თქვანწკუმა? თქვან ქომონჯ თე ირფელს ქართუნ-და, შეგალებენა თიშ მოხვარა.

გუვარჩუათ ფელიშაშ მაგალით, მიდგაშ ქომონჯის, ეთანს, ბაღანობაშე გევითარ პორნოგრაფიაშ ჯინაშ ჩვევაქ. ფელიშა ირნერო ოცად, მუშ ქომონჯის ადვილქ აჸუას თიშა მეულაქ დო დორაგადაფაქ, მუჟამსით კინ ურჩქინდუ პორნოგრაფიაშ ჯინაშ სურვილ. ეთან იჩიებ: „ჩქიმ ოსურს ირიათო ალალას ვეჩიებუქ დო მუთუნს ვა ვუფულუნქ. თინა ჸოროფათ მოხვარ, დუდ ევუჩილითუე ცდუნებეფს დო ირიათო მოკითხ, მუჭო ვობრძოლუქ ჩქიმ პრობლემას. თეს გეძინელ, მოხვარ, მანგარ ყურადღებათ ვორდე თიწკუმა დაკავშირებით, მუსხი ხანს დო მუჟამ იბრინუანქ ინტერნეტის“. მუშო ოკო რაგად, ფელიშას გურს უწყუნუანს თიშ რჩქინა, ნამდა ეთანს პორნოგრაფიაშ ჯინაშ სურვილ უღჷ დო თე ჩვევაშა რე დამოკიდებულ, მარა თინა იჩიებ: „გებრისხებუქ დო გურს მიპჸონანქ-და, ვეშმალებე, ქიმვეხვარე ეთანს თე გლახა ჩვევაშა გერჯგინას. თიშ უკულ, მუთ თე სირთულეშ გურშენ ართიანს ალალას ვეჩიებუთ, მიშმურს ჩქიმ მდგომარეობაშა დო უმოსო ოცად, დუდ აურიდას პორნოგრაფიაშ ჯინას“.

ჩილ დო ქომონჯ შქას თეცალ ალალ ჩიება ოხვარ ქომონჯის, ვეიაჸუნას პორნოგრაფიაშ ჯინაშ ცდუნებას დო ოხვარ ოსურს ხოლო, კინ დირთინუას მუშ ქომონჯიშ მიმართ ნდობა. მუჟამსით ქომონჯ მუშ სისუსტეეფიშ გურშენ ოსურწკუმა ალალას იჩიებ დო ოგებაფუანს, სო მეურს დო მუს ორთჷ, თეშნერო, კინ ირთინუანს ოსურიშ ნდობას, მუშენდა მუთუნს ვა უფულუნს.

ქოფიქრენთ, ნამდა თეცალ მოქმედებათ თქვან ქომონჯის ქიმეხვარებუთ-და, ართო წეკითხით დო გარჩით თე სტატია. თეშ უკულ, თქვან მეუღლეს უმოსო აჸი გინოჭყვიდილ, დუდ აურიდას პორნოგრაფიაშ ჯინას დო ირნერო ეცადას, დირთინუას თქვან ნდობა. მუჟამსით თე სირთულეწკუმა დაკავშირებით თიწკუმა ქიჩიებუთ, თიშ მანგიორო, ნამდა გეღიზიანას, ირნერო ოკო ეცადას, გემშართას თქვან მდგომარეობაშა დო ქიგეგას, მუჭო გიჭუანა გურს თიშ საქციელ. თქვა ხოლო, თქვან მხარეშე ირნერო ოკო ქუდუკინათ ხუჯ დო ქიმეჩათ შესაძლებლობა, დირთინუას თქვან ნდობა. ჟირხოლოს ჯგირო ოკო გარჩქილედან, მუშენ უჯინე ადამიან პორნოგრაფიას დო მუჭო რე შიეოლებერ თე ჩვევაშ ჩათხინაფა.d

ქოფიქრენთ, ნამდა თქვა დო თქვან ქომონჯის თე საკითხიშ გურშენ მშვიდას ვადგარაგადენა დო ნირზშახ ქიმგალენან-და, თი უხუცესის, მიდგაწკუმა ჟირხოლო თავისფალო გინაფლენთ დუდის, ქოთხით, მუდგარენ პერიოდის დესწრას თქვან ჩიებას. რშუდან, თქვან მეუღლექ პორნოგრაფიაშ ჯინა მიოტუასინ ხოლო, დრო დეგესაჭირებნა, ნამდა კინ ენდათ თის. ეცადით, ქოძირათ თქვან ურთიერთობას წიმი გინოდგუმილ აკაბცხა ნაბიჯ ხოლო. იმენდ ვადინუათ დო რჯერდან, ნამდა ჟირხოლო ქიმითვინენთ-და, დროშ ულაწკუმა ართო, თქვან ქორწინება კინ თიცალ ძალიერ იჸუაფ, მუნერით რდჷ (ეკლ. 7:8; 1 კორ. 13:4).

ᲛᲣ ᲝᲙᲝ ᲐᲙᲔᲗᲐᲗ, ᲛᲣᲟᲐᲛᲡᲘᲗ ᲞᲠᲝᲑᲚᲔᲛᲐ ᲞᲠᲝᲑᲚᲔᲛᲐᲗ ᲡᲥᲘᲓᲣ?

თქვან ქომონჯიქ პორნოგრაფიას კინ ქუჯინ-და, თენა იშენდოიშენ ვა ნიშნენს, ნამდა ვა ნარღენს დაშებულს დო დღას ვეშიალებე, გიორჯგინას თე ჩვევას. მითუმეტეს პორნოგრაფიაშ ჯინაშა დამოკიდებულ ქორენ-და, შილებე თე ჩვევაშა მთელ ცხოვრებას აჸუას ობრძოლებერქ. პორნოგრაფიაშ ჯინაშა დამოკიდებულ პიროვნებაქ, შილებე წანეფიშ უკულ კინ ქუჯინას თის. თქვან ქომონჯის თექ ვაღოლას დო თე გლახა ჩვევას კინ ვა დართასინ, საჭირო რე, მკაცრ შეზღუდვეფ დუწესას მუშ დუდის დო თიმწკუმა ხოლო მიაჸუნას თინეფს, მუჟამსით თეშ იძირე, ითამ თე ჩვევა ჩათხინაფილ აფჷ (იგავ. 28:14; მათ. 5:29; 1 კორ. 10:12). თქვან მეუღლექ ოკო დითირუას აზროვნება დო გიჯოგუას უბადობა, მუდგაშა მიშურს პორნოგრაფია დო შხვა უწმინდურ ჩვევეფ, მაგალთო, მუნერით რე, მასტურბაცია (ეფეს. 4:23; ფსალმ. 97:10; რომ. 12:9). თქვან ქომონჯ თე ირფელიშ ოკეთებელო მზათ ქორენ-და, თიშ მდგომარეობა უიმენდო ვა რე დო შეიალებე ჩეთხინუას პორნოგრაფიაშ ჯინაშ ჩვევა.e

მუ ოკო აკეთათ, მუჟამსით თქვან მეუღლე მუთუნნერო ვაცად თე პრობლემაშ ჩათხინაფას? მუშო ოკო რაგად, ბუნებრივ რე, თეცალ დროს გურქ მოირთან დო დუდ თეშ იგინათ, ითამ საჸოროფო პიროვნებაქ დუგაღალატეს. თქვან ოწუხებელ იეჰოვას მიანდით, მუთ მიგეხვარებნა, ვადინუათ შინაგან სიმშვიდე (1 პეტ. 5:7). ღორონთიშ სიტყვაშ გიმორკვიებათ, ნაკითხირშე ფიქრით დო ლოცვათ, გაგრძელით იეჰოვაწკუმა დაახლოება დო დარწმუნებულ რდათ, ნამდა აშო ხოლო დეგეახლოებნა. მუჭოთ ესაიაშ 57:15-ის ბკითხულენთ, იეჰოვა თანდაბალეფ დო დაჩაგრულეფწკუმა რე დო მანგარო ოკო, ქიმეხვარას ხიოლიშ დორთინაფას. მუთ შეილებნა ირფელ გაკეთით, ნამდა ღორონთიშ ართგურ რდათ. ქოთხით მოხვარა უხუცესეფს დო ვადინუათ იმენდ, ნამდა ართ დღასით თქვან ქომონჯ მთელ გურით მინდომენს გიშასწორებას (რომ. 2:4; 2 პეტ. 3:9).