გეგმირკვით ბიბლიურ წინასწარმეტყველებეფ

1. მუ მიმეხვარებნა, სიამოვნება მიბღათ წინასწარმეტყველებეფიშ გიმორკვიებაშე?

„ᲛᲐᲜᲒᲐᲠᲝ მობწონს ბიბლიურ წინასწარმეტყველებეფიშ გიმორკვიება“, იჩიებ ართ ახალგაზრდა ჯიმა, სახელო ბენ. თქვა ხოლო მორწონანო თე პროცეს დოვარ, ფიქრენთ, ნამდა ბიბლიურ წინასწარმეტყველებეფიშ ინონჭაფა რთულ რე დო მოსაწყენ რე თინეფიშ გიმორკვიება. თაშ ქორენ-და, შილებე აზრიქ დუგათირან, მუჟამსით უმოსის ქიგეგენთ თიწკუმა დაკავშირებით, მუშენ ინაჭარაფუ იეჰოვაქ მუშ სიტყვას წინასწარმეტყველებეფ.

2. მუს გუვარჩიენთ თე სტატიას?

² თე სტატიას ხვალე თიშენ ვა მაღვენნა ჩიება, მუშენ ოკო გიმიბრკვიათ ბიბლიურ წინასწარმეტყველებეფ, თიშე ხოლო ქიფჩიებუთ, მუჭო შემლებნა თეშ კეთება. უკულ გუვარჩიენთ დანიელიშ წიგნის ინოჭარილ ჟირ წინასწარმეტყველებას, ნამდა ქობძირათ, მუ ჯგირობუას მომღანა თინეფიშ ინონჭაფა ამდღა.

ᲛᲣᲨᲔᲜ ᲝᲙᲝ ᲒᲘᲛᲘᲑᲠᲙᲕᲘᲐᲗ ᲑᲘᲑᲚᲘᲣᲠ ᲬᲘᲜᲐᲡᲬᲐᲠᲛᲔᲢᲧᲕᲔᲚᲔᲑᲔᲤ?

3. მუ ოკო ვაკეთათ, ნამდა ქინვანჭათ ბიბლიურ წინასწარმეტყველებეფს?

³ ქუმოკონა ბიბლიურ წინასწარმეტყველებეფს ქინვანჭათ-და, საჭირო რე, ქიფთხუათ მოხვარა. ქიმიპჸონათ თეცალ მაგალით. წერმიდგინით, ნამდა თიცალ ადგილს რეთ, სოდეთ აიშახ დღას ვა ჸოფეთ ნარინა. მარა თქვანწკუმა ართო თიცალ მეგობარ რე, მით თექიანობას ჯგირო იჩინენს დო ზუსტას უჩქჷ, სო რეთ დო სოიშახ მეიჸონანა თითოულ შარა. მუშო ოკო რაგად, გოხიოლდან იჸი, ნამდა თინა თქვანწკუმა რე. იეჰოვა ხოლო თე მეგობარცალ რე. თის ჯგირო უჩქჷ, მუ დროს ფცხოვრენთ დო მუ მელნა წოხოლე. თაშ ნამდა, ბიბლიურ წინასწარმეტყველებეფს ქინვანჭათინ, თანდაბლურო ოკო ფთხუათ იეჰოვას მოხვარა (დან. 2:28; 2 პეტ. 1:19, 20).

4. მუშენ ინაჭარაფუ იეჰოვაქ მუშ სიტყვას წინასწარმეტყველებეფ? (იერ. 29:11; ქოძირით სურათ).

⁴ ჯგირ დო მოჸოროფე მშობელცალო, იეჰოვას ხოლო ოკო მუშ სქუალეფს ბედნერ მომავალ უღდან (წეკითხით იერემიაშ 29:11). მარა ადამიანეფიშ გინაწონს, იეჰოვას შეულებ მომავალ ქიწინასწარმეტყველას დო თე ირფელქ ზუსტას შისრულას. თიქ ბიბლიაშ მაჭარალეფს მუშ სიტყვას წინასწარმეტყველებეფ ინაჭარაფუ, ნამდა მიჩქუდესკო თი მოვლენეფიშ გურშენ, ნამუთ მომავალს მოხვადუ (ეს. 46:10). თაშ ნამდა, ბიბლიურ წინასწარმეტყველებეფ ძღვინ რე, ნამუთ ჩქინ ზეციერ მუმაქ ჸოროფათ მუჩეს. მარა მუჭო შეილებნა დერწმუნათ, ნამდა თი ირფელ, მუთ ბიბლიას რე ნაწინასწარმეტყველებ, აუცილებერო შისრულებ?

5. მუშ გურაფა შეულებნა ახალგაზრდეფს მაქსიშ შემთხვევაშე?

⁵ ახალგაზრდეფს ამდღა სკოლას, თიცალ კათაწკუმა უხვადნა ურთიერთობა, მიდგას შურო მუთუნო ვემიორჩქ ბიბლია ვარდა ჭიჭეთ აფასენს თის. თინეფიშ ჩიებას დო საქციელს შეულებ ეჭვეფ ქინათასას ჩქინ ახალგაზრდეფიშ გურს. გუვარჩუათ ართ ჯიმაშ, მაქსიშ, შემთხვევა. თინა იჩიებ: „მოზარდობას ეჭვეფქ გომრჩქინდჷ თიწკუმა დაკავშირებით, მართალო ქორდჷ დო ვარ ჭეშმარიტება თინა, მუდგას ჩქიმ მშობლეფ მოგურუანდეს დო ქორდჷ დო ვარ ბიბლია ღორონთშე შთაგონებულ“. მუ აკეთეს მაქსიშ მშობლეფქ? თინა იჩიებ: „ბგინაფლენდჷ, ნამდა მანგარო ნერვიანენდეს, მარა თეშ უმკუჯინუო, იშენით მშვიდას დომრაგადუეს“. თინეფქ მუნეფიშ სქუაშ არძა კითხვას ბიბლიაშე უპასუხეს. მაქსიქ ხოლო თაშ მიქცუ დო ბიბლიას დოგორ თი კითხვეფიშ პასუხეფ, ნამუთ ოინტერესუდ. თინა იჩიებ: „იბრკვიენდჷ ბიბლიურ წინასწარმეტყველებეფს დო მუდგას ბგებულენდჷ, კრებას შხვა ახალგაზრდეფს ურაგადუდ“. თექ მაქსის ჯგირ შედეგ მოუღ. თინა იჩიებ: „დებრწმუნ, ნამდა ბიბლია ღორონთშე შთაგონებულ წიგნ რე“.

6. ეჭვეფ ქოიღნან-და, მუ ოკო აკეთათ დო მუშენ?

⁶ მაქსცალო შილებე თქვა ხოლო ეჭვეფქ გოირჩქინდეს დო გაფიქრუაფდან, ქორენ დო ვარ სიმართლე თი ირფელ, მუთ ბიბლიას ინოჭარ. თაშ ქორენ-და, ონჯღორექ ვადგაგურან დო დუდ დამნაშავეთ ვეგინათ, მარა ვართ დრო იღათ, მუშენდა თეცალ დროს აუცილებერ რე მოქმედება. ეჭვეფ ღანჯის მოგენს. ყურადღებას ვემვაქციენთ-და, თის შეულებ ძვირფას ნივთის მადვას დო ჭიე-ჭიეთ გილალუას. თქვან რწმენაქ ხოლო ჭიე-ჭიეთ ვედესუსტას, თაშ ქოფთქუათინ „ვედეღანჯასინ“, საჭირო რე, თქვან დუდის ქოკითხათ: „ქობჯერსო თიშ, მუდგას ბიბლია მომავალიშ გურშენ იჩიებ?“. თეშა ბოლოშა დარწმუნებულ ვა რეთ-და, ჯგირ იჸუაფ, გეგმირკვიათ თი ბიბლიურ წინასწარმეტყველებეფ, ნამდგაქ უკვე შისრულ. მორთ გუვარჩუათ, მუჭო შეილებნა თეშ კეთება?

ᲛᲣᲭᲝ ᲒᲘᲛᲘბᲠᲙᲕᲘᲐᲗ ᲑᲘᲑᲚᲘᲣᲠ ᲬᲘᲜᲐᲡᲬᲐᲠᲛᲔᲢᲧᲕᲔᲚᲔᲑᲔᲤ?

7. მუ მაგალით დომტეს დანიელქ თიწკუმა დაკავშირებით, მუჭო ოკო იბრკვიენდათ წინასწარმეტყველებეფს? (დან. 12:10; ქოძირით სურათ).

⁷ დანიელქ ჯგირ მაგალით დომტეს თიწკუმა დაკავშირებით, მუჭო ოკო გიმიბრკვიათ წინასწარმეტყველებეფ. გიმორკვიებაშ დროს თის სწორ მოტივ უღუდ, თაშ ქოფთქუათინ, თიშო მთავარ სიმართლეშ გაგება რდჷ. თეს გეძინელ, დანიელ თანდაბალ რდჷ დო ჯგირო არჩქილედ, ნამდა იეჰოვაშ მოხვარაშ უმშო ვენანჭუდ წინასწარმეტყველებეფს. თინა ხოლო ჯგირო უჩქუდ, ნამდა იეჰოვაშ ართგურ ქიჸიდ დო თის დემორჩილებუდ-და, ღორონთ ქიმეჩანდჷ ინონჭაფაშ უნარს (დან. 2:27, 28; წეკითხით დანიელიშ 12:10). ზუსტას ათეშენ, თიქ თანდაბლურო თხუ იეჰოვას მოხვარა (დან. 2:18). ხვალე თენა ვარინ, დანიელ გურგედვალირო ირკვიენდჷ ბიბლიაშ თი წიგნეფს, ნამუთ თი პერიოდის მუშო რდჷ ხეშამალაფარ (იერ. 25:11, 12; დან. 9:2). მუჭო შეილებნა მიაჸუნათ თიშ მაგალითის?

8. მუშენ ირკვიენს ნამთინე ბიბლიურ წინასწარმეტყველებეფს?

⁸ შეამოწმით თქვან მოტივეფ. დეფიქრით: თიშენ ირკვიენთო ბიბლიურ წინასწარმეტყველებეფს, ნამდა სიმართლეშ გაგებაშ ძალიერ სურვილ გიღნა? თაშ ქორენ-და, იეჰოვა აუცილებერო ქიმგეხვარებნა (იოან. 4:23, 24; 14:16, 17). მარა ბიბლიურ წინასწარმეტყველებეფიშ გიმორკვიებაშ დროს, არძას ვა უღჷ სწორ მოტივ. მაგალთო, ნამთინე ოცად, ქიმიოგორუას თიშ მტკიცებულებას, ნამდა ბიბლია ღორონთშე შთაგონებულ ვა რე. თინეფ ფიქრენა, ნამდა თეს დამტკიცენან-და, შეიალებენა მუნეფიშით გინოჭყვიდან, მუ რე სწორ დო არასწორ. მარა ჩქი სწორ მოტივეფ ოკო მიღდან დო ხვალე თენა ვარინ, ბიბლიურ წინასწარმეტყველებეფიშ ინანჭაფალო ხოლო მნიშვნელოვან მუდგარენ რე საჭირო. მორთ ქიგებგათ, მუ რე თენა.

9. ნამ თვისება მოსაჭირნა ბიბლიურ წინასწარმეტყველებეფიშ ინანჭაფალო? გენწყით.

⁹ რდათ თანდაბალ. იეჰოვა თანდაბალეფს ოპირ, ნამდა ქიმეხვარებ (იაკ. 4:6). ათეშენ, საჭირო რე, ლოცვას მოხვარა ქოფთხუათ ღორონთის, ნამდა ქინვანჭათ ბიბლიურ წინასწარმეტყველებეფს. თეს გეძინელ, ოკო მარჩქილედან, ნამდა მოსაჭირნა მოხვარა ართგურ დო გონიერ მონაშე, მიდგაშ საშვალებათ ღორონთ დროულო მარზენა სულიერ საზრდოს (ლუკ. 12:42). იეჰოვა წესრიგიშ ღორონთ რე, ათეშენ ხვალე ართგურ დო გონიერ მონას ირინუანს, ნამდა ქიმმეხვარან ბიბლიურ ჭეშმარიტებაშ ინონჭაფას (1 კორ. 14:33; ეფეს. 4:4—6).

10. მუს ბგურაფლენთ ესთერიშ შემთხვევაშე?

¹⁰ გეგმირკვით გურგედვალირო. დუდშე ქიდიჭყით თი წინასწარმეტყველებაშ გიმორკვიება, ნამუთ არძაშ უმოსო გოინტერესნა. ზუსტას თენა აკეთ ართ ჩქინ დაქ, სახელო ესთერქ. თის მესიაშ მულაწკუმა დაკავშირებულ წინასწარმეტყველებეფ ოინტერესუდ. ესთერ იჩიებ: „15 წანერ ვორდინ თეშ ქიდიბჭყჷ მტკიცებულებეფიშ გორუა თიწკუმა დაკავშირებით, ნამდა წინასწარმეტყველებეფქ მესიაშ გურშენ იესოშ მულაშახ იჭარ“. ესთერ თეშა ხოლო უმოსო დარწმუნ თი ირფელქ, მუდგას მკვდარ ზღვაშ ხეშნაჭარეფშე კითხულენდჷ. თინა გეუძინანს: „ნამთინე თე ხეშნაჭარაქ იესოშ დაბადებაშახ იჭარ, მუდგაქ დუმარწმუნ, ნამდა თე წინასწარმეტყველებეფ ღორონთშე რდჷ. თე ირფელიშ კეთებას ჩქიმ მხარეშე მონდომა ოსაჭირუდ, მუშენდა თე ხეშნაჭარეფს ქინვანჭიკონ, მუსხირენშა ოკო წებკითხკო თინეფ“. ბიბლიურ წინასწარმეტყველებეფიშ გურგედვალირო გიმორკვიებაქ ესთერს ჯგირ შედეგეფ მოუღ. თინა იჩიებ: „თე ირფელიშ ჭყოლოფათ დებრწმუნ, ნამდა ბიბლიას ინოჭარილ ინფორმაცია ზუსტ რე“.

11. მუ ჯგირობუას მომღანა თიშა დარწმუნება, ნამდა ბიბლიას ინოჭარილ ინფორმაცია სიმართლე რე?

¹¹ თიშ გაგება, მუჭო შისრულ ბიბლიას მოჩამილ ნამთინე წინასწარმეტყველებაქ, მიმანგარენა იეჰოვაშ დო თიშ ხემძღვანელობაშ მიმართ ნდობას. თეს გეძინელ, მოხვარნა, სირთულეეფიშ დროს ხოლო ვა ვოდინუათ მომავალიშ იმენდ. მორთ, ასე მოკლეთ გუვარჩუათ დანიელიშ წიგნის ინოჭარილ ჟირ წინასწარმეტყველება, ნამუთ ჩქინ დროს ისრულებ. თინეფიშ ინონჭაფა მიმეხვარებნა, მიბღათ სწორ გადაწყვეტილებეფ.

ᲗᲘᲮᲐᲗ ᲓᲝ ᲠᲙᲘᲜᲐᲗ ᲬᲧᲝᲠᲘᲚ ᲥᲐᲜᲓᲐᲙᲔᲑᲐᲨ ᲜᲐᲠᲩᲐᲙᲣᲩᲮᲔᲤ

12. მუ რე წარმოდგენილ ქანდაკებაშ ნარჩაკუჩხეფით? (დან. 2:41—43).

¹² წეკითხით დანიელიშ 2:41—43. მეფე ნაბუქოდონოსორქ სიზმარს, ნამუთ დანიელქ ენწყჷ, ძირჷ ქანდაკება, ნამდგაშ ნარჩაკუჩხეფ „გვერდო თიხაშ რდჷ დო გვერდო რკინაშ“. თე წინასწარმეტყველებას „დანიელიშ“ დო „გამოცხადებაშ“ წიგნეფს მოჩამილ შხვა წინასწარმეტყველებეფს ქეშუდარენთ-და, თი დასკვნაშა ქიმურთ, ნამდა ნარჩაკუჩხეფით წარმოდგენილ რე ინგლის-ამერიკაშ მსოფლიო იმპერია. დანიელქ თე ალიანსიშ გურშენ თეცალ მუდგარენ თქუ: „თე სამეფო გვერდო ძალიერ დო გვერდო ადვილო ტირხუნფერ იჸუაფ“. თეშ მიზეზ თინა რე, ნამდა მოქალაქეეფ, მით „თიხათ“ რენა წარმოდგენილ, ასუსტენა თე სამეფოშ „რკინაცალ“ ძალას.b

13. მუ მნიშვნელოვან დეტალეფს ბგებულენთ დანიელიშ ენწყუმილ სიზმარშე?

¹³ დანიელიშ ენწყუმილ თე სიზმარშე დო კონკრეტულო ქანდაკებაშ ნარჩაკუჩხეფშე, ბრელ მნიშვნელოვან დეტალს ბგებულენთ. პირველ, ინგლის-ამერიკაქ მსოფლიოს მუშ ძალაუფლება ბრელშა ოძირუ. მაგალთო, თიქ მთავარ როლ ილაჸაფ პირველ დო მაჟია მსოფლიო ომეფიშ მოგებას. მარა თე იმპერიაშ ძალას ასუსტენდეს დო ასუსტენა კინ მუნეფიშ მოქალაქეეფ, მით ობრძოლნა, მუჭოთ ართიანს, თეშ სახელმწიფოს ხოლო. მაჟია, ინგლის-ამერიკა იჸუაფ ბოლო მსოფლიო იმპერია, მუჟამსით ღორონთიშ სამეფო განადგურენს არძა ადამიანურ მართველობეფს. მართალ რე, ამდღა ბრელ ქიანა ოცად, რდას მსოფლიო იმპერია ინგლის-ამერიკაშ მანგიორო, მარა მუჭოდგა ვემინდომანინ, თე მიზანშა ვემიაჭირინენა. თენა თევრეშე მიჩქნა, ნამდა „ქუა“, ნამდგათ წარმოდგენილ რე ღორონთიშ სამეფო, აკოფუჩხოლუნს ქანდაკებაშ ნარჩაკუჩხეფს, ნამდგათ წარმოდგენილ რე ინგლის-ამერიკაშ ალიანს (დან. 2:34, 35, 44, 45).

14. მუჭო მოხვარნა ნარჩაკუჩხეფიშ გურშენ წინასწარმეტყველებაშ ინონჭაფა ბრძნულ გადაწყვეტილებეფიშ მეღებას?

¹⁴ ქორეთო დარწმუნებულ, ნამდა დანიელიშ წინასწარმეტყველება ქანდაკებაშ ნარჩაკუჩხეფიშ გურშენ ამდღა ისრულებ? თაშ ქორენ-და, თენა თქვან ცხოვრებაშე ხოლო იძირედას იჸი დო მიღენთ ბრძნულ გადაწყვეტილებეფს. მაგალთო, გინოჸუნელ ვეჸით ფარაშ დო მატერიალურ ნივთეფიშ შიბაშა, მუშენდა გიჩქნა, ნამდა თე ქვეყნიერება მალას გენადგურებ (ლუკ. 12:16—21; 1 იოან. 2:15—17). თეს გეძინელ, მიგეხვარებნა, ქოძირათ, მუსხით მნიშვნელოვან რე ქადაგებაშ დო მოწაფეეფიშ მომზადებაშ საქმე დო თის ცხოვრებას პირველ ადგილს ქიგიორინუანთ (მათ. 6:33; 28:18—20). თე წინასწარმეტყველებაშ გიმორკვიებაშ უკულ, ქოკითხით თქვან დუდის: „ქაძირანსო ჩქიმ გადაწყვეტილებეფ, ნამდა ბჯერს, ღორონთიშ სამეფო მალას მოურს დო ბოლოს მუღენს არძა ადამიანურ მართველობას?“.

„ᲩᲠᲓᲘᲚᲝᲔᲗᲘᲨ ᲓᲝ ᲡᲐᲛᲮᲠᲔᲗᲘᲨ ᲛᲔᲤᲔᲔᲤ“

15. მი რენა „ჩრდილოეთიშ დო სამხრეთიშ მეფეეფ“? (დან. 11:40).

¹⁵ წეკითხით დანიელიშ 11:40. დანიელიშ მა-11 დუდის ჩიება მეურს ჟირ მეფეშე, თაშ ქოფთქუათინ ჟირ პოლიტიკურ ძალაშე, მით პირველობაშ მიოღებელო ობრძოლნა ართიანს. თე წინასწარმეტყველებას ბიბლიას მოჩამილ შხვა წინასწარმეტყველებეფს ქეშუდარენთ-და, ქიმურთ თი დასკვნაშა, ნამდა „ჩრდილოეთიშ მეფე“ რუსეთ დო თიშ მოკავშირეეფ რენა დო „სამხრეთიშ მეფე“ ინგლის-ამერიკაშ მსოფლიო იმპერია რე.c

16. მუ სირთულეეფს ხვადუნა თინეფ, მით „ჩრდილოეთიშ მეფეშ“ მართველობაშ თუდო რენა?

¹⁶ ამდღა „ჩრდილოეთიშ მეფე“ თხოზ თი ქრისტიანეფს, მით თიშ მართველობაშ თუდო რენა. მაგალთო, ნამთინე ჩქინ თანაქრისტიან გოლახეს დო რწმენაშ გურშენ ციხეს ხოლო ქუდახუნეს, მარა თიშ მანგიორო, ნამდა დოშქურდან, თინეფიშ რწმენა უმოსო იმანგარებ, მუშენდა უჩქნა, ნამდა ღორონთიშ ხალხიშ თხოზინით ისრულებ დანიელიშ წიგნის მოჩამილ წინასწარმეტყველებაd (დან. 11:41). თეშ რჩქინა ჩქი ხოლო მოხვარნა, ვა ვოდინუათ მომავალიშ იმენდ დო ბოლოშა იეჰოვაშ ართგურეფქ ქუდოფსქიდათ.

17. მუ სირთულეეფს ხვადუნა თი და დო ჯიმალეფ, მით „სამხრეთიშ მეფეშ“ მართველობაშ თუდო რენა?

¹⁷ ულირს „სამხრეთიშ მეფე“ არგამათ თხოზუდ ღორონთიშ ხალხის. მაგალთო, მა-20 საუკუნეშ დაჭყაფუს ბრელ ჩქინ და დო ჯიმა ნეიტრალიტეტიშ გურშენ ციხეს ქუდახუნეს დო ნამთინე იეჰოვაშ მოწმე ბაღანა სკოლაშე გარიცხეს. ბოლო წანეფს, თი ქრისტიანეფიშ ართგურობა, მით „სამხრეთიშ მეფეშ“ მართველობაშ თუდო რენა, ხოლო შხვანერო გიმიცადებ. მაგალთო, წინასაარჩევნო კამპანიეფიშ დროს ქრისტიანქ შილებე ქიგედირთას ცდუნებაშ წოხოლე, ნამდა ხუჯ ქუდუკინას, ნამდგაინ პოლიტიკურ პარტიას ვარდა ლიდერს. შილებე თიქ ნამდგაინ პოლიტიკურ პარტიას ვემეჩას ხონარ, მარა გურს ხუჯ ქუდუკინას თის. ათეშენ მნიშვნელოვან რე, პოლიტიკურო ნეიტრალურეფ ვორდათ, მუჭოთ საქმეეფით, თეშ ფიქრეფით ხოლო (იოან. 15:18, 19; 18:36).

18. მუნერ რეაქცია მიღნა, მუჟამსით ვორწყეთ, მუჭო ოწინააღმდეგნა ართიანს „სამხრეთიშ დო ჩრდილოეთიშ მეფეეფ“? (ქოძირით სურათ).

¹⁸ თინეფქ, მიდგას ბიბლიას მოჩამილ წინასწარმეტყველებაშ ვა ჯერა, შილებე ოწუხებელს ქინოლან, მუჟამსით ქოძირნა, მუჭო მიდულა ართიანიშ წინააღმდეგ „სამხრეთიშ დო ჩრდილოეთიშ მეფეეფ“ (დან. 11:40). ჟირხოლო მეფეს თიზმა ბირთვულ იარაღ უღჷ, ნამდა თავისფალო შეულებნა დედამიწაშ განადგურება. მარა მიჩქნა, ნამდა იეჰოვა თეს დღას ვა დუშვენს (ეს. 45:18). ათეშენ, მუჟამსით ვორწყეთ, მუჭო ოწინააღმდეგ ართიანს თე ჟირ მეფე, შიშის ვენობლუთ, თეშ გინაწონს, რწმენა მემანგარებნა, მუშენდა თენა მარწმუნენა, ნამდა უბადო ქვეყნიერებაშ აღსასრულ მონჭაფილ რე.

ᲓᲔᲙᲕᲘᲠᲘᲗ ᲬᲘᲜᲐᲡᲬᲐᲠᲛᲔᲢᲧᲕᲔᲚᲔᲑᲔᲤᲡ

19. მუ ოკო მარჩქილედან ბიბლიურ წინასწარმეტყველებეფწკუმა დაკავშირებით?

¹⁹ მუშო ოკო რაგად, ჩქი ზუსტას ვა მიჩქნა, მუჭო შისრულებ ნამთინე ბიბლიურ წინასწარმეტყველება. ვართ დანიელ ინანჭუდ ბოლოშა თი ირფელიშ მნიშვნელობას, მუდგას ღორონთიშ შთაგონებათ ჭარუნდჷ (დან. 12:8, 9). მართალ რე, კილ-კილშა ვა მიჩქნა, მუჭო შისრულებ წინასწარმეტყველებეფ, მარა თენა ვა ნიშნენს, ნამდა თინეფ ვეშისრულებ. მუშო ოკო რაგად, ჩქი ვონდუთ იეჰოვას დო ბოლოშა დარწმუნებულ ვორეთ, ნამდა თინა საჭირო დროს ქუგმოგებაფუანა თი ირფელს, მუდგას ამდღა ვენვანჭუთ, მუჭოთ თეს ულირს ორთუდ (ამოს. 3:7).

20. ნამ ბიბლიურ წინასწარმეტყველებეფ შისრულებ მალას დო მუ ოკო ვაკეთათ თიშახ?

²⁰ მალას კეთებულ იჸუაფ განცხადება „მშვიდობა დო უსაფრთხოებაშ“ გურშენ (1 თეს. 5:3). მუდგაშ უკულ მთავრობეფ დუდის ქიგიანთხუნა ტყურა რელიგიას დო განადგურენა თის (გამოცხ. 17:16, 17). თეშ უკულ ღორონთიშ ხალხის ხოლო ქადირთუნა, მუდგას არმაგედონიშ ომ ქუმაჸუნუ (ეზეკ. 38:18, 19; გამოცხ. 16:14, 16). თე მოვლენეფ მალას მოხვადუ, მარა ონდო თე დრო დოდირთუდას, მორთ მარდულობა გეგმოფხანტათ ჩქინ მოჸოროფე ზეციერ მუმაშ მიმართ თით, ნამდა ქიდვეკვირათ ბიბლიურ წინასწარმეტყველებეფს დო შხვეფს ხოლო ქიმვეხვარათ თეშ კეთებას.