თქვა შეილებნა ჩეთხინუათ „ჯვეშ პიროვნება“

1. მუნერ რდჷ თქვან ცხოვრება, სოიშახ ბიბლიაშ გურაფას დიჭყანდით?

მუნერ რდჷ თქვან ცხოვრება სოიშახ იეჰოვაშ მოწმეეფწკუმა ბიბლიაშ გურაფას დიჭყანდით? ბრელს ვა მოწონს თეშე ფიქრ, მუშენდა ჩქინ ჯვეშ პიროვნება დო შეხედულებეფ სწორ დო არასწორწკუმა დაკავშირებით ქვეყნიერებაშ ნორმეფით რდჷ გენწყილ. თაშ ნამდა, თე ქვეყნიერებას უიმენდოთ დო უღორონთეთ ვორდით (ეფეს. 2:12). ბიბლიაშ გურაფაქ თე ირფელ დოთირუ.

2. მუ გეგით ბიბლიაშ გურაფაშ შედეგო?

² ბიბლიაშ გურაფაშ დოჭყაფაშ უკულ ქიგეგით, ნამდა გიჸუნა ზეციერ მუმა, ნამდგას მანგარო უჸორთ. თქვა ქიმეხვადით, ნამდა იეჰოვაშ გურიშ გახარება დო თიშ თაყვანიშმცემელეფიშ ოჯახიშ წევრობა ქუგოკოდეს-და, ოკო დოთირეთკო თქვან ცხოვრება, შეხედულებეფ დო ფიქრეფ. თქვა ქიდიგურეთ, ნამდა თიშ მაღალ ნორმეფით ოკო იცხოვრათ (ეფეს. 5:3—5).

3. მუჭოთ კოლოსელეფიშ 3:9, 10-შე ვორწყეთ, მუშ კეთებას თხულენს ღორონთ ჩქინდე, დო მუს გუვარჩიენთ თე სტატიას?

³ ჩქინ გუმაჭყაფალს დო ზეციერ მუმას, იეჰოვას უღჷ უფლება გეგნოჭყვიდას, მუნერეფ რდან თიშ ოჯახიშ წევრეფ. ათეშენ მუშ მსახურეფშე ნათუაშახ თხულენს: „ჩეთხინეთ ჯვეშ პიროვნება დო თიშ საქმეეფ“.b (წეკითხით კოლოსელეფიშ 3:9, 10). თე სტატია ნათუა ოკონან თინეფს ქიმეხვარებ, ქუპასუხან სუმ კითხვას: 1) მუ რე „ჯვეშ პიროვნება“? 2) მუშენ ელამჩანა იეჰოვა ჩეფთხინუათ თინა? დო 3) მუჭო შემლებნა თეშ კეთება? თეს გეძინელ, უკვე ნათილ ვორეთინ თინეფს, თე სტატია მიმეხვარებნა, კინ ვადვართათ ჯვეშ პიროვნებაშო დამახასიათებელ თვისებეფს.

მუ რე „ჯვეშ პიროვნება?“

4. მუს ოკეთებაფუანს „ჯვეშ პიროვნება“ ადამიანს?

⁴ „ჯვეშ პიროვნება“ ადამიანს უმენტაშო ხორციელ საქმეეფს ოკეთებაფუანს. თის შილებე ხეთეშე მალედას გურ, რდას ეგოისტ, უმარდულ დო ამაყ. თეს გეძინელ, შილებე მოწონდას პორნოგრაფიულ მასალა დო უჯინედას უზნეო ვარდა ძალადობაშ კადრეფს. მუშო ოკო რაგად, თის ჯგირ თვისებეფ ხოლო აღვენუ დო გამორიცხულ ვა რე, დუდის დამნაშავეთ გინაფლენდას, მუშ სიტყვეფ დო საქმეეფიშ გურშენ, მარა იშენ დო იშენ ვა ულამ ცხოვრებაშ თირუა (გალ. 5:19—21; 2 ტიმ. 3:2—5).

5. ქეშემლებნანო ბოლოშა ჯვეშ პიროვნებაშ ჩათხინაფა? გენწყით (საქ. 3:19).

⁵ არძა არასრულყოფილეფ ვორეთ, ათეშენ მითინს ვეშემლებნა გურ დო გონებაშე ბოლოშა გეშეპჸოთათ არძანერ გლახა ფიქრ დო გრძნობა. მინშა თიცალ მუდგარენს ქოფთქუანთ ვარდა გუვაკეთენთ, მუთ უკულ ონარღებელ მაფნა (იერ. 17:9; იაკ. 3:2). მარა მუჟამსით ჯვეშ პიროვნებას ჩეფთხინუანთ, ხორციელ აზროვნებას დო საქმეეფს მეტო ვეშიალებე ჩქინ მართუა; თინეფს მეტო ვეშიალებენა ქიმოქმედან ჩქინ პიროვნებაშა (ეს. 55:7; წეკითხით საქმეეფიშ 3:19).

6. მუშენ ელამჩანა იეჰოვა ჩეფთხინუათ ჯვეშ პიროვნებაშ გლახა ფიქრეფ დო ჩვევეფ?

⁶ იეჰოვა ელამჩანა, დუდ ეუჩილითუათ არასწორ ფიქრეფს დო გეგნიპჸოთათ გლახა ჩვევეფ, მუშენდა თის მანგარო უჸორთ დო ოკო, გეფხარათ ცხოვრებათ (ეს. 48:17, 18). თის უჩქ, ნამდა პიროვნება გლახა სურვილეფს გეიაჸუნუნ-და, ქოთ მუშ დუდის ოცილ დო ქოთ შხვეფს. თენა იეჰოვას მანგარო უწყუნუანს გურს.

7. მუჭოთ რომაელეფიშ 12:1, 2-შე იძირე, მუშ გიშაგორუა შემლებნა?

⁷ დუდშე შილებე ნამთინე მეგობარ ვარდა ოჯახიშ წევრ გუმაძიცანდეს, მუჟამსით ჯვეშ პიროვნებაშ ჩათხინაფა დიბჭყით (1 პეტ. 4:3, 4). თინეფ შილებე მირაგადდეს, ნამდა უფლება მიღნა, მუთ მოკონა თინა ვაკეთათ დო შხვას ოკო ვემეფჩათ საშვალება, მუშ ჭკუაშა გილამიჸონან. მარა მით იეჰოვაშ ნორმეფით ცხოვრებაშე ვარიას იჩიებ, სინამდვილეს ვა რე თავისფალ. თინეფ სატანაშ ქვეყნიერებას დოჸუნა (წეკითხით რომაელეფიშ 12:1, 2). ჩქი არძას შემლებნა გიშებგორათ, ვეჩეფთხინუათ ჯვეშ პიროვნება, ნამდგაშათ ცოდვა დო სატანაშ ქვეყნიერება მოქმედენს ვარდა იეჰოვას ქიმეფჩათ საშვალება, დოთირუას ჩქინ პიროვნება (ეს. 64:8).

მუჭო შეილებნა ჩეთხინუათ ჯვეშ პიროვნება?

8. მუ მიგეხვარებნა გლახა ფიქრეფ დო ჩვევეფიშ ჩათხინაფას?

⁸ იეჰოვას უჩქჷ, ნამდა გლახა ფიქრეფიშ დო ჩვევეფიშ ჩათხინაფას დრო დო მონდომა ოსაჭირ (ფსალმ. 103:13, 14). მარა თინა მუშ სიტყვაშ, წმინდა შურიშ დო ორგანიზაციაშ საშვალებათ მარზენა სიბრძნეს, ძალას დო მოხვარნა თირუას. მუშო ოკო რაგად, ღორონთიშ მოხვარა თეიშახ ხოლო ქუგაჸინა გუნამორსებ. მორთ ასე გუვარჩუათ მუსხირენ პრაქტიკულ ნაბიჯ, ნამუთ მიგეხვარებნა წიმი ულას, ჯვეშ პიროვნებაშ ჩათხინაფას დო ნათუაშო მომზადებას.

9. მუშ კეთებას მიგეხვარებნა ღორონთიშ სიტყვა?

⁹ გეგმირინეთ ბიბლია თქვან დუდიშ გიმარკვიებელო. ღორონთიშ სიტყვა მოგენს სარკეს. თის შეულებ, ქუგოძირან, მუნერ რე თქვან ფიქრეფ, ჩიება დო საქმეეფ (იაკ. 1:22—25). მით ბიბლიას გოგურუანა ვარდა შხვა სულიერო მოწიფულ ქრისტიანქ შილებე რჩევა ქიმერჩან. მაგალთო, თინეფქ შილებე ბიბლიაშ გიმორნაფათ ქუგოძირან თქვან ძალიერ დო სუსტ მხარეეფ ვარდა შილებე თიშ გაგებას ქიმგეხვარან, მუჭო გორათ ბიბლიაშა გერსხილ ინფორმაცია, სოდეთ ქოძირუნთ, მუჭო ჩეთხინუათ გლახა ჩვევეფ. მუშო ოკო რაგად, იეჰოვა ირო მზათ რე თქვან მახვარებელო. თის არძაშ უჯგუშო უჩქჷ, მუჭო აკეთას თენა, მუშენდა ორწყე თქვან გურს (იგავ. 14:10; 15:11). თაშ ნამდა, ჩვევათ გიღდან ლოცვა დო ღორონთიშ სიტყვაშ ირ დღას გურაფა.

10. მუ დიგურეთ ილიშ მაგალითშე?

¹⁰ დარწმუნებულ რდათ, ნამდა იეჰოვაშ ნორმეფით ცხოვრება არძაშ უჯგუშ რე. ირფელს მუდგაშ კეთებას იეჰოვა ჩქინდე ითხინს, ჯგირობუა მოუღ. მით თიშ ნორმეფს მეჸუნს, დუდის დაფასებულო დო ბედნერო გინაფლენს დო უღჷ ცხოვრებაშ აზრ (ფსალმ. 19:7—11). თეშ გინაწონს, თინეფ მით იეჰოვაშ ნორმეფით ცხოვრებაშე ვარიას იჩიებნა, ზიანს მიორინუანა მუნეფიშ დუდის. ყურადღება ქიმიაქცით, მუს იჩიებ ართ კოჩ, სახელო ილი, ღორონთიშ ნორმეფშე გინორთაშ გურშენ. თინა იეჰოვაშ მოჸოროფე მშობლეფქ რდეს, მარა მოზარდობაშ პერიოდის გლახა საზოგადოებას ქაკათ. თიქ გლახა ცხოვრებას ქიმიაჸუნ, ნარკოტიკეფს ღებულენდჷ, უზნეოთ ცხოვრენდჷ დო ხირულენდჷ. ილი იჩიებ, ნამდა ჭიე-ჭიეთ ფიცხე კოჩო გინირთჷ დო თი ირფელს ორთუდ, მუთ უჩქუდ, ნამდა ქრისტიანს ვაფუდ ოკეთებელ. მარა ილის ვა გოჭყოლად ბაღანობას ნაგურეფ. საბოლათ თიქ კინ ქიდიჭყჷ ბიბლიაშ გურაფა. ილი ბრელს ხანდენდჷ, ნამდა ჩეთხინუკო გლახა ჩვევეფ დო 2000 წანას დინათ. მუ ჯგირობუა მოუღ თის იეჰოვაშ ნორმეფით ცხოვრებაქ? ილი იჩიებ: „ასე შინაგან სიმშვიდე დო სუფთა სინდის მიღჷ“.c მუჭოთ თე მაგალითშე ვორწყეთ, მით იეჰოვაშ ნორმეფს გინურთანს, ზიანს მიორინუანს მუშ დუდის, მარა იეჰოვა ირო მზათ რე, ქიმეხვარას თეცალ ადამიანს, ნამდა დითირას.

11. მუ ჯოგჷ იეჰოვას?

¹¹ გიჯოგეთ თინა, მუთ იეჰოვას ჯოგჷ (ფსალმ. 97:10). ბიბლია იჩიებ, ნამდა იეჰოვას ჯოგჷ „ამაყას იჯინენ ფერ თოლ, მეტყურე ნინა, ხელეფ ნამუთ ბრალ ვეგეძუნ ფერ ზისხირს ობუნს“ (იგავ. 6:16, 17). თეს გეძინელ, თის ჯოგჷ „ზისხირიშ დუმაბუნალ დო უბადობაშ მასხუნალ“ (ფსალმ. 5:6). იეჰოვას მანგარო ჯოგჷ თეცალ აზროვნება დო საქციელ. ზუსტას თეშ გურშენ თიქ ნოეშ პერიოდის მოსპჷ არძა უბადო მუშენ-და, თინეფქ უბადობათ გეიოფშეს დედამიწა (დაბ. 6:13). გუვარჩუათ მალაქიაშ მაგალით. იეჰოვაქ წინასწარმეტყველ მალაქიას ორაგადაფუ, ნამდა თის ჯოგჷ თინეფ, მით უსამართლოთ ითხინუანს მეუღლეს. ღორონთ ვა ღებულენს თინეფიშ თაყვანიშცემას დო პასუხის მოთხინს მუნეფიშ საქციელიშ გურშენ (მალ. 2:13—16; ებრ. 13:4).

12. მუს ნიშნენს უბადობაშ გოჯოგაფა?

¹² იეჰოვას ოკო, ნამდა გიბჯოგუათ უბადობა (რომ. 12:9). სიტყვა, ნამუთ გოჯოგაფათ რე თარგმნილ, ეჭარუნს ძალიერ ემოციას. თენა ნიშნენს, მანგარო რჯოგუდას მუდგარენ. წერმიდგინით, მუნერ რეაქცია გაღვენუდეს, მუჟამსით ართ სენ ჸორადილ ოჭკუმალს ქიმგარზიენდეს დო გიწინდეს, ნამდა ოიჭკუმუდესკო. თეშე ფიქრიქ ხოლო შილებე გლახათ გინგორთინუან. თეშნერო, თეცალ მუდგარენშე ფიქრ ხოლო, მუთ იეჰოვას ჯოგჷ მიუღებელ ოკო რდას ჩქინო.

13. მუშენ ოკო ჩეფთხინუათ გლახა ფიქრეფ?

¹³ ჩეთხინეთ გლახა ფიქრეფ. ჩქინ ფიქრეფ მოქმედენს ჩქინ საქმეეფშა, ათეშენ იესოქ დუმოგურეს, ჩეფთხინუათ თიცალ ფიქრეფ, მუდგაქ შილებე სერიოზულ ცოდვაშა ქიმემჸონან (მათ. 5:21, 22, 28, 29). ჩქი მოკონა, გურ გუხარათ ჩქინ ზეციერ მუმას, მუდგაშ გურშენ მანგარ მნიშვნელოვან რე, ხეთეშე ჩეფთხინუათ არძანერ გლახა აზრ, ნამდგაქ შილებე მომრთან.

14. მუს ოძირანს ჩქინ ჩიება დო მუ კითხვეფშე ოკო დეფიფქრათ?

¹⁴ ქიდეკვირით თქვან რაგადის. იესოქ თქუ: „კოჩ თის იჩიებ, მუთ გურს უღჷ“ (მათ. 15:18). თაშ რე, ჩქინ ჩიება ბრელ მუდგარენს ოძირანს თიშ გურშენ, სინამდვილეს მუნერ პიროვნებეფ ვორეთ. ათეშენ ოკო დეფიფქრათ: „თიმ დროს ხოლო, მუჟამსით სიმართლეშ რაგად უხერხულ მდგომარეობას ინმოჸოთანს, იშენით ქიფჩიებუქო თის? მუჭოთ დაქორწინებულ პიროვნება, დუდის ქურიდანქო საპირისპირო სქესიშ პიროვნებაწკუმა ფლირტის? ჭირცალო ქობჯოგუნო უზნეო სიტყვეფიშ გიმორნაფა? მშვიდას ქუვარზენქო პასუხის, მიდგა მაღიზიანენს?“. თეცალ კითხვეფშე ჯგირო დაფიქრებას შეულებ ჩქინ მოხვარა. მუჭოთ ბარგის ნაჭა აერთიანენს, თეშ გლახა სიტყვეფიშ გიმორნაფა ჯვეშ პიროვნებაწკუმა მაერთიანენა. თაშ ნამდა, ჯვეშ პიროვნებაშ ჩათხინაფა ქუმოკონან-და, ოკო მივოტუათ ტყურაშ რაგად, თეწკუმა ართო უზნეო დო შეურაცხმყოფელ სიტყვეფიშ გიმორნაფა.

15. მუს ნიშნენს ჩქინ „ჯვეშ პიროვნებაშ ძელს მიკოჭკადუა“?

¹⁵ მზათ რდათ, ნამდა დითირათ. პავლე მოციქულქ გიმირინუ მაგალით თიშ ეიოჭარალო, მუსხით სერიოზულო ოკო უჯინედათ ცხოვრებაშ წესიშ თირუას. თიქ ჭარჷ, ნამდა „ჩქინ ჯვეშ პიროვნება“ „ძელს ოკო ქიმკვოჭკადათ“ (რომ. 6:6). შხვა სიტყვეფით ქოფთქუათინ, ჩქი მოკონა, მივაჸუნათ ქრისტეშ მაგალითის. მზათ ოკო ვორდათ, ჩეფთხინუათ თი დამოკიდებულებეფ დო ჩვევეფ, ნამუთ ჯოგჷ იეჰოვას. ხვალე თე ნაბიჯეფიშ გინოდგუმაშ უკულ მაღვენუნა სუფთა სინდის დო მარადიულ ცხოვრებაშ შესაძლებლობა (იოან. 17:3; 1 პეტ. 3:21). რშუდან, ნამდა იეჰოვა დღას ვა თირანს მუშ ნორმეფს. თეშ მანგიორო, ჩქი ოკო დოფთირუათ ჩქინ პიროვნება დო მივაჸუნათ თიშ ნორმეფს (ეს. 1:16—18; 55:9).

16. მუშენ ოკო მაფდან გინოჭყვიდილ, ვებრძოლათ ხორციელ სურვილეფს?

¹⁶ ქებრძოლით ხორციელ სისუსტეეფს. თეშ კეთება ნათუაშ უკულ ხოლო მნიშვნელოვან რე. გუვარჩუათ მაურისიოშ მაგალით. ახალგაზრდობას თიქ ჰომოსექსუალურ ცხოვრებაშ წესის ქიმიაჸუნ. საბოლათ თიქ ქეშეხვად იეჰოვაშ მოწმეეფს დო ქიდიჭყჷ ბიბლიაშ გურაფა, დოთირუ მუშ ცხოვრება დო 2002 წანას დინათ. თიშ უმკუჯინუო, ნამდა ბრელ წანა რე, იეჰოვას ომსახურ, მაურისიო იჩიებ: „ოკო ქოფთქუე, ნამდა არასწორ სურვილეფს ამდღა ხოლო ვობრძოლუქ“. მარა თინა გურს ვეტახუნს დო აგრძელენს: „გურშა ელამკინანს თიშ რჩქინა, ნამდა თე სურვილეფს ვევაჸუნუქ-და, იეჰოვას გუხარენქ გურს“.d

17. მუჭო ელაიკინეს გურშა ნაბიჰაშ შემთხვევაქ?

¹⁷ იეჰოვას ქოთხით მოხვარა დო თქვან ძალას ვარინ, თიშ წმინდა შურს ქიმიენდით (გალ. 5:22; ფილ. 4:6). ჩქი ოკო გეგნობჭყვიდათ, ნამდა ჩეფთხინუათ ჯვეშ პიროვნება დო ვეგნურთათ თის. გუვარჩუათ ართ დაშ, ნაბიჰაშ, შემთხვევა. ამშვ წანერ რდუნ თეშ, თინა მუმაქ მიოტუ. ნაბიჰა იჩიებ: „თექ მანგარ ემოციურ ჭუა მუმორინუ“. თინა მუთ უმოსო ირდუდ, თით უმოს ფიცხე დო აგრესიულ რდჷ. ნაბიჰაქ ნარკოტიკეფით ვაჭრობა ქიდიჭყჷ, დაპატიმრეს დო მუსხირენ წანას ციხეს ხედჷ. ართშა იეჰოვაშ მოწმეეფქ თე ციხეს ქიდიჭყეს ქადაგება. ნაბიჰაქ ქიდიჭყჷ ბიბლიაშ გურაფა დო მუშ ცხოვრებაშ თირუა. თინა იჩიებ: „ნამთინე ჩვევა ადვილო მივოტე, მარა სიგარეტიშ მეტებაქ მანგარო გამჭირდჷ“. ნაბიჰა ართ წანაშე მეტ ხანს ობრძოლუდ თე გლახა ჩვევას დო საბოლათ გიორჯგინ თის. მუჭო შეიალებუ თექ? თინა იჩიებ: „პირველ რიგის, ირიათო ბლოცულენდჷ, მუდგაქ მიმეხვარ, მემტებუდკო თე გლახა ჩვევა“. თინა ასე შხვეფს ეჩიებ: „დარწმუნებულ ვორექ, მა ქეშმალებუ ჩქიმ პიროვნებაშ თეცალო თირუაქ-და, თენა ნებისმიერს შეიალებე!“.e

თქვა შეილებნა დოთირუათ ცხოვრებაშ წეს დო დინათათ!

18. მუშ კეთებაქ შეიალებუ ღორონთიშ ბრელ მსახურს, მუჭოთ თეს 1 კორინთელეფიშ 6:9—11-ის ვორწყეთ?

¹⁸ პირველ საუკუნეს, ნამთინე ქომოლკოჩის დო ოსურკოჩის, ნამუთ იეჰოვაქ ქრისტეშ თანამართველეფო გიშეგორ, ულირს გლახა ჩვევეფ უღუდ. მაგალთო, თინეფ რდეს მრუშეფ, ჰომოსექსუალეფ დო მახირალეფ. ღორონთიშ წმინდა შურიშ მოხვარათ, თინეფს შეიალებუეს, დოთირუესკო მუნეფიშ პიროვნება (წეკითხით 1 კორინთელეფიშ 6:9—11). თეშნერო, ბიბლია ამდღა ხოლო ოხვარ მილიონობით ადამიანს, დოთირუას მუშ ცხოვრება.f თინეფქ ჩეთხინეს გლახა ჩვევეფ. თე კათაშ მაგალითეფ ამტკიცენს, ნამდა თქვა ხოლო შეილებნა დოთირუათ თქვან პიროვნება დო ჩეთხინუათ გლახა ჩვევეფ, ნამდა მზათ ქიჸუათ ნათუაშო.

19. მუს გუვარჩიენთ უკულიან სტატიას?

¹⁹ თეს გეძინელ, მით ითხინუანს ჯვეშ პიროვნებას დო ოკო ნათუა, ირფელ ოკო გაკეთას, ნამდა დითირას ახალ პიროვნებათ. უკულიან სტატიას გუვარჩიენთ, მუჭო შემლებნა თეშ კეთება დო მუჭო შეულებნა შხვეფს ჩქინ მოხვარა.