ნათუაშ უკულ ხოლო ვემიოტუათ „ახალ პიროვნებათ თირუა“

1. მუჭო მოქმედენს აზროვნება ჩქინ პიროვნებაშა?

ახალ ნანათა ვორეთ დოვარ ბრელ ხანიშ, არძას მოკონა, იეჰოვაშ მოსაწონეფ ვორდათ. თეშო საჭირო რე, ჩქინ აზროვნებას ქიმვაქცუათ ყურადღება. თენა მნიშვნელოვან რე, მუშენდა მუნერ აზროვნება მიღნან, თიცალ პიროვნება ვორეთ. მაგალთო, ირიათო ხორციშ სურვილეფშენ ქიფიფქრით-და, გლახა მუდგარენს ქოფთქუანთ დო გუვაკეთენთ (ეფეს. 4:17—19). თეშ გინაწონს, მუჟამსით გონებას ჯგირ აზრეფით გევოფშანთ, უმოსო რე შეიოლებერ, იფჩუათ დო იმოფქმედათ ჩქინ ზეციერ მუმაშ მოსაწონო (გალ. 5:16).

2. ნამ კითხვეფს მიაჩამუ პასუხ თე სტატიას?

² მუჭოთ წოხოლენ სტატიას მიფშინეთ, მუდგარენ გლახა ფიქრ არძას მუმალენა გონებაშა. მარა ჩქი შემლებნა, ვევაჸუნათ თეცალ ფიქრეფს. ნათუაშახ ოკო მივოტუათ თიცალ ჩიება დო მოქმედება, მუნერით იეჰოვას ჯოგჷ. თენა რე პირველ დო არძაშ უმოს დიდ ნაბიჯ ჯვეშ პიროვნებაშ ჩათხინაფალო. მარა იეჰოვას გურ ბოლოშა გუხარათინ, საჭირო რე, დევემორჩილათ მითითებას: „დითირით ახალ პიროვნებათ“ (კოლ. 3:10). თე სტატიას პასუხის ქიმეფჩანთ კითხვეფს: მუ რე „ახალ პიროვნება“? მუჭო შემლებნა, დიფთირათ „ახალ პიროვნებათ“ დო მუკულუათ თის?

მუ რე „ახალ პიროვნება“?

3. მუჭოთ გალატელეფიშ 5:22, 23-შე იძირე, მუ რე „ახალ პიროვნება“ დო მუჭო ოძირანს ადამიან, ნამდა ითირუ?

³ თინა, მით „ახალ პიროვნებათ“ ითირუ, მეჸუნს იეჰოვაშ აზროვნებაშ დო მოქმედებაშ მაგალითის. ადამიან ახალ პიროვნებათ ითირუ, მუჟამსით გიმირჩქინანს ღორონთიშ წმინდა შურიშ ნაყოფის დო საშვალებას არზენს წმინდა შურს, ქიმოქმედას მუშ ფიქრეფ, გრძნობეფ დო მოქმედებეფშა (წეკითხით გალატელეფიშ 5:22, 23). მაგალთო, თის უჸორს იეჰოვა დო თიშ ხალხ (მათ. 22:36—39). ვადინუანს ხიოლს სირთულეეფიშ დროს (იაკ. 1:2—4). ხეს უნწყუნს მშვიდობას (მათ. 5:9). მოთვინებას დო სიკეთეს გიმირჩქინანს შხვეფიშ მიმართ (კოლ. 3:13). უჸორს ჯგირიშ კეთება (ლუკ. 6:35). მუშ საქმეეფით ოძირანს, ნამდა ძალიერ რწმენა უღჷ ზეციერ მუმაშ მიმართ (იაკ. 2:18). ვადინუანს სიმშვიდეს, მუჟამსით თიშ გაღიზიანებას ოცადნა დო ვეჸუნს ცდუნებას (1 კორ. 9:25, 27; ტიტ. 3:2).

4. მუშენ რე საჭირო გალატელეფიშ 5:22, 23-ს დო ბიბლიაშ შხვა მონაკვეთეფს მოშინაფილ არძა ჯგირ თვისებაშ გავითარება ახალ პიროვნებათ ოთირალო?

⁴ ახალ პიროვნებათ ოთირალო საჭირო რე, გუვავითარათ გალატელეფიშ 5:22, 23-ს დო ბიბლიაშ შხვა მონაკვეთეფს მოშინაფილ არძა ჯგირ თვისება.b თე თვისებეფ ართიანწკუმა მანგარო რე დაკავშირებულ დო ათეშენ, დასაბაღ ვა რე ხვალე ნამთინე თვისებაშ გიმორჩქინა. მაგალთო, მოყვას მთელ გურით ქომიჸორან-და, მუთვინენთ დო ჯგირს გუკეთენთ. თეწკუმა ართო, ლიბ ხასიათიშ დო დუდშეკებაშ გიმოხანტუათ სიჯგირას გეგმიფრჩქინანთ.

მუჭო შემლებნა „ახალ პიროვნებათ“ თირუა?

5. მუს ნიშნენს, მიღდან „ქრისტეშ გონება“ დო მუშენ ოკო გებგათ თიშ გურშენ უმოს? (1 კორ. 2:16).

⁵ (წეკითხით 1 კორინთელეფიშ 2:16). ახალ პიროვნებათ დიფთირათინ, საჭირო რე, მიღდან „ქრისტეშ გონება“. თენა ნიშნენს, ქიგებგათ იესოშ აზროვნება დო მივაჸუნათ თიშ მაგალითის. იესო სრულყოფილო გიმირჩქინანს ღორონთიშ შურიშ ნაყოფის; თინა ზუსტას იეჰოვაცალო გიმოხანტუნს თიშ თვისებეფს (ებრ. 1:3). მუთ უმოსო მაღვენუნა იესოცალ აზროვნება თით უმოსო ქუვაგურუთ თიშ პიროვნებას (ფილ. 2:5).

6. მუქ ოკო ვაგმოჭყორდან, მუჟამსით ვოცადუთ ახალ პიროვნებათ თირუას?

⁶ ქორენო შეიოლებერ, მივაჸუნათ იესოშ მაგალითის? შილებე იფიფქრათ: „იესო სრულყოფილ რე, მა დღას ვეშმალებე ზუსტას თიცალ ვორდე“. თაშ ქოფიფქრენთ-და, საჭირო რე, ვაგმოჭყორდან: პირველ, ჩქი გოჭყაფილ ვორეთ იეჰოვა დო იესოცალო, ათეშენ თავისფალო შემლებნა, მივაჸუნათ თინეფიშ მაგალითის დო წარმატებას ხოლო ქიმვოჭირინუათ (დაბ. 1:26). მაჟია, ღორონთიშ წმინდა შურ სამყაროს არძაშ უმოს დიდ ძალა რე. თიშ მოხვარათ შემალებენა თიცალ მუდგარენ, მუთ ჩქინით დღას ვა მაკეთებედეს. მასმა, იეჰოვა ველჷ, ნამდა წმინდა შურიშ ნაყოფის სრულყოფილო გეგმიფრჩქინანთ. სინამდვილეს, ჩქინ ზეციერ მუმაქ გასრულყოფილებაშო ანთას წანა მეჩჷ თინეფს, მიდგას დედამიწას ცხოვრებაშ იმენდ უღნა (გამოცხ. 20:1—3). ამდღა იეჰოვა ჩქინდე ხვალე თის ითხინს, ნამდა ნამ შემლებნა თინა გუვაკეთათ დო მუშ მოხვარაშ იმენდ მიღდან.

7. მუს გუვარჩიენთ ასე?

⁷ კონკრეტულო მუ ოკო ვაკეთათ, ნამდა მივაჸუნათ იესოშ მაგალითის? ასე გუვარჩიენთ ღორონთიშ წმინდა შურიშ ნაყოფიშ ოთხ თვისებას დო ქობძირუნთ, მუჭო გიმირჩქინანდჷ იესო თე თვისებეფს დო ჩქი მუს ბგურაფლენთ თავრეშე; თეწკუმა ართო, გუვარჩიენთ მუსხირენ კითხვას, ნამუთ მიმეხვარებნა, გუვაუჯგუშათ ჩქინ ახალ პიროვნება.

8. მუჭო გიმირჩქინ იესოქ ჸოროფა?

⁸ იესოს იეჰოვაშ დიდ ჸოროფაქ გინაჭყვიდირაფუ, მსხვერპლშა მიდართკო მუშ მუმაშ დო ჩქინ გურშენ (იოან. 14:31; 15:13). დედამიწას ცხოვრებაშ დროს იესოქ ქაძირუ, მუზმათ უჸორდჷ ხალხ. თინა ირდღას გიმირჩქინანდჷ ჸოროფას დო მიშეშ შხვეფიშ მდგომარეობაშა თიმწკუმა ხოლო, მუჟამსით ოწინააღმდეგდეს. მთავარ, მუდგათ იესო ხალხიშ ჸოროფას გიმირჩქინანდჷ, თინეფშა ღორონთიშ სამეფოშ გურშენ გურაფა რდჷ (ლუკ. 4:43, 44). იესოქ ღორონთიშ დო ადამიანეფიშ მიმართ დუდგინოდვალირ ჸოროფა თით ხოლო ოძირუ, ნამდა მზათ რდჷ, დეტანჯუკო დო დოღურკო ცოდვილეფიშ ხეშე. თეშნერო თიქ არძას ქომჩეს მარადიულ ცხოვრებაშ საშვალება.

9. მუჭო შემლებნა, იესოშ ჸოროფაშ მაგალითის მივაჸუნათ?

⁹ ჩქი დუდ მეუძღვინით იეჰოვას დო დიმნათით, მუშენდა მიჸორა თინა. იესოცალო, ღორონთიშ ჸოროფა ხალხიშ მიმართ ჩქინ დამოკიდებულებათ ოკო ქუვოძირათ. მოციქულ იოანექ ჭარჷ: „მიდგას მუშ ჯიმა ვა უჸორს, ნამდგას ორწყე, ვეშიალებე უჸორდას ღორონთ, ნამდგას ვარწყე“ (1 იოან. 4:20). შემლებნა ჩქინ დუდის ბკითხათ: „ქომღუნო ხალხიშ მიმართ ჸოროფა? ქიმშურქო შხვეფიშ მდგომარეობაშა, მუჟამსით თინეფ ჯგირო ვა მოქცუნა? გინმოჭყვიდრაფუანსო ჸოროფა, ჩქიმ დრო დო შესაძლებლობეფ გეგმიბრინუე თიშო, ნამდა ხალხის ქიმვეხვარე იეჰოვაშ გაჩინებაფას? თიმწკუმა ხოლო გუვაკეთენქო თეს, მუჟამსით უმენტაშ ვა დაფასენს ჩქიმ მონდომას ვარდა ქიმეწინააღმდეგებ? ქეშემლებნო უმოს დრო გეგმურთე მოწაფეეფიშ მომზადებას?“ (ეფეს. 5:15, 16).

10. მუჭო უნწყუნდჷ იესო ხეს მშვიდობას?

¹⁰ იესო მშვიდობას უნწყუნდჷ ხეს. მუჟამსით იესოს გლახათ ოქცუდეს, თინა უბადობას უბადობათ ვა პასუხენდჷ, პირველ ნაბიჯის გინოდგუნდჷ მშვიდობაშო დო შხვეფს ხოლო ელუჩანდჷ თეს. მაგალთო, იესო ხალხის ოგურუანდჷ, ნამდა იეჰოვაქ თინეფიშ თაყვანიშცემა მიღკონ, ართიანწკუმა მშვიდობა ოკო უღდესკო (მათ. 5:9, 23, 24). თინა ელუჩანდჷ მოციქულეფს, მიოტუესკო თიშე ნირზ, მის უკინებუდ თინეფ შქას უდიდაშ ადგილ (ლუკ. 9:46—48; 22:24—27).

11. მუჭო შემლებნა, ხე შეუნწყუათ მშვიდობას?

¹¹ შილებე ჩქინ მიზეზით ვა ხვადუდას უთანხმოება, მარა თენა ვა ნიშნენს, ნამდა მშვიდობაშ ხეშემანწყუალეფ ვორეთ. საჭირო რე, პირველ ნაბიჯ გეგნობდგათ შხვეფწკუმა მშვიდობაშ დართინაფალო დო და დო ჯიმალეფს ხოლო ქელუჩათ, თაშ გაკეთან (ფილ. 4:2, 3; იაკ. 3:17, 18). შემლებნა ჩქინ დუდის ქობკითხათ: „მუ მსხვერპლშა შემლებ იბდე, ნამდა მშვიდობა დიფრთინუე შხვეფწკუმა? მუჟამსით ჯიმა ვარდა და მოწყინებაფუანს, გურმოულირ ხომ ვა დოფსქიდუქ? შხვას უჯინექო, მუჟამ გინოჭყვიდუნს მშვიდობაშ დორთინაფას დოვარ მა გინობდგუნქ პირველ ნაბიჯის, თიმწკუმა ხოლო, მუჟამსით თიშ ბრალ რე? თენა უადგილო ვა რენ-და, ქელუჩანქო მშვიდობაშა თინეფს, მიდგას უთანხმოება უღნა ართიანწკუმა?“.

12. მუჭო გიმირჩქინ იესოქ სიკეთე?

¹² იესო გიმირჩქინანდჷ სიკეთეს (მათ. 11:28—30). თინა თეს ლიბ ხასიათით დო შხვეფიშ დათმობათ ორთუდ. მაგალთო, მუჟამსით ფინიკიელ ოსურკოჩიქ თხუ, ნამდა მუშ სქუა დუსქილიდუაფუდკო, იესოქ დუდშე ვარია უწუ, მარა, მუჟამსით თე ოსურკოჩიშ ძალიერ რწმენა ქოძირ, სიკეთე გეგმირჩქინ დო დასქილიდუ თიშ სქუა (მათ. 15:22—28). მუშო ოკო რაგად, თინა კეთილ რდჷ, მარა საჭირო დროს რჩევაშ მეჩამას ხოლო ვა ურიდანდჷ დუდის. მინშა მუშ სიმტკიცეთ გიმირჩქინანდჷ სიკეთეს თინეფიშ მიმართ, მით უჸორდჷ. მაგალთო, მუჟამსით პეტრექ ეცად, გეგნაფიქრებაფუკო იეჰოვაშ ნებაშ შესრულება, იესოქ შხვეფიშ წოხოლე შეუსწორ აზროვნება (მარ. 8:32, 33). იესოს თეთ პეტრეშ დამცირება ვაკოდ, თის ოკოდ, ქუდაგურუკო დო შხვეფ ხოლო გაფრთხილკო, ნამდა ზედმეტიშ უფლება ვემეჩესკო მუნეფიშ დუდის. მუშო ოკო რაგად, პეტრე უხერხულო ქიგინანდჷ დუდის, მარა თის ჯგირობუას მუღანდჷ თე გურაფა.

13. მუჭო შემლებნა სიკეთეშ გიმორჩქინა?

¹³ მიჸორან თინეფიშ მიმართ სიკეთე გეგმიფრჩქინათინ, შილებე საჭირო ქიჸუას ალალას ჩიებაქ. თე დროს მიაჸუნით იესოშ მაგალითის დო თქვან რჩევა ღორონთიშ სიტყვას მოჩამილ პრინციპეფს ქიგიორსხეთ. გეგმირჩქინით ლიბ ხასიათ. რჯერდან, ნამდა თინეფს ოკონა სწორიშ კეთება, უჸორა იეჰოვა, უჸორთ თქვა დო მიღენა თქვან რჩევას. ქოკითხით თქვან დუდის: „ქომღუნო გაბედულება, ორაგადე ქოფთქუე, მუჟამსით ვორწყექ, ნამდა პიროვნება, ნამუთ მიჸორს, მუდგარენ გლახას ორთჷ? მუჟამსით რჩევა მაფჷ მიოჩამალ, გემუანო ვაკეთენქ დოვარ უხეშო? მუ მოტივით ვარზენქ რჩევას? თეს თიშენ ვორთუქო, ნამდა თი პიროვნება მაღიზიანენს დოვარ მოკო, მივეხვარე?“.

14. მუჭო გიმირჩქინანდჷ იესო სიჯგირას?

¹⁴ იესოს უჩქჷ, მუ რე ჯგირ, მარა ხვალე რჩქინას ვეგეჯერდუ, თინა აკეთენს ჯგირს. იესოს უჸორს მუშ მუმა, ათეშენ ირო ჯგირ მოტივით ორთჷ ჯგირ საქმეეფს. თვისება სიჯგირა შხვეფწკუმა ურთიერთობაშ დროს მიკორჩქინდუ, თინა რე აქტიურ მოქმედება შხვეფიშ საჯგირობუოთ. ხვალე თიშ რჩქინა ვა რე დასაბაღ, მუშ კეთება რე ჯგირ, ჩქი ოკო ვაკეთათ ჯგირ საქმეეფ ჯგირ მოტივით. ნამთინექ შილებე იკითხას: „ქორენო შეიოლებერ ჯგირ საქმეშ გლახა მოტივით კეთება?“. თენა შეიოლებერ რე. მაგალთო, იესო იჩიებუდ თიცალ ადამიანეფიშ გურშენ, მით გაჭირებულიშ მიმართ ჭყოლოფას შხვეფიშ ოძირაფალო გიმირჩქინანდეს. მართალ რე, თენა ჯგირ საქმე რდჷ, მარა იეჰოვა ვეწონუანდჷ თეს (მათ. 6:1—4).

15. განსაკუთრებულო მუ შემთხვევას გიმიფრჩქინანთ სიჯგირას?

¹⁵ სიჯგირას განსაკუთრებულო თიმწკუმა გეგმიფრჩქინანთ, მუჟამსით ჯგირ საქმეეფს თიშენ ვა ვორთუთ, ნამდა ჩქი მიბღათ სარგებელ. ქოკითხით თქვან დუდის: „უბრალოთ მიჩქუნო, მუშ კეთება რე ჯგირ დო ვარ ვორთუქ თის? მუ მოტივით ვორთუქ ჯგირ საქმეეფს?“.

მუჭო შემლებნა მუკულუათ „ახალ პიროვნებას“?

16. მუ ოკო ვაკეთათ ირდღას დო მუშენ?

¹⁶ ვეფიფქრათ, ნამდა ნათუათ ითებ ახალ პიროვნებათ გინორთა. საჭირო რე ჩქინ სქვამ დო ახალ პიროვნებას მუკულუათ. თეს გუვაკეთენთ, მუჟამსით ირდღას ქივეცადებუთ, დობგორათ ღორონთიშ წმინდა შურიშ გიმორჩქინაშ საშვალებეფ. მუშენ რე თეშ კეთება საჭირო? იეჰოვა ირო მოქმედენს დო თიშ წმინდა შურ ხოლო მოქმედ ძალა რე (დაბ. 1:2). წმინდა შურიშ ნაყოფიშ არძა თვისებას შეულებ დო ქოთ ოკო აღბძრან მოქმედებაშა. მაგალთო, იაკობიქ ჭარჷ: „რწმენა საქმეეფიშ უმშო ღურელ რე“ (იაკ. 2:26). იგივეშ რაგად შილებე წმინდა შურიშ შხვა თვისებეფიშ გურშენ ხოლო. ირო, მუჟამსით წმინდა შურიშ ნაყოფის გიმიფრჩქინანთ, ვოძირანთ, ნამდა ღორონთიშ ძალა ჩქინდა მოქმედენს.

17. მუჭო ოკო მიფქცუათ, მუჟამსით წმინდა შურიშ გიმორჩქინა მიჭირა?

¹⁷ ბრელ ხანიშ ნათილ ქრისტიანეფს ხოლო მინშა შილებე წმინდა შურიშ ნაყოფიშ გიმორჩქინაქ გაუჭირდან, მარა მთავარ რე, გურქ ვეუოლან. ქიმიპჸუნათ თეცალ მაგალით: თქვა გიჸორან ფერ ბარგიქ ჭიჭეთ ქიმკოიხორცქეს-და, ხეთეშე გინაჸათანთო თის? მუშო ოკო რაგად, ვარ. თქვა ალბათ ქეშეცადებუთ, სქვამაშე გელაჭუათ თინა დო უკულიანშო უმოს ყურადღებით იჸუათ. თეშნერო, მითინწკუმა ურთიერთობაშ დროს სიკეთეშ, მოთვინებაშ ვარდა ჸოროფაშ გიმორჩქინაქ ვეშქალებუეს-და, გურ ვეგიტახათ. მთელ გურით მობოდიშებას შეულებ პიროვნებაწკუმა ჯგირ ურთიერთობა დოირთინუან. თეშ უკულ გინოჭყვიდილ გაფდან, უმოს ყურადღებით რდათ.

18. მუშა შემლებნა ვორდათ დარწმუნებულ?

¹⁸ მანგარ მარდულ ვორეთ, ნამდა იესოქ მაგალით დომტუეს. მუთ უმოსო მივაჸუნუთ თიშ აზროვნებაშ დო დამოკიდებულებაშ მაგალითის, თით უმოს ადვილ მაჸინა თიცალო მოქმედება, დო მუთ უმოსო იმოფქმედენთ იესოცალო, თით უმოსო დოფთირანთ ჩქინ დუდის ახალ პიროვნებათ. თე სტატიას წმინდა შურიშ ხვალე ოთხ თვისება გუვარჩით. ჯგირ იჸუაფ, დრო გეგშურთათ შხვა თვისებეფიშ გარჩიებას ხოლო დო ქიდვეკვირათ, მუჭო გიმიფრჩქინანთ თინეფს. თეწკუმა დაკავშირებით შეილებნა ქოძირათ „იეჰოვაშ მოწმეეფიშ ორკვიებელ სახემძღვანელოს“ თემას, „ქრისტიანულ ცხოვრება“, „შურიშ ნაყოფ“. შეილებნა დარწმუნებულ რდათ, ნამდა თქვან ოკეთებელს გაკეთენთ-და, იეჰოვა ქიმგეხვარებნა, დითირათ ახალ პიროვნებათ დო მუკულუათ თის.