1921 ოშ წანაშ წოხოლე

1921 წანაშ 1 იანარიშ „გინაჯინალ კოშკის“ ბიბლიაშ მარკვიებელეფშო თეცალ კითხვა რდჷ მოჩამილ: „მუ საქმე მელნა თე წანას?“. თეშ პასუხო მოჩამილ რდჷ ესაიაშ 61:1, 2: „იეჰოვაქ გიშაბგორ თვინიერეფშა სახიოლო ამბეშ გინაჩამალო . . . იეჰოვაშ ჭყოლოფაშ წანაშ დო ჩქინ ღორონთშე მანგიორიშ გინოგაფაშ დღაშ გაცხადებელო“. თენა ბიბლიაშ მარკვიებელეფს გაშინანდჷ მუნეფიშ დავალებას, იქადაგესკო სახიოლო ამბე.

გაბედულ მაქადაგებელეფ

ქადაგებაშ საქმეშო ბიბლიაშ მაგურაფალეფს გაბედულება ოსაჭირდეს. თინეფს თანდაბლეფშა „სახიოლო ამბე“ ოკო უქადაგებდესკო დო უბადოეფშა „მანგიორიშ გინოგაფაშ დღაშ“ გურშენ ხოლო ოკო გუცხადებდესკო.

ჯიმა ჰოსკინი, ნამუთ კანადას ცხოვრენდჷ, წინააღმდეგობაშ უმკუჯინუო, გაბედულო ქადაგენდჷ. 1921 წანაშ გაზაფხულს თიქ მეთოდისტ მაქადაგებელს შეხვად. ჯიმა ჰოსკინქ ჩიება თეცალ სიტყვეფით დიჭყჷ: „ჩქი წმინდა წერილეფშე ნირზიშ უმშო ოკო იფჩუათ დო, თიმწკუმა ხოლო, მუჟამსით შხვადოშხვანერ აზრ მაღვენუნა, შემლებნა მშვიდას და მეგობრულო გუვათუათ ჩიება“. მარა თექ თაშ ვა მოხვად; ჯიმა ჰოსკინი გეუძინანს: „რაგადიშ დოჭყაფაშე მუსხირენ წუთშა, თე მაქადაგებელქ სარკეამ კარ თიცალ მანგარო ქიმიორაგვინუ, ნამდა იფიფქრჷ, თინა ტვერო გინირთუდ“.

„მუშენ ვემურქ დო ვა უქადაგენქ თინეფს, მით ვა რენა ქრისტიანეფ?“ — გეუღვარუ მეთოდისტ მაქადაგებელქ ჯიმა ჰოსკინს. თის პასუხ ვემუჩამ, მარა გურს იფიქრჷ: „სქანწკუმა ჩიებაშ უკულ, ფიფქრენქ, უკვე ქივეჩი თეცალ ადამიანს“.

მუჟამსით მაჟია დღას თე პიროვნება მუშ ეკლესიას ქადაგენდჷ, კინ გაგრძელ ჯიმა ჰოსკინიშ გურშენ გლახა მუდგარენეფიშ რაგად. ჯიმა ჰოსკინი იშინანს: „თიქ ხალხის უწუ, ნამდა მა ვორდჷ არძაშე უმოს დიდ მეტყურე, მიდგას თე ქალაქშა მურთუმ, ათეშენ ოკო დოპჸილესკო“. მარა, თეშ უმკუჯინუო, ჯიმა ჰოსკინს ვემუტებ ქადაგება დო წარმატებას ხოლო ქიმიოჭირინუ. თინა გეუძინანს: «თექ მსახურებას ჩქიმდა მანგარ ხიოლ მოუღუდ. ნამთინე მირაგადუდ: „მიჩქ, ნამდა სი ღორონთიშ კოჩ რექ!“ დო მოკითხუდ, მუთუნ ხომ ვა მოსაჭირუდ».

პირად დო ოჯახურ გურაფა

დაინტერესებულეფიშ მახვარებელო, ბიბლიაშ მარკვიებელეფქ გეგშაშქვეს ბიბლიაშ ოგურაფალ პროგრამა ჟურნალს „ოქროშ ხანა“.a თექ მოჩამილ რდჷ ბიბლიურ კითხვეფ ახალგაზრდეფშო, ნამდგაშ გარჩიება მშობლეფს მუნეფიშ სქუალეფწკუმა შეულებდეს. თინეფ ქუდუსვენდეს სქუალეფს თე კითხვეფს დო უკულ ქიმეხვარებდეს ბიბლიას პასუხეფიშ გორუას. ნამთინე კითხვა, მუნერით რე: „მუსხი წიგნშე შითმოდირთუ ბიბლია?“, ოგურუანდჷ ძირითად საკითხეფს ბიბლიაშე. შხვა კითხვეფ, მაგალთო, „ჭეშმარიტ ქრისტიანეფშე არძა ოკო ელდასო თხოზინს?“, ამზადენდჷ ახალგაზრდეფს, ნამდა გაბედულ მაქადაგებელეფ ჸოფედესკო.

თეს გეძინელ, თინეფშო, მიდგას მეტ რჩქინა უღუდ ბიბლიაშ გურშენ, ხეშამალაფარ რდჷ ბიბლიურ კითხვეფ დო პასუხეფ. თე პასუხეფიშ გორუა შილებედ წიგნიშ „წმინდა წერილიშ გიმორკვიება“ პირველ ტომს. ანთასობით მკითხველქ სარგებელ მიღჷ თე პროგრამაშე, მარა 1921 წანაშ 21 დეკემბერიშ „ოქროშ ხანაშ“ გიშაშქუმალას რაგადებულ რდჷ, ნამდა თე პროგრამეფ მეტო ვეჸუაფუდ. მუშენ მოხვად თე ცვლილებაქ?

ახალ წიგნ!

წიგნ „ღორონთიშ ქნარ“

ბარათ, სოდეთ მოჩამილ რე ოკითხე დავალება

ბარათ, სოდეთ მოჩამილ რე კითხვეფ

ხემძღვანელ ჯიმალეფქ ქიმეხვადეს, ნამდა ბიბლიაშ ახალ მაგურაფალეფს ძირითად ბიბლიურ საკითხეფიშ ინანჭაფალო რეგულარულ გურაფა ოსაჭირდეს. ათეშენ 1921 წანაშ ნოემბერს გიშაშქუმალირქ იჸუ წიგნიქ „ღორონთიშ ქნარ“. დაინტერესებულეფს, მით თე წიგნის მიღენდეს, შეულებდეს დამოუკიდებელო დიჭყესკო ბიბლიაშ გურაფაშ კურს. თე კურსიქ ადამიანეფს მეხვარ, ქიგეგესკო ღორონთიშ განზრახვა მარადიულ ცხოვრებაწკუმა დაკავშირებით. მუ შედეგიქ მაჸუნ თეს?

მუჟამსით პიროვნება მიღენდჷ თე წიგნის, თინა ჭიჭე ბარათის გეჭარილ ოკითხე დავალებას ხოლო ღებულენდჷ. უკულიან მარას თინა კინ ღებულენდჷ ბარათის, სოდეთ ნაკითხირწკუმა დაკავშირებით კითხვეფ რდჷ მოჩამილ. ბარათიშ ბოლოს ჭარილ რდჷ ოკითხე დავალება უკულიან მარაშო.

12 მარაშ დინახალე ბიბლიაშ მაგურაფალ ირმარას ღებულენდჷ ახალ-ახალ ბარათის ადგილობრივ კრებაშე. ხშირ შემთხვევას ბარათეფს კრებაშ უხუცესეფ ვარდა შეზღუდულ შესაძლებლობაშ და დო ჯიმალეფ ოჯღონანდეს. მაგალთო, ანა გარდნერი (აშშ) იშინანდჷ: «მუჟამსით წიგნიქ „ღორონთიშ ქნარ“ გიშართჷ, ჩქიმ დას, ტაილს, ნამდგას გილულა ვეშულებუდ, მეტიშ კეთებაშ საშვალებაქ ქიმიაჩ. თინა ირმარას ბიბლიაშ მაგურაფალეფს ბარათეფს უჯღონანდჷ». გურაფაშ კურსიშ თებაშ უკულ მაგურაფალს კრებაშე მიდგაინ აკითხანდჷ, ნამდა ბიბლიაშე მეტიშ გაგებას ქიმეხვარკო.

საქმე წიმი მიღნა

ჯიმა რუტერფორდიქ წანაშ ბოლოს არძა კრებას წერილ ქუჯღონ. თინა იჩიებუდ: „თე წანას, ულირწკუმა შედარებით, სამეფოშ გურშენ დამოწმებაშ საქმექ უმოს ადამიანშა ქიმიოჭირინუ დო უმოს შედეგიან რდჷ“. უკულ თიქ გეუძინ: „ხოლო ბრელ რე ოკეთებელ. ქიმეხვარით შხვეფს, თე დიდებულ საქმეს მონაწილებაშ მეღება ქიდიჭყან“. მუჭოთ იძირ, ბიბლიაშ მარკვიებელეფქ ქიმიაჸუნეს თე რჩევას. 1922 წანას, თინეფ სარკო გაბედულებათ ქადაგენდეს ცნობას სამეფოშ გურშენ.

გაბედულ მეგობრეფ

ბიბლიაშ მარკვიებელეფ ჯიმალურ ჸოროფას გიმირჩქინანდეს დო ართიანს ოხვარდეს. მუჭოთ თუდო მოჩამილ შემთხვევაშე იძირე, თინეფ „გაჭირებაშო დაბადებულ“ გაბედულ მეგობრეფ რდეს (იგავ. 17:17).

1921 წანაშ 31 მესის, თახაშხა დღას ტულსას მახორუ უჩაკანამ კოჩის ბრალ ქიგედვეს ჩეკანამ ოსურშა ძალადობაშ გურშენ დო ციხეს ქუდახუნეს. თიშ უკულ, მუთ 1 000 ჩეკანამ ქომოლკოჩიქ ჩხუპ ქუდუჭყჷ უჩაკანამ ქომოლკოჩეფიშ უმოს ჭიჭე ჯგუფის, ჩხუპიქ გრინვუდიშ ტერიტორიას მადვჷ, სოდეთ მახორუეფიშ უმენტაშ უჩაკანამ რდჷ. 1 400-შე მეტ ჸუდე დო კომერციულ შენობა გოხირეს დო უკულ გეგნოჭვეს. გავრცელებურ ოფიციალურ ინფორმაციათ 36 ადამიან ჸვილეს, მარა სინამდვილეს ოშობით ადამიან რდჷ ღურელ. უმოს გვიანო თე შემთხვევას გიოდვეს „უდუნდებელ რასობრივ ჸვილუეფ ტულსას“.

ჯიმა რიჩარდ ჰილი, უჩაკანამ ბიბლიაშ მარკვიებელ დო გრინვუდიშ მახორუ, იშინანს: „აბუნტება სერს კრებაშ შეხვალამა მიღდეს. თიშ თებაშ უკულ, ქალაქიშ ცენტრშე იარაღიშ ჸოთამაშ ხონარ ქიგებგონით, მუდგაქ გვიანშახ გეგრძელ“. 1 ივანობას, ჯუმაშხა ოჭმარეს, სიტუაციაქ უმოსო გეუფრაშ. თინა გეუძინანს: „ნამთინექ ქუმორთჷ დო მიწის, ნამდა დუდიშ თხილუა ქუმოკოდეს-და, ქალაქიშ ართ-ართ მუნიციპალურ შენობაშა ოკო მიდამრთუმდესკო“. ათეშენ ჯიმა რიჩარდიქ ხეთეშე მუშ მეუღლე დო ხუთ სქუაწკუმა ართო თე შენობაშა მიდართჷ. თექ სოდგარენ 3 000 უჩაკანამ ქომოლკოჩ დო ოსურკოჩ რდჷ. თინეფს თხილანდეს მთავრობაშე დანიშნულ ჯარიშკოჩეფ, მიდგას არეულობაშ დაწყნარება ოვალდეს.

თე დროს ჯიმა არტურ კლაუსიქ, ნამუთ ჩეკანამ რდჷ, გაბედულ გადაწყვეტილება მიღჷ. თინა იშინანს: „მუჟამსით ქიგებგჷ, ნამდა აბუნტებულეფ გრინვუდის ჸუდეეფს ხირუნდეს დო გინოჭუნდეს, გეგნობჭყვიდ, თექ მიდაფრთკო დო ქიგებგიკო, მუ მდგომარეობას რდჷ ჩქიმ ძვირფას მეგობარ, რიჩარდი“.

ჯიმა არტურ კლაუსი, წიგნიშ „ღორონთიშ ქნარ“ გიმორნაფათ, 14 ბაღანას ოგურუანდჷ ბიბლიას

თექ ქიმერთუნ, თინა რიჩარდიშ ჩეკანამ მეზობელქ ქოძირ, ნამუთ შეიარაღებულ რდჷ. თე მეზობელ, ნამდგას რიჩარდწკუმა მეგობრულ ურთიერთობა უღუდ, ფიქრენდჷ, ნამდა არტური აბუნტებულეფშე ართ-ართ რდჷ. თიქ გეუღვარუ: „მუ გოკო თე კოჩიშ ოზეს?“.

არტური იშინანს: „მი ვორდინ თინა გასაგებო ვემწყუმუდკონ, იარაღის ქუმოჸოთანდჷ. თინა დუვარწმუნ, ნამდა რიჩარდიშ მეგობარ ვორდჷ დო ბრელშა პჸოფექ თიშ ჸუდეს“. საბოლათ, არტურქ დო თე მეზობელქ რიჩარდიშ ჸუდე დოთხილეს აბუნტებულეფშე.

მალას არტურქ ქიგეგ, ნამდა რიჩარდი დო თიშ ოჯახ მუნიციპალურ შენობას რდეს. არტურს უწუეს, ნამდა თი შენობა ნამთინ უჩაკანამს ვა დატებედ გენერალ ბარეტიშ ხემოჭარილ ბრძანებაშ უმშო. არტური იშინანს: «ნამდვილო ვა რდჷ ადვილ გენერალიშ ძირაფა. მუჟამსით თის ვუწი, მუ გეგმეფ მიღუდ, თიქ ბკითხჷ: „დოთხილანქო თე ოჯახის დო ქიმკაჯინექო თინეფიშ საჭიროებეფს?“ მუშო ოკო რაგად, მა ხიოლით დევეთანხმჷ».

არტურქ ხემოჭარილ ბრძანებათ გემნირულ მუნიციპალიტეტიშ შენობაშა დო თინა ოფიცერს ქაძირუ. ოფიცერქ მიოძახ: „თენა გენერალიშ ხემოჭარილ ბრძანება რე! ქოიჩქუნო, ნამდა სი პირველ რექ, მიდგას თავრეშე მეჸუნს ხალხ?“. თინეფქ ხეთეშე ქიმიოგორეს რიჩარდის დო თიშ ოჯახის დო არტურქ მუშ მანქანათ ჸუდეშა მიდეჸონ თინეფ.

არტურქ დერწმუნ, ნამდა რიჩარდი დო თიშ ოჯახ უსაფრთხოთ რდეს. თიშ გაბედულებაშ დო ჯიმალურ ჸოროფაშ მაგალითიქ მანგარო იმოქმედ შხვეფშა. არტური იშინანდჷ: „თი მეზობელ, ნამდგაქ რიჩარდიშ ჸუდეშ თხილუას მიმეხვარ, ასე უმოსო აფასენს იეჰოვაშ მოწმეეფს. თეს გეძინელ, ბრელ ადამიანქ დეინტერეს ჭეშმარიტებათ, თიშ უკულ, მუთ ქოძირეს, ნამდა იეჰოვაშ მოწმეეფ ვა ვორეთ გორთილეფ კანიშ ფერიშ მიხედვით დო ჩქინ შქას მითინ ვა ფიქრენს, ნამდა შხვაშე უჯგუშ რე“.

a ჟურნალ „ოქროშ ხანას“ 1937 წანაშე დათირ სახელქ დო ჯოხოდ „ნუგეში“, 1946 წანაშე მოჸუნაფილ თიშ სახელ რე „გეგშაკურცხით!“.