არძა გადაწყვეტილებაშ მეღებაშ დროს პირველ ადგილშა იეჰოვა გემირდჷ

დებაბდჷ 1940 წანაშ 19 მესის ლიბანიშ ჭიჭე ქალაქ ამიონს. მუსხირენ წანაშა ჩქინ ოჯახიქ ოცხოვრებშა ქალაქ ტრიპოლშა გეგნორთჷ. მა თე ქალაქის იბრდუდ მოჸოროფე დო ბედნერ ოჯახის, სოდეთ იჩინენდეს იეჰოვას დო უჸორდეს თინა. ჟირ ჯიმა დო სუმ დაშე არძაშ უკლაშ ვორდჷ. ჩქიმ მშობლეფშო დღას ვა ჸოფე ფარაშ შიბა არძაშ უმოს მნიშვნელოვან. ჩქი მთავარ ყურადღება ბიბლიაშ გურაფაშა, ქრისტიანულ შეხვალამეფშა დო შხვეფშა იეჰოვაშ გაჩინებაფაშა მაფდეს გინოღალირ.

ჩქინ კრებას მუსხირენ ცხებულ ქრისტიან მსახურენდჷ. ართ-ართ რდჷ მიშელ აბუდი, ნამუთ ატარენდჷ შეხვალამას, ნამდგას თი დროს წიგნიშ შესწავლას ვუძახუდით. თიქ ჭეშმარიტება ნიუ-იორკის გეგჷ დო 1920-იან წანეფს ლიბანს ხოლო იქადაგ. განსაკუთრებულო გუმაშინე, მუნერ პატიცემას გიმირჩქინანდჷ გალაადიშ სკოლა მიკნაულა ჟირ დაშ მიმართ დო მუჭო ოხვარუდ თინეფს. თენეფ რდეს ენი დო გვენი ბივორეფ. თინეფქ ჩქინ ჯგირ მეგობრეფო გინირთეს. წანეფიშ უკულ, მანგარო მახიოლ შეერთებულ შტატეფს ენიშ ძირაფაქ. მუსხირენ ხანიშ უკულ გვენი ხოლო ქობძირ, ნამუთ უკვე უილფრედ გუჩიშ ოსურ რდჷ; თინეფ ლონდონიშ ფილიალს მსახურენდეს.

დამოწმება ლიბანს

ჩქიმ ახალგაზრდობას, ლიბანს ხვალე მუსხირენ მოწმე რდჷ. მარა ჩქი, ნამთინე რელიგიურ ლიდერიშ წინააღმდეგობაშ უმკუჯინუო, გურგედვალირო გინოფჩანდით შხვეფს თის, მუთ ბიბლიაშე მიჩქუდეს. თიმ დროს მოხვალამირ ნამთინე შემთხვევა ამდღარ დღაცალო ფშჷ.

ართ დღას, მა დო ჩქიმ და, სანა, კორპუსეფს ფქადაგენდით. თე დროს ვეველუდითინ თეშ, მღვდელქ ქამოდირთეს. მუჭოთ იძირენ, თის დოუძახეს. თიქ სანას შეურაცხყოფა მიორინუ, მანგარო გერისხჷ, ქიგუჯიკუ დო კიბეეფს ქიგიოჸოთ. მიდგარენქ პოლიციაშა დორეკ. მუჟამსით თინეფქ ქუმორთეს, დერწმუნეს, ნამდა სანას მუთუნ ვაჭირუდ დო მღვდელ განყოფილებაშა მიდეჸონეს. თექ ქოძირეს, ნამდა თის იარაღ ნოღვე. პოლიციაშ უნჩაშიქ თის კითხჷ: „ხალხის ღორონთიშ გურშენ ოგურუანქ დოვარ ძალადობაშ გურშენ?“.

ხოლო ართ შემთხვევა ფშჷ ჯგირო, ნამდგაქ თიმწკუმა მოხვად, მუჟამსით კრება ავტობუსით ვორდით ოქადაგებშა ულირ დაშორებულ ტერიტორიაშა. ირფელ ჯგირო მიშჷ, სოიშახ ადგილობრივ მღვდელ გეგენდჷ, ნამდა ფქადაგენდით. თიქ ხალხ აკოშაყარუ ჩქინ წინააღმდეგ. თინეფ მანგარ აგრესიულეფ რდეს დო ქუალეფს ხოლო მოჸოთანდეს. ართ-ართ ქუაქ ჩქიმ მუმას ქუმოხვად. ჯგირო ფშჷ, მუნერ გოზისხირელ აფუდ თის სახე. თიქ ჩქიმ დიდაწკუმა ართო ავტობუსშა დირთჷ დო შხვეფქ ხოლო ქეკვაჸუნით. დღას ვაგმოჭყორდუ თი სიტყვეფ, ნამუთ ჩქიმ დიდაქ თიმწკუმა თქუ, მუჟამსით თის სახეს უწიმინდანდჷ: „იეჰოვა, ქორთხინქ ქაპატი თინეფს, მუშენდა ვა უჩქნა მუს ორთნა“.

ხოლო ართ შემთხვევაქ მოხვად, მუჟამსით ჩქინ ნათესეეფშა ვორდით ულირ მშობლიურ მხარეშა. თექ, ბაბუშ ჸუდეს, ცნობილ ეპისკოპოსის ქეშეფხვადით. თის უჩქუდ, ნამდა ჩქიმ მშობლეფ იეჰოვაშ მოწმეეფ რდეს. თიშ უმკუჯინუო, ნამდა თიმ დროს ხვალე ამშვ წანერ ვორდჷ, თიქ ცალკე გენკომჭანუ დო ბკითხჷ: „სი, მუშენ ვა რექ ნათილ?“. მა ვუპასუხ, ნამდა დიო ხოლო ბაღანა ვორდჷ დო დიბნათკონ საჭირო რდჷ, უმოს ქიგებგიკო ბიბლიაშე დო მიღუდკო ძალიერ რწმენა. ჩქიმ პასუხიქ ვემეწონუნ თიშენ, ბაბუს უწუ, ითამ უპატიცემლოთ მივექცი.

მარა თეცალ გლახა შემთხვევეფქ ხვალე მუსხირენშა მოხვად. ლიბანელეფ უმენტაშო მეგობრულ დო სტუმარიშ მოჸოროფეეფ რენა. ათეშენ, ჩქი ბრელშა მიღდეს სასიამოვნო მსჯელობა ბიბლიურ საკითხეფშე დო ბრელ ბიბლიაშ გურაფას ვატარენდით.

გეგნობჭყვიდით შხვადო გინულა

დიო ხოლო სკოლას ბგურაფლენდინ თეშ, ვენესუელაშე ართ ახალგაზრდა ჯიმაქ ქუმორთჷ ლიბანშა. თინა შეხვალამეფს ჩქინ კრებას ოსწრუდ დო ურთიერთობა ქიდიჭყჷ ჩქიმ და ვაფაწკუმა. ჭიჭე ხანშა თინეფქ დექორწინეს დო ოცხოვრებშა ვენესუელაშა გეგნორთეს. მანგარო ვონატრუდითინ თიშენ, წერილეფიშ საშვალებათ ვაფა ჩქიმ მუმას არწმუნენდჷ, ნამდა მთელ ოჯახიქ ვენესუელაშა გეგნოფრთითკო ოცხოვრებშა. საბოლათ, თიქ ქუდომჸუნეს დო გეგნობჭყვიდით გინულა!

1953 წანას გეგნოფრთით ვენესუელაშა, დო ქიდიფხორით კარაკასის პრეზიდენტიშ სასახლეშ გოხოლუას. დიო ხოლო ბაღანა ვორდინ თიშენ, ჩქიმდა მანგარო მოქმედენდჷ თიშ ძირაფა, მუჭო მიკიჸონანდჷ პირად შოფერ პრეზიდენტის მდიდრულ მანქანათ. ჩქიმ მშობლეფშო ადვილ ვა რდჷ მიარჩქვანესკო ახალ ქიანას, ნინას, კულტურას, ოჭკუმალს დო კლიმატის. მარა, თინეფქ ჭიე-ჭიეთ ქიდიჭყეს თექიანობაშ მერჩქვანა. სანარღოთ, თე დროს უბედრობაქ ქიგმოტირხეს დუდის.

უბედრობაქ ქიგმოტირხეს

ჩქიმ მუმაქ დელახ. თეს არძაშ ნაკლებო ველუდით, მუშენდა თინა ჯანმრთელ კოჩ რდჷ. დღას ვა ფშუნა თიშ ლახალა. თის კიბოშ დიაგნოზ ქიგუშქვეს დო ოპერაცია გუკეთეს, მარა სანარღოთ, ართ მარაშა დომღურეს.

ნინათ ვემაჭარე, მუნერ განადგურებულ ვორდით თიმწკუმა. თიმ დროს ხვალე 13 წანერ ვორდჷ. მიჭირდეს თიშ დაჯერება, ნამდა მუმა ღურელ მაფდეს დო ფიფქრენდით, დღას ქიპჸუაფუდითო ბედნერეფ. მინშა ჩქიმ დიდაშო მანგარ ძნელ რდჷ თიშ გააზრება, ნამდა ქომონჯ გვერდით ვა ჸუნდჷ. მარა ქიმეფხვადით, ნამდა ცხოვრება იგრძელებუდ დო იეჰოვაშ მოხვარათ გეგნიბღით თე ირფელ. 16 წანერ ვორდინ, სკოლა გუვათე კარაკასის. მანგარო მოკოდ ჩქიმ ოჯახის ქელვუდირთკო.

თე პერიოდის ჩქიმ და სანაქ დექორწინ რუბენ არაუხოშა, ნამდგას გალაადიშ სკოლა აფუდ მიკნაულა დო ვენესუელაშა რდჷ დორთელ. თინეფქ გეგნოჭყვიდეს ნიუ-იორკშა გინულა. მუჟამსით ჩქიმ ოჯახიქ გეგნოჭყვიდ, ნამდა უმაღლესის იბგურეკო, მა ქუდვაჸუნ თინეფს დო ოცხოვრებშა ამერიკაშა, ჩქიმ და დო სინჯაშა, გინიბლჷ. თინეფქ მანგარო მიმეხვარეს სულიერო წიმი ულას მუნეფწკუმა ცხოვრებაშ დროს. თეს გეძინელ, ბრუკლინს ჩქინ ესპანურ კრებას ბრელ მოწიფულ ჯიმა მსახურენდჷ. მანგარო მოხიოლუდ, ნამდა გეფჩინებაფე ჯიმალეფ მილტონ ჰენშელი დო ფრედერიკ ფრენცი; თინეფ ბრუკლინიშ ბეთელს მსახურენდეს.

მუჟამსით უმაღლესის გურაფაშ პირველ წანა ითებუდ, თიშე ქიდიბჭყჷ ფიქრ, მუ მიზან მიღუდ ცხოვრებას. მა წებკითხჷ დო სერიოზულო დეფიფქრჷ გინაჯინალ კოშკიშ ართ-ართ სტატიაშე, სოდეთ ჭარუდ თი ქრისტიანეფშე, მიდგაშ მთავარ მიზან იეჰოვაშ მსახურება რდჷ. ვორწყედ, მუნერ ბედნერეფ რდეს თი პიონერეფ დო ბეთელელეფ, მით ჩქინ კრებას მსახურენდეს დო მა ხოლო მოკოდ თინეფცალ პჸოფედკო, მარა დიო ნათილ ხოლო ვა ვორდჷ. ქიმეფხვად, ნამდა მნიშვნელოვან რდ, ჩქიმ ცხოვრება იეჰოვას მევუძღვინკო. ქოთ თაშ მიფქცი დო 1957 წანაშ 30 მარტის გეგნობდგჷ თე ნაბიჯ დო დიბნათ.

მნიშვნელოვან გადაწყვეტილებეფ

თე მნიშვნელოვან ნაბიჯიშ გინოდგუმაშ უკულ შხვა ნაბიჯიშ გინოდგუმა ხოლო მოკოდ. თენა რდჷ სრულ დროთ მსახურებაშ დოჭყაფა. პიონერო მსახურება მანგარო მოკოდ, მარა ვორწყედ, ნამდა თენა ადვილ ვეჸუაფუდ. მუჭო შემალებედ ქოთ უნივერსიტეტის იბგურეკო დო ქოთ პიონერო ვიმსახურკო? მა დო ჩქიმ ოჯახ ართიანს ბრელ წერილს ბჭარუნდით. მა თინეფს გევუნწყჷ, ნამდა გინოჭყვიდილ მაფუდ, მივოტეკო გურაფა, დიფრთიკო ვენესუელაშა დო ქიდიბჭყიკო პიონერობა.

1957 წანაშ ივანობას კარაკასშა დიფრთჷ. ქობძირ, ნამდა ჩქიმ ოჯახის უჭირდჷ. საჭირო რდჷ, ოჯახშა ხოლო მიდგაინქ გამშეღკო ფარა. მა მუშ კეთება შემლებუდ? ბანკის მუშობა შემოფთავაზეს, მარა თაქ თიშენ დიფრთჷ, ნამდა პიონერობა მანგარო მოკოდ. გინობჭყვიდ ჟირხოლო ართო გამკეთებუდკო. მუსხირენ წანას ბანკის სრულ განაკვეთის მუფშენდჷ დო პიონერ ხოლო ვორდჷ. თეცალ დაკავებულ, მარა ბედნერ დღას ვა პჸოფექ!

თე ხიოლს თიქ ხოლო ქიგიაძინ, ნამდა გეფჩინებაფე ართ გერმანელ სქვამ და, სილვია, ნამდგაშა დებქორწინ. თის მანგარო უჸორდჷ იეჰოვა. სილვიაქ მშობლეფწკუმა ართო ვენესუელაშა გინორთჷ. ჩქი ართ ბოშ დო ართ ძღაბიქ, მაიკლიქ (მაიკი) დო სამირაქ, ქეშმეძინეს. თეს გეძინელ, ჩქიმ დიდას ხოლო მიკვოჯინედ. თიქ ჩქინდა გეგნორთჷ ოცხოვრებშა. მართალ რე, ოჯახურ პასუხიშმგებლობაშ გურშენ პიონერობა მივოტე, მარა პიონერულ შურ ვამდინუაფ. მა დო სილვია შვებულებაშ დროს დამხმარე პიონერო ვმსახურენდით.

შხვა მნიშვნელოვან ნაბიჯ

ბაღანეფ სკოლას გურაფლენდეს, მუჟამსით თი კითხვეფშე დეფიფქრჷ, ნამუთ თე სტატიაშ დაჭყაფუს რე მოჩამილ. ოკო ქირაგადუას, ნამდა მანგარ კომფორტულ ცხოვრება მიღუდ დო სამუშას ხოლო პატის ფცენდეს. მარა მოკოდ, უმოსო იეჰოვაშ მსახურო მიჩინენდესკო. თე ფიქრეფქ მთელ დღას ვამმოსვანჯუ. ათეშ გურშენ მა დო ჩქიმ ოსურქ ჩქინ ოჯახიშ ფინანსურ მდგომარეობაშე ქიფჩით. ბანკის მუშობას მივოტენდ-და, თინეფ გარკვეულ რაოდენობაშ ფარას ქომჩანდეს. ვალეფ ვეგებძუდეს, ათეშენ ცხოვრებას გუვამარტივენდით-და, მაღვენუდეს თიზმა ფარა, ნამუთ ბრელ ხანს მიბაღდეს.

თე ნაბიჯიშ გინოდგუმა ადვილ ვა რდჷ, მარა ჩქიმ ძვირფას მეუღლე დო დიდაქ ხუჯ ქუდამკინეს. თაშ ნამდა, კინ გეგნობჭყვიდ სრულ დროთ მსახურებაშ დოჭყაფა. მუ ბედნერ ვორდჷ! მზათ ვორდჷ, პიონერობა ქიდიბჭყიკო, მარა თე დროს ვეველუდითინ ფერ ამბე ქიგებგით.

სახიოლო ახალ ამბე!

ართ დღას ჩქინ ექიმქ მიწის, ნამდა სილვია ორსულო რდჷ. თეს ნამთინ ვეველუდით! თექ მანგარო მახიოლეს; მარა მა კინ ფიფქრენდჷ ჩქიმ გადაწყვეტილებაშე, ვიმსახურკო პიონერო. ქეშმალებედუო თეშ კეთება? ჩქი ვა გაბჭირებნა გონებრივო დო ემოციურო მივემზადითკო დო შურ მოლდეს, მუჟამ მაჸვენდეს ოჯახიშ ახალ წევრ. მარა, მუ ირაგადედ თი გეგმეფშე, ნამუთ მთელ მონდომათ მაფუდ გენწყილ?

ჩქინ მიზნეფიშ გურშენ ჩიებაშ უკულ გეგნობჭყვიდით, ვა ფთირეთკო მთავარ გეგმა. ჩქინ ბოშიქ, გაბრიელქ, 1985 წანაშ აპრილს დებად. მა სამუშა მივოტე დო 1985 წანაშ ივანობას პიონერობა ქიდიბჭყჷ. უმოს გვიანო, მიღუდ პატი, ვიმსახურკო ფილიალიშ კომიტეტის. მარა ფილიალ კარაკასის ვა რდჷ, ათეშენ მარაშე ჟირ ვარდა სუმ დღას ჸუდეს ვეპჸიდ დო ოულარ მაჸიდ სოდგარენ 80 კილომეტრიშ მაშორაშა.

შხვა ტერიტორიაშა გინულა

ფილიალ ქალაქ ლა-ვიქტორიას რდჷ, ათეშენ გეგნობჭყვიდით ოჯახამო გეგნოფრთითკო თე ქალაქშა, ნამდა ბეთელიშ ხოლოს ვორდკო. თენა მანგარ დიდ ნაბიჯ რდჷ. ვეგმმახანტე თი გრძნობეფ დო მარდულობა, ნამდგას ჩქიმ ოჯახიშ მიმართ ბგინაფლენქ. თინეფიშ დამოკიდებულება მანგარო მოხვარუდ. ჩქიმ დაქ, ბაჰაქ, მუშ დუდშა გეჭოფ ჩქინ დიდაშ მიკოლუაფაშ პასუხიშმგებლობა. მაიკი დაოჯახებულ რდჷ; სამირა დო გაბრიელი ჩქინწკუმა ართო ცხოვრენდეს. ლა-ვიქტორიაშა გინულა ნიშნენდჷ, ნამდა თინეფს დატებელ აჸიდეს მუნეფიშ მეგობრეფ. თეს გეძინელ, სილვიას დედაქალაქის ცხოვრებაშ უკულ ჭიჭე ქალაქის ცხოვრებაშა აჸიდ მიორჩქვანალ დო ჭიჭე ჸუდეს მაჸიდეს ოცხოვრებელ. თაშ ნამდა, თე გინულაშ გადაწყვეტილებაშა ბრელ მუდგარენ მიშეშ.

მარა მუდგარენეფქ კინ დითირ. გაბრიელქ დექორწინ დო სამირაქ ცალკე გინილ ოცხოვრებშა. თეშ უკულ, 2007 წანას, მა დო სილვია ბეთელიშ ოჯახშა მემწვიეს, სოდეთ ამდღარშახ ხიოლით ვმსახურენთ. მაიკი, ჩქინ უნჩაშ ქომოლსქუა, უხუცეს რე დო მუშ ოსურ მონიკაწკუმა ართო პიონერო მსახურენს. გაბრიელი ხოლო უხუცეს რე დო მუშ ოსურ ამბრაწკუმა ართო ცხოვრენს იტალიას. სამირა პიონერო დო ბეთელიშ შტატგარეშე მოხალისეთ მსახურენს.

თეს კინ გუვაკეთენდჷ

ჩქიმ ცხოვრებას ბრელ მნიშვნელოვან გადაწყვეტილება მიბღჷ დო მუთუნს ვა ბნარღენქ. თეს კინ გუვაკეთენდჷ. მანგარო ვაფასენქ თი სულიერ პასუხიშმგებლობეფს დო პატის, ნამუთ იეჰოვაშ მსახურებას მიღუდ. წანეფიშ დინახალე მა ქობძირ, ნამდა მანგარ მნიშვნელოვან რე, ვა ვოდინუათ იეჰოვაწკუმა ხოლოშიან ურთიერთობა. ვა უღჷ მნიშვნელობა, ჭიჭე გადაწყვეტილებას ბღებულენთ დოვარ დიდის, იეჰოვას შეულებ მუჩან მშვიდობა, ნამუთ „ნებისმიერ აზრშე უმოს რე“ (ფილ. 4:6, 7). სილვია დო მა ხიოლით ვასრულენთ თე წმინდა მსახურებას ბეთელს. ჩქიმ ცხოვრებას ჩქინ გინოდგუმილ არძა ნაბიჯიქ კურთხეულქ იჸუ, მუშენდა არძა გადაწყვეტილებაშ მეღებაშ დროს პირველ ადგილშა იეჰოვა გემირდჷ.