კითხვა დო პასუხი

მუს გულისხმენდჷ მოციქულ პავლე, მუჟამსით თქუ: „კანონიშ საშვალებათ დობღურ კანონშო“? (გალ. 2:19).

პავლექ ჭარჷ: „კანონიშ საშვალებათ დობღურ კანონშო, ნამდა გეფცოცხლკო ღორონთშო“ (გალ. 2:19).

გალატიაშ კრებას ნამთინე ქრისტიანიშ აზროვნებაშა ტყურა გურაფეფქ იმოქმედ. თინეფ ოგურუანდეს, ნამდა რსხებაშო საჭირო რდჷ, მიაჸუნესკო მოსეშ კანონს, განსაკუთრებულო წინადაცვეთაშ საკითხის. მარა პავლეს უჩქუდ, ნამდა ღორონთ მეტო ვა თხულენდჷ მორწმუნეეფშე წინადაცვეთას. ძალიერ არგუმენტეფით თიქ დამტკიც, ნამდა თე გურაფეფ ტყურა რდჷ დო ჯიმალეფს ქრისტეშ მსხვერპლიშ მიმართ რწმენა გუმანგარ (გალ. 2:4; 5:2). თეშ დამტკიცებელო თქუ პავლექ გალატელეფიშ 2:19-ს ენოჭარილ სიტყვეფ.

ბიბლია არგამათ იჩიებ, ნამდა პიროვნება დოღურუნ, თინა მუთუნს ვა გინაფლენს (ეკლ. 9:5). მუჟამსით პავლექ თქუ, „დობღურ კანონშო“, თინა გულისხმენდჷ მოსეშ კანონს, ნამუთ მეტო ვა მოქმედენდჷ თიშა. თეს გეძინელ, პავლე დარწმუნებულ რდჷ, ნამდა გიშაჸიდირალიშ მიმართ რწმენაშ საშვალებათ, გაცოცხლებურ რდჷ „ღორონთშო“.

პავლეშ შემთხვევას თე ცვლილებაქ „კანონიშ საშვალებათ“ მოხვად. თიქ ენწყჷ: „ადამიან იესო ქრისტეშ მიმართ რწმენათ იჸუაფ მართალო მერჩქინელ დო ვართ კანონიშ დაცვებათ“ (გალ. 2:16). კანონქ მნიშვნელოვან ფუნქცია შეასრულ, მუთ პავლექ გალატელეფს თეშნერო ეუნწყჷ: „ცოდვეფიშ გიმაარგამებელო, სოიშახ მიშჷ გამნარყ, ნამდგას მიაჩ დუნაპირებუქ“ (გალ. 3:19). კანონქ ქაძირუ, ნამდა არასრულყოფილ, ცოდვილ ადამიანეფს ვეშულებდეს სრულყოფილო დეცვესკო თინა დო, თეს გეძინელ, თინეფს ოსაჭირდეს სრულყოფილ მსხვერპლ. თაშ ნამდა, კანონქ მეხვარ ხალხის, ქიმეხვადესკო, ნამდა იესო რდჷ „გამნარყ“. იესო ქრისტეშ მიმართ რწმენაშ გიმორჩქინათ პიროვნებას შეიალებედ ღორონთშე მართალო რდუკო მერჩქინელ (გალ. 3:24). პავლექ თეს ქიმიოჭირინუ, მუშენდა კანონიშ საშვალებათ თიქ მიღჷ დო ირწმუნ იესო. თეშნერო პავლექ „დოღურ კანონშო“ დო „გეცოცხლჷ ღორონთშო“. ასე უკვე კანონს ვარინ, ღორონთის უღუდ თიშე ძალაუფლება.

პავლექ რომაელეფშა მეჭარილ წერილს ხოლო თეჯგურა აზრ გიმოხანტჷ. თიქ თქუ: „ჩქიმ ჯიმალეფ, თქვა ხოლო დოღურით კანონშო ქრისტეშ შეწირულ სხეულიშ საშვალებათ . . .ჩქი გეფთავისფალით კანონშე, ნამდგას ბორკილ ვაფუდით“ (რომ. 7:4, 6). თე მუხლეფს, მუჭოთ გალატელეფიშ 2:19-ს პავლე ცოდვაშ შედეგო ღურაშე ვარინ, კანონშე გათავისფალებაშე იჩიებუდ, ნამუთ უკვე ვა მოქმედენდჷ თიშა დო შხვეფშა ხოლო. თინეფქ ქრისტეშ მსხვერპლიშ რწმენათ გეთავისფალეს.