იეჰოვაქ ველუდინ თიშე უმოსო მაკურთხჷ

საბოლათ, მუჟამსით გივორჯგინ ეჭვეფს დო პიონერო მსახურება ქიდიბჭყჷ, ჩქიმ ცხოვრებაქ ვეველუდინ თეშ დითირ (ეფეს. 3:20). ალბათ გოინტერესნა მუჭო მოხვად თექ. მორთ ირფელს დუდშე ქიგეჩიებუთ.

მა 1939 წანას, მაჟია მსოფლიო ჩხუპიშ დოჭყაფაშე მუსხირენ თუთაშ უკულ გერმანიაშ ქალაქ ბერლინს დებაბდჷ. 1945 წანაშ ბოლოს, მუჟამსით ჩხუპ ითებუდ, ბერლინს საჰაერო თვითმფრინავეფშე ბომბუნდეს დო ართ-ართ თეცალ ბომბუაშ დროს ჩქინ ქუჩაქ ხოლო ქუმოხვად. მა დო ჩქიმ ოჯახიქ იმნტით თიცალ ადგილშა, სოდეთ თხილერო იპჸიდით. უსაფრთხოებაშ გურშენ უმოს გვიანო, ქალაქ ერფურტშა მიდაფრთით, სოდეთ ჩქიმ დიდა რდუ დაბადებულ.

დიაჩქიმ მთელ გურით გორუნდჷ ჭეშმარიტებას. თინა კითხულენდჷ ფილოსოფიურ წიგნეფს დო ირკვიენდჷ შხვადოშხვა რელიგიეფს, მარა თენა ვაკმაყოფილენდჷ. სოდგარენ 1948 წანას, ჟირ იეჰოვაშ მოწმექ ქუმორთჷ ჩქინ ჸუჩა. დიაჩქიმქ თინეფ ჸუდეშა გემნიჸონ დო ბრელ კითხვას უსვენდჷ. ართ საათის ხოლო ვემკურთუმუნ თეშ, თიქ მა დო ჩქიმ დას მიწუეს: „ჭეშმარიტებას ქიმვოგორე!“. თეშ უკულ ჭიჭე ხანშა მა, დიაჩქიმ დო ჩქიმ დაქ ქალაქ ერფურტის, კრებაშ შეხვალამეფშა გილულა ქიდიბჭყით.

1950 წანას ბერლინშა დიფრთით დო ბერლინი-კრუიზბერგიშ კრებაშა გილეფშით. მარა ჭიჭე ხანშა ოცხოვრებშა შხვადო გინიბლით დო ბერლინი-ტემპელჰოფიშ კრებაშა ქიდიბჭყით გილულა. დრო ხანიშ უკულ დიაჩქიმქ დინათ, მარა მა ვა ფჩქარენდჷ ნათუას. მუშენ?

გივორჯგინ მორდებუანობას დო ყოყმანს

მანგარ მორდებუან ვორდჷ, ათეშენ სულიერო წიმი ვემიფშჷ. მართალ რე, მსახურებაშა გილეფშჷ, მარა მთელ ჟირ წანას ხონარ ვეკომღალ. მარა სიტუაციაქ დითირ, მუჟამსით თიცალ და დო ჯიმალეფწკუმა ქიდიბჭყჷ უმოს ხშირ ურთიერთობა, მით გაბედულებას გიმირჩქინანდეს დო იეჰოვაშ ართგურეფ რდეს. თინეფშე ნამთინე, ართ დროს ნაცისტურ საკონცენტრაციო ბანაკეფს დო აღმოსავლეთ გერმანიაშ ციხეეფს ხედეს. შხვეფს აღმოსავლეთ გერმანიაშა ლიტერატურა ტყობაშე გინუღდეს დო თეთ, მუნეფიშ თავისუფლებას რისკიშ თუდო გიორინუანდეს. თინეფიშ მაგალითეფქ მანგარო იმოქმედ ჩქიმწკუმა. ფიფქრენდჷ, თინეფქ მუნეფიშ სიცოცხლე დო თავისუფლება იეჰოვაშ დო და დო ჯიმალეფიშ გურშენ საფრთხეშა ქენიჸოთეს-და, მა ხოლო ოკო გივორჯგინკო მორდებუანობას.

1955 წანას მონაწილება მიბღჷ სპეციალურ სამქადაგებლო კამპანიას, მუდგაქ მიმეხვარ მივერიკო თე პრობლემას. „ინფორმატორს“a მოჩამილ რდუ ჯიმა ნეითან ნორიშ წერილ, სოდეთ თინა იჩიებუდ, ნამდა ორგანიზაციაშ წუმოჭყაფილ კამპანიეფშე, თენა თი დროს ართ-ართ არძაშ უდიდაშ კამპანია იჸუაფუდ. თიქ თქუ, ნამდა თე საქმეს მონაწილებას არძა მაუწყებელ ქიმიღენდჷ-და, თენა იჸუაფუდ დამოწმებაშ არძაშ უჯგუშ თუთა, მთელ დედამიწას. თენა ნამდვილო თაშ რდუ. თე კამპანიაშე ბრელ დროს ვემკურთუმუნ თეშ, დუდ მევუძღვინ იეჰოვას დო 1956 წანას ჩქიმ მუმა დო დაწკუმა ართო დიბნათ. მარა, ჭიჭე ხანშა მნიშვნელოვან გადაწყვეტილებაშ წოხოლე ქიგებდირთჷ.

წანეფიშ განმავლობას, მიჩქუდ, ნამდა ოკო დომჭყაფუდკო პიონერო მსახურება, მარა თეშ კეთებას ირიათო გინობდვანდჷ. დუდშე გინობჭყვიდ უმოს უჯგუშო ქუდომგურუაფუდკო იმპორტ-ექსპორტიშ საქმე ბერლინს. თეშ უკულ, მოკოდ ჩქიმ პროფესიათ ქიმუფშეკო დო პიონერობაშ დოჭყაფაშახ, ჩქიმ საქმიანობას უმოს გამოცდილ ვორდკო. ათეშენ, 1961 წანას, ქალაქ ჰამბურგის, გერმანიაშ არძაშ უდიდაშ საპორტო ქალაქის ქიდიბჭყჷ მუშობა. მუთ უმოსო ვორდჷ დაკავებულ თე საქმეთ, თით უმოსო გინობდვანდჷ სრულ დროთ პიონერო მსახურებაშ დოჭყაფას. მუ მაფუდ ოთირალ?

მარდულ ვორექ იეჰოვაშ, მუშენდა თიქ მოჸოროფე ჯიმალეფ გიმირინუ, მიდგაქ მიმეხვარეს თიშ ძირაფას, ნამდა იეჰოვაშ მსახურება არძაშ უმოს მნიშვნელოვან საქმე რდუ. ნამთინე ჩქიმ მეგობარქ პიონერო მსახურება ქიდიჭყჷ დო თეთ ჯგირ მაგალით მუჩეს. თეს გეძინელ, ართ ჯიმაქ, ნამუთ ართ დროს საკონცენტრაციო ბანაკის რდუ, მიმეხვარ მივენდიკო იეჰოვას. თიქ მეჩუ, ნამდა ჯიმალეფქ, მით საკონცენტრაციო ბანაკის მუნეფიშ დუდშა რდეს მენდებულ, უმოს გვიანო სულიერო მისუსტეს. მარა თინეფქ, მით იეჰოვას სრულაშო ონდუდეს, ბოლოშა ართგურეფქ ქუდოსკიდეს დო თეთ ჯგირ მაგალით მეჩეს შხვეფს.

ჯიმა მარტინი პოეტზინგერ, ნამუთ უმოს გვიანო, ხემძღვანელ საბჭოშ წევრო მსახურენდჷ, ჯიმალეფს თეცალ სიტყვეფით ამანგარენდჷ: „არძაშ უმოს ძვირფას, მუთ გიღნა, გაბედულება რე!“. თე სიტყვეფშე დაფიქრებაშ უკულ, საბოლათ მივოტე ჩქიმ სამუშა დო 1963 წანაშ ივანობას, პიონერო მსახურება ქიდიბჭყჷ. თენა ჩქიმ ცხოვრებას არძაშ უჯგუშ გადაწყვეტილება რდუ! ჟირ თუთაშ უკულ, დიო ხოლო თი დროს, მუჟამსით ახალ სამუშაშ გორუა ვა მაფუდ დოჭყაფილ, სპეციალურ პიონერო მსახურება შემოფთავაზეს. მუსხირენ წანაშ უკულ, იეჰოვაქ ველუდინ თიშე უმოსო მაკურთხჷ დო სკოლა გალაადიშ 44-ა კლასშა ქიმემწვიეს.

გალაადის ფასდაუდებელ გაკვეთილ დიბგურე

ართ-ართ მნიშვნელოვან გაკვეთილ, ნამუთ დიბგურე, განსაკუთრებულო ჯიმალეფ ნეითან ნორი დო ლაიმან სვინგლიშე თინა რდუ, ნამდა ადვილო ვა დამნებებუდკო დუდ ჩქიმ დავალებეფშა. თინეფქ ელამჩეს, ნამდა წარმატებულო ვიმსახურითკო ჩქინ დანიშნულებეფს. ჯიმა ნორიქ თქუ: „მუს მიაქციენთ ყურადღებას თქვან დანიშნულებეფს? სიბინძურეს, ხოჭოეფს, სიღარიბეს დო ვარ ჯალეფს, ყვავილეფს დო ბედნერ სახეეფს? ქიდიგურეთ ხალხიშ ჸოროფა!“. ართშა, მუჟამსით ჯიმა სვინგლი ენწყუნდჷ მუშენ დანებ დუდ ხეთეშე ნამთინე ჯიმაქ მუნეფიშ დავალებაშ შესრულებას, თის ემოციეფქ ვეშეაკავებუ დო თოლეფქ ჩილამურით გეიაფშჷ. თიქ მიოტუ მოხსენებაშ კითხირ დო სოიშახ ვედემშვიდ, თეიშახ ვა გუგრძელებ ჩიება. თექ მანგარო შეხუ ჩქიმ გურს დო გინობჭყვიდ, დღას ვა გუტახკო გურ ქრისტეს დო თიშ ართგურ ჯიმალეფს (მათ. 25:40).

დანიშნულებეფიშ მეღებაშ უკულ ნამთინე ბეთელელ ინტერესით მოკითხუდეს, სო დუმანიშნეს. თითოულ დანიშნულებას დადებითო აფასენდეს, მარა, მუჟამსით ქიგეგეს, ნამდა კონგოს (კინშასა) დაბნიშნეს, უცბას გაჩენდეს დო მიწუეს: „კონგოსო? იეჰოვა ჸოფედას სქანწკუმა!“. თი დროეფს კონგოშე ახალ ამბეეფ მიშჷ, ნამდა თექ ჩხუპ რდუ დო ხალხ ართიანს ჸვილუნდჷ. მარა მა ირიათო სკოლა გალაადის ნაგურეფშე ფიფქრენდჷ. 1967 წანაშ სექტემბერს სკოლა გალაადიშ თებაშ უკულ ჭიჭე ხანშა ჰაინრიხ დენბოსტელქ, კლოდ ლინდსეიქ დო მა კონგოშ დედაქალაქ კინშასაშა გეგნოფრთით.

მისიონერულ მსახურებაქ ბრელ მუდგარენ დუმოგურეს

გინულაშე სუმ თუთაშა ფრანგულ ქიდიბგურეთ. თეშ უკულ, სამხრეთ კონგოშე შორს, ზამბიაშ საზღვარწკუმა ხოლოს ქალაქ ლუბუმბაშიშა გეგნოფრთით, ნამუსით თეიშახ ელიზაბეტვილ ჯოხოდ. თექ ქალაქიშ ცენტრის მისიონერეფიშ ჸუდეშა გინიბლით.

ლუბუმბაშიშ უმენტაშ ტერიტორიას დღას ვარდჷ ნაქადაგებ, ათეშენ მანგარო მოხიოლდეს, ნამდა პირველეფ ვორდით, მიდგაქ თექიანეფს სახიოლო ამბე ვუქადაგით. ჭიჭე ხანშა თიზმა ბიბლიაშ გურაფა ქიდიბჭყით, დრო ვამბაღდეს არძას ჩავუტარითკო გურაფა. თეწკუმა ართო, ჩქი მთავრობაშ წარმომადგენლეფს დო პოლიციელეფს ვუქადაგუდით. ბრელ გიმირჩქინანდჷ ღორონთიშ სიტყვაშ დო ჩქინ სამქადაგებლო საქმიანობაშ ინტერესის. თექიანეფ ძირითადო სუაჰილი ნინაშა იჩიებდეს, ათეშენ მა დო კლოდიქ ქიდიბგურეთ თე ნინა დო ჭიჭე ხანშა სუაჰილურ კრებას დაბნიშნეს.

მართალ რე, ბრელ ჯგირ შემთხვევეფ მიღდეს, მარა თეწკუმა ართო სირთულეეფ ხოლო ვა მორკუდეს. ხშირას შეფხვადუდით შუმილ შეიარაღებულ ჯარიშკოჩეფს დო შარიან პოლიციელეფს, მით ტყურა ბრალდებეფს წუმომრინუანდეს. ართშა, მუჟამსით მისიონერეფიშ ჸუდეს კრებაშ შეხვალამას ვატარენდით, შეიარაღებულ პოლიციელეფიშ ჯგუფიქ გენმაკათეს. თინეფქ პოლიციაშ მთავარ განყოფილებაშა მიდამიჸონეს, სოდეთ ონჯუაშ ვით საათშახ პროლს გივოხედით, ონდო გომტენდეს.

1969 წანას გილმალ ზედამხედველო დაბნიშნეს, მუ დროსით მიხვადუდ შორ შარეფშა ულა, სოდეთ დიდ ტყა დო ლეტა რდუ, მუთ ჩვეულებრივ მუდგარენ რდუ აფრიკას. ართშა ართ სოფელს ჩქიმ დანჯირუშ თუდო მოჭვაქ სერით ოგვაჯე გაკეთ. დღას ვაგმოჭყორდუ თი ოჭმარე, მუჟამსით დიო ხოლო გოთანელ ვა რდუნ თეშ, მუჭო გუმოკურცხინუ თე ქოთომიშ საშინელ ხონარქ. გუმაშინე თი მომენტეფ, მუჟამსით ონჯუას ჯიმალეფ ართო ქუდობზოჯუდით დაჩხირწკუმა დო ბიბლიურ თემეფშე იფჩიებუდით.

ართ-ართ დიდ სირთულე თინა რდუ, ნამდა ნამთინე, მით იეჰოვაშ მოწმეთ აცხადენდჷ დუც, მოძრაობა „კიტავალაშ“ წევრ რდუ.b ნამთინექ დინათ დო უხუცესო ხოლო დენიშნჷ. თენეფიშ უმენტაშის, მით ითამ კირდეცალ რდეს კრებაშო, ვეშიალებუ ართგურ და დო ჯიმალეფიშ მეჩილითაფაქ (იუდ. 12). დროხანიშ უკულ, იეჰოვაქ გეგმაარგამ თინეფიშ მოტივეფ დო კრება გათავისუფალ თეცალ ხალხშე. თეშ უკულ ბრელქ ქიდიჭყჷ ჭეშმარიტებაშა მოულა.

1971 წანას კინშასაშ ფილიალს დუმანიშნეს, სოდეთ შხვადოშხვა საქმეშ კეთება მოვალუდ, მაგალთო, ვოხვარუდ კორესპონდენციაშ, ლიტერატურაშ გიშაჭარუაშ დო სამსახურებრივ განყოფილებეფს. ბეთელს ქიდიბგურე, მუჭო ვუხემძღვანელკო ჩქინ საქმიანობას დიდ ქიანას, სოდეთ ინფრასტრუქტურა ჯგირო ვარდჷ განვითარებულ. მინშა თუთეფ ოკოდ თვითმფრინავით ჯღონელ წერილეფს კრებეფშა ქიმურთუმუდკო. წერილეფს თვითმფრინავეფშე ნავეფშა გიმოჩოლანდეს, ნამუთ მარეფიშ დინახალე მალწყარს მიშასკიდუდ, მუშენდა გინოადგილებას ოცილუდ სქელ ნოხცალო მოფინილ მცენარე, ნამუსით წყარიშ ჰიაცინტეფ ჯოხო. თე დო შხვა სირთულეეფიშ უმკუჯინუო, ღორონთიშ საქმე იშენით იკეთებუაფუდ.

მიკვენდჷ, მუჭო ახერხენდეს ჯიმალეფ დიდ კონგრესეფიშ ჩატარებას ჭიჭე თანხეფით. თინეფ სცენეფს კირდეშ ქუალეფით აშენენდეს დო მაღალ ოდიარეს კიდალეფშო დო სკამეფიშ გინაკირალო გიმირინუანდეს. ბამბუკშე ბიჯეფს ორთუდეს, ნამუთ შენობეფს ამანგარენდჷ დო ლერწამშე ორთვალს დო მაგიდეფს. ლისმარიშ მანგიორო ჯაშ წკირიეფს გიმირინუანდეს. მა მუთუნიშ მოხვარა ვეშემლებუდ, მარა გაკვირვებულ ვორდჷ, მუჟამსით ვორწყეთ, მუჭო გიმირინუანდეს და დო ჯიმალეფ ახალ იდეეფს სირთულეეფიშ გინაჭკირალო. მთელ გურით ქიმეჸოროფ თინეფქ. ათეშენ, მუჟამსით შხვა ტერიტორიას დაბნიშნეს, მანგარო მონატრუდ თექიანეფ.

მსახურება კენიას

1974 წანას კენიაშ დედაქალაქ ნაირობიშ ფილიალს ქიდიბჭყჷ მსახურება. ჩქი ბრელ საქმე მაფდეს ოკეთებელ, მუშენდა კენიაშ ფილიალ ქადაგებაშ საქმეს ხემძღვანელენდჷ ვით გოხოლუა ქიანას, სოდეთ ნამთინე ადგილს აკრძალურ რდუ ჩქინ საქმიანობა. ხშირას მიტენდეს თე ქიანეფშა, განსაკუთრებულო ეთიოპიაშა, ნამდა გურშა ელუკინკო თექიან და დო ჯიმალეფს. ეთიოპიას თიმ დროს იეჰოვაშ მოწმეეფს მანგარო თხოზუდეს დო დიდ სირთულეეფს შეხვადუდეს. ბრელს სასტიკო მექცუეს, ნამთინე ციხეს ქუდახუნეს დო მუსხირენ დოჸვილეს. მარა თინეფ ართგურო აგრძელენდეს მსახურებას, მუშენდა ჯგირ ურთიერთობა უღდეს მუჭოთ იეჰოვაწკუმა, თეშ ართიანწკუმა ხოლო.

1980 წანას ჩქიმ ცხოვრებას სასიამოვნო დროქ ქუდოდირთ, მუჟამსით დებქორწინ. ჩქიმ მეუღლე გეილ მატენსონ კანადაშე რდუ დო ჩქი ართო ბგურაფლენდით გალაადიშ სკოლას. თიშ უკულ ხშირას ბჭარუნდით ართიანს წერილეფს. გეილ მისიონერო მსახურენდჷ ბოლივიას. 12 წანაშ უკულ ჩქი კინ ნიუ-იორკის ქეშეფხვადით. თეშ უკულ ჭიჭე ხანშა კენიას დებქორწინით. მარდულ ვორექ გეილიშ, მუშენდა თის ირიათო სულიერ ხედვა უღუდ დო კმაყოფილ რდუ მუთ უღუდუნ თით. თინა ამდღა ხოლო ელამრე გვერდით, მუჭოთ ძვირფას დო მოჸოროფე მეუღლე.

1986 წანას მა დო გეილ გილმალ მსახურებას დაბნიშნეს, მარა მა ფილიალიშ კომიტეტის ხოლო ვაგრძელენდჷ მსახურებას. გილმალ მსახურებაშ დროს ბრელ თიცალ ქიანაშა გილეფშით, ნამდგას კენიაშ ფილიალ ხემძღვანელენდჷ.

ჯგირო გუმაშინე თი პერიოდ, მუჟამსით 1992 წანას ასმერას (ერიტრეა) კონგრესშო ვემზადებუდით. თი დროს თექ ჩქინ საქმიანობა აკრძალურ ვარდჷ. სანარღოთ, კონგრესიშ ოტარებელო ხვალე ართ შენობა ქობძირით, სოდეთ საქონელიშ ოჭკუმალს ჩუანდეს. თე შენობა დინახალე ხოლო უფრაშ რდუ, ვინემ გალეშე იძირედ. კონგრესიშ დღას გაკვირვებულქ ქუდოფსკიდ; ჯიმალეფს თინა თიცალ ჯგირო მოუნწყუნა, ნამდა შესაფერის რდუ იეჰოვაშ თაყვანიშ ოცემებელო. ბრელ ოჯახიქ დეკორატიულ მიკაქუნალ ქიმიღ დო უსქვამურო იძირედუნ ფერ ადგილეფ დოფორ. ჩქი გურიშემაკინალ კონგრეს მიღდეს, ნამდგას 1279 პიროვნებაქ დესწრჷ.

გილმალ მსახურება გვალო ადვილ ვარდჷ ჩქინო, მუშენდა ოცხოვრებელ ადგილეფ მანგარო გენესხვავებუდ ართიანშე. ართშა მდიდრულ ჸუდეს ფჩენდუდით ოკეანეშ სანაპიროს, მაჟიაშა მუშეფიშ ბანაკის, ნამუთ უბრალო კონსტრუქციაშე რდუ კეთებულ დო ტუალეტეფ 100 მეტრაშ მაშორას რდუ. მარა თიშ უმკუჯინუო, სო ვმსახურენდით, ირიათო ჯგირო გუმაშინენა თი დღალეფ, მუჟამსით გურგედვალირ პიონერეფ დო მაქადაგებელეფწკუმა ვმსახურენდით. მუჟამსით ახალ დანიშნულება მიბღით, დატებელქ მაჸუეს ბრელ ძვირფას მეგობარქ, მით მანგარო მიმენატრებდეს.

კურთხევეფ ეთიოპიას

1987—1992 წანეფშო ჩქინ საქმიანობა კანონიერო დაშვებულ რდუ მუსხირენ ქიანას, ნამდგას კენიაშ ბეთელ ხემძღვანელენდჷ. შედეგო თე ქიანეფს ცალკე ფილიალეფქ დო ოფისეფქ გინწყჷ. 1993 წანას ჩქი ეთიოპიაშ დედაქალაქ ადის-აბებაშ ოფისის დუმანიშნეს, სოდეთ ჩქინ საქმიანობა ვითობით წანას აკრძალურ რდუ, მარა ასე კანონიერო რე აღიარებულ.

იეჰოვაქ აკურთხჷ ჩქინ საქმიანობა ეთიოპიას. ბრელ და დო ჯიმაქ პიონერულ მსახურება ქიდიჭყჷ. 2012 წანაშე მოჸუნაფილ მაქადაგებელეფიშ 20 პროცენტშე მეტ ირ წანას პიონერო მსახურენდჷ. თეს გეძინელ შხვადოშხვა თეოკრატიულ სკოლეფ იტარებუაფ დო 120-შე მეტ სამეფო დარბაზიქ იჸუ აშენებულქ. 2004 წანას ბეთელიშ ოჯახიქ ახალ შენობაშა გეგნორთ; თე ტერიტორიას საკონგრესო დარბაზ ხოლო აშენეს; თე ირფელ დიდ კურთხევა რდუ და დო ჯიმალეფშო.

წანეფიშ დინახალე მა დო გეილს ხოლოშიან ურთიერთობა მიღდეს ეთიოპიელ და დო ჯიმალეფწკუმა. ჩქი მანგარო მიჸორა თინეფ, მუშენდა მოჸოროფე დო ჯგირ გურიშ რენა. ბოლო პერიოდის ჯამრთელობაშ პრობლემეფქ ქუმაშუეს, ათეშენ ცენტრალურ ევროპაშ ბეთელშა გეგნომიჸონეს. თაქ ყურადღებას ვამარკენა, მარა მანგარო მონატრნა ჩქინ ძვირფას ეთიოპელ მეგობრეფ.

იეჰოვაშ მოხვარათ საქმექ წიმი მიდართ

ჩქინ თოლო ქობძირით, მუჭო მიშ საქმე წიმი იეჰოვაშ მოხვარათ (1 კორ. 3:6, 9). მაგალთო, მუჟამსით რუანდელ მეშახტეეფს პირველო ვუქადაგ კონგოს, თი დროს რუანდას ართ მაქადაგებელ ხოლო ვარდჷ. მარა ამდღა თექ 30 000-შე უმოს იეჰოვაშ მოწმე რე. 1967 წანას კონგოს (კინშასა) სოდგარენ 6 000 მაქადაგებელ რდუ. მარა ასე თექ სოდგარენ 230 000 მაქადაგებელ რე დო 2018 წანას გოშინაშ ონჯუას ართ მილიონშე უმოსიქ დესწრჷ. არძა თი ქიანას, ნამდგას ართ დროს კენიაშ ფილიალ ხემძღვანელენდჷ, მაქადაგებელეფიშ რიცხვიქ 100 000-შე უმოსით მიძინ.

50 წანაშე უმოს ხანიშ წოხოლე, იეჰოვაქ შხვადოშხვა ჯიმალეფიშ საშვალებათ მიმეხვარ, ქიდიბჭყიკო სრულ დროთ მსახურება. მართალ რე, ამდღა ხოლო ვორექ მორდებუან, მარა იეჰოვაშა მენდება ქიდიბგურე. აფრიკას ცხოვრებაქ დო მსახურებაქ მიმეხვარ გუვავითარკო თიცალ თვისებეფ, მუნერით რე მოთვინება დო კმაყოფილება. მა დო გეილ მანგარო ვაფასენთ ჩქინ ძვირფას და დო ჯიმალეფს, მით სტუმარიშ პატიცემას გიმირჩქინანდეს, ურზუდეს განსაცდელეფს დო ონდუდეს იეჰოვას. მარდულ ვორექ იეჰოვაშ გიმორჩქინელ ჸოროფა დო სიჯგირაშენ. იეჰოვაქ ბრელით უმოსო მაკურთხჷ, ვინემ ველუდ (ფსალმ. 37:4).