თინეფქ ქაძირეს, ნამდა მზათ რდეს მადაგასკარი

„ჩქიმ მეგობრეფ თიცალ ტერიტორიას მსახურენდეს, სოდეთ პიონერეფიშ დიდ საჭიროება რდუ. თინეფ ხშირას იჩიებდეს თექიან შემთხვევეფიშ გურშენ, ათეშენ მა ხოლო მანგარო მოკოდ თეცალ მსახურებაშ გამორსება, მარა ფიფქრენდჷ, თენა ვეშმალებედჷ“, — იჩიებ ართ პიონერ და სილვიანა, ნამუთ 20 წანას რე გინოჩილათირი.

თქვა ხოლო თეშ გინაფლენთო დუც, მუჭოთ სილვიანა? გოკონანო თიცალ ტერიტორიას მსახურება, სოდეთ მეტ მაქადაქებელ რე საჭირო? ფიქრენთო, ნამდა თე მიზანშა ვემგაჭირნენა? თაშ ქორენ-და, გურ ვეგიტახათ! იეჰოვაშ მოხვარათ ანთასობით და დო ჯიმაქ გიორჯგინ ირფელს, მუთ თე მიზანიშ მეჭირნაფას ოცილუდჷ. მორთ ქობძირათ, მუჭო მეხვარ იეჰოვაქ ნამთინე მაქადაქებელს, ნამუთ მსოფლიოს სიდიდათ მანთხა კუნძულს, მადაგასკარს მსახურენს.

სოდგარენ ვით წანაშ დინახალე, 11 ქიანაშეa 70-შე უმოს მაქადაქებელქ გინორთ აფრიკაშ თე მხარეშა, სოდეთ ბრელ აფასენს ბიბლიას. თეს გეძინელ, ბრელ ადგილობრივ მაქადაქებელს ხოლო ოკოდ, ქიმეხვარკო შხვა ქიანეფშე მოულირ და დო ჯიმალეფს. ათეშენ თინეფქ კუნძულიშ შხვადოშხვა ტერიტორიაშა გეგნორთეს ოქადაქებშა. მორთ, გეფჩინებაფუათ ნამთინე.

თინეფქ გიორჯგინეს შიშისდო გურიშ გოტახუას

30 წანას გინოჩილათირ ართ წყვილქ, ლუისიქ დო პერინქ საფრანგეთშე მადაგასკარშა გეგნორთეს ოქადაქებშა. თინეფ ბრელ ხანს ფიქრენდეს შხვა ქიანას მსახურებაშენ, მარა პერინი ვაჩქარენდ შხვადო გინულას. თე და იჩიებ: „მოშკურუდ შხვა ქიანაშა გინულა. მანგარო მნერვიანენდ თიშენ, ნამდა ოჯახ, კრება, ჸუდე, ნაჩინებ ადგილეფ დო თი საქმეეფ მაჸიდ დატებელ, მუდგას მერჩქვანელ ვორდი. სინამდვილეს, არძაშ უმოს დიდ დაბრკოლება ჩქიმო თინა რდუ, ნამდა თე ირფელშე ზედმეტო პწუხენდი“. პერინქ გიორჯგინ თე ირფელს დო 2012 წანას ქომონჯწკუმა ართო მადაგასკარშა გეგნორთ. მუს ფიქრენს ასე თინა თე გადაწყვეტილებაშ გურშენ? პერინ იჩიებ: „მუჟამსით ულირს იფშინანქინ, თამამას შემლებ ფთქუე, ნამდა ჩქიმ ცხოვრებას იეჰოვაშ ხეშ ძირაფაქ რწმენა გამმანგარ“. ლუის გეუძინანს: „წერმედგინით, მუჟამსით მადაგასკარს გოშინაშ ონჯუა პირველო ჩუვატარითინ, თის ვით დაინტერესებულქ დესწრჷ, ნამუსით ჩქი ბიბლიას ვოგურუანდით“.

მუქ მეხვარ თე წყვილს მადაგასკარს მსახურებაშ გაგრძელებას, მუჟამსით პრობლემეფქ ქაშუეს? თინეფქ იეჰოვას ლოცვას ქოთხის, ნამდა მოთვინებაშო საჭირო ძალეფ ქიმუჩამუდკო (ფილ. 4:13). ლუისი იშინანს: «ჩქინ თოლით ქობძირით, ნამდა იეჰოვაქ ქუპასუხ ჩქინ ლოცვეფს დო ქომჩეს „მშვიდობა“. მთელ ყურადღება თი ხიოლშა გეგნიბღით, ნამუთ მსახურებას მოუღუდ. თეს გეძინელ, ჩქინ მეგობრეფ საფრანგეთშე, გურიშ ემაკინალ წერილეფს მიჯღონანდეს, ნამდა გამგრძელებდესკო მსახურება» (ფილ. 4:6, 7; 2 კორ. 4:7).

იეჰოვაქ კურთხევეფით ეიოფშ ლუისი დო პერინი მუნეფიშ მოთვინებაშ გურშენ. ლუისი იჩიებ: „2014 წანაშ ოქტომბერს გემკოფრთით სკოლა ქრისტიან წყვილეფშო საფრანგეთის. თე სკოლა ჩქინო იეჰოვაშ საჩუქარ რდუ, ნამუთ დღას ვაგმოჭყორდუნა“.b თე წყვილს მანგარო ახიოლ თიშ გაგებაქ, ნამდა თინეფ კინ მადაგასკარს დანიშნეს.

„მანგარო მახიოლენა!“

ართ წყვილქ, დიდიე დო ნადინიქ, ნამუთ 50 წანას რდეს გინოჩილათირინ, 2010 წანას მადაგასკარშა გეგნორთეს ოქადაქებშა. დიდიე იშინანს: „ახალგაზრდობას პიონერეფო ვმსახურენდით დო უკულ სუმ სქუას ბრდუნდით. მუჟამსით სრულწლოვანო გინირთესინ, ჩქი შხვა ქიანაშა გინულაშ გურშენ ქიდიპჭყით ფიქრი“. ნადინი გეუძინანს: «მუჟამსით თიშე ფიფქრენდჷ, სქუალეფშე შორს იპჸუაფუდინ, გურ ვა მაფუდ თექ გინულაშა. მარა ჩქინ ბაღანეფქ მიწის: „შხვა ქიანაშა ოქადაქებშა გინილენთ-და, მანგარო მახიოლენა!“. თე სიტყვეფქ გურშა ელამკინეს დო გინულა გინმოჭყვიდრაფეს. მართალ რე, სქუალეფშე შორს ვორეთ, მარა მანგარო მოხიოლნა თინეფწკუმა ხშირას ჩიება».

თე წყვილშო ძნელქ იყუ მალაგასიურ ნინაშ გურაფაქ. „ჩქი უკვე ვა ვორეთ 20 წანერეფი“ — გოძიცებულო იჩიებ ნადინი. მუქ მეხვარ თინეფს წარმატებაშ მეჭირნაფას? დუდშე თინეფ გილეშეს ფრანგულ კრებაშა. დრო ხანიშ უკულ ქოძირეს, ნამდა მზად რდეს უცხო ნინა ქუდუგურუაფდესკო დო გინილეს კრებაშა, ნამუთ მალაგასიურ ნინაშა იტარებუდ. ნადინი იშინანს: «ბრელს, მიდგას მსახურებას შეფხვადუთინ, უჸორს ბიბლიაშ გურაფა. ხშირას მადლობას ხოლო მირაგადნა მეკითხირიშ გურშენ. დუდშე ვა ბჯერდ, ნამდა თენა დასურო თაშ რდუ. მიჸორს თე ტერიტორიას პიონერო მსახურება. ირ ოჭმარეს ჩქიმ დუც ვურაგადუქ: „მუშმაჯგირა რე, ამდღა ოქადაქებშა მეულ!“».

დიდიე ძიცებულო იშინანს თი დროს, მუჟამსით მალაგასიურიშ გურაფა დიჭყჷ. თინა იჩიებ: „კრებაშ შეხვალამას ვატარენდ, მარა ვა ბგებულენდ და დო ჯიმალეფიშ კომენტარეფს. ხვალე მადლობაშ რაგად შემლებუდ. ართშა, მუჟამსით ართ დას კომენტარიშ გურშენ მადლობა ვუწინ, თიშ უკახალე ხედესინ თინეფქ ქუმოჩინებაფეს, ნამდა პასუხ სწორ ვა რდუ. ათეშენ, ხეთეშე ართ-ართ ჯიმას ქოპკითხ კომენტარი. იმენდ მიღჷ, თიქ ვარა ქუპასუხ სწორას“.

თიქ ხიოლით ქუდაჸუნ

2005 წანაშ კონგრესის ტიერი დო მუშ ოსურ ნადიაქ ქუჯინეს დრამას „გიღდან თიცალ მიზნეფ, ნამუთ განადიდენს ღორონც“. ბიბლიურ დრამა ტიმოთეს ოხუდჷ. თეშ ჯინაქ მანგარო იმოქმედ თინეფწკუმა დო უმოსო ქუმმაკორინეს თექ მსახურებაქ, სოდეთ მაქადაქებელეფიშ დიდ საჭიროება რდუ. ტიერი იჩიებ: «დრამაშ ბოლოს, ტაშიშ მეგამაშ დროს ჩქიმ ოსურს ელვორაგადე: „ჩქი სო იბდათ?“. ჩქიმ ოსურქ მიწუ, ნამდა მუ ხოლო ზუსტას თეს ფიქრენდ». ჭიჭე ხანშა თინეფქ გეგნოდგეს ნაბიჯეფ, ნამდა ქიმუჭირნუაფდესკო თე მიზანშა. ნადია იშინანს: „ჩქინ ნივთეფ ჭიჭე-ჭიჭეთ დეფთხინეთ. ბოლოს ხვალე ოთხ ჩემოდანს ენინტირედუნ თისხიქ ქუდმოსკიდეს!“.

თინეფქ მადაგასკარშა 2006 წანას მერთეს დო ხეთე მეწონეს თექიან მსახურებაქ. ნადია იჩიებ: „ჩქინო დიდ ხიოლ მოუღუდ თექიან ხალხწკუმა ურთიერთობას“.

ამშვ წანაშ უკულ თე წყვილქ ართ პრობლემაშ წოხლე ქიგედირთ. ნადიაშ დიდაქ, მარი-მადელენქ, ნამუთ საფრანგეთის ცხოვრენდუნ, ქუდანთხ, ხე მიტახ დო დუდ დეზიან. ექიმწკუმა დორაგადაფაშ უკულ, ნადიაქ მუშ დიდას ქოთხუ მადაგასკარშა მალართუკო დო თინეფწკუმა იცხოვრუკო. მართალ რე, თინა 80 წანერ რდუ, მარა იშენით ხიოლით ქუდაჸუნ თინეფს. მუს ფიქრენს თინა შხვა ქიანას ცხოვრებაშენ? მარი-მადელენი იჩიებ: „მართალ რე, მინშა მიჭირს მერჩქვანა დო ბრელ მუთუნიშ კეთება ვეშემლებ, მარა კრებას იშენით საჭიროთ ბგინაფლენქ დუც. არძაშ უმოსო თინა მოხიოლ, ნამდა ჩქიმ სქუალეფს საშვალება უღნა, გაგრძელან თაქ მსახურება“.

„ვორწყექ იეჰოვაშ ხეს“

20 წანას გინოჩილათირ ჯიმა რინი ცხოვრენდ ქალაქ ალაოტრა-მანგოროს (აღმოსავლეთ მადაგასკარი). თე მხარეს ბრელ მოსავალ მოურს. რინი ჯგირო გურაფლენდ სკოლას დო გურაფაშ გაგრძელება ოკოდჷ, მარა ჭეშმარიტებაშ გაგებაშ უკულ თიქ დოთირუ მუშ გეგმეფი. თინა იჩიებ: „იეჰოვას დევეპირ, ნამდა სკოლაშ ბოლო გამოცდას ჩუვაბარენდ-და, პიონერობას ქიდიბჭყანდი“. რინიქ მუშ სიტყვა შეასრულ. თიქ ართ პიონერ ჯიმაწკუმა ართო გეგნორთ შხვა ქალაქშა, დოგორ თიცალ სამუშა, ნამუთ ბრელ დროს ვემდუღანდ დო პიონერობა ქიდიჭყ. თინა იჩიებ: „ჩქიმ ცხოვრებას თენა არძაშ უჯგუშ გადაწყვეტილება რდუ“.

რინიშ ხოლოშიანეფს ვარჩქილედეს, მუშენ თქუ თიქ ვარია გურაფაშ გაგრძელებაშე. თინა იშინანს: „ჩქიმ მუმა, ბიძია დო მუაჩქიმიშ დეი ირიათო მეჩიებდეს, ნამდა უმაღლესის მიგურუაფუდკო. მარა მა ვა მოკოდჷ პიონერობაშ მეტება“. რინის თექ ოკოდჷ მსახურება, სოდეთ მაქადაქებელეფიშ მეტ საჭიროება რდუ. მუქ გინაჭყვიდრაფუ თენა? რინი იშინანს: „ართშა მახირალეფქ გემნორთეს ჩქინ ჸუდეშა დო გოფხირეს. თე შემთხვევაქ დუმაფიქრჷ იესოშ სიტყვეფშე, ნამდა განძი ზეცას ოკო ფშაყარუათ. ათეშენ გეგნობჭყვიდ მეტ მიკეთებუდკო, ნამდა დომშაყარუდკო სულიერ განძი“ (მათ. 6:19, 20). თიქ მუშ ჸუდეშე 1 300 კილომეტრიშ მაშორას, მადაგასკარიშ სამხრეთ ნაწილშა გეგნორთ, სოდეთ ირიათო გოლოფა რდუ. თე მხარეს ცხოვრენდეს ანტანდრუელეფი. მუშენ გინოჭყვიდ თიქ თევრე ულა?

ჸუდეშ გოხირუაშე ართ თუთათ ადრე რინქ ბიბლიაშ გურაფა დოუჭყჷ ჟირ ანტანდრუელ კოჩის. თიქ თინეფიშ ნინაშა მუსხირენ წინადადება ქიდიგურუ დო ქიდიჭყჷ ფიქრი შხვა ანტანდრუელ ხალხშე, მიდგასით დღას ვაფუდ მორჩქილაფირ სახიოლო ამბე. რინი იჩიებ: „იეჰოვას ფთხულენდჷ ქიმმეხვარკო თი ტერიტორიაშა გინულას, სოდეთ თე ნინაშა იჩიებდეს“.

თიქ გეგნორთ თე ადგილშა, მარა სამუშაქ სოთინ ვაშუ. ართ კოჩიქ უწუ: „მუშა მორთ აშო? სამუშაშ ოგორშა თავრეშე თექ მეულა, სოდეთ სი ცხოვრენქ!“. ჟირ მარაშ უკულ რინიქ უკაპეკეთ მიდართ კონგრესშა. კონგრესიშ ბოლო დღას ართ ჯიმაქ რინის კოსტუმიშ ჯიბეშა მუდგარენ ქელუკუჭუ. თენა გვარიან ფარა რდუ, ნამუთ უბაღუდ კინ დირთკო ანტანდრუშა დო დუდიშ ეიოჯუმალარო იოგურტით ვაჭრობა ქუდუჭყაფუდკო. რინი იჩიებ: „იეჰოვაშ ხე ზუსტას მოსაჭირუდუნ თი დროს ქიბგინი. შემლებუდ კინ გუვაგრძელკო მსახურება დო მივეხვარკო თინეფს, მიდგას ვა უღუდეს საშვალება ქიგეგესკო იეჰოვაშ გურშენ!“. თეს გეძინელ, კრებას ხოლო ბრელ საქმე რდუ ოკეთებელი. რინი იშინანს: „ირ მაჟია მარას საჯარო მოხსენება მიღუდჷ. იეჰოვას ოკოდჷ მუშ ორგანიზაციაშ საშვალებათ მეტ დუმოგურუკო“. ამდღა თინა სახიოლო ამბეს უქადაგ ტანდროი ნინაშა მორაგადე ხალხის, მიდგას იეჰოვაშე მეტიშ გაგება ოკო.

„კურთხეულ იჸუაფ ართგურ ღორონთშე“

იეჰოვა მარწმუნენა, ნამდა „არძა, მით მუშ დუც აკურთხენს დედამიწასინ, კურთხეულ იჸუაფ ართგურ ღორონთშე“ (ეს. 65:16). მუჟამსით მთელ ძალეფით ვოცადუთ, მსახურებას დაბრკოლებას გივორჯგინათინ, იეჰოვა მაკურთხენა. დეფიქრით სილვიანაშ მაგალითშე, ნამუთ სტატიაშ დაჭყაფუს რდუ მოშინაფილი. მუჭოთ გებგითინ, თინა ფიქრენდჷ, ნამდა ვეშიალებედ მსახურება თექ, სოდეთ მაქადაქებელეფიშ მეტ საჭიროება რდუ. მუშენ ფიქრენდჷ თაშ? თინა იჩიებ: „კვარჩხან კუჩხი მარძგვანშე 9 სანტიმეტრით უჭიჭაშ მიღჷ. თაშ ნამდა, ფქულანქჷ დო ხეთე ფშურდუქ“.

მარა 2014 წანას სილვიანაქ ართ დაწკუმა სილვიენწკუმა ართო ოქადაქებშა გეგნორთ ჭიჭე სოფელშა, ნამუთ მუშ ქალაქშე 85 კილომეტრიშ მაშორას რე. დაბრკოლებეფიშ უმკუჯინუო, სილვიანაშ ოცნებაქ ესრულ დო თეს დიდ კურთხევეფქ ქუმაჸუნ. თინა იჩიებ: „ართ წანაშ მსახურებაშ უკულ, ართ ახალგაზრდა ოსურქ დორატინიქ, მიდგას ბიბლიას ვოგურუანდითინ, რაიონულ კონგრესის დინათ“.

„მა მიგეხვარებუქ“

მუჭოთ მაქადაქებელეფიშ მაგალითეფშე იძირენ, მუჟამსით ვოცადუთ გივორჯგინათ დაბრკოლებეფს, ნამდა მსახურებას უმოს გუვაკეთათინ, ჩქინ დუდშა გუვამორსენთ თი სიტყვეფიშ ჭეშმარიტებას, ნამუთ იეჰოვაქ მუშ მსახურეფს უწუ: „მა გუგამანგარენქ. მა მიგეხვარებუქ“ (ეს. 41:10). შედეგო, იეჰოვაწკუმა ჩქინ ურთიერთობა იმანგარებ. თეს გეძინელ, შხვა ქიანას ვარდა ჩქინ ქიანას თიცალ ტერიტორიაშა გინულა, სოდეთ მაქადაქებელეფიშ საჭიროება რენ, მამზადენა თეოკრატიულ საქმეეფშო, ნამუთ ახალ ქიანას ოკო ვაკეთათ. მუჭოთ ჟიშე მოშინაფილ დიდიექ თქუნ: „თექ მსახურება, სოდეთ დიდ საჭიროება რენ, ჯგირო მამზადენა მომავალშო“. თაშ ნამდა, იეჰოვაშ ოკო, მუთ შილებე მეტიქ ქიდიჭყას თეცალ მომზადება.