თინეფქ ქაძირეს, ნამდა მზათ რდეს თურქეთი

პირველ საუკუნეს ქრისტიანეფ დუც ვაზოგენდეს, ნამდა მუთ შილებენ მეტ ხალხის ქუქადაქესკო „სახიოლო ამბე სამეფოშ გურშენ“ (მათ. 24:14). თინეფშე ბრელ შხვა ქიანაშა ხოლო მიშ ოქადაქებშა. მაგალთო, მოციქულ პავლექ მისიონერულ მოგზაურობათ ამდღარ თურქეთიშ ტერიტორიაშა იდუ ოქადაქებშა.a სოდგარენ 2000 წანაშ უკულ, 2014 წანას თურქეთის კინ ჩეტარ სპეციალურ ქადაქებაშ კამპანიაქ. მუშენ ჩეტარ დო მიქ მიღ თის მონაწილება?

„მუ ამბე რე თაქ?“

თურქეთის, სოდეთ 79 მილიონ კოჩ ცხოვრენსინ, 2 800-შე მეტ მაქადაქებელ რე. თენა თის ნიშნენს, ნამდა ართ მაქადაბელშა 28 000 კოჩი მოურს. მუჭოთ ვორწყეთინ, მაქადაქებელეფიშ თე ჭიჭე რიცხვ ვა განჭუ, ქუქადაქას ირ კოც. თე სპეციალურ კამპანიაშ მიზან რდუ, ჭიჭე დროშ დინახლე მუთ შილებე ბრელ ხალხშა ქუქადაქეფდესკო. შხვადოშხვა ქიანაშ თურქულ ნინაშა მორაგადე სოდგარენ 550 და დო ჯიმაქ გეგნორთ თურქეთშა დო თექიან მაქადაქებელეფწკუმა ართო მონაწილება მიღ ქადაქებაშ კამპანიას. მუ შედეგიქ მაჸუნ თეს?

დიდ მაშტაბით ქადაქება. სტამბულიშ ართ კრება ჭარუნს: «მუჟამსით ხალხიქ ქობძირესინ, მოკითხუდეს: „მუთუნ განსაკუთრებულ შაყარუა გიღნანო? ირდიხას იეჰოვაშ მოწმეეფს ვორწყეთ“». იზმირიშ ართ კრება ჭარუნს: «ტაქსიშ შოფერქ უხუცესის კითხ: „მუ ამბე რე თაქ? თქვან საქმექ მიძინუო?“». თე კამპანია არძაშო თოლშა მალაფარ რდუ.

შხვა ქიანეფშე მოულირ და დო ჯიმალეფ ხიოლით მონაწილენდეს ქადაქებაშ საქმეს. ართ ჯიმა შტეფან, ნამუთ დანიაშე რენ, რაგადანს: „ირ დღას შეფხვადუდ თიცალ ხალხის, მიდგას იეჰოვაშ გურშენ დღას ვაფუდ გუნაგებ. თენა საშვალებას მარზენდ, იეჰოვაშ სახელ არძას გუვოჩინებაფეკო“. ფრანგი ჯიმა ჟან-დევიდ იჩიებ: „ართ ქუჩას ოთხ საათის ვმსახურენდით. მართალო სარკო რდუ! ხალხიშ უმენტაშ ვეჩინენდ იეჰოვაშ მოწმეეფს. დახე არძა კარს იბჭყანდით მენძელწკუმა რაგადის, ვოძირანდით ვიდეოს დო იპტენდით ლიტერატურას“.

ჟირ მარაშ დინახალე 550 მაქადაქებელქ სოდგარენ 60 000 ცალ ლიტერატურა გავრცელ. თე კამპანიას დიდ მაშტაბით დამოწმებაქ მაჸუნ.

მსახურებაშ ინტერესიქ უმოსო ქიმიძინ. თე კამპანიაქ მეტიშ კეთებაშ ხიოლ ქიმეჩ თექიან და დო ჯიმალეფს. ბრელქ სრულ დროთ მსახურებაშე ფიქრ ქიდიჭყ. შედეგო, თურქეთის თე კამპანიაშ უკულ ართ წანაშა პიონერეფიშ რიცხვიქ 24 პროცენტით ქიმიძინ.

შხვადოშხვა ქიანაშე მოულირ და დო ჯიმალეფ იჩიებნა, მუჭო მეხვარ თე კამპანიაქ მსახურებაშ გაუჯგუშებას მუნეფიშ ქიანაშა დორთელს. გერმანელ და შირენ იჩიებ: „თურქეთის ადვილო იჭყანდეს ჯიმალეფ არაფორმალურო ქადაქის. მა მორდებიან ვორექ დო მიჭირს თეცალ დროს ქადაქებაშ დოჭყაფა. მარა თე სპეციალურ კამპანიაშ, თექიან ჯიმალეფიშ დო ბრელ ლოცვაშ ჭყოლოფუათ, ქიდიპჭყი თიშ კეთება, მუთ თეიშა ვა მაკეთებედ. თექ მეტროს ბქადაქენდ დო ბუკლეტეფს ხოლო ვავრცელენდ. ამდღა უკვე ვა ვორექ თიცალ მორდებიან, მუნერით თეიშა ვორდი“.

იოჰანეს, ნამუთ გერმანიას ცხოვრენსინ, იჩიებ: „თე კამპანიაქ ბრელ მუთუნ დუმოგურუ. თურქ ჯიმალეფს ოკონა მუთ შილებე ბრელ კოც ქუქადაქან. თინეფ ირნერ სიტუაციას გიმირინუანა თეშო. გეგნობჭყვიდ, მა ხოლო თაშ მიფქციკო, მუჟამსით გერმანიაშა დიფრთუდინ. ასე მართალო უმოს მეტ კოც უქადაქუქ, ვინემ თეიშა“.

ზენეფ, ნამუთ საფრანგეთშე რენ, იჩიებ: „თე კამპანიაქ ჩქიმ მსახურებაწკუმა მანგარო იმოქმედ. თექ მიმეხვარ, მეტ გაბედულ ვორდე დო უმოსო ქიმვენდე იეჰოვას“.

მაუწყებელეფქ უმოსო გეჩინებაფეს ართიან. შხვადოშხვა ქიანაშე მოულირ და დო ჯიმალეფიშ ჸოროფას დო ართობას ჯგირ შედეგიქ მაჸუნ. ჟიშე მოშინაფილ ჟან-დევიდ იჩიებ: „ჩქინ დუდშა გეგმობცადით სტუმარიშ პატიცემა, ნამუთ ჯიმალეფქ გიმირჩქინეს. თინეფქ მუნეფიშ ჸუდეშ კარი გომინჯეს დო ოჯახიშ წევრეფცალო მემღეს. მიჩქუდ, ნამდა მსოფლიო საჯიმალოს ვოკათუდ დო თეშ გურშენ ბრელ მაფუდ ნაკითხირ ჩქინ ლიტერატურას, მარა ასე თენა ჩქიმ დუდშა გეგმობცად. გურ ხიოლით მაფ ეფშა დო ღორონთიშ მარდულ ვორექ თეცალ პატი მიღუნ თიშენ“.

„დანიელეფი, ფრანგეფი, გერმანელეფი დო თურქეფი არძა ართ ოჯახიშ წევრეფცალო ვორდით. თეშ იძირედ ითამ, ღორონთიქ არძა ქიანაშ საზღვარ დოლას დიდ ოლასარით“, — იჩიებ ართ ფრანგ და კლერი.

სტეფანი, ნამუთ საფრანგეთშე რენ, იჩიებ: „თე სპეციალურ კამპანიაქ ქუმოძირეს, ნამდა ჩქინ კულტურა დო ნინა ვარინ, იეჰოვაშ ჸოროფა გინმორთინუანა ართ ოჯახო“.

ჯგირ შედეგეფი

თე კამპანიას მონაწილე შხვადოშხვა ქიანაშე მოულირ და დო ჯიმალეფქ თურქეთშა გინულაშე ფიქრ ქიდიჭყეს. თენეფშე მუსხირენქ გინილ თე ტერიტორიაშა, ნამდა თექიანეფს ქიმეხვარესკო ქადაქებაშ საქმეს. მართალო დასაფასებელ რე თეცალ და დო ჯიმალეფიშ მონდომა.

მაგალთო, თურქეთიშ ართ დაშორებულ ტერიტორიას 25-კოჩიან ჯგუფ რე. წანეფიშ დინახლე თე ჯგუფის ხვალე ართ უხუცეს მსახურენდ. წერმიდგინით, მუ ხიოლ აღვენდეს თინეფს, მუჟამსით 2015 წანას გერმანიაშე დო ჰოლანდიაშე ამშვ და დო ჯიმაქ გინილ თე ჯგუფიშ მახვარებშა.

მსახურება თექ, სოდეთ ჭეშმარიტებას პირველო ირჩქილუანა

მუს იჩიებნა თურქეთშა გინულირ და დო ჯიმალეფ თექიან ცხოვრებაშენ? მუშო ოკო რაგად, მინშა თინეფ სირთულეეფს შეხვადნა, მარა კურთხევეფ უმოს უღნა. ქობძირათ, მუს იჩიებნა თექიან მსახურებაშ გურშენ თინეფ:

„ქონება ბრელ ვამღუდ დო ვა ვორდ თეშა დამოკიდებულ; თექ მიმეხვარ უმოს მნიშვნელოვან საქმეშო მიფიქრებუდკო“, — იჩიებ 40 წანას მენჭაფილ დაოჯახებულ ჯიმა ფედერიკო, ნამუთ ესპანეთშე რე. ქელამჩანდესო თინა თეცალ მსახურებას? „მუშო ოკო რაგად, ქო! მუჟამსით შხვა ქიანაშა გინურქ თიშო, ნამდა ქიმეხვარე ხალხის იეჰოვაშ გაჩინებაფას, თეთ სქან დუც მთლიანო იეჰოვას გინოჩანქ. თე დროს არძაშ უმოსო გინაფლენქ, მუჭო გომინჯ იეჰოვა“, — იჩიებ ფედერიკო.

ართ დაოჯახებულ ჰოლანდიელ ჯიმა რუდი, ნამუთ 60 წანას რე მენჭაფილინ, რაგადანს: „დიდ კმაყოფილება დო ხიოლ მოუღ მსახურებას თექ, სოდეთ ხალხიშ უმენტაშის დღას ვამურჩქილუაფ ჭეშმარიტება დო თის ხოლო, ნამდა ჭეშმარიტებაშ გაგებაშ უკულ ხალხი ბედნერ რე“.

40 წანას მენჭაფილ დაოჯახებულ ჯიმა საშა, ნამუთ გერმანიაშე რენ, იჩიებ: „მსახურებას ირო შეფხვადუქ თიცალ ხალხის, მით პირველო ირჩქილუაფ ჭეშმარიტებას. მანგარ კმაყოფილ ვორექ, მუჟამსით თეცალ ხალხის ვოხვარუქ იეჰოვაშ გაჩინებაფას“.

დაოჯახებულ იაპონელ და აცუკო, ნამუთ 35 წანას რე მენჭაფილინ, რაგადანს: „თეიშახ მოკოდ არმაგედონქ მალას ქუმორთკო. მარა თურქეთშა გინულაშ უკულ, იეჰოვას მადლობას ვურაგადუქ, ნამდა ამდღარდღაშა მოთვინებას გიმირჩქინანს. მუთ უმოსო ვორწყექ, იეჰოვა თე საქმეს მუჭო ხემძღვანელენსინ, თით უმოსო მოკო დევეახლოვე თის“.

30 წანას მენჭაფილ და ალისა, ნამუთ რუსეთშე რენ, იჩიებ: „თეცალ მსახურებაქ მიმეხვარ გემო გუსინჯიკო ირფელ ჯგირს“ (ფსალმ. 34:8). თინა აგრძელენს: „იეჰოვა უჯგუშო გეფჩინებაფე შხვადოშხვა სიტუაციას დო ქიმეფხვად, ნამდა თინა ხვალე ჩქინ მუმა ვარინ, ხოლოშიან მეგობარ რე. ჩქიმ ცხოვრება ეფშა რე ბედნერ წუთეფით, საინტერესო შემთხვევეფით დო ბრელ კურთხევეფით!“.

„ქიგნაჯინით ჸვანეფს“

თურქეთის სპეციალურ კამპანიაშ ჭყოლოფუათ, სახიოლო ამბექ ბრელ კოჩიშ ჸუჯშა ქიმერთ. თეშ უმკუჯინუო, ტერიტორიაშ დიდ ნაწილ იშენით ვა რე დამუშებულ. თურქეთშა გინულირ და დო ჯიმალეფ ირ დღას შეხვადნა თიცალ კათას, მიდგას დღას ვაგუგებ იეჰოვაშ გურშენ. ქუგოკონანო თეცალ ტერიტორიას მსახურება? თეშ გინაჭყვიდირალო, დეფიქრით თე სიტყვეფშე: „გეუკინით დუც დო ქიგნაჯინით ჸვანეფს, მუჭო რე გინორჩიალებულ ეიოჭოფალო“ (იოან. 4:35). ქეშეილებნანო იმსახურათ თექ, სოდეთ ტერიტორიეფ „გინორჩიალებულ [რე] ეიოჭოფალო“? თაშ ქორენ-და, ასეშე ქიდიჭყით მოქმედება. ფაქტი რე: სახიოლო ამბეშ ქადაქება „დედამიწაშ მუკი მუკი“ ბრელ კურთხევას მოიღანა (საქ. 1:8).