იეჰოვა გურშა ემქექუანა ირნერ გაჭირებას

1, 2. მუჭო ემქექუანა გურშა იეჰოვა პრობლემეფიშ დროს დო მუშა მარწმუნენა თიშ სიტყვა?

ართ ახალგაზრდა ჯიმა, ნამუთ ვარდ დაოჯახებულ, ფიქრენდ 1 კორინთელეფიშ 7:28-შენ, სოდეთ ჭარ, ნამდა დაქორწინებულეფს „ხორციელ გაჭირება აღვენუნა“. თიქ ბრელ ხანიშ დაქორწინებულ უხუცესის, სტეფანს კითხ, მუ რდუ თე გაჭირება დო მუჭო შეულებუდ მერუკო თის, დექორწინებუდ-და. ონდო თე კითხვას უპასუხენდუნ, სტეფანქ თის თხუ, დეფიქრუკო პავლეშ შხვა სიტყვეფშენ, სოდეთ თინა იჩიებ, ნამდა იეჰოვა რე „ირნერ გურიშ ექექაფაშ მუმა, ნამუთ ირნერ გაჭირებას გურშა ემქექუანა“ (2 კორ. 1:3, 4).

² ნამდვილო, ჩქინ ზეციერ მოჸოროფე მუმა იეჰოვა გურშა ემქექუანა, მუჟამსით პრობლემეფს შეფხვადუთ. შილებე თქვა ხოლო გიღუდესკო თიცალ შემთხვევა, სოდეთ იეჰოვაქ მიგეხვარეს დო გიხემძღვანელეს მუშ სიტყვათ. მუჭოთ ჯვეშ მსახურეფიშ მაგალითეფშე იძირენ, შემლებნა დარწმუნებულ ვორდათ, ნამდა თის ჯგირ ოკო ჩქინო (წეკითხით იერემია 29:11, 12).a

3. ნამ კითხვეფს გენიფხილენთ?

³ მუშო ოკო რაგად, ჩქი უჯგუშო მივერიებუთ პრობლემეფს, მუჟამსით მარჩქვენუნა, მუ რე თიშ მიზეზი. თენა თი გაჭირებას ხოლო ოხუ, ნამუთ ქორწინებას დო ოჯახურ ცხოვრებას შილებე მაჸუნას. მუ შილებე მიშეშას ხორციელ გაჭირებაშა, ნამუთ პავლექ მიშინუ? ნამ ბიბლიურ დო ამდღანერ მაგალითეფ მიმეხვარებნა გურიშ ექექაფას? თეშ რჩქინა მიმეხვარებნა, მივერუათ პრობლემეფს.

„ხორციელ გაჭირება“

4, 5. მუ რე ხორციელ გაჭირებაშ ნამთინე მიზეზი?

⁴ ღორონთიქ ოსურკოჩი გაჭყუ დო კოჩის ქიმეუჸონუნ, თიქ თქუ: „ქიდიტენს კოჩი მუმას დო დიდას, ქუმკაჭაბუ ოსურს დო ართ ხორცი იჸუაფნა“ (დაბ. 2:24). თე სიტყვეფი იეჰოვაქ თიმწკუმა თქუ, მუჟამსით პირველ ქორწინებას მეჩ დაჭყაფუ. მარა არასრულყოფილებაშ გურშენ დაქორწინებას დო ახალ ოჯახიშ შექმნას შილებე პრობლემეფქ ქუმაჸუნას (რომ. 3:23). მაგალთო, დაქორწინებაშახ ოსურკოჩი წესით მუშ მშობლეფს ომორჩილ, მარა დაქორწინებაშ უკულ თინა მუშ ქომონჯის ოკო ომორჩილდას. ღორონთი კოჩშე ითხინს, ნამდა რდას მუშ ოსურიშ დუდი (1 კორ. 11:3). ნამთინე ახალ დაქორწინებულშო თენა ვა რე ადვილ. ღორონთიშ სიტყვაშე იძირე, ნამდა ოსურქ ქომონჯიშ ხემძღვანელობას ოკო მიაჸუნას დო ვართ ხოლო მუშ მშობლეფიშ. მეუღლეშ ნათესეფწკუმა ურთიერთობაქ ხოლო შილებე პრობლემაქ ქიჸუას ახალ დაქორწინებულეფშო.

⁵ შხვა სირთულექ ხოლო შილებე გორჩქინდას, მუჟამსით ჩილ დო ქომონჯი გებულენა, ნამდა ბაღანაქ ოკო აშუან. ხიოლწკუმა ართო თინეფ თიშენ ნერვიანენა, ქიდებადებ დო ვარ ბაღანა ჯამრთელ დო თი პრობლემეფშენ ხოლო ფიქრენა, ნამუთიქ შილებე მაჸუნას ორსულობას დო უკულიან პერიოდის. თინეფ ფინანსურ სირთულეეფშენ ხოლო ფიქრენა, ნამუთ თე ირფელს მოჸუნს. ბაღანა იბადებუნ, ბრელ მუდგარენ ითირუ. მაგალთო, დიდაშ დრო დო ყურადღება ბაღანაშ მიკოლუაფაშა გინურს. თეცალ დროს ჩილ დო ქომონჯის ართიანშო ისხი დრო ვასკიდუ, მუზმათ ადრე. თეწკუმა ართო მუმას ახალ პასუხიშმგებლობეფი გიაძინუ, მუშენდა თიქ ასე ოკო იფიქრას მუჭოთ ოსურიშ, თეშ ბაღანაშ საჭიროებეფშენ ხოლო.

6^—8. მუჭო მოქმედენს წყვილეფშა, მუჟამსით სქუა ოკონა, მარა ვა ურჩქინდუნა?

⁶ დაქორწინებულეფ შხვადოშხვანერ პრობლემას შეხვადუნა. ნამთინეს მანგარო ოკო ჸუნდას ბაღანა, მარა მუჟამსით ოსურკოჩის სქუა ვა ურჩქინდუნ, თინა ემოციურო გლახათ გინაფლენს დუც. ბაღანა გოკონ დო ვეირჩქინდუნ, თენა „ხორციელ გაჭირება“ რე, მარა ბაღანაშ დაბადება ხოლო ვა რე თიშ გარანტია, ნამდა უკულ ვაგაღვენუ მუთუნნერ ოწუხებელ (იგავ. 13:12). ბიბლიურ დროს ოსურს სქუა ვაჸუნდ-და, თენა ონჯღორეთ ითვალუდ. ათეშგურშენ იაკობიშ ოსურ რახელს გურ აფუდ გოტახილ, მუშენდა მუშ დას სქუალეფ ჸუნდ დო მუს ვარ (დაბ. 30:1, 2). მისიონერეფს, მით თიცალ ქიანეფს მსახურენა, სოდეთ მიღებულ რე, ბრელ სქუალეფ ჸუნდან, ხშირაშო ოკითხნა, მუშენ ვა ჸუნა თინეფს ბაღანეფ. მისიონერეფი ტაქტიანო ეუნწყუნა მიზეზის, მარა თინეფს იშენით ურაგადნა: „ჩქი იბლოცენთ თქვანო“.

⁷ ინგლისის ართ დას მანგარო ოკოდ ბაღანა, მარა მუჟამსით ქიგეგ, ნამდა თე ქვეყნიერებას ბაღანა ვაშიდუნ, გურქ გუტირხ. თეშ უკულ მუქ დო მუშ ქომონჯიქ გეგნოჭყვიდეს, ბაღანა გეუჭოფდესკო. თინა იჩიებ: „მა იშენით ბნერვიანენდ, მუშენდა ართ რე ბაღანაშ ეჭოფუა დო გვალო შხვა რე სქან ბაღანა რჸუნსუნ თინა“.

⁸ ბიბლიას ჭარ, ნამდა ქრისტიან „ოსურკოჩის სქუალეფიშ ერჩქინა გინასკილიდუანს“ (1 ტიმ. 2:15). მარა თენა თის ვა ნიშნენს, ნამდა სქუალეფიშ ერჩქინა თის მარადიულ სიცოცხლეს მუღანს. თე სიტყვეფი თის ნიშნენს, ნამდა სქუალეფიშ რდუალა დო ოჯახიშ შხვა საქმეეფიშ კეთება დეცვენს ოსურკათას ჭორიკნობაშე დო შხვაშ საქმეეფიშ გარჩიებაშე (1 ტიმ. 5:13). თეშ უმკუჯინუო, თის იშენით აღვენუ გაჭირება, ნამუთ ქორწინებას დო ოჯახურ ცხოვრებას მოჸუნს.

9. ნამ რე ხოლო ართ პრობლემა, ნამუსით დაქორწინებულეფ შეხვადუნა?

⁹ ართ-ართ პრობლემა, ნამუსით შილებე დაქორწინებულეფქ შეხვადან, მეუღლეშ ღურა რე. შილებე, შურო ვაფიქრენდესკო, ნამდა თეცალ გაჭირებას ქეშეხვადუდეს. ქრისტიანეფ დარწმუნებულ რენა იესოშ დაპირებას, ნამდა იჸუაფ ღურელეფიშ გათელება (იოან. 5:28, 29). თენა დიდი იმენდის არზენს დო გურშა ეუქექუანს თინეფს, მიდგას საჸოროფო მეუღლე აფუ ღურელ. ჩქინ მოჸოროფე მუმა მუშ სიტყვას, ბიბლიას მოჩამილ დაპირებეფით ელამრენა დო გურშა ემქექუანა თეცალ გაჭირებაშ დროს. მორთ, ქობძირათ მუსხირენ მაგალით, სოვრეშეთ იძირე, მუს გინაფლენდეს ღორონთიშ მსახურეფ გაჭირებაშ დროს დო მუჭო ეუქექუანდ გურშა იეჰოვა თინეფს.

გურიშ ექექაფა პრობლემეფიშ დროს

10. მუქ ეუქექუ გურშა ხანას? (ქოძირით სურათ მა-4 გვერდის).

¹⁰ ელკანაშ საჸოროფო ოსურ ხანა ართ პრობლემაშ წოხოლე გერდ. თის მანგარო ოკოდ სქუა, მარა ვა ურჩქინდუდ. ელკანაშ მაჟია ოსურს ფენინას, ბრელ სქუა ჸუნდ (წეკითხით 1 სამუელი 1:4—7).b ხანას თინა ხოლო ელაჭუანდ გურს, ნამდა ფენინა თეშ გურშენ „ირ წანას“ გიაძიცენდ. ხანა იეჰოვაწკუმა ლოცვათ გორუნდ გურიშ ექექაფას. თინა „ბრელ ხანს ლოცულენდ იეჰოვაშ წოხოლე“. ქუღუდუო თიშ იმენდი, ნამდა იეჰოვა შეუსრულენდ მუშ ოთხუალს? ფაქტი რე, ნამდა თის უღუდ თეშ იმენდი, მუშენდა ლოცვაშ უკულ ხანას „სახე შეწუხებულ ვაფუდ“ (1 სამ. 1:12, 17, 18). თის ჯერდ, ნამდა იეჰოვა ვარდა მოუგვარენდ უსქუალობაშ პრობლემას, ვარდა თე ნარკულობას შხვა მუდგარენით გეკუფშანდ.

11. მუჭო ემქექუანა გურშა ლოცვა?

¹¹ პრობლემეფი დო გაჭირება ირიათო მაღვენუნა, ონდო არასრულყოფილეფ ვორეთ დო თე ქიანას სატანა მართუნს (1 იოან. 5:19). მუჯგირ რე თიშ რჩქინა, ნამდა იეჰოვა რე „ირნერ გურიშ ექექაფაშ ღორონთი“. ლოცვა რე თი ართ-ართ საშვალება, ნამუთ განსაცდელეფიშ დო გაჭირებაშ დროს მიმეხვარებნა. ხანაქ გურ გეგნუფაჩ იეჰოვას დო მუშ პრობლემაშ გურშენ ქეჩუ. თეგვარო, ჩხი ხოლო გაჭირებაშ დროს უმოს მეტ ოკო ვაკეთათ, ვინემ ხვალე თიშ მოშინაფა, მუჭო ბგინაფლენთ დუც. ჩქი ოკო ვეხვეწათ ღორონც, ნამდა ქიმმეხვარან დო მთელ გურით ოკო ქუწუათ, მუ მაწუხენა (ფილ. 4:6, 7).

12. მუ ეუქექუანდ გურშა ქომონჯ ღურელ ანას?

¹² თიმწკუმა ხოლო, მუჟამსით უსქუალობაშ ვარდა საჸოროფო პიროვნებაშ ღურაშ გურშენ მანგარო მაჭუნა გურს, შემლებნა მიბღათ გურიშ ექექაფა. იესოშ დროს წინასწარმეტყველ ანას დაქორწინებაშე შკვით წანაშ უკულ ქომონჯიქ დუღურ. ბიბლიას ვა რე მოშინაფილ, ქოჸუნდ დო ვარ თის ბაღანეფი. მარა მუს ორთუდ ანა 84 წანერ რდუნ თეშ ხოლო? ლუკაშ 2:37-ის ჭარ: „ტაძარს ვათხუდ დო დღაშ დო სერით მარხვათ დო ხვეწინით ასრულენდ წმინდა მსახურებას“. ღორონთიშ თაყვანიშცემა ანას გურშა ეუქექუანდ დო ხიოლს არზენდ.

13. ქიმიჸონით მაგალით, მუჭო შეულებნა ნამდვილ მეგობრეფს გურშა ემქექუან, მუჟამსით ნათესეფს ვეშულებნა თეშ კეთება?

¹³ და დო ჯიმალეფწკუმა ხოლოშიან ურთიერთობათ ართგურ მეგობრეფს იფრჩქინანთ (იგავ. 18:24). პაულა იშინანს, მუ გლახათ გინაფლენდ დუც, მუჟამსით 5 წანერ რდუნ თეშ, დიდაქ ჭეშმარიტება ქიდიტუ. თენა დიდ განსაცდელ რდუ პაულაშო. მარა თის ართ პიონერ დაქ ანაქ მანგარო მეხვარ დო ქიზრუნ თიშ სულიერობაშენ. პაულა იჩიებ: „ანა მოჯგირე ვა მაფუდ, მარა თინა ირნერო ელამირდ დო მოხვარუდ, ვემსახურკო იეჰოვას“. პაულა ამდღა ხოლო ართგურო ომსახურ იეჰოვას. თინა ბედნერ რე, მუშენდა კინ მუშ დიდაწკუმა ართო მსახურენს კრებას. ანა ხოლო ბედნერ რე თით, ნამდა მეხვარ პაულას, ვემუტებუდკო იეჰოვაშ მსახურება.

14. მუ კურთხევეფი უღუნა თინეფს, მით შხვეფს გურშა ეუქექუანა?

¹⁴ მუჟამსით შხვეფს ვოხვარუთ დო ჯგირ საქმეეფს ვუკეთენთინ, ჩქინ პრობლემეფი მოჭყორდნა. დაქორწინებულ დო დაუქორწინებელ დალეფს უჩქნა, ნამდა სახიოლო ამბეშ ქადაქებათ ღორონთწკუმა თანამშრომლენა დო თიშ ნებას ასრულენა. თინეფიშ მიზან რე ღორონთიშ განდიდება დო თეს ბედნერობა მოუღ თინეფშო. ნამდვილო, ჩქი შხვეფს ჯგირს ვუკეთენთ თით, ნამდა უქადაქენთ. თეშ გარდა, ხოლოშიან ურთიერთობა მიღნა და დო ჯიმალეფწკუმა, მუჟამსით ვოხვარუთ თინეფს (ფილ. 2:4). მოციქულ პავლექ თეშ ჯგირ მაგალით დომტუეს. თინა დიდაცალო ზრუნენდ თესალინიკეშ კრებაშ წევრეფშო დო თინეფიშ სულიერ მუმა ხოლო რდუ (წეკითხით 1 თესალონიკელები 2:7, 11, 12).c

გურიშ ექექაფა ოჯახშე

15. მიშ მოვალეობაშა მიშურს ბაღანეფშა ჭეშმარიტებაშ გურაფა?

¹⁵ მნიშვნელოვან რე გურშა ეუქექუათ დო ქიმვეხვარათ მუჭოთ ჩქინ ოჯახიშ წევრეფს თეშ, კრებაშ წევრეფიშ ოჯახეფს ხოლო. მინშა ახალ ნათილეფ მოწიფულ მაუწყებლეფს თხინა, ქიმეხვარან ბაღანეფს ქუდაგურუან ჭეშმარიტება დო ართო ჩატარან ბიბლიაშ გურაფა. ბიბლიაშე იძირე, ნამდა ბაღანეფიშ გურაფა მშობლეფს ოვალნა (იგავ. 23:22; ეფეს. 6:1—4). ნამთინე შემთხვევას აუცილებერ რე, ქიმვეხვარათ თინეფს, მარა მშობლეფიშ პასუხიშმგებლობა იშენით ვეთირუ. მნიშვნელოვან რე, მშობლეფს რეგულარულ ურთიერთობა უღდან მუნეფიშ სქუალეფწკუმა.

16. მუქ ოკო ვაგმოჭყორდან, მუჟამსით ბაღანეფს ვოგურუანთ?

¹⁶ მშობელ გეგნოჭყვიდუნს, მუნეფიშ ბაღანეფს ჭეშმარიტება შხვაქ ოგურუას-და, თიქ მიდგა მეხვარებუნ, ვეცადას ოკო მშობელიშ როლ გეჭოფას. მინშა შილებე ბიბლიაქ მაჸუან ოგურაფალქ თი ბაღანეფშა, მიდგაშ მშობლეფ ვარენა მოწმეეფი. თე დროს ვაგმოჭყორდან ოკო, სულიერ დახმარება თის ვა ნიშნენს, ნამდა ჩქი თინეფიშ მშობლეფო გინიფრთათ. თეცალ დროს ჯგირ იჸუაფ ბიბლიაშ გურაფა მუნეფიშ ჸუდეს მშობლეფწკუმა ვარდა მოწიფულ ქრისიტიანწკუმა ართო ჩუვატარათ; ბიბლიაშ გურაფა შილებე შხვადო ხოლო ჩაუტარათ ბაღანეფს, სოდეთ ხვალე ვეპჸით. თეგვარო, მითინს ვემეფჩანთ თიშ საბაბის, ნამდა მუთუნ შხვანერო იფიქრან. იმენდ რე, დრო ხანიშ მიკულაშ უკულ მშობლეფ მუნეფიშ დუდშა გეჭოფნა სქუალეფიშ სულიერ გურაფაშ პასუხიშმგებლობას.

17. მუჭო შეულებნა ბაღანეფს გურშა ეუქექუან ოჯახიშ წევრეფს?

¹⁷ ახალგაზრდეფს, მით ღორონთიშ ჸოროფას გურაფლენა დო თიშ ხემძღვანელობას მეჸუნან, გურშა ეუქექუანა ოჯახიშ წევრეფს. თენა შეულებნა აკეთან თით, ნამდა მშობლეფს პატი ცან დო მატერიალურო მეხვარან. თეშ გარდა, სულიერო ხოლო ოხვარნა თინეფს. დიდწყარალაშახ ლამექ იეჰოვას ომსახურუდ. თიქ მუშ სქუა, ნოეშ გურშენ თქუ: „[თინა] გურიშ ექექაფათ ემქექუანა ხანდას დო ტანჯებას, მუშენდა იეჰოვაქ დიხა დოჭყუ“. თე წინასწარმეტყველებაქ შისრულ დიდწყარალაშ უკულ, მუჟამსით იეჰოვაქ მაშორუ დიხას თე ჭყალა (დაბ. 5:29; 8:21). ბაღანეფს, მით წმინდა თაყვანიშმცემლობას მეჸუნა, შეულებნა გურშა ეუქექუან ოჯახიშ წევრეფს, მეხვარან არძას, მერუან პრობლემეფს დო გინუსკიდან დიდწყარალაშე უმოსის, თე ქიანაშ განადგურებას.

18. მუ მიმეხვარებნა უშკურანჯუო გურზათ პრობლემეფს, ნამუსით ამდღა ვარდა ანწი შეფხვადუთ?

¹⁸ ლოცვა, ბიბლიას ინოჭარილ მაგალითეფშენ დაფიქრება დო იეჰოვაშ ხალხწკუმა ხოლოშიან ურთიერთობა ოხვარ მილიონეფს, მიღან გურიშ ექექაფა გაჭირებაშ დროს (წეკითხით ფსალმუნი 145:18, 19).d თიშ რჩქინა, ნამდა იეჰოვა ირიათო გურშა ემქექუანან, მიმეხვარებნა გაბედულო გურზათ პრობლემეფს, ნამუსით ამდღა ვარდა ანწი შეფხვადუთ.