გეგმირჩქინით რწმენა გეგნოჭყვიდით გონივრულო!

1. მუშენ ვემიაღებუ კაენს გონივრულ გადაწყვეტილებაქ დო მუქ მაჸუნ თეს?

კაენს გინაჭყვიდირალ აფუდ: გაკონტროლენდ ემოციეფს დო ვარ, ემოიცეფ გაკონტროლენდ მუშ მოქმედებეფს. მუდგა ვეგნოჭყვიდუკონ, შედეგეფ მთელ მუშ ცხოვრებას მიაჸუნუდ. ჩქი მიჩქუნა, ნამდა კაენქ ვაკეთ ჯგირ არჩევანი. თიშ გადაწყვეტილებას შედეგო თიშ ართგურ ჯიმაშ, აბელიშ ღურაქ დო გუმაჭყაფალწკუმა ურთიერთობაშ გაფუჭებაქ ქუმაჸუნ (დაბ. 4:3—16).

2. მუშენ რე მნიშვნელოვან გონივრულ გადაწყვეტილებეფიშ მეღება?

² ჩქი ხოლო მაფუნა არჩევან ოკეთებელ დო გადაწყვეტილებეფ მიოღებელი. არძა გადაწყვეტილება ვა რე ღურა დო თელაშ საკითხი. მარა ბრელ ჩქინ გადაწყვეტილებას დო არჩევანს შეულებ მანგარო იმოქმედას ჩქინ ცხოვრებას. თაშ ნამდა, გონივრულ გადაწყვეტილებეფიშ მეღება მიმეხვარებუნა, მიღუდან უმოს მშვიდ დო წყნარ ცხოვრება, ვინემ ქაოსურ, პრობლემეფით ეფშა დო გურიშ გუმატახალ ცხოვრება (იგავ. 14:8).

3. ა) მუ ოკო ბწანდან, გონივრულ გადაწყვეტილებეფი მიბღათი? ბ) მუ კითხვეფს გუვარჩიენთ?

³ მუ მიმეხვარებუნა გონივრულ გადაწყვეტილებეფიშ მეღებას? ჩქი მოსაჭირუნა თიშ რწმენა, ნამდა ღორონთის ოკო დო შეულებ ქიმმეხვარან, ვორდათ ბრძენეფი. ჩქი იეჰოვაშ სიტყვაშ ხოლო ბწანდან ოკო დო ვონდუდათ თიშ მითითებეფს (წეკითხით იაკობიშ 1:5—8). ღორონთწკუმა დაახლოება დო თიშ სიტყვაშ ჸოროფა მიმეხვარებუნა, ვენდათ თიშ სამართლიანობას. შედეგო, წესო მაღვენუნა გადაწყვეტილებეფიშ მეღებაშახ ღორონთიშ სიტყვას ბგორათ ხემძღვანელობა. მუჭო გუვაუჯგუშათ გადაწყვეტილებეფიშ მეღებაშ უნარი? შილებე დო ვარ დობთირუათ მეღებულ გადაწყვეტილებეფი?

საჭირო რე გადაწყვეტილებეფიშ მეღება

4. მუნერ არჩევან აკეთუ ადამქ დო მუქ მაჸუნ თის?

⁴ კაცობრიობაშ გოჭყაფუშე მნიშვნელოვან გადაწყვეტილებეფ არძას აფუდ მიოღებელ. ადამს გინაჭყვიდირალ აფუდ მუშ გუმაჭყაფალს მურჩქილუანდ დო ვარ ევას. მუს ფიქრენთ ადამიშ მეღებულ გადაწყვეტილებაშენ? ევაქ, ნამუთ შეცდომაშა რდუ მიშულირ, გლახა გადაწყვეტილება მიოღებაფუ ადამს, ნამუშ შედეგო თიქ მიოდინუ სამოთხეს ცხოვრებაშ უფლება დო ბოლოს დოღურ. მარა თენა ხვალე დაჭყაფ რდუ — ჩქი ამდღარშახ იპტანჯებუთ თი შედეგეფით, ნამუთ ადამიშ გინოჭყვიდილ საქმეს მაჸუნ.

5. მუჭო ოკო უჯინედათ გადაწყვეტილებეფიშ მეღებას?

⁵ შილებე ნამთინე ფიქრენდას, ნამდა ცხოვრება ბრელით უჯგუშ იჸიდ, გადაწყვეტილებეფ მიოღებელ ვარდასინ. თქვა ხოლო თაშ ფიქრენთო? ვაგგოჭყორდან, იეჰოვას ხალხი რობოტეფო ვაგუჭყაფ, ნამდა ვეშიალებესკო ფიქრიქ დო არჩევანიშ კეთებაქ. ბიბლია მოგურუანა, მუჭო მიბღათ გონივრულ გადაწყვეტილებეფი. მართალ რე, იეჰოვას ოკო მიბღათ გადაწყვეტილებეფი, მარა თიშენ ვარ, ნამდა დებზარალათ. მორთ, ქობძირათ თეშ მუსხირენ მტკიცება.

6, 7. მუ არჩევანიშ წოხოლე გერდეს ისრაელეფ დო მუშენ რდუ თინეფშო გონივრულ გადაწყვეტილებაშ მეღება რთული? (ქოძირით სურათ მა-13 გვერდის)

⁶ დუნაპირებ ქიანას ქიდიხორესინ თიშ უკულ, ისრაელეფს მნიშვნელოვან გადაწყვეტილება აფუდეს მიოღებელ: ვარდა იეჰოვას ოკო ცესკო თაყვან ვარდა შხვა ღორონთის (ღორონთეფს) (წეკითხით იესო ნავეშ სქუაშ 24:15). თე გადაწყვეტილებაშ მეღება შილებედ ადვილო იძირედ. მარა თინეფიშ არჩევან ღურა დო თელას ოხუდ. მსაჯულეფიშ დროს ისრაელეფქ ბრელშა მიქცუეს უგუნურო. თინეფქ იეჰოვას ოჭიშ ქურთინეს დო შხვა ღორონთეფიშ თაყვანიშცემა ქიდიჭყეს (მსაჯ. 2:3, 11—23). დეფიფქრათ ხოლო ართ შემთხვევაშენ ღორონთიშ ხალხიშ ისტორიას, მუჟამსით თინეფ ვალდებულ რდეს გადაწყვეტილება მეუღებდესკო. წინასწარმეტყველ ელიაქ ღორონთიშ ხალხი არჩევანიშ წოხოლე ქიგიორინუ: ვარდა იეჰოვას ოკო ემსახურესკო ვარდა ბაალს (1 მეფ. 18:21). ელიაქ შენიშვნა ქიმეჩ თინეფს, მუშენდა ვეგნაჭყვიდირეს, მუჭო მიქცუესკონ. შილებე ფიქრენდათ, ნამდა თენა ადვილ გინაჭყვიდირალ რდუ, თიშგურშენ ნამდა იეჰოვაშ მსახურებას ირიათო ჯგირობუა მოუღ. სინამდვილეს, ნამთინ გონიერ კოჩი ვედიჭყანდ ბაალიშ თაყვანიშცემას. მარა თი ისრაელეფი „ჟირ ხოლო კუჩხით ქულანდეს“. მუშო ოკო რაგად, ელია ელუჩანდ თინეფს, იეჰოვაშ თაყვანიშცემა გეგშუგორდესკო.

⁷ მუშენ გუჭირდეს ისრაელეფს გონივრულ გადაწყვეტილებაშ მეღებაქ? პირველ, თინეფს მეუდინეს იეჰოვაშ რწმენაქ დო მიოტუეს თიშ რჩქილა. თინეფ ვაღებულენდეს ზუსტ რჩქინას დო სიბრძნეს დო ვანდუდეს იეჰოვას. ზუსტ რჩქინათ მოქმედება მეხვარებუდ თინეფს, მეუღებდესკო სწორ გადაწყვეტილებეფი (ფსალმ. 25:12). ხოლო უმოს, თინეფქ შხვეფს ქიმეჩეს თიშ ნება, მუნეფწკუმა გავლენა უღუდესკო დო გადაწყვეტილებეფ ხოლო მუნეფიშ მანგიორო მეუღებდესკო. თი ქიანას მახორუ ხალხწკუმა ურთიერთობაქ, ნამუთ ვარდეს იეჰოვაშ თაყვანიშმცემელეფი, ისრაელეფიშ აზროვნებაწკუმა ქიმოქმედ დო თინეფქ თე წარმართ ხალხის ქაკათეს. იეჰოვას ბრელ ხანით ადრე აფუდ გაფრთხილებულ მუშ ხალხი, ნამდა შილებედ თეცალ მუდგარენქ ქუმოხვადუკონ (გამ. 23:2).

შხვეფქ ოკო გინოჭყვიდანიო ჩქინ მანგიორო?

8. გადაწყვეტილებაშ მეღებაშ მუ მნიშვნელოვან მაგალით შემლებუნა ბძირათ ისრაელიშ ისტორიაშე?

⁸ ჟიშე მოშინაფილ მაგალითეფ მოგურუანა, ნამდა ჩქი ოკო მიბღათ გადაწყვეტილებეფი, მარა თინეფი გონივრულ დო სწორ რდასინ თიშენ ბიბლიურ რჩქინაშა ოკო რდას გერსხილი. გალატელეფიშ 6:5 იჩიებ: „თითოულს მუშ ოღალ მეუღუ“. ჩქინ მანგიორო შხვა მითინს ოკო ვეგნოფჩათ გადაწყვეტილებეფიშ მეღებაშ პასუგიშმგებლობა. ჩქი თვითონ ოკო გებგათ, მუ რე ღორონთიშ თოლს სწორ დო თაშ მიფქცუათ.

9. მუშენ შილებე გლახა რდას, მუჟამსით შხვეფს არზენქ საშვალებას სქან მანგიორო გინოჭყვიდანი?

⁹ მუქ შილებე ხე შეუნწყუას თის, ნამდა ჩქინ მანგიორო შხვეფქ მიღან გადაწყვეტილებეფი? ჩქინმახანეფიშ გავლენას შეულებ გლახა გადაწყვეტილება მიმოღებაფუან (იგავ. 1:10, 15). მნიშვნელობა ვა უღუ, თეს მუჭოდგა ვაცადუდან, ჩქინ პასუხიშმგებლობა რე, მივაჸუნათ ბიბლიათ გურაფილ სინდისის. ბრელ შემთხვევას, მუჟამსით შხვეფს საშვალებას ვარზენთ ჩქინ მანგიორო გეგნოჭყვიდანი, სინამდვილეს თე დროს ჩქი „თინეფიშ მიმაჸუნალეფი“ გიშმურთ. თენა ხოლო არჩევან რე, მარა თეს შილებე გლახა შედეგეფქ ქუმაჸუნას.

10. მუ გაფრთხილება მეჩუ მოციქულ პავლექ გალატელ ქრისტიანეფს?

¹⁰ მოციქულ პავლე აფრთხილენდ გალატელ ქრისტიანეფს, მუქ შილებედ მაჸუნუკო თის, მუჟამსით შხვეფს ქიმეჩანდეს თიშ უფლებას, ნამდა პირად გადაწყვეტილებეფ მუნეფიშ მანგიორო მიღესკო (წეკითხით გალატელეფიშ 4:17). კრებას ნამთინე ქრისტიანს ოკოდ შხვეფიშ მანგიორო გაკეთკო არჩევან, ხალხი მოწაფეეფს დაშორესკონ თიშენ. თეს თიშენ ორთუდეს, ნამდა დიდებას გორუნდეს. თინეფ ირნერ ზღვარს გინმიშეს დო პატის ვაცენდეს ქრისტიანეფიშ უფლებას, მუნეფიშით მეუღებდესკო გადაწყვეტილება.

11. მუჭო მივეხვარათ შხვეფს, მიღან პირად გადაწყვეტილებეფი?

¹¹ პავლე პატის ცენდ ჯიმალეფიშ უფლებას, მუნეფიშით მეუღებდესკო გადაწყვეტილება დო თეთ ჯგირ მაგალით დომტუეს (წეკითხით 2 კორინთელეფიშ 1:24). ამდღა ხოლო, მუჟამსით უხუცესეფს პირად საკითხიშ გურშენ რჩევა მიოჩამალ აფუნან, თინეფქ ხოლო პავლეშ მაგალითის ოკო მიაჸუნან. თინეფ მზათ რენა კრებაშ წევრეფს ბიბლიაშა გერსხილ რჩევეფ გეგნოჩან. მარა უხუცესეფ საშვალებას არზენა და დო ჯიმალეფს, მუნეფიშით მიღან გადაწყვეტილებეფი. თენა ლოგიკურ რე, მუშენდა მიდგა გადაწყვეტილებას ღებულენსინ თინა რე შედეგეფშენ პასუხიშმგებელი. თავრეშე ართ მნიშვნელოვან გაკვეთილს ბგურაფლენთ: ჩქი შემლებუნა დებინტერესათ შხვეფით დო ყურადღება მივოქციებაფუათ თინეფს ბიბლიურ პრინციპეფშა დო რჩევეფშა. არძას უღუ თიშ უფლება დო პასუხიშმგებლობა, მუშით მიღას გადაწყვეტილებეფი; გონივრულო მეღებულ გადაწყვეტილებეფს ჯგირ შედეგეფ მოჸუნს. არგამა რე, ჩქი დღას ოკო ვეფიფქრათ, ნამდა მიღუნა თიშ უფლება, და დო ჯიმალეფიშ მანგიორო გინოპჭყვიდათ.

გადაწყვეტილებეფიშ მეღება ემოციეფ მორუნან თი დროს

12, 13. მუქ შილებე მაჸუნას, მუჟამსით განერვიანებულ ვარდა გურგოტახილეფ ვორეთ დო თეშ ბღებულენთ გადაწყვეტილებეფს?

¹² გავრცელებულ რე თეცალ აზრი: მუდგას გურ გირაგადუნ თინა აკეთი. მარა თეცალ მოქმედებას შილებე ჯგირობუაქ ვამაჸუნას. თეშ გარდა, ბიბლიაშე ბგებულენთ, ნამდა თეცალ მოქმედება ვა რე სწორი. თინა მაფრთხილენა, საკითხეფიშ გინოჭყვიდუაშ დროს ვევაჸუნათ ემოციეფს დო არასრულყოფილ გურს (იგავ. 28:26). ბიბლიას მოჩამილ მაგალითეფ მოძირანა, ნამდა გლახა შედეგეფ მოჸუნს თის, მუჟამს გურიშ აზრეფს გევაჸუნუთ. მთავარ პრობლემა თინა რე, ნამდა არასრულყოფილ კათაშ გური უნდო დო უმართუ რე (იერ. 3:17; 13:10; 17:9; 1 მეფ. 11:9). მუქ შილებე მაჸუნას, გურიშ კორნებეფს გევაჸუნით-და?

¹³ სიმბოლურ გურს დიდ მნიშვნელობა უღუ, მუშენდა იეჰოვა მირაგადუნა, მიჸორდან თინა მთელ გურით დო მოყვას ჩქინ დუდცალო (მათ. 22:37—39). წოხოლენ აბზაცის მოშინაფილ ბიბლიურ აზრეფშე, ქიგებგით, მუ გლახა შედეგეფ მოჸუნს, მუჟამსით ემოციეფს ვარზენთ უფლებას, მართას ჩქინ აზროვნება დო მოქმედება. მაგალთო, მუქ შილებე მოხვადას, განერვიანებულ ვორეთინ თეშ ქობღებულენთ გადაწყვეტილებეფს-და? დღას ქუმაფუნა ჩხე გურით მუთუნ გინნაჭყვიდირა-და, თე კითხვაშ პასუხი ჩქინო არგამა იჸი (იგავ. 14:17; 29:22). ვარდა ქიმმაღებენანო გონივრულ გადაწყვეტილება გურგოტახილეფ ვორეთინ თეშ? (რიცხ. 32:6—12; იგავ. 24:10). ვაგგოჭყორდან, ნამდა ბიბლია მოძირანა, მუ ჯგირობუა მოჸუნს, მუჟამსთი „ღორონთიშ სიტყვაშ მონა“ ვორეთ (რომ. 7:25). არგამა რე, მნიშვნელოვან გადაწყვეტილებეფიშ მეღებაშ დროს ემოციეფს დუდ ქიმეფჩით-და, შილებე ადვილო მეფჩირთათ.

მუ დროს ოკო ფთირუათ გადაწყვეტილებეფ?

14. სოვრეშე მიჩქუნა, ნამდა შემლებუნა გადაწყვეტილებეფიშ თირუა?

¹⁴ საჭირო რე მიბღათ გონივრულ გადაწყვეტილებეფ. მარა თენა თის ვა ნიშნენს, ნამდა ვეშემლებუნა დობთირუათ თი გადაწყვეტილებეფი, ნამუთ ადრე მიბღით. მინშა საჭირო რე, ქიგნვოჯინათ ჩქინ გადაწყვეტილებეფს დო საჭირო ქორენ-და, დობთირუათ. ქიგიბშინათ, მუჭო მექცუ იეჰოვაქ ნინეველეფს იონაშ დროს. „ ჭეშმარიტ ღორონთიქ ქოძირ თინეფიშ საქმეეფ, ნამდა მიოტეს მუნეფიშ უბადო შარა. ჭეშმარიტ ღორონთიქ თინეფიშ ჭყოლოფუა გეგმირჩქინ დო ეუჩილითუ თი უბედრობა, მუთ ნარაგად აფუდ“ (იონ. 3:10). იეჰოვაქ დოთირუ მუშ გადაწყვეტილება, მუჟამსით ქოძირ, ნამდა ნინეველეფქ მინანის დო მიოტეს ჯვეშ საქმეეფი. თეცალ მოქმედებათ იეჰოვაქ გონიერება, თანდაბლობა დო ჭყოლოფუა გიმირჩქინ. თაშ ნამდა, ხალხიშ გინაწონს, ღორონთი გარისხებულ რენ თიმწკუმა ხოლო გონივრულ გადაწყვეტილებეფს ღებულენს.

15. მუშენ შილებე მაჸუან ოთირალქ ჩქინ გადაწყვეტილებაქ?

¹⁵ მინშა რე თიცალ შემთხვევეფ, მუჟამსით უჯგუშ რე ქიგნვოჯინათ ჩქინ გადაწყვეტილებას ვარდა არჩევანს. მაგალთო, თექ შილებე საჭიროქ იჸუას, მუჟამსით ითირუ მდგომარეობა. იეჰოვა ხოლო მინშა თირანდ მუშ გადაწყვეტილებეფს, მუჟამსით მდგომარეობა ითირუდ (1 მეფ. 21:20, 21, 27—29; 2 მეფ. 20:1—5). შილებე ახალ ინფორმაცია მიბღათ, ნამუთ მარზენდან თიშ სერიოზულ მიზეზის, ნამდა ქიგნვოჯინათ ჩქინ გადაწყვეტილებას. მეფე დავითის ტყურა ინფორმაცია უღუდ საულიშ მოთაშ მეფიბოშეთიშ გურშენ. უმოს გვიანო, მუჟამსით დავითიქ სიმართლე, ქიგეგუნ, თიქ დოთირუ მუშ გადაწყვეტილება (2 სამ. 16:3, 4; 19:24—29). გონივრულ იჸუაფ მინშა ჩქი ხოლო თაშ ქიმიფქცუათ.

16. ა) ნამ რჩევეფ მიმეხვარებუნა სწორ გადაწყვეტილებეფიშ მეღებას? ბ) მუშენ ოკო გინვოჯინათ ადრე მეღებულ გადაწყვეტილებეფს?

¹⁶ ღორონთიშ სიტყვა მირაგადუნა, ვეფჩქარათ, მუჟამსით სერიოზულ გადაწყვეტილება მაფუნა მიოღებელი (იგავ. 21:5). მუჟამსით დროს გიმოფრთუნთ თიშო, ნამდა ჯგირო დეფიფქრათ დო გებწონათ ირნერ მხარე, ნამუთ ოხუ ჩქინ გადაწყვეტილებას, თეს ჯგირ შედეგ მოჸუნს (1 თეს. 5:21). ონდო მუთუნ საქმეს დიჭყანდასინ, ოჯახიშ დუდიქ გეგმირკუას ოკო ბიბლია დო ქრისტიანულ პუბლიკაციეფ, თეშ გარდა ოჯახიშ შხვა წევრეფს ხოლო ოკო ქელაკითხუას აზრი. ქიგიფშინათ, ნამდა ღორონთიქ აბრაამს უწუ, ქუმურჩქილუაფუდკო მუშ ოსურიშ აზრიშა (დაბ. 21:9—12). უხუცესეფქ ხოლო ოკო გეგმორთან დრო, ნამდა გეგმირკუან საკითხი. გონიერ დო თანდაბალ უხუცესეფს ვაშკურნენა თიშა, ნამდა მეუდინუნა პატიცემა, მუჟამსით ახალ ინფორმაციაშ მეღებაშ უკულ, საჭიროქ ქაჸუეს მეღებულ გადაწყვეტილებაშ თირუაქ-და. თინეფ მზათ იჸუაფუნა დოთირუან აზროვნება დო მიქცუან მუჭო საჭირო რენ თეშ. ჯგირ იჸუაფ არძაქ თაშ მიფქცუათ, მუშენდა თენა ხეს უნწყუნს კრებაშ მშივიდობას დო წესრიგის (საქ. 6:1—4).

მუთ გინოჭყვიდილ გაფუნ თის მიაჸუნ

17. მუჭო შემლებუნა სწორას მიბღათ გადაწყვეტილებეფი?

¹⁷ მინ გადაწყვეტილება უმოს მნიშვნელოვან რე, მინ ვარ. მნიშვნელოვან გადაწყვეტილებეფიშ მეღებაშ დროს საჭირო რე მეტ ფიქრი დო ლოცვა; თექ შილებე ბრელ დრო მითხუას. ნამთინე ქრისტიანს გინაჭყვიდირალ აფუ დექორწინას დო ვარ, მის აჸუნას ვარდა მი მიჸონას. ხოლო ართ სერიოზულ გადაწყვეტილება პიონერულ მსახურებაშ დოჭყაფა რე, ნამუსით ბრელ კურთხევა მოჸუნს. თეცალ საკითხეფს მნიშვნელოვან რე მივენდათ იეჰოვას, ნამდა თინა ქომჩანა სწორ ხემძღვანელობას (იგავ. 1:5). თაშ ნამდა, საჭირო რე რჩევა არძაშ უჯგუშ წყაროშე, ბიბლიაშე მიბღათ დო ხემძღვანელობა იეჰოვას ქოფთხუათ ლოცვას. ვაგგოჭყორდან, ნამდა იეჰოვას შეულებ ქომჩან თვისებეფი, ნამუთ მოსაჭირუნა, მიბღათ თიშ ნებას ოსადაგუნ ფერ გადაწყვეტილებეფი. სერიოზულ გადაწყვეტილებეფიშ მეღებაშ დროს ქოკითხით თქვან დუც: ქაძირანსო თე გადაწყვეტილება, ნამდა მიჸორს იეჰოვა? ქუმუღანსო თენა მშვიდობა დო ბედნერობას ჩქინ ოჯახის? ქაძირანსო თენა ჩქიმ მოთვინებას დო სიკეთეს?

18. მუშენ ელუ იეჰოვა, ნამდა ჩქინით მიბღენთ გადაწყვეტილებეფს?

¹⁸ იეჰოვა ვა მანძალენა მიჸორდან თინა დო ვემსახურათ თის. თენა ჩქინ გინაჭყვიდირალ რე. ღორონთიქ ნებაშ თავისუფლება მუჩეს დო თინა აფასენს ჩქინ პასუხიშმგებლობას დო უფლებას, ნამდა ჩქინით გინობჭყვიდათ, ვემსახურათ დო ვარ თის (იეს. 24:15; ეკლ. 5:4). მარა თინა ელუ ჩქინდე, ნამდა მიბღენთ თიცალ გადაწყვეტილებეფს, ნამუთ თიშ ხემძღვანელობაშა იჸუაფ გერსხილ. მუჟამსით გეგმიფრჩქინანთ იეჰოვაშ რწმენას დო თიშ პრინციპეფს გეგმიბრინუანთინ, შემალებენა სწორ გადაწყვეტილებეფიშ მეღება დო თიშ დამტკიცება, ნამდა მანგარო გივორეთ არძა საქმეს (იაკ. 1:5—8; 4:8).