„ვა არსებენს რთულ დო ბოლო ვა უღუნ ფერ შარა“

1937 წანაშ 26 მარტის ჟირ შულადირ კოჩიქ მუნეფიშ ტვერამ სატვირთო მანქანათ ქადირთეს ქალაქ სიდნეის (ავსტრალია). ქალაქიშ დოტებაშე ართ წანაშ უკულ, 19 300 კილომეტრიშე მეტ მილეს თე კონტინენტიშ არძაშ უმოს მიკოლაფირ დო ოღროჩოღრო ადგილეფს. თინეფ ვართ მკვლევარეფ რდეს დო ვართ თავგადასავლეფს გორუნდეს. ართურ უილისის დო ბილ ნიულენდსის შხვა გურგედვალირ პიონერეფცალო გინოჭყვადილ აფუდეს, ღორონთიშ სამეფოშ გურშენ სახიოლო ამბეშ ქადაგება ავსტრალიაშ თიცალ ტერიტორიას, სოდეთ ხალხ ოშა-გოშათ ოხორანს.

1920-იან წანეფიშ ბოლოშო, ბიბლიაშ მარკვიებელეფიშa ჭიჭე ჯგუფი ძირითადო ქადაქენდუ ავსტრალიაშ ზღვაპიჯიშ ქალაქეფს დო ხოლოშიან ტერიტორიას. კონტინენტიშ მიკოლაფირ, ოშა-გოშათ დოხორელ დო ხრიოკ ტერიტორია, ნამუსით ავსტრალიაშ ცენტრალურ ნაწილ უკინებუნ, ფართობით ამერიკაშ შეერთებულ შტატეფიშ ტერიტორიაშ გვერდის უდრენს. მარა ჯიმალეფს ჯგირო არჩქილედეს, მუჭო იესოშ მოწაფეეფქ დედამიწაშ არძა კუნთხუს ოკო იქადაქესკო დო მუშო ოკო რაგად, თეშა ავსტრალია ხოლო მიშმეშუ (საქ. 1:8). მარა მუჭო შეიალებედეს თინეფს თეშ მადიდა საქმეშ კეთება? თიშა დარწმუნებულეფქ, ნამდა იეჰოვა აკურთხენდ მუნეფიშ მონდომას, გეგნოჭყვიდეს მუთ შეულებუდესინ დუდ ვადაზოგესკო თე საქმეშ ოკეთებელო.

პიონერეფ იჭყანა ქადაქებაშ საქმეს

კონტინენტიშ ცენტრალურ ნაწილს ქიქადაქესკონ თიშენ, 1929 წანას კუინზლენდის დო დასავლეთ ავსტრალიას კრებებქ მუსხირენ ავტოფურგონ გეიონწყის. ფურგონეფ ჩაბარეს თიცალ პიონერეფს, მიდგას შეულებუდ თიშ მიკოჯინა დო რთულ პირობეფიშ გარზება. თინეფქ თიცალ ადგილეფშა ქიმერთეს, სოდეთ დღას ვარდ ნაქადაქებ.

თი პიონერეფ, მიდგას ხე ვემუოლუდ თე ტრანსპორტშა, ველოსიპედეფით გილეშეს ოშა-გოშათ დოხორელ ტერიტორიაშა. მაგალთო, 1932 წანას 23 წანერ ბენეტ ბრიკელქ, როკჰემპტონშე ხუთ თუთათ ოქადაგებშა გინილუ კუინზლენდიშ შტატიშ ჩრდილოეთ ნაწილშა. მუშ ხარგელ ველოსიპედშა გიმუძუდ ნორჩალ, ბარგი, ოჭკუმალ დო ბრელ წიგნი. მუჟამსით ბარბალ დითმიშკვანდუნ, იშენით აგრძელენდ შარას, თიშა დარწმუნებულ, ნამდა იეჰოვა ქუხემძღვანელენდ. 320 კილომეტრის თის ხეთ მეუღუდ ველოსიპედ დო თიცალ ადგილეფ მიკორთ, სოდეთ ადრე ბრელ ჸუმენათ რე ნაღურა. თეშ უკულ 30 წანას ჯიმა ბრიკელქ ანთასობით კილომეტრ გილართ ავსტრალიაშ დინახლე, მუჭო ველოსპედითინ თეშ, მოტოციკლეტით დო მანქანათ ხოლო. თიქ აბორიგენეფწკუმა წიმიჭყ ქადაქება დო ოხვარუდ თინეფს კრებეფიშ ჩამოყალიბებას; თი ტერიტორიას თის იჩინენდეს დო პატის ცენდეს.

სირთულეეფიშ გინოღალა

ავსტრალია, მსოფლიოშ ართ-ართ ქიანა რე, სოდეთ ხალხი ართიანწკუმა ხოლო-ხოლოს ვახორანს, განსაკუთრებულო ოშა-გოშათ დოხორინელ ადგილეფს. ათეშენ, იეჰოვაშ ხალხიქ გეგნოჭყვიდუ თეცალ ტერიტორიას არძაშა ქიმურთუმუდესკო დო ქუქადაქებდესკო.

პიონერეფქ, სტიუარტ კელტიქ დო უილიამ ტორინგტონქ თეშნერ მზადყოფნა გეგმირჩქინეს. თინეფქ, 1933 წანას, გეგნოკვათეს სიმპსონიშ დიდ უდაბნო, სოდეთ ბორიაშ მოღალირ ქვიშა გვალაცალო გერზვენუ; თიშენ, ნამდა კონტინენტიშ შქა გურს, ჭიჭე ქალაქ ალის-სპრინგსის ქუქადაქებდესკო. მუჟამსით თინეფს მანქანაქ გილელეს დო მიოტებელქ აჸუესინ, ჯიმა კელტიქ თიშ უმკუჯინუო, ნამდა კუჩხიშ ჯაშ პროტეზ უღუდუნ, იშენით გაგრძელ მოგზაურობა უკვე აქლემით! პიონერეფიშ შრომას შედეგიქ თინწკუმა ქუმაჸუნ, მუჟამსით უილიამ კრიკის, უშორაშ მატარებელიშ სადგურს ართ სასტუმროშ მინჯეს ქეშეხვადეს. ჩარლზ ბერნჰარდტიქ მიღუ ჭეშმარიტება, გეგმოჩ მუშ სასტუმრო დო 15 წანას ხვალე მსახურენდ პიონერო ავსტრალიაშ არძაშ უმოს მიკოლაფირ დო ხრიოკ ადგილეფს.

მუშო ოკო რაგად, ადრეშიან პიონერეფს თეცალ სირთულეეფიშ გინაღალარო გაბედულება დო შეუპოვრობა ოსაჭირუდეს. დაჭყაფუს მოშინაფილ ართურ უილისის დო ბილ ნიულენდსის ართშა, მუჟამსით ავსტრალიაშ მიკოლაფირ ადგილებს ქადაქენდესინ, ჟირ მარას 32 კილომეტრიქ აჸუეს ოულარქ, ნაჭვემერიშ გურშენ ლეტათ გინორთელ უდაბნოს. მინშა თაკარია ჩხანას უფამეფი, ძალამელიებურეფი, გერზვენილ ქვიშეფ შკას, მანქანას უჯიკუანდესინ თეშ მიშეს რობუეფ შკას დო გინმოკვათუნდეს ქვიშამ ადგილეფს. მუჟამსით მანქანა გილმელებუდესინ, ნამუთ ხშირას ხვადუდ, თინეფ მუსხირენ დღას ველოსპედით ვარდა კუჩხით მიშეს უხოლაშ ქალაქშა დო მარობით უჯინედეს მათირალ ნაწილიშ მოულას. თეშნერ გაჭირებაშ უმკუჯინუო, თინეფ პოზიტიურ განწყობას ინარჩუნენდეს. ართურ უილისიქ, მუჟამსით თიმდროშიან ჟურნალ „ოქროშ ხანას“ ნაჭარა სიტყვეფს იშინანდუნ, პერეფრაზირება აკეთ დო თქუ: „თიშ მოწმეეფშო ვა არსებენს რთულ დო ბოლო ვაუღუნ ფერ შარა“.

დიდხანიშ პიონერ ჯიმა ჩარლზ ჰარისი ეთმონწყუნს, ნამდა ოშა-გოშათ დოხორინელ ადგილეფს ხვალეიან რინაქ დო გაჭირებეფიშ გინოღალაქ იეჰოვაწკუმა უმოსო დაახლოვუ. თინა აგრძელენს: „მუთ უმოს ჭიჭე ჩანთა გიღუ ბარგიშო, თით უმოს უჯგუშ რე ცხოვრება. იესო ქორდუ მზათ, მუჟამსით საჭირო რდუნ თიწკუმა გალე ცაშ თუდო ქუდუნჯირუდკონ-და, ჩქი ხოლო დავალება ქითხინს-და, ხიოლით ოკო ვაკეთათ თენა“. ზუსტას თეს ორთუდ ბრელ პიონერი. თინეფიშ თესხი შრომაშ ჭყოლოფუათ, სახიოლო ამბექ მთელ კონტინენტის გევრცელ დო ბრელს მეხვარ, ნამდა ღორონთიშ სამეფოშ მხარეს ქიგედირთესკო.