მუნერ პიროვნება რე იეჰოვა?

პირველო მუ მუგალენა გონებაშა, მუჟამსით იეჰოვა ღორონთშე ფიქრენთ? ხომ ვა ფიქრენთ, თინა დიდებულ პიროვნება რე, მარა თიცალ შორს რე თქვანდე, მუჭოთ მურიცხეფ? ხომ ვა ფიქრენთ, ნამდა თინა რეალურ პიროვნება ვარინ, უბრალოთ ძალა რე, მუჭოთ, ვალ დო გურგინ? სინამდვილეს მუნერ რე იეჰოვა? თიშ სიტყვაშ, ბიბლიაშ, საშვალებათ იეჰოვა მოგებაფუანა მუშ ნამთინე თვისებას დო თის ხოლო, ნამდა თინა დაინტერესებულ რე თქვანით.

1. მუშენ ვა რე შეიოლებერ ღორონთიშ ძირაფა?

„ღორონთ შურ რე“ (იოანე 4:24). იეჰოვას ვა უღჷ ფიზიკურ სხეულ. თის სულიერ სხეულ უღჷ დო მკვიდრენს ზეცას, ადგილს, ნამდგაშ ძირაფა ვეშემლებნა.

2. ნამ რე იეჰოვაშ ნამთინე თვისება?

მართალ რე, იეჰოვაშ ძირაფა შეიოლებერ ვა რე, მარა თინა რეალურ პიროვნება რე დო უღჷ თვისებეფ, მუდგაშ საშვალებათ დუდის უჸოროფუანს თინეფს, მით თის იჩინებაფუანს. ბიბლია იჩიებ: „იეჰოვა სამართლიანობაშ მოჸოროფე რე დო ვემიოტენს მუშ ართგურეფს“ (ფსალმუნი 37:28). თეს გეძინელ, „გურშა მეუღ შხვეფიშ გაჭირება დო მოჭყოლოფე რე“, განსაკუთრებულო თინეფიშ მიმართ, მით იტანჯებ (იაკობი 5:11). „იეჰოვა ხოლოს რე გურგოტახილეფწკუმა; თინა ირსხენს შურაკოჭირებულეფს“ (ფსალმუნი 34:18). ქოიჩქუდესო, ნამდა იეჰოვაშ გრძნობეფწკუმა მოქმედენს ჩქინ საქციელ? მით გლახას ორთჷ, გურს უწყუნუანს თის (ფსალმუნი 78:40, 41). მარა თიცალ კოჩ, მით ჯგირს ორთჷ, გურს უხარენს თის (წეკითხით იგავეფიშ 27:11).

3. მუჭო მოძირანა იეჰოვა, ნამდა ვუჸორთ?

იეჰოვაშ არძაშ უმოს განსაკუთრებულ თვისება ჸოროფა რე. ნამდვილო „ღორონთ ჸოროფა რე“ (1 იოანე 4:8). იეჰოვაშ ჸოროფა ხვალე ბიბლიაშე ვარინ, თიშ არძა გუნაჭყეფუეფშე იძირე (წეკითხით საქმეეფიშ 14:17). მაგალთო, გუვარჩუათ, მუჭო ვაფუთ გოჭყაფილ. იეჰოვაქ მუჩეს უნარ, ბძირათ სქვამ ფერეფ, გებგონათ სასიამოვნო მუსიკაშ ხონარ დო გემო გუსინჯათ გემუან ოჭკუმალს. ღორონთის ოკო, გეფხარათ სიცოცხლეთ.

ქიგეგით უმოს

4. წმინდა შურ — ღორონთიშ მოქმედ ძალა

მუჭოთ საქმეშ შეიოსრულებერო იბრინუანთ ჩქინ ხელეფს, თეშ იეჰოვა ხოლო ირინუანს მუშ წმინდა შურს. ბიბლიაშე ბგებულენთ, ნამდა წმინდა შურ ვა რე პიროვნება, თინა რე ძალა, ნამდგას იეჰოვა დიდებულ საქმეეფიშ შეიოსრულებერო ირინუანს. წეკითხით ლუკაშ 11:13 დო საქმეეფიშ 2:17, დო უკულ გარჩით თუდო მოჩამილ კითხვა:

• ღორონთ „ქიმეჩანს [მუშ] შურს“ არძას, მიდგა თხულენს თის. ათეშენ, მუჭო ფიქრენთ წმინდა შურ პიროვნება რე დოვარ ღორონთიშ მოქმედ ძალა დო მუშენ ფიქრენთ თაშ?

იეჰოვა წმინდა შურს ირინუანს, ნამდა შეასრულას დიდებულ საქმეეფ. წეკითხით ფსალმუნიშ 33:6 დო 2 პეტრეშ 1:20, 21 დო უკულ გარჩით თუდო მოჩამილ კითხვა:

• ნამ შემთხვევეფს გიმირინუ ღორონთიქ წმინდა შურ?

5. იეჰოვას უღჷ მიმზიდველ თვისებეფ

მოსე ღორონთიშ ართგურ თაყვანიშმცემელ რდუ, მარა თის ოკოდ, უჯგუშო გეჩინებაფუკო მუშ გუმაჭყაფალ. ათეშენ თიქ ღორონთის უწუ: „ქუგმოგებაფე სქან შარეფ, ნამდა გიჩინენდე“ (გამოსვლა 33:13). იეჰოვაქ თეშ პასუხო, მოსეს მუშ ნამთინე თვისება ქუგაგებაფუ. წეკითხით გამოსვლაშ 34:4—6 დო უკულ გარჩით თუდო მოჩამილ კითხვეფ:

• მუშ ნამ თვისებეფ გუცხად იეჰოვაქ მოსეს?

• იეჰოვაშ თვისებეფშე განსაკუთრებულო ნამ მორწონა?

6. იეჰოვა ზრუნენს ხალხშე

იეჰოვაშ ხალხ, ებრაელეფ, მონეფ რდეს ეგვიპტეს. მუჭო მოქმედენდჷ თინეფიშ ტანჯება იეჰოვაწკუმა? ჩართით აუდიო დრამა დო თოლ ქუჸუნეთ ვარდა წეკითხით გამოსვლაშ 3:1—10. უკულ გარჩით თუდო მოჩამილ კითხვეფ:

აუდიო: „იეჰოვას გურს უჭუანდჷ თინეფიშ ტანჯება“ (2:45)

• მუჭოთ თე ბიბლიურ მონაკვეთშე იძირე, მუს გინაფლენს იეჰოვა, მუჟამსით ხალხიშ ტანჯებას ორწყე? (ქოძირით მუხლეფ 7 დო 8).

• მუჭო ფიქრენთ, მართალო ოკონო იეჰოვას, მეხვარას ხალხის დო ქუღუნო თეშ კეთებაშ ძალა დო მუშენ ფიქრენთ თაშ?

7. იეჰოვაშ გუნაჭყეფუეფშე თიშ თვისებეფ იძირე

იეჰოვა გუნაჭყეფუეფიშ საშვალებათ მუშ თვისებეფს მოგებაფუანა. ქოძირით ვიდეო, უკულ წეკითხით რომაელეფიშ 1:20 დო გარჩით თუდო მოჩამილ კითხვა:

ვიდეო: „იეჰოვაშ გუნაჭყეფუეფშე თიშ ჸოროფა იძირე — ადამიანიშ სხეულ“ (1:57)

• იეჰოვაშ ნამ თვისებეფს ორწყეთ თიშ გუნაჭყეფუეფშე?

დასკვნა

იეჰოვა სულიერ პიროვნება რე, მიდგას ბრელ ჯგირ თვისება უღჷ, განსაკუთრებულო ჸოროფა.

გამეორებელ კითხვეფ

• მუშენ ვეშემლებნა იეჰოვაშ ძირაფა?

• მუ რე წმინდა შურ?

• ნამ რე იეჰოვაშ ნამთინე თვისება?

დამატებით მასალა

ქიგეგით უმოს იეჰოვაშე თიშ ოთხ ძირითად თვისებაშ გიმორკვიებათ.

„მუნერ პიროვნება რე ღორონთ?“ („გინაჯინალ კოშკი“ №1, 2019 წ.)

ქიგეგით, მუ ამტკიცენს, ნამდა იეჰოვა ვა რე ირფელს დო ირდიხას.

„რენო ღორონთ ირდიხას დო ირფელს?“ (ვებ სტატია)

ქოძირით, მუშენ მიშინუანს ბიბლია წმინდა შურს, მუჭოთ ღორონთიშ ხელეფს.

„მუ რე წმინდა შურ“ (ვებ სტატია)

ართ კოჩის, ნამუთ თოლს ვარწყე, უჭირდჷ თიშ დაჯერება, ნამდა ღორონთ ზრუნენდჷ თიშე. ქიგეგით, მუქ თირუ თიშ აზროვნება.

„ასე მა ხოლო შემლებ, შხვეფიშ მოხვარა“ („გინაჯინალ კოშკი“ 1 ოქტომბერი, 2015 წ.)