კორნელიუს წმინდა შურს ღებულენს

კესარეას ცხოვრენდჷ რომიშ ჯარიშ ოშიშდუდ, ნამდგას კორნელიუს ჯოხოდ. მართალ რე, თინა იუდეველ ვა რდჷ, მარა იუდეველეფ თის დიდ პატის ცენდეს. კორნელიუს გურხვე კოჩ რდჷ დო უღონოეფს დო გაჭირებულეფს ოხვარუდ. თის წანდჷ იეჰოვა დო ირიათო ლოცულენდჷ. ართ დღას კორნელიუსის ანგელოზიქ გეგმეცხად დო უწუ: ღორონთიქ ქიმირჩქილუ სქან ლოცვეფ. ასე სქან ხალხ მიდაშქვ ქალაქ იოპეშა, პეტრე რენ თი ჸუდეშა, დო ქიმუჩინ, სქანდა ქუმორთას. კორნელიუსიქ ხეთე მიდაშქვჷ სუმ კოჩ იოპეშა, ნამუთ სამხრეთჸურე, სოდგარენ 50 კილომეტრიშ მაშორას რდჷ.

ეშობას იოპეს პეტრექ ხილუა ქოძირ. თიქ ქოძირ ცხოველეფ, ნამდგაშ ჭკუმუაშ უფლება იუდეველეფს ვა უღუდეს. უკულ პეტრეს ხონარქ ქელასიმ, ნამდგაქ უწუ, ოჭკუმუკო თე ცხოველეფ. პეტრექ ივარუ თეშ კეთება დო თქუ: ჩქიმ ცხოვრებას დღას ვამჭკუმ უწმინდურ ცხოველ. მარა ხონარქ უწუ: ნუმ მიშინუანქ თე ცხოველეფს უწმინდურო. ღორონთიქ წმინდათ გინაშქვჷ თინეფ. სქან კარწკუმა სუმ კოჩ გერე. მიდაჸუნ თინეფს. პეტრექ კარშა ქიმერთჷ დო თე კოჩეფს კითხჷ, მუშა რდესჷ მოულირ. თინეფქ უპასუხეს: კორნელიუსიქ, რომიშ ჯარიშ ოშიშდუდიქ, მუმაშქვეს. თიშ ჸუდეშა, კესარეაშა, ოკო მოლმაჸუნათ. პეტრექ თინეფ დინახალე გემნიპატიჟ დო უწუ, ნამდა თექ ქიგისერუესკო. მაჟია დღას პეტრექ თინეფწკუმა ართო მიდართჷ კესარეაშა. იოპეშე თის მუსხირენ ჯიმაქ ხოლო მიდაჸუნ.

კორნელიუსიქ პეტრე ქოძირუნ, ბირგულეფს ქეშანთხჷ, მარა პეტრექ უწუ: გედჷ, მა ხოლო სქანცალ ადამიან ვორექ. მართალ რე, იუდეველეფ შხვა ერიშ ხალხიშ ჸუდეშა ვემნულა, მარა ღორონთიქ მიწუ, სქანდა ქუმომრთუმუდკო. რთხინქჷ, ქომწი, მუშა რე საქმე, მუშენ მაშქვჷ თე ხალხ ჩქიმდა?

კორნელიუსიქ პეტრეს უწუ: ოთხ დღაშ წოხოლე, ბლოცულენდინ თეშ, ანგელოზიქ მიწუ, ნამდა სქანდა ხალხ მიდვაშქვიკო. რთხინქჷ, ქუდმოგურეთ იეჰოვაშ სიტყვა. პეტრექ უპასუხ: ქიმეფხვად, ნამდა ღორონთ ვეგმირჩქინანს გიშაკერძაფას. თინა ღებულენს არძას, მიდგას თიშ თაყვანიშცემა ოკო. პეტრექ თინეფს იესოშ გურშენ ბრელ მუდგარენ ქუდაგურუ. თიმწკუმა წმინდა შურქ გინილ კორნელიუსშა დო თექ რდესინ თინეფშა. შედეგო არძაქ დინათ.