იესო საბატონს ოსქილიდუანს ლეხის

ფარისეველეფს ჯოგუდეს იესო დო თიშ ოჭოფალო მიზეზის გორუნდეს. თინეფ იჩიებუდეს, ნამდა თის საბატონს ხალხიშ სქილიდაფაშ უფლება ვა უღუდ. ართ საბატონ დღას იესოქ თოლს ვარწყედუნ ფერ მათხირ ქოძირ, ნამუთ შარას გილახედ დო მუშ მოწაფეეფს უწუ: ქუჯინით, მუჭო მეხვარებ თის ღორონთიშ ძალა. უკულ დიხას ქიგიოფურტინ, ლეტა დოზუ, თე კოჩის თოლეფს ქოუსვჷ დო უწუ, მეუ დო თოლეფ სილოამიშ აუზის გელებონია. კოჩიქ ქოთ თაშ მიქცუ დო მუშ ცხოვრებას პირველო ქუმაკათ თოლსინთექ.

თე ამბეთ გაკვირებულ ხალხ იჩიებუდ: თენა თი კოჩ ვა რენო, მით ქუჩას ხედჷ დო თხულენდჷ, დოვარ უბრალოთ მოგენს თის? თოლსინთექ მაკათუნ თი კოჩ ურაგადუდ, ქო, მა ვორექ დო დაბადებაშე თოლს ვა ვორწყედია. ხალხ თის ოკითხუდ: ქო მარა, ასე მუჭო ორწყექ? მუჟამსით თიქ ქეჩუ, მუჭო მაკათ თოლსინთექ, ფარისეველეფშა მიდეჸუნეს.

თე კოჩიქ ფარისეველეფს უწუ: იესოქ თოლეფშა ლეტა ქომისვჷ დო მიწუ, მეუ დო გელებონია. მა ხოლო თაშ მიფქცი დო თოლსინთექ ქუმმაკათ. ფარისეველეფქ უწუეს: იესო საბატონს ქასქილიდუანს-და, თის ძალა ღორონთშე ვა ნოღვე. მარა შხვეფ იჩიებუდეს, თის ძალა ღორონთშე ვა უღუდასინ, შურო მითინიშ სქილიდაფა ვეშულებუდას იჸინია.

ფარისეველეფქ თე კოჩიშ მშობლეფ ქიჭანუეს დო კითხეს: მუჭო მოხვად, ნამდა თქვან სქუა ასე თოლს ორწყე? მშობლეფს აშქურინეს, მუშენდა ფარისეველეფს ნარაგად აფუდეს, მით იესოს ირწმუნენს, სინაგოგაშე გეგშვოჸოთანთია. ათეშენ ფარისეველეფს უპასუხეს: ვა მიჩქუნა, მუს ქოკითხით. თეშ უკულ ფარისეველეფქ ხოლო ართშა გეგთოკითხეს თე კოჩ. ბოლოს თიქ უწუ: მუთ მიჩქუდუნ, ირფელ ქოიწით. ართ დო იგივეს მუშენ მოკითხუთ? ფარისეველეფქ გერისხეს დო თინა გალე გეგმაჸათეს.

იესოქ თე კოჩ დოგორ დო კითხჷ: ქორწანსო მესია? თიქ უპასუხ, მი რენ ქუმორჩქინასინ, იბრწმუნენქია. იესოქ უწუ: მა ვორექ მესია. მართალო მუშმადიდა სიკეთე გიმირჩქინ იესოქ! თიქ თე კოჩის ხვალე თოლსინთე ვა მუკათუნ, რწმენაშ გავითარებას ხოლო მეხვარ.