იესო ათელენს ლაზარეს

იესოს ბეთანიას სუმ მანგარ ხოლოშიან მეგობარ ჸუნდჷ. თინეფ რდესჷ ლაზარე დო თიშ დალეფ, მარიამ დო მართა. ართშა, მუჟამსით იესო იორდანეშ მელე, პერეას, რდჷ, მარიამქ დო მართაქ თის ქიმუჩინეს, ლაზარე მანგარ გლახათ რე, სასწრაფოთ ქუმორთია! მარა იესოს ხეთე ვა ულინ. თიქ ხოლო ჟირ დღას გაჩერდჷ პერეას დო უკულ მუშ მოწაფეეფს უწუ, ბეთანიაშა მიდაბრთათ. ლაზარეს ლურსჷ დო თიშ გაკურცხინაფშა მეურქია. მოწაფეეფქ უწუეს: ქოლურს-და, იმწკუმა მალას ჯგირო გინირთუ. თიმწკუმა იესოქ პირდაპირ ქოუწუ: „ლაზარექ დოღურ“.

იესოქ ბეთანიაშა გენორთუნ, ლაზარე უკვე ოთხ დღაშ საფლებურ რდჷ. მართა დო მარიამშა მიონარღებშა ქიანაშ ხალხ მიშჷ. მუჟამსით მართაქ ქიგეგ, იესო მოურსია, თიშ შეიოხვალამშა მიდერულ დო უწუ: „უფალ, თაქ ქორდიკონ, ვა ღურუდ ჩქიმ ჯიმა“. იესოქ უპასუხ: სქან ჯიმა კინ იცოცხლენს. ქორჯერსო თენა, მართა? თიქ უწუ: ბჯერსჷ, ნამდა გათელება იჸუაფუნ თი დროს დართუ სიცოცხლე. იესოქ უწუ: „მა ვორექ გათელება დო სიცოცხლე“.

უკულ მართაქ მარიამშა მიდართჷ დო უწუ, იესო თაქ რენია. მარიამქ იესოშა ირულ დო ხალხიქ ხოლო ქეკაჸუნ. თიქ იესოშ კუჩხეფწკუმა ქეშანთხჷ დო ჩხე ჩილამურეფით ინგარდჷ. მარიამქ იესოს უწუ: უფალ, თაქ ქოჸოფედიკონ, ჩქინ ჯიმა ასე ცოცხალ იჸიდ. მუჟამსით იესოქ ქოძირ, მუ მდგომარეობას რდჷ მარიამ, მუს ხოლო ქანგარინ. ხალხიქ იესოშ ჩილამურეფ ქოძირუნ, თქუეს: ქუჯინით, მუჭო ნოჸოროფუე ლაზარე. მარა ნამთინეს უკვენდჷ, მუშენ ვეგნატუა მუშ მეგობარ. საინტერესო რე, მუს გაკეთენდ იესო.

იესოქ თი ადგილშა ქიმერთჷ, სოდეთ ლაზარე სვანჯუდ. სასაფლაშ მინაულარს დიდ ქუა მიკოპონუდ. იესოქ ზოჯჷ, თე ქუა გეგნაკერკელუესკო. თიმწკუმა მართაქ უწუ: ქო მარა, ოთხ დღაშ ღურელ რე, უკვე შურ აღვენუ. მარა თინეფქ იშენით გეგნაკერკელუეს ქუა. უკულ იესოქ ილოც: მუმა, მადლობა, მირჩქილექინ. მიჩქჷ, ნამდა ირიათო მირჩქილექ, მარა თეს ხონარმაღალო თიშენ იფჩიებუქ, ნამდა თე ხალხიქ ქიგეგას, სი მუმაშქვინ. უკულ თიქ ხონარმაღალო ქიდიძახ: „ლაზარე, გიმილ!“. თე დროს სარკო მუდგარენქ ქუმოხვად: ნოჭკერეფს მიშაკირილ ლაზარექ გიმილ სასაფლაშე! იესოქ თქუ: „გოუნწყით, ნამდა თავისფალო გილართას!“.

ბრელქ, მიდგაქ თენა ძირჷ, ირწმუნ იესო. მარა ნამთინექ ფარისეველეფშა მიდართჷ დო თე ამბე ქეჩუ. თე დროშე მოჸუნაფილ, ფარისეველეფს ქოთ ლაზარეშ დო ქოთ იესოშ ჸვილუა ოკოდეს. 12 მოციქულშე ართიქ, იუდა ისკარიოტელქ, ტყობაშე მიდართჷ ფარისეველეფშა დო კითხჷ, იესო ხეშა ქეშაიჸოთათინ, მუსხის გინომგანთია. თინეფქ 30 ვარჩხილიშ ფარაშა მირაგადუეს. თეშ უკულ იუდა მომენტის გორუნდჷ, ნამდა იესო ფარისეველეფს გეგნოჩუკო.