გვალას ქადაგება

თიშ უკულ, მუთ იესოქ 12 მოციქულ გიშეგორ, გვალაშე გეგმორთჷ დო თექ ქიმერთჷ, სოდეთ ხალხ რდჷ შაყარელ. თინეფ გალილეაშე, იუდეაშე, ტვიროსშე, სიდონშე, სირიაშე დო იორდანეშ მელეშე რდესჷ მოულირ. თინეფს დალახებურეფ დო დემონეფ მიშუხედესინ ფერეფ აფუდეს მოჸუნაფილ. იესოქ არძა დასქილიდუ. უკულ ფერდის ქუდოზოჯ დო ჩიება ქიდიჭყჷ. თიქ ენწყჷ, მუ ოკო ვაკეთათ, ღორონთიშ მეგობრეფო გინიბრთათინ. ჩქი ოკო მარჩქილედან, ნამდა იეჰოვა მოსაჭირუნა დო ოკო ქიპჸოროფუათ თინა. მარა ადამიანეფ ვა მიჸორან-და, ვეშმალებენა ღორონთ ქიპჸოროფუათ. ჩქი ჯგირო დო სამართლიანო ოკო მივექცუათ არძას, ჩქინ ნტერეფს ხოლო.

იესოქ თქუ: ვა რე დასაბაღ, ხვალე მეგობრეფ გიჸორდას. ნტერეფ ხოლო ოკო გიჸორდას დო მთელ გურით ოკო აპატუე შხვეფს. მითინ სქანდე გურმულირ ქორენ-და, ხეთე მეუ, ბოდიშ ქოუწი დო გერიგ თის. თეშ მექცი შხვეფს, მუჭოთ სი გოკო, მიგექცუან.

იესოქ ხალხის ქონებაწკუმა დაკავშირებით ხოლო მეჩჷ ჯგირ რჩევეფ. თიქ თქუ: იეჰოვაწკუმა მეგობრობა ბრელ ფარაშე უმოს მნიშვნელოვან რე. მახირალს შეულებ ფარა მიგოხირას, მარა იეჰოვაწკუმა მეგობრობა მითინს ვემდაღინე. ვეწუხა ოჭკუმალ დო ოშუმალშე ვარდა ბარგშე. ქიდეკვირ ჩიტეფს. ღორონთ ირო ზრუნენს თინეფშე, ნამდა დასაბაღ ოჭკუმალ ქოუღუდან. წუხება ართ დღათ ხოლო ვა მოიძინანს სიცოცხლეს. რშუდას, იეჰოვას უჩქჷ, მუ გოსაჭირ.

ხალხის შხვაშე დღას ვა მურჩქილუაფ თინა, მუთ იესოშე მირჩქილუეს. რელიგიურ წინამძღოლეფ თეცალ მუდგარენეფს ვაგურუანდეს თინეფს. მუშენ რდჷ იესო თეცალ დიდებულ მასწავლებერ? მუშენდა ირფელ, მუდგას ოგურუანდჷ, იეჰოვაშე უჩქუდ.