იესო მოწაფეეფს ლოცვას ოგურუანს

ფარისეველეფ ირფელს ხალხიშ ოძირაფალო ორთუდეს. მუთუნ ჯგირს გაკეთენდეს-და, შხვეფიშ ოძირაფალო. თინეფ ხალხიშ შაყარუაშ ადგილეფს ლოცულენდეს, ნამდა ირკოჩიქ ქოძირუკო. ფარისეველეფ გინძე ლოცვეფს იზეპირენდეს დო სინაგოგეფს დო ქუჩეფიშ კუნთხუეფს შხვეფიშ მარჩქილაფარო იმეორენდეს. ათეშენ ხალხის მანგარო გუკვირდჷ, მუჟამსით იესოქ თინეფს უწუ, ფარისეველეფცალო ველოცათია. უკულ გეუძინ: თინეფს მიორჩქუნა, ნამდა ღორონთის გაკვირენა მუნეფიშ დიდ ლოცვეფით. მარა თენა თაშ ვა რე. ლოცვა თქვან დო იეჰოვაშ შქას ურთიერთობა რე. ლოცვაშ დროს ირიათო ართ დო იგივე ვეგემეორათ. იეჰოვას ოკო თიშ გურშენ ეჩუათ, მუთ გურს გიღუნა.

თაშ ოკო ილოცათ: „ჩქინ ზეციერ მუმა, წმინდა რდასჷ სქან სახელ, ქუმორთას სქან სამეფოქ დო შისრულას სქან ნებაქ, მუჭოთ ცას რენ თეშ დედამიწას“. იესოქ ხალხის თინა ხოლო უწუ, ნამდა იეჰოვას ირდღას ქოთხუესკო დასაბაღ ოჭკუმალ. თეს გეძინელ, ქოთხუესკო პატიება ცოდეფიშ გურშენ დო შხვა პირად საკითხეფშენ ხოლო ილოცესკო.

იესოქ ხალხის უწუ: დღას ვემიოტუათ ლოცვა. ირიათო ქოთხით მოხვარა თქვან ზეციერ მუმას, იეჰოვას. არძა მშობელს ჯგირ ოკო მუშ სქუაშო. სქუა ქობალს ქორთხინს-და, ქუას ხომ ვემეჩანქ? ვარდა ჩხომს ქორთხინს-და, გვერს ხომ ვემეჩანქ?

უკულ იესოქ გენწყჷ, მუს გულისხმენდჷ: სქუალეფს ჯგირს თქვა ქარზენთ-და, თქვან ზეციერ მუმა, იეჰოვა, უმოსო ვემერჩანანო წმინდა შურს? უბრალოთ ქოთხით თის. ქირინუანქო იესოშ რჩევას? მუშ გურშენ ლოცულენქ?