იესო გიშაგორუნს ვითოჟირ მოციქულს

იესოქ ქადაგება დიჭყუნ თევრეშე სოდგარენ წანა დო გვერდ რდჷ მიკულირ. თის მნიშვნელოვან გადაწყვეტილება აფუდ მიოღებელ. თიქ მუშ მოწაფეეფშე ოკო გეგშეგორუკო თიცალეფ, მიდგაწკუმა მანგარ ხოლოს ქითანამშრომლენდ დო მიდგას ქრისტიანულ კრებაშ ხელმძღვანელეფო მამზადენდ. თე გადაწყვეტილებეფიშ მიოღებელო იესოს იეჰოვაშ მოხვარა ოსაჭირუდ. ათეშენ გვალაშა მიდართჷ, სოდეთ ხვალე იჸუაფუდ დო მთელ სერ ლოცვას გათანუ. ოჭმარეს მოწაფეეფ ქიჭანუ დო თინეფშე 12 მოციქულ გეგშეგორ. ნამუშ სახელ რშჷ? თინეფს რდესჷ პეტრე, ანდრია, იაკობ, იოანე, ფილიპე, ბართლომე, თომა, მათე, ალფეშ სქუა იაკობ, თადეოზ, სიმონ დო იუდა ისკარიოტელ.

თე ვითოჟირ მოციქულ იესოწკუმა ართო გილეშ. იესოქ მამზად თინეფ დო გოუტუ ოქადაგებშა. იეჰოვაქ თინეფს დემონეფიშ გიშარაჸუაშ დო ლეხეფიშ სქილიდაფაშ ძალა ხოლო ქიმეჩ.

იესო თე ვითოჟირ მოციქულს მეგობრეფო მიშინუანდჷ დო ონდუდ თინეფს. ფარისეველეფ თინეფს ურჩქინჯ დო ჩვეულებრივ კათათ მირჩქინანდეს, მარა იესო თაშ ვა უჯინედ თინეფს დო ირფელ ქუდაგურუ, მუთ ოსაჭირუდეს. იესოშ ცხოვრებაშ არძაშ უმოს მნიშვნელოვან მომენტეფს მოციქულეფ თიშ გვერდით რდესჷ. მაგალთო, ღურაშ წოხოლე დო გათელებაშ უკულ. იესო დო მუშ მოციქულეფიშ უმენტაშ გალილეაშე რდჷ. მოციქულეფშე ნამთინე დაქორწინებულ რდჷ.

იესოშ მოციქულეფ არასრულყოფილეფ რდესჷ დო ხშირას ჩირთუდეს. ნამთინეშა თინეფ უდუფიქრებუო იჩიებუდეს დო გლახა გადაწყვეტილებეფს ხოლო ღებულენდეს. მინშა მოთვინებაშ გიმორჩქინა უჭირდეს. ინა ვარ, თიშე ხოლო ნირზენდეს, მი რდჷ მუნეფ შქას უმოს მანგარ. მარა თინეფ იშენ ჯგირ ადამიანეფ რდესჷ დო უჸორდეს იეჰოვა. იესოშ ზეცაშა ულაშ უკულ, თინეფქ ქრისტიანულ კრებაშ პირველ წევრეფო გინირთეს დო თიშო ბრელ მნიშვნელოვან საქმე აკეთეს.