იესო ქადაგენს სამეფოშ ამბეს

ნათუაშ უკულ მალას იესოქ ქადაგება ქიდიჭყჷ დო ხალხის ურაგადუდ: მონჭაფილ რე ღორონთიშ სამეფო! თინა მთელ გალილეას დო იუდეას ქადაგენდჷ დო მოწაფეეფ ხოლო ეკოჸუნდეს თის. მუჟამსით იესოქ მუშ ქალაქშა, ნაზარეთშა, დირთჷ, სინაგოგაშა გემნორთჷ, ესაიაშ გრაგნილ გონწყჷ დო ხონარმაღალო წეკითხჷ: იეჰოვაქ მუშ წმინდა შურ მუჩჷ, ნამდა სახიოლო ამბე იფქადაგე. მუს ნიშნენდჷ თენა? თე სიტყვეფით იესოქ ოძირუ, ნამდა, მართალ რე, ხალხის თიშ კეთებულ სასწაულეფიშ ძირაფა უმოსო ოკოდ, მარა წმინდა შურიშ მეღებაშ მთავარ მიზან სასწაულეფიშ კეთება ვარინ, სახიოლო ამბეშ ქადაგება რდჷ. უკულ იესოქ მუშ მარჩქილეეფს უწუ: თე წინასწარმეტყველებაქ ამდღა შისრულ.

თეშ უკულ იესოქ გალილეაშ ზღვაშა მიდართჷ, სოდეთ ოთხ მეჩხომეს, პეტრეს, ანდრიას, იაკობის დო იოანეს, ქეშეხვად, მით მუშ მოწაფეეფ იჸუაფუდეს. იესოქ თინეფს უწუ, ქეკმაჸუნით დო ადამიანეფიშ მეჩხომეეფო გინგოშქვანთია. თინეფქ ხეთე მიოტუეს ჩხომუაშ საქმე დო თის ქეკაჸუნეს. იესოქ დო მუშ მოწაფეეფქ მთელ გალილეა მილეს დო იეჰოვაშ სამეფოშ ამბეს ქადაგენდეს ირდიხას – სინაგოგეფს, მოედანეფს დო ქუჩეფს. სოდგა ვედესკონ, თინეფს ქიანაშ ხალხ ეკოჸუნდჷ. იესოშ ამბექ ირდიხას გისიმ, თინეფ შქას სირიას ხოლო, ნამუთ მანგარ შორს რდჷ.

დროშ-ხანიშ მიკულაშ უკულ იესოქ მუშ ნამთინე მოწაფეს ხოლო ქიმეჩ ადამიანეფიშ სქილიდაფაშ დო დემონეფიშ გიშარაჸუაშ ძალა. იესოს ბრელ ეკოჸუნდჷ, მუჟამსით თინა ქალაქშე ქალაქშა დო სოფელშე სოფელშა გილეშ დო ქადაგენდჷ. თინეფ შქას რდესჷ ართგურ ოსურკათა, მით იესოშე დო თიშ მოწაფეეფშე ზრუნენდეს, მაგალთო, მარიამ მაგდალელ, იოანა, სუსანა დო შხვეფ.

იესოქ მუშ მოწაფეეფ მამზად დო ოქადაგებშა გოუტუ. თინეფ მთელ გალილეას ქადაგენდეს. შედეგო ბრელ გინირთუდ მოწაფეთ დო ინათუდ. მოწაფეთ გინორთა თიზმას ოკოდ, ნამდა იესოქ თინეფ თიცალ ჸვანეფს შეადარ, ნამუთ მზათ რდჷ ეიოჭოფალო. თიქ მოწაფეეფს უწუ: ილოცით დო ქოთხით იეჰოვას, ჸვანაშ ეიოჭოფალო უმოს მუშა ქუმაშქვას. უკულ 70 მოწაფე გეგშაგორ დო ჟირ-ჟირო გოუტუ, ნამდა მთელ იუდეას ქიქადაგესკო. თინეფ არძანერ ადამიანს ოგურუანდეს სამეფოშ გურშენ. მოწაფეეფქ დირთესინ, შურ ოლუდეს, მუჟამ უწინდეს იესოს, მუქ მაჸუნ თინეფიშ ქადაგებას. სატანას მუთუნქ ვა ქიმინ ქადაგებაშ საქმეშ გაჩერებელო.

იესოქ ირფელ გაკეთ, ნამდა მუშ ზეცაშა ულაშ უკულ, მოწაფეეფქ გაგრძელესკო თე მნიშვნელოვან საქმეშ კეთება. თიქ თინეფს უწუ: ირდიხას იქადაგით სახიოლო ამბე, ქუდაგურეთ ხალხის ღორონთიშ სიტყვა დო დონათით თინეფ.