ᲒᲐᲙᲕᲔᲗᲘᲚ 72
ჭიჭე იესო
იოსებ დო მარიამ იესოწკუმა დო მუნეფიშ შხვა სქუალეფწკუმა ართო ნაზარეთის ცხოვრენდეს. იოსებ ჯაშ ხელობათ ეიჯუმუანდჷ ოჯახის. თეწკუმა ართო, თინა იეჰოვაშ დო თიშ კანონეფიშ გურშენ ოგურუანდჷ მუშ ჩილ დო სქუას. თინეფ ირო გილეშეს სინაგოგაშა თაყვანიშოცემშა დო ირწანას მიშეს იერუსალიმშა პასექიშ დღახუშა.
იესო 12 წანერ რდუნ თეშ, მუჭოთ წესო უღუდეს, თინეფქ მიდართეს იერუსალიმშა. თინეფიშ ჸუდეშე თე ქალაქშახ შორ შარა მეძუდ. იერუსალიმ ეფშა რდჷ პასექიშ დღახუშ ოზეიმებშა მოულირ ხალხით. დღახუქ გეთუნ, იოსებიქ დო მარიამქ ჸუდეშ შარას ქიგიოდირთეს. თინეფ ფიქრენდეს, ნამდა იესო უკახალე ეკოჸუნდჷ, მარა ნათესეეფ შქას გიგორუესინ, ვა ძირეს.
ათეშენ იერუსალიმშა დირთეს დო სუმ დღას გორუნდეს მუნეფიშ სქუას. ბოლოს ტაძარშა გემნორთეს. იესო თექ რდჷ, მასწავლებერეფს ეშუხედ, ყურადღებათ ურჩქილედ თინეფს დო ჯგირ კითხვეფს უსვენდჷ. მასწავლებერეფ თეშ რდესჷ გაკვირებულ იესოშ რჩქინათ, ნამდა იშო ქუდუჭყეს კითხვეფიშ დოსუმალა. იესოშ პასუხეფ თინეფს მანგარო აკვირენდჷ. მასწავლებერეფ ორწყედეს, ნამდა თის ჯგირო უჩქუდ იეჰოვაშ კანონეფ.
იოსებ დო მარიამ მანგარ განერვიანებულეფ რდესჷ. მარიამქ იესოს უწუ: ირდიხას რგორუნდით! სო რდჷ? იესოქ უპასუხ: ვაიჩქუდესო, ნამდა თაქ, მუაჩქიმიშ ჸუდეს, იპჸიდ?
იესოქ მუშ მშობლეფწკუმა ართო დირთჷ ნაზარეთშა. იოსებ თის ჯაშ ხელობას ოგურუანდჷ. სქან აზრით, მუნერ პიროვნება იჸუაფუდ იესო მოზარდობაშ წანეფს? იესო ირდუდ, აძინუდ სიბრძნე დო მოწონა უღუდ ქოთ ღორონთშე დო ქოთ ადამიანეფშე.
„სქან ნებაშ შესრულება მოხიოლ, ჩქიმ ღორონთ, დო გურს მიღჷ სქან კანონ“ (ფსალმუნეფ 40:8).