იეჰოვაქ დოთხილუ იესო

ისრაელიშ აღმოსავლეთით ცხოვრენდჷ ხალხ, მიდგას ჯერდჷ, ნამდა მურიცხეფს შეულებუდეს შარა ოძირუესკო თინეფს. ართ სერს, აღმოსავლეთშე მოულირ მუსხირენ კოჩიქ ქოძირ ბარჩხალია მურიცხ, ნამუთ ცას მოძრავენდჷ დო ქეკაჸუნეს თის. „მურიცხიქ“ თინეფ იერუსალიმშა გენიჸუნ. თე კოჩეფს უჩქუდეს, ნამდა რდჷ ართ ბაღანა, ნამუთ იუდეველეფიშ მეფეთ გინირთუდ. ათეშენ თექიან ხალხის კითხეს: სო რე ბაღანა, მით იუდეველეფიშ მეფე იჸუაფ? თაქ თიშ პატიშოცემშა მობრთით.

მუჟამსით ჰეროდექ, იერუსალიმიშ მეფექ, ახალ მეფეშ ამბე ქიგეგ, მანგარო გენერვიან. თიქ უნჩაშ მღვდელეფს კითხჷ, სო ოკო დებადუკონია მეფექ. თინეფქ უპასუხეს: წინასწარმეტყველეფქ თქუეს, ნამდა თინა ბეთლემს დებადებუდ. თაშ ნამდა, ჰეროდექ ქიჭანუ აღმოსავლეთშე მოულირ კოჩეფ დო უწუ: მეუთ ბეთლემშა დო დოგორით თე ბაღანა. უკულ დირთით დო ქომწით, სო რე თინა. მა ხოლო მოკო, პატი ქოფცე თის. მარა ჰეროდე ტყურას იჩიებუდ.

„მურიცხიქ“ კინ ქიდიჭყჷ მოძრაობა. თე კოჩეფქ ქეკაჸუნეს თის დო ბეთლემშა გენორთეს. „მურიცხიქ“ ართ ჸუდეშ დუდის გაჩერდჷ დო თე კოჩეფქ ხოლო გემნორთეს დინახალე. თინეფქ იესო დიამუშწკუმა, მარიამწკუმა, ქოძირეს. თინეფქ ბირგულ ქუდუშქვეს ბაღანას დო ქიმეჩეს საჩუქარეფ – ოქრო, გუნდრუკ დო მურ. იეჰოვაქ მიჸუნუო თე კოჩეფ თექ, სოდეთ იესო რდჷ? ვარ.

თიმ სერს იეჰოვაქ იოსების სიზმარო უწუ: ჰეროდეს იესოშ ჸვილუა ოკო. ათეშენ ხე ქიმეთხ სქან ჩილ დო სქუას დო ინტჷ ეგვიპტეშა. თექ ქორდა, სოიშახ მა ვაიწინქ, ნამდა დორთა შეილებ. იოსებიქ დო მარიამქ თიმწუთის მიდართეს ეგვიპტეშა.

იეჰოვაქ აღმოსავლეთშე მოულირ კოჩეფს უწუ, ნამდა ვედირთესკო ჰეროდეშა. მუჟამსით ჰეროდექ ქიმეხვად, ნამდა თე კოჩეფს დორთა ვა ულამუდეს, მანგარო გერისხჷ. რახანს თის ვემიაგორუ იესოშა, ზოჯჷ, ნამდა ბეთლემს იესოშ მახანა არძა ჭიჭე ბოშ დოჸვილესკო. მარა იესო თხილერ რდჷ, მუშენდა თინა შორს, ეგვიპტეს, რდჷ.

დროშ მიკულაშ უკულ ჰეროდექ დოღურ. ათეშენ იეჰოვაქ იოსების უწუ, ნამდა ასე უკვე შეულებუდ ისრაელშა დორთა. თაშ ნამდა, იოსებიქ, მარიამქ დო იესოქ დირთეს ისრაელშა დო ნაზარეთის ქიდიხორეს.