ანგელოზეფ აცხადენა იესოშ დაბადებას

რომიშ იმპერატორქ, კეისარ ავგუსტუსიქ, ზოჯჷ, ნამდა არძა იუდეველქ მოსახლეობაშ ეჭარუაშ დროს მუშ-მუშ ქალაქშა მიდართუკო. ათეშენ იოსებ დო მარიამქ ბეთლემშა მიდართეს, მუშენდა იოსებ თევრეშე რდჷ. თე დროს მარიამიშ მშობიარობა მონჭაფილ რდჷ.

იოსებიქ დო მარიამქ ბეთლემშა გენორთესინ, ორინჯიშ დარნალიშ მეტ, გიოჩერებელ ადგილქ ვაშუეს. ზუსტას თექ ეიორჩქინ მარიამქ იესო. თიქ ბაღანა ნოჭკერეფს ქიმიოკირ დო ფინახარს ქინანჯირუ.

ბეთლემიშ გოხოლუას ჭყიშეფ გალე ოთანუანდეს დო მუნეფიშ შხურს ყარულენდეს. უცფას ანგელოზიქ გეგმეცხად თინეფს დო თექიანობა იეჰოვაშ დიდებაქ გოსინთუ. ჭყიშეფქ დოშქურდეს, მარა ანგელოზიქ თინეფს უწუ: ვა გაშქურინან, თქვანო მანგარ ჯგირ ამბე მიღჷ. ამდღა ბეთლემს მესიაქ ქიდებად! თე დროს ცას ქიანაშ ანგელოზიქ გემკორჩქინდჷ. თინეფ იჩიებუდეს: დიდება ზეცას ღორონთის დო მშვიდობა დედამიწას! თეშ უკულ თე ანგელოზეფქ მედინეს. მუ რეაქცია უღუდეს ჭყიშეფს?

თინეფქ ართიანს უწუეს: დრო ვებღათინ თეშ იბდათ ბეთლემშა. ქოთ ხეთეშე მიდართეს დო დოგორეს იოსებ დო მარიამ, მით მუნეფიშ ახალდუნაბად ბაღანაწკუმა ართო ორინჯიშ დარნალს რდესჷ.

არძა, მიდგაქ გეგჷ, მუ უწუ ანგელოზიქ ჭყიშეფს, გაკვირებულ რდჷ. მარიამ ფიქრენდჷ ანგელოზიშ სიტყვეფშე დო დღას ვა გოჭყოლად თინა. ჭყიშეფქ მუნეფიშ ოჭყიშალს დართეს. თინეფ იეჰოვას უმარდუდეს თი ირფელშენ, მუთ ძირეს დო მირჩქილუეს.