ᲒᲐᲙᲕᲔᲗᲘᲚ 69
გაბრიელ მარიამშა მეურს
ელისაბედის ჸუნდჷ ართ ახალგაზრდა ნათესე, მარიამ, ნამუთ გალილეაშ ქალაქ ნაზარეთის ცხოვრენდჷ. მარიამ ართ ჯაშ მოხელეშა, იოსებშა, რდჷ დანიშნულ. ელისაბედ ამშვ თუთერ ორსულ რდუნ თეშ, ანგელოზ გაბრიელქ გეგმეცხად მარიამს დო უწუ: ჯგირობუა, მარიამ! იეჰოვაქ მოიწონუ. მარიამქ ვემეხვად, მუშ ამბეს რდჷ თინა, მარა უკულ გაბრიელქ უწუ: დეორსულებუქ დო გეიორჩქინანქ ბოშის, ნამდგას იესო ოკო გიოდვე. თინა მეფე იჸუაფ დო თიშ სამეფო სადღამუშოთ იმმართველენს.
მარიამქ უწუ: ქო მარა, მა ხომ ცირასქუა ვორექ, მუჭო ემრჩქინდუ ბაღანა? გაბრიელქ უპასუხ: იეჰოვას ვეშულებუნ ფერ მუთუნ ვა რე. წმინდა შურს მიღენქ დო ბოშის გეიორჩქინანქ. სქან ნათესე, ელისაბედ, ხოლო ორსულო რე. უკულ მარიამქ თქუ. იეჰოვაშ მსახურ ვორექ. ირფელქ თეშ იჸუას, მუჭოთ სი თქვი.
მარიამქ მიდართჷ ელისაბედშა, ნამუთ გვალამ მხარეს, ართ ქალაქის ცხოვრენდჷ. ელისაბედიქ მარიამ ქოძირუნ, ქიგინ, ნამდა ბაღანაქ ქვარას ქიდიხვარხვალუ. ელისაბედიქ წმინდა შურით გეიფშჷ დო თქუ: მარიამ, იეჰოვაქ დორხვამუ. ჩქიმო დიდ პატი რე, ჩქიმ უფალიშ დიდაქ ყუდეშა მუმაკითხუნ. მარიამქ უწუ: მთელ გურით ვადიდენქ იეჰოვას. თიქ ელისაბედწკუმა სუმ თუთას ქუდოსქიდ დო უკულ ნაზარეთშა, მუშ ჸუდეშა, დირთჷ.
იოსებიქ მარიამიშ ორსულობაშ ამბე ქიგეგუნ, ნიშნობაშ გაუქმება მინდომ, მარა ანგელოზიქ გეგმეცხად სიზმარს დო უწუ: ვეგეთაკილას მარიამიშ ოსურო მოჸუნაფაქ. თის გლახა მუთუნ ვა უკეთებ. თაშ ნამდა, იოსებიქ მარიამ ოსურო ქიმიჸუნ დო ჸუდეშა მიდეჸუნ.
„იეჰოვა, მუდგას მიკორინუანსინ, ირფელს ორთჷ ქოთ ცას დო ქოთ დედამიწას“ (ფსალმუნეფ 135:6).