ᲒᲐᲙᲕᲔᲗᲘᲚ 63
ნაჭარა კიდალას
დროშ მიკულაშ უკულ ბაბილონიშ მეფეთ ბელშაცარქ გინირთჷ. ართ სერს თიქ ანთასობით დიდ კათას დიარა მოუნწყუ. უკულ მუშ მსახურეფს უზოჯ, გეგმიღესკო თი ოქროშ ჭირქეფ, ნამუთ ნაბუქოდონოსორქ იეჰოვაშ ტაძარშე იღჷ. ბელშაცარ დო თიშ სტუმარეფ თე ჭირქეფშე შუნდეს დო მუნეფიშ ღორონთეფს ადიდენდეს. უცფას თი ოთახის, სოდეთ თინეფს დიარა უღუდეს, კოჩიშ ხექ გემკორჩქინდჷ დო კიდალას მითინს ვა უჩქუდუნ ფერ სიტყვეფიშ ჭარუა ქიდიჭყჷ.
ბელშაცარს მანგარო აშქურჷინ. თიქ მუშ ჯადოქარეფ ქიჭანუ დო პირობა მეჩჷ, მით თე სიტყვეფს ენწყუნს, თის ბაბილონს მასმა კოჩო ქიგვორინუანქია. ჯადოქარეფქ ეცადეს თე სიტყვეფიშ ენწყუმას, მარა ნამთინს ვეიანწყინ. უკულ დედოფალქ მინილ დო ბელშაცარს უწუ: ართ კოჩ რე, დანიელ, ნამუთ ნაბუქოდონოსორს ირფელს ეუნწყუნდჷ. თის შეულებ გეინწყას, მუს ნიშნენს თე სიტყვეფ.
დანიელქ მეფეშა გემნორთჷ. ბელშაცარქ თის უწუ: თე სიტყვეფს წეკითხენქ დო გემინწყუნქ-და, ოქროშ ცეპის ქიმერჩანქ დო ბაბილონს მასმა კოჩო გიგორინუანქ. დანიელქ უპასუხ: ვა მოკო საჩუქარეფ, თეშ ქოიწინქ, მუს ნიშნენს თე სიტყვეფ. მუასქან, ნაბუქოდონოსორ, დუდძირგალ რდჷ, ათეშენ იეჰოვაქ დამცირ თინა. სი გიჩქუდ ირფელ, მუდგაქ თის აღოლ, მარა იეჰოვაშ ტაძარშე მოღალირ ოქროშ ჭირქეფით შუნდჷ ღვინს, მუდგათ უპატიცემლობა გიმირჩქინ იეჰოვაშ მიმართ. ათეშენ ღორონთიქ თე სიტყვეფ ჭარჷ: მენე, მენე, თეკელ, უფარსინ. თე სიტყვეფ თის ნიშნენს, ნამდა მიდიელეფ დო სპარსელეფ გეჭოფუნა ბაბილონს დო მეტო ვეჸუაფუქ მეფე.
თეშ იძირედ, ნამდა ბაბილონშა მითინს ვა მარიებედ, მუშენდა თე ქალაქ სქელ კიდალეფით დო ტომბა მალწყარით რდჷ თხილერ. მარა თიმ სერს მიდიელეფქ დო სპარსელეფქ ქიგიანთხეს ბაბილონს. სპარსეთიშ მეფე კიროსიქ მალწყარს მიმართულება დუთირუ, ნამდა ჯარიშკოჩეფს ქალაქიშ კარმინოლშა ქიმურთუმუდესკო. თინეფს კარმინოლქ გონჯამილქ ქუდოხვადეს. ჯარქ გემნოსოფ ქალაქშა, გეჭოფ თინა დო დოჸვილ მეფე. თეშ უკულ ბაბილონიშ მმართველო კიროსიქ გინირთჷ.
ართ წანაშა კიროსიქ გეგმაცხად: იეჰოვაქ მიწუ, ნამდა ტაძარ გევაშენე იერუსალიმს. თიშ ხალხშე მითინს თე საქმეს მოხვარა ქაკონ-და, თავისფალო შეულებ იდას. თაშ ნამდა, იერუსალიმიშ განადგურებაშე 70 წანაშ უკულ ბრელ ებრაელქ დირთჷ ჸუდეშა, მუჭოთ თენა იეჰოვას აფუდ ნარაგად. ირფელ, მუთ ნაბუქოდონოსორქ ტაძარშე იღჷ – ოქროშ დო ვარჩხილიშ ჭირქეფ დო ჭკუდეფ, კიროსიქ დართინუ. ქარწყექო, მუჭო გიმირინუ იეჰოვაქ კიროს მუშ ხალხიშ მახვარებელო?
„ქუდანთხჷ! ქუდანთხჷ დიდ ბაბილონქ დო გინირთჷ დემონეფიშ ოკვირდეთ“ (გიმოცხადება 18:2).