დანიელს ლომეფწკუმა ენაჸათანა

ბაბილონიშ ხოლო ართ მეფე რდჷ დარიოს მიდიელ. თიქ ქოძირ, ნამდა დანიელ შხვეფშე უმოს ბრძენ კოჩ რდჷ. ათეშენ თინა ბაბილონს არძაშ უმოს დიდ კათაშ უნჩაშო ქიგიორინუ. თე დიდ კათას ონჯარუდ დანიელიშ დო თიშ ჩათხინაფა ოკოდეს. თინეფს უჩქუდეს, ნამდა დანიელ დღაშე სუმშა იეჰოვას ლოცვათ ურაგადუდ. ათეშენ დარიოსის უწუეს: მეფე, კანონ გეგშაშქვჷ, ნამდა არძაქ ოთხუალ ხვალე სი გიწუას. მით თე კანონს ვედემორჩილებ, ლომეფწკუმა ოკო იჸუას ენოჸოთამილქ. დარიოსის მეწონ თე აზრიქ დო ხე ქუმაჭარ კანონს.

დანიელქ თე კანონიშ ამბე ქიგეგუნ, ხეთე მუშ ჸუდეშა მიდართჷ, გონჯამილ აკოშკაშ წოხოლე ბირგულეფს ქეშანთხჷ დო იეჰოვას ლოცვათ ქუდურაგადუ. თე დროს, თი კოჩეფქ, მიდგას დანიელიშ ონჯარუდეს, გემნოსოფეს დანიელიშ ჸუდეშა დო ლოცვას ქიგიოჭოფეს. უკულ დარიოსშა მიდერულეს დო უწუეს: დანიელ ვამორჩილ სქან კანონს. თინა მუშ ღორონთის დღაშე სუმშა ლოცვათ ურაგად. დარიოს პატის ცენდჷ დანიელს დო ვაკოდ თიშ ღურა. თინა მთელ დღას ფიქრენდჷ, მუჭო შილებედ დანიელ ღურაშე ირსხუკო, მარა მეფეს ხოლო ვეშულებუდ თი კანონიშ თირუა, ნამდგაშა უკვე ხე აფუდ მოჭარილ. თის შხვა შარაქ ვა დასქიდ დო ზოჯჷ, ნამდა დანიელ შქირენით გაქანდარებულ ლომეფწკუმა ქენაჸათესკო.

თიმ სერს დარიოს თეშ ნერვიანენდჷ დანიელიშ გურშენ, ნამდა ვა დარულ. ოჭმარეს დარიოსიქ ირულ თი ადგილშა, სოდეთ დანიელ ლომეფწკუმა რდჷ ენოჸოთამილ დო ქუდუძახ: გირსხუო სქან ღორონთიქ?

დარიოსიქ დანიელიშ ხონარ ქიგეგ: იეჰოვაშ ანგელოზიქ პიჯ გეუკილუ ლომეფს. თინეფს ჩქიმდა მუთუნ ვა დუშებუნა. დარიოსის თე ამბექ მანგარო ახიოლ. თიქ დანიელიშ ეშაჸონაფა ზოჯჷ. თინა მიკოცხაბარელ ხოლო ვა რდჷ. უკულ მეფექ ზოჯჷ, ნამდა დანიელს ბრალ გედვესინ თი კოჩეფ ქენაჸათესკო ლომეფწკუმა. ენოჸოთამა დო ხეთეშე თინეფ ლომეფქ გაკოსოფეს.

დარიოსიქ თეცალ მუდგარენ ზოჯჷ: არძას ოშქურუდას დანიელიშ ღორონთშა! თიქ დანიელ ლომეფშე ირსხჷ.

დანიელცალო, სი ხოლო ქოლოცულენქო ირდღას?