იეჰოვაშ ართგურ ოთხ ბოშ

ნაბუქოდონოსორქ იერუსალიმიშ სამეფო საგვარეულოშე ხალხ ბაბილონშა მიდეჸუნ დო თინეფს მუშ სამეფო კარიშ მსახურ, აშფენაზ, მეურჩქინ ზედამხედველო. ნაბუქოდონოსორქ თის დავალ, ნამდა თე ხალხშე არძაშ უმოს ჯანმრთელ დო ჭკვერ ბოშეფ გეგშაგორუკო, მიდგას სუმ წანაშ დინახალე მამზადენდეს. მომზადებაშ უკულ თე ახალგაზრდეფ ბაბილონს დიდ თანამდებობეფს მიღენდეს. თე ბოშეფს ოკო დუგურუაფდესკო ჭარუა, კითხირ დო ჩიება აქადურ ნინაშა, ნამდგაშათ ბაბილონელეფ იჩიებუდეს. თეს გეძინელ, თინეფს თი ოჭკუმალ ოკო უჭკუმუდესკო, ნამდგას მეფე დო თიშ მსახურეფ ჭკუმუნდეს. გიშაგორილ ახალგაზრდეფშე ოთხ დანიელ, ხანანია, მიშაელ დო აზარია რდესჷ. აშფენაზიქ თინეფს ბაბილონურ სახელეფ ქიგიოდვჷ: ბელტეშაცარ, შადრაქ, მეშაქ დო აბედნეგო. თე ახალგაზრდეფს იეჰოვაშ მსახურებას ხომ ვეცილებუდ თი მომზადება, ნამუთ ბაბილონს აფუდეს მიკაულარ?

თე ოთხ ბოშის გინოჭყვიდილ აფუდ, ოჭიშ ვა ურთინუესკო იეჰოვას. თინეფს უჩქუდეს, ნამდა მეფეშ სტოლშე ნამთინე ოჭკუმალ იეჰოვაშ კანონით უწმინდურ რდჷ დო ოკო ვა უჭკუმუდესკო. ათეშენ აშფენაზის უწუეს: რთხინთჷ, ვადმანძალათ მეფეშ ოჭკუმალიშ ჭკუმუა. აშფენაზიქ უპასუხ: ვა ჭკუმუნთ დო დელახებუთ-და, მეფე დოპჸვილუნს.

დანიელს ართ იდეა უღუდ. თიქ მცველს უწუ: რთხინქჷ, ვით დღას ხვალე მცენარეულობა დო წყარ ქომუჩით. უკულ შხვა ბოშეფს ქელამჸუნეთ, მით მეფეშ სტოლშე ჭკუმუნა. მცველს ვა უვარიებ თენა.

ვით დღაშ უკულ დანიელს დო თიშ სუმ მეგობარს შხვა ბოშეფშე ბრელით უმოს ჯანმრთელეფიშ მეჯინა უღუდეს. იეჰოვას გურს უჰამუანდჷ თინეფიშ მორჩილება. თიქ დანიელს თიცალ სიბრძნე ქიმეჩ, ნამდა სიზმარეფიშ დო ხილუეფიშ ენწყუმა ხოლო შეულებუდ.

მუჟამსით მომზადებაშ პერიოდიქ გეთუ, აშფენაზიქ ნაბუქოდონოსორს მომზადებულ ბოშეფ ქიმუჸუნ. მეფექ თინეფს ქუდურაგადუნ, ქოძირ, ნამდა დანიელ, ხანანია, მიშაელ დო აზარია შხვეფშე უმოს ჭკვერეფ დო გოხვალამირეფ რდესჷ. თიქ ზუსტას თე ოთხ ბოშ გიშეგორ სამეფო საქმეშო. მეფე ხშირას ელაკითხანდჷ თინეფს რჩევეფს მნიშვნელოვან საკითხეფშენ. იეჰოვაქ თინეფს თიშე ბრელით უმოს სიბრძნე ქიმეჩ, ვინემ სამეფოშ ჭკვერ კათას დო ჯადოქარეფს უღუდეს.

თიშ უმკუჯინუო, ნამდა დანიელ, ხანანია, მიშაელ დო აზარია უცხო ქიანას ცხოვრენდეს, თინეფს ვა გოჭყოლადუნა, ნამდა იეჰოვაშ მსახურეფ რდესჷ. სქან მშობლეფ სქანწკუმა ვა რდანინ ხოლო, თე ახალგაზრდა ბოშეფცალო, სი ხოლო ირიათო რშუდას იჸინო იეჰოვა?