იერუსალიმიშ განადგურება

იუდას მახორუ ხალხიქ კინ ქურთინუ ოჭიშ იეჰოვას დო ტყურა ღორონთეფს ქუდუჭყჷ თაყვანიშცემა. იეჰოვა ბრელ წანას ოცადუდ თინეფიშ მოხვარას. თიქ თინეფს გაფრთხილებერო ბრელშა მეუშქვჷ მუშ წინასწარმეტყველეფ, მარა მუთუნს ველერჩქილუანდეს. ინა ვარ, წინასწარმეტყველეფს გიაძიცანდეს. მუჭო მოსპჷ იეჰოვაქ კერპთაყვანიშმცემლობა?

ბაბილონიშ მეფე ნაბუქოდონოსორ ართიანიშ მეჸუნელო ეჭოფუნდჷ ქიანეფს. მუჟამსით თიქ პირველო გიორჯგინ იერუსალიმს, ბაბილონშა ტყვეეფო მიდეჸუნ მეფე იეჰოიაკიმ, მთავარეფ, მებრძოლეფ დო მოხელეეფ. თეს გეძინელ, იეჰოვაშ ტაძარ არძა ძვირფასეულობაშე დოჩოლუ. უკულ ნაბუქოდონოსორქ იუდაშ მეფეთ ციდკია ქიგიორინუ.

დუდშე ციდკია ომორჩილუდ ნაბუქოდონოსორს, მარა უკულ მეზობელ ერეფქ დო ტყურა წინასწარმეტყველეფქ ელუჩეს, ნამდა ბაბილონიშ წინააღმდეგ ებუნტუკო. იერემიაქ გაფრთხილ თინა: ებუნტებუქ-და, თეს იუდას ღურა, შქირენა დო ლახალა ქუმაჸუნუ.

გამეფებაშე ბრუო წანაშ უკულ ციდკიაქ გინოჭყვიდ, მიდართუკო ბაბილონიშ წინააღმდეგ. თიქ მოხვარა ეგვიპტეს ქოთხუ. ათეშენ ნაბუქოდონოსორქ ჯარ მიდაშქვჷ, ნამდა ქიგიანთხესკო იერუსალიმს. თინეფქ ქალაქის ქუგუდირთეს. იერემიაქ ციდკიას უწუ: იეჰოვა იჩიებ, ნამდა ბაბილონიშ წინააღმდეგ ვებრძოლენქ-და, ქოთ სი დო ქოთ ქალაქ გინასქიდუთ, მარა იშენით ბრძოლას გეგნოჭყვიდუნქ-და, ბაბილონელეფ გეგნოჭუნა იერუსალიმს დო ტყვეთ მიდაიჸუნანა. ციდკიაქ უპასუხ: დუდის ვემუდვანქ ბაბილონს!

წანმოწანა დო გვერდიშ უკულ ბაბილონიშ ჯარქ გეკარღვჷ იერუსალიმიშ კიდალეფ დო მთელ ქალაქ გეგნოჭვჷ. თინეფქ განადგურეს ტაძარ, გეშაჭყვიდეს ხალხ დო ანთასობით ტყვე მიდეჸუნეს.

ციდკიაქ ინტჷ იერუსალიმშე, მარა ბაბილონელეფქ ქიგიათხოზეს, იერიხონწკუმა ოჭოფეს დო ნაბუქოდონოსორს ქიმუჸუნეს. ბაბილონიშ მეფექ ციდკიას სქუალეფ მუშ თოლიშ წოხოლე დოუჸვილ. უკულ თოლეფ გემწუღ დო ციხეს ქიმთახუნუ, სოდეთ თიქ ქიმთოღურ. მარა იეჰოვაქ იუდეველეფს პირობა მეჩჷ, 70 წანაშ უკულ იერუსალიმშა, თქვან ჸუდეშა, დუგორთინუანთია.

მუ ელუდ თი ახალგაზრდეფს, მით ბაბილონს ტყვეეფო რდესჷ ჸუნაფილ? ქუდოსქიდუდესო თინეფ იეჰოვაშ ართგურეფ?