ᲒᲐᲙᲕᲔᲗᲘᲚ 57
იეჰოვა იერემიას ოქადაგებშა უტენს
იეჰოვაქ იერემია წინასწარმეტყველო გიშეგორ, ნამდა იუდაშ მახორუეფს ქოუქადაგუკო. თიქ იერემიას დავალ, ნამდა გაფრთხილუკო ხალხ, მიოტუესკო გლახა საქმეეფიშ კეთება. იერემიაქ იეჰოვას უწუ: იეჰოვა, მა დიო ხოლო ახალგაზრდა ვორექ. ვა მიჩქჷ, მუჭო ოკო დურაგადუე ხალხის. იეჰოვაქ უპასუხ: ვა გაშქურინას! მა გიწინქ, მუ ოკო უწუე თინეფს. მა მიგეხვარებუქ!
იეჰოვაქ იერემიას დავალ, ნამდა გეკოშაყარუკო ხალხიშ უხუცესეფ, თინეფიშ თოლიშ წოხოლე დიხას ქიგიოფუჩხოლუკო დიხაჭუბერიშ ჭკუდ დო უწუკო: ათაშ გეკიფუჩხოლუ იერუსალიმ. იერემიაქ ირფელ თეშ გაკეთ, მუჭოთ იეჰოვაქ დავალ. თექ უხუცესეფ მანგარო გარისხჷ. ართ მღვდელქ, ნამდგას ფაშხურ ჯოხოდ, გოლახ იერემია დო ხელეფს დო კუჩხეფს ჯაშ ბორკილეფ ქიგედვჷ. თეშ გურშენ იერემიას მთელ სერს ვადაქანცინ. მაჟია ოჭმარეს ფაშხურქ გოუტუ თინა. იერემიაქ თქუ: მეტ ვეშემლებ. მივოტენქ ქადაგებას. მართალო თაშ მიქცუო თიქ? ვარ. იერემიაქ დეფიქრუნ, თქუ: იეჰოვაშ სიტყვა დაჩხირცალო იბორბონჩ ჩქიმ გურს. ვემმატებე ქადაგება! თაშ ნამდა, იერემიაქ გაგრძელ ხალხიშ გაფრთხილება.
გემკორთჷ წანეფქ დო იუდას ახალ მეფექ გემეფ. მღვდელეფს დო ტყურა წინასწარმეტყველეფს ჯოგუდეს იეჰოვაშ სიტყვა. თინეფქ მთავარეფს უწუეს: თე კოჩ ღურაშ ღირს რე! იერემიაქ თინეფს უწუ: გიჩქუდან, დოპჸვილუნთ-და, მუთუნ ბრალ ვა უღუნ ფერ კოჩ გაჸინა ჸვილირ. მა იეჰოვაშ სიტყვეფს გინორჩანთ დო ვართ ხოლო ჩქიმს. მთავარეფქ თენა ქიმირჩქილუესინ, თქუეს: თე კოჩ ვა რე ღურაშ ღირს!
იერემია აგრძელენდჷ ქადაგებას, მუდგაქ მთავარეფ მანგარო გარისხჷ. თინეფქ მეფეს თხუეს, დაჸვილაფუკო იერემია. მეფექ უწუ, მუთ გოკონან, თინა ღოლითია. თაშ ნამდა, თინეფქ ოჭოფეს იერემია დო მანგარ ტომბა, ლეტამ ინჭას ქენაჸათეს; იმენდ უღუდეს, ნამდა თინა თექ ქენოღურუდ. იერემია ჭიე-ჭიეთ ლეტას ინწყუდ.
უკულ ართ სამეფო კარიშ მსახურქ, ებედ-მელექიქ, მეფეს უწუ: მთავარეფქ იერემია ინჭას ქენაჸათეს! თის თექ ქენიპტენთ-და, დოღურუ. მეფექ ებედ-მელექის უზოჯ, მიდეჸუნკო 30 კოჩ დო იერემია ინჭაშე გეგშეჸუნკო. იერემიაცალო, ჩქი ხოლო მუთუნს ოკო ვემეფჩათ უფლება, მიმოტებაფუან ქადაგება.
„არძა გოიჯოგუანა ჩქიმ სახელიშ გურშენ, მარა მით ბოლოშახ მითვინენს, გინოსქიდუ“ (მათე 10:22).