ᲒᲐᲙᲕᲔᲗᲘᲚ 52
იეჰოვაშ დიდ ჯარ
სირიაშ მეფე ბენ-ჰადად, ირიათო გიანთხუდ ისრაელს. მარა წინასწარმეტყველ ელისე ირო აფრთხილენდჷ ისრაელიშ მეფეს, მუდგაშ ჭყოლოფათ ნტებას ჭიშუდ. ათეშენ ბენ-ჰადადიქ გეგნოჭყვიდ ოჭოფუკო ელისე. თიქ ქიგეგ, ნამდა ელისე ქალაქ დოთანს რდჷ დო ჯარ მიდაშქვჷ თიშ ოჭოფალო.
სირიელეფქ დოთანშა სერით ქიმერთეს. გოთანდუნ, ელისეშ მსახურქ გალე გიმილ დო ქოძირ, ნამდა ქალაქის ქიანაშმადიდა ჯარ გოურდჷ. თის აშქურინ დო ქიმიოძახ: ელისე, მუ ფქიმინათ? ელისექ უპასუხ: ვა გაშქურინას, ჩქინწკუმა უმოს რენა, ვინემ თინეფწკუმა! თე დროს იეჰოვაქ ქაძირუ ელისეშ მსახურს, ნამდა ქალაქის გოურდუნ თი გვალეფ ეფშა რდჷ დაჩხირს მოგენდუნ ფერ ცხენეფით დო საბრძოლო ეტლეფით.
სირიელ ჯარიშკოჩეფქ ელისეშ ოჭოფშა ქიმერთესინ, თიქ ილოც: იეჰოვა, რთხინქჷ, თოლსინთე მიდუღ თინეფს. იეჰოვაქ უცფას უპასუხ თიშ ლოცვას. მართალ რე, თინეფს თოლსინთე ვადინაფუნა, მარა ვა ხვადუდეს, სო რდესჷ. ელისექ ჯარიშკოჩეფს უწუ: შხვა ქალაქშა რეთჷ მოულირ. ქეკმაჸუნით დო ქიმეიჸუნანთ თი კოჩშა, მიდგას გორუნთ. ჯარიშკოჩეფქ ხოლო ქეკაჸუნეს ელისეს. თიქ თინეფ სამარიაშა გენიჸუნ, სოდეთ ისრაელიშ მეფე ცხოვრენდჷ.
სირიელ ჯარიშკოჩეფქ გვიანო ქუგოხვადეს, სო რდესჷ. ისრაელიშ მეფექ ელისეს კითხჷ: პჸვილაო თენეფ? გეგმირინუანდუო ელისე თე საშვალებას დო გეგნუგანდუო მანგიორს თე ჯარიშკოჩეფს, მიდგას თიშა გლახაშ კეთება ულამუდეს? ვარ, ელისექ თაშ ვემიქცუ. თიქ მეფეს უწუ: ვა ჸვილა. ოჭკუმალ ქოჩჷ დო მუნეფიშ შარაშა გოუტე. თაშ ნამდა, მეფექ დიდ დიარა მოუნწყუ თინეფს დო უკულ ჸუდეშა გოუტუ.
„ჩქი მტკიცას ბჯერა, ნამდა მუდგა ვა ფთხუათინ, თიშ ნებას ქიმურენ-და, თინა მირჩქილენა“ (1 იოანე 5:14).