გაბედულ იეჰოიადა

დედოფალ იზებელს ჸუნდჷ ცირასქუა, ნამდგას ათალია ჯოხოდ. თინა ხოლო დიამუშცალ უბადო რდჷ. ათალია იუდაშ მეფეშ ოსურ რდჷ. ქომონჯიქ დოღურუნ, მეფეთ მუშ სქუაქ გინირთჷ. სქუაქ ხოლო დოღურუნ, იუდაშ მმართველო მუშ დუდ ქიგიორინუ. უკულ ეცად, მთლიანო მოსპუკო სამეფო ხაზ დო დოჸვილუკო არძა, მიდგაქ შილებედ მუშ მანგიორო მეფეთ გინირთუკო. თიქ მუშ მოთალეფ ხოლო ვედენდჷ. არძას ოშქურუდ თიშა.

მღვდელმთავარ იეჰოიადას დო თიშ ოსურს, იეჰოშებას, უჩქუდეს, ნამდა, მუდგას ათალია ორთუდ, მანგარ უბადობა რდჷ. ათეშენ მუნეფიშ სიცოცხლე საფრთხეშა ქენიჸოთეს დო გეგნატყობინუეს ათალიაშ ართ-ართ მოთა, ჭიჭე იეჰოაშ. იეჰოიადაქ დო თიშ ოსურქ ბაღანა ტაძარს მორდეს.

იეჰოაშიქ შქვით წანერო გინირთუნ, იეჰოიადაქ დუდკოჩეფ დო ლევიანეფ გეკოშაყარუ დო უწუ: ტაძარიშ კარეფწკუმა ქიგედირთით დო მითინ ვემნაშქვათ. უკულ იეჰოიადაქ იეჰოაშ იუდაშ მეფეთ ქიგიორინუ დო დუდის გვირგვინ ქიგმადგჷ. იუდაშ მახორუეფ იძახუდეს: დურინუდას მეფეს!

დედოფალ ათალიაქ ხალხიშ ხონარ ქიგეგონუნ, ხელათ ტაძარშა ირულ. თიქ ახალ მეფე ქოძირუნ, ქიმიოკიჟინ: „ათონწყილ ამბე რე! ათონწყილ!“ დუდკოჩეფქ ოჭოფეს უბადო დედოფალ, გეგმიჸუნეს დო დოჸვილეს. მარა მუ ოხვარუდ ერს, ნამუთ უბადო დედოფალიშ გავლენაშ თუდო რდჷ?

იეჰოიადაქ ხალხის იეჰოვაწკუმა შეთანხმება ქუდადვალაფუ, ნამდა ხვალე თის ცენდეს თაყვანს. თიქ გეკარღვჷ ბაალიშ ტაძარ დო ფია-ფიათ ეკიღ კერპეფ. თეს გეძინელ, ტაძარს მსახურებაშო მღვდელეფ დო ლევიანეფ ქიგიორინუ, ნამდა ხალხის კინ ქეშიალებუკო თექ თაყვანიშცემაქ. თიქ ტაძარიშ მინაულარს მცველეფ ქიგიორინუ, მუშენდა ვემნორთუკო მითინქ, მით იეჰოვაშ თოლს უწმინდურ რდჷ. უკულ იეჰოიადაქ დო დუდკოჩეფქ იეჰოაშ სასახლეშა მიდეჸუნეს დო სამეფო ტახტის ქიგიოხუნუეს. იუდაშ მახორუეფს მანგარ ხიოლ უღუდეს. მუჭოთ იჸუ, გეთავისფალეს უბადო ათალიაშე დო ბაალიშ თაყვანიშცემაშე. თინეფს უკვე მუთუნ ვაცილუდ იეჰოვაშ მსახურებას. ქარწყექო, მუსხი კოჩის აწადირთჷ იეჰოიადაშ გიმორჩქინელ გაბედულებაქ?