მაჩხუპერ დო ჭიჭე ძღაბ

ართ ჭიჭე ისრაელ ძღაბ სირიელეფქ მუშ ოჯახის გამასოფეს დო ჸუდეშე შორს, სირიაშა, მიდეჸუნეს. თინა სირიაშ ჯარიშ მეთაურიშ, ნაამანიშ, ოსურიშ მსახურ რდჷ. თე ჭიჭე ისრაელ ძღაბ იეჰოვაშ მსახურ რდჷ თიშ უმკუჯინუო, ნამდა მუშ გოხოლუას მითინ ვამსახურუდ იეჰოვას.

ნაამანს საშინელ კანიშ ლახალა ოჭირუდ დო ირიათო მანგარ ჭუეფ უღუდ. ჭიჭე ძღაბის მთელ გურით ოკოდ, ქიმეხვარუკო თის. ათეშენ თიქ ნაამანიშ ოსურს უწუ: იფჩინენქ ართ კოჩის, მიდგას შეულებ ჩქიმ ბატონიშ სქილიდაფა. ისრაელს რე იეჰოვაშ ართ წინასწარმეტყველ, ელისე. თის შეულებ ბატონიშ სქილიდაფა.

ნაამანიშ ოსურქ ჭიჭე ძღაბიშ ნარაგად გეგნოჩ მუშ ქომონჯის. ნაამან ირფელს გაკეთენდ, ოღონც დოსქიდუკო ლახალაშე. ათეშენ თიქ მიდართჷ ისრაელშა. თის მიორჩქუდ, ნამდა ელისე დიდ ამბეთ შეხვადუდ, მარა თიშ ჸუდეს ქადირთუნ, ელისეს თეშ ხოლო ვეგმურთუმ თიშ შეიოხვალამშა. თიქ მუშ მსახურ გეგმაშქვჷ დო ქიმუჩინ, ნამდა მალწყარ იორდანეშა მიდართუკო, შქვითშა გიბონუკო დო დოსქიდუდ ლახალაშე.

ნაამან თეცალ მუდგარენს ველუდ. თიქ თქუ: ფიფქრენდჷ, თე წინასწარმეტყველ მუშ ღორონთის ქოთხინდ მოხვარას, მთელ ტანს ხელეფს ქუგომლუანდ დო დუმოსქილიდუანდ. მარა თეშ მანგიორო, თინა მირაგად, ისრაელიშ მალწყარშა მეუა. სირიას თეშ უჯგუშ მალწყარეფ მიღუნა დო თექ ვა მაბონედუო?! ნაამანს გურქ მოურთჷ დო ელისეშ ჸუდეშე მიდართჷ.

ნაამანს მსახურეფქ მეხვარეს, აზრ დითირუკო დო უწუეს: ირფელს ხომ გაკეთენქ, ნამდა დოსქიდე? თე წინასწარმეტყველ გირაგადუნ თიშ კეთებას ბრელ ამბე ვაკო. ქოუჯგ, გაკეთე. ნაამანქ ქუდუჯერ თინეფს, მიდართჷ მალწყარ იორდანეშა დო შქვითშა ქინწყუ დუდ. თეშ უკულ ნაამანქ დოსქიდ ლახალაშე. თინა თიცალ მარდულ რდჷ, ნამდა ელისეშა მადლობაშ ორაგადშა დირთჷ დო უწუ: ასე უკვე მიჩქჷ, ნამდა ხვალე იეჰოვა რე ნამდვილ ღორონთ. სქან აზრით, მუს იგინანდჷ ჭიჭე ისრაელ ძღაბ, მუჟამსით ნაამან სქილადირ დირთუდ ჸუდეშა?