ქომონჯღურელ ოსურკოჩიშ ბოშიქ გეთელ

გოლოფაშ დროს იეჰოვაქ უწუ ელიას: სარეფთაშა მეუ. თექ ართ ქომონჯღურელ ოსურკოჩ ქიმერჩანს ოჭკუმალს. ქალაქიშ მინაულარს ქადირთუნ, ელიაქ ქოძირ ქომონჯღურელ ოსურკოჩ, ნამუთ დიშქას შაყარანდჷ. ელიაქ თის ართ ჭირქა წყარ თხუ. ოსურკოჩიქ წყარიშ მაღალშა მიდართუნ, ელიაქ ქეკაძახ: რთხინქჷ, ჭიჭე ქობალ ხოლო ქუმომიღ. ქომონჯღურელ ოსურკოჩიქ უპასუხ: ვა მიღჷ ქობალ. ხვალე ართ კეთება ქვირ დო ზეთ მიღჷ ჩქიმო დო ჩქიმ ჭიჭე ბოშშო. ელიაქ თის უწუ: იეჰოვაქ პირობა დოდვჷ, ნამდა ჭიჭე ქობალს დომჭუნქ-და, სქან ჸუდეს თე გოლოფაშ თებაშახ ქვირ დო ზეთ ვემგოკორდუ.

თაშ ნამდა, ქომონჯღურელ ოსურკოჩიქ მიდართჷ ჸუდეშა დო იეჰოვაშ წინასწარმეტყველშო ქობალ დოჭვჷ. მუჭოთ იეჰოვას აფუდ რაგადებულ, ონდო გოლოფა რდჷ, ქომონჯღურელ ოსურკოჩის დო თიშ ჭიჭე ბოშის ოჭკუმალ ვემერკებუნა. თიშ ჸუდეს ქვირიშ დო ზეთიშ ჭკუდ ირიათო მოფშა რდჷ.

უკულ მანგარ გლახა ამბექ ქუმოხვად. ბაღანაქ მანგარო დელახ დო დოღურ. ქომონჯღურელ ოსურკოჩ ელიას მოხვარას ოხვეწუდ. ელიაქ თის ბაღანა გეგწუჸონ დო ჟინ ოთახშა გეკიჸუნ. ბაღანა მუშ ნორჩალს ქიგიოსვანჯუ დო ქილოც: იეჰოვა, რთხინქჷ, სიცოცხლე დურთინე ბაღანას. ქოიჩქუნო, მუშენ რდჷ თენა განსაკუთრებულ ოთხუალ? მუშენდა, მუჭოთ მიჩქუნა, თეიშახ ღურელ ვა გათელებე. თეს გეძინელ, თე ქომონჯღურელ ოსურკოჩ დო თიშ ჭიჭე ბოშ ისრაელეფ ხოლო ვა რდესჷ.

მარა ბაღანას სიცოცხლექ დართჷ დო შურიშ ღალა ქიდიჭყჷ! ელიაქ ქომონჯღურელ ოსურკოჩის უწუ: ქუჯინ, სქან სქუა ცოცხალ რე! თე ოსურკოჩ ხიოლით ცას ონჭუდ. თიქ ელიას უწუ: სი მართალო ღორონთიშ კოჩ რექჷ, მუშენდა ხვალე თის იჩიებუქ, მუდგას იეჰოვა გირაგადჷ.