იეჰოვა სამსონს ძალიერო გინაშქვანს

ისრაელეფიშ უმენტაშიქ კინ კერპეფიშ თაყვანიშცემას დართჷ, ათეშენ იეჰოვაქ ფილისტიმელეფს ქიმეჩ საშვალება, ნამდა გეჭოფესკო თინეფიშ დიხა. მარა ისრაელს რდესჷ თიცალეფ ხოლო, მიდგას უჸორდეს იეჰოვა. თინეფ შქას ართ-ართ რდჷ მანოახ. მანოახის დო თიშ ოსურს სქუალეფ ვა ჸუნდეს. ართ დღას იეჰოვაქ ანგელოზ ქიმიაშქვჷ მანოახიშ ოსურშა. ანგელოზიქ თის უწუ: ქომოლსქუა გაჸვენუ. თინა დერსხენს ისრაელს ფილისტიმელეფიშ ხეშე. თინა ნაზირ იჸუაფ. ქოიჩქუნო, მი რდესჷ ნაზირეფ? თინეფ იეჰოვაშ განსაკუთრებულ მსახურეფ რდესჷ. ნაზირეფს ვა უღუდეს უფლება, თუმა გიჭკირესკო.

დრო-ხანიშ მიკულაშ უკულ მანოახის ბოშიქ ქაშუ, ნამდგას სახელო სამსონ ქიგიოდვეს. სამსონქ მირდუნ, იეჰოვაქ თინა მანგარ ძალიერო გინაშქვჷ. თის შეულებუდ, ლომ ცარიელ ხეთ დოჸვილუკო. ართშა სამუელქ ხვალე, შხვაშ მოხვარაშ უმშო, 30 ფილისტიმელ ჸვილჷ. ფილისტიმელეფს ჯოგუდეს თინა დო ოცადუდეს, მუდგათიჸინ დოჸვილესკო. ართშა სამსონ ქალაქ ღაზას რდჷ, მუჟამსით სერით ლურდუნ თეშ, ფილისტიმელეფქ ქალაქიშ მინაულარ კარწკუმა ქიმერთეს დო თექ გეუხედეს, ნამდა ოჭმარეს სამსონ გეგმიშუნ, დოჸვილესკო თინა. მარა შქა სერს სამსონქ გედირთჷ, ქალაქიშ მინაულარ კარწკუმა ქიმერთჷ, კარ გეგლანწყჷ დო ხებრონიშ გვალაშ წვანდშახ ხუჯით გეკიღ.

დროქ გემკორთუნ, ფილისტიმელეფქ სამსონიშ ჸოროფილშა, დალილაშა, ქიმერთეს დო უწუეს: ქუგამგით, სოვრეშე უღჷ სამსონს თეშმადიდა ძალა დო ანთასობით ვარჩხილიშ ფარას ქიმერჩანთ. თიშ ჭოფუა დო ციხეს დოხუნაფა მოკონა. დალილას ფარა ოკოდ, ათეშენ ქოია ქოუწუ თინეფს. დუდშე სამსონ ვა ურაგადუდ თის, სოვრეშე უღუდ თეშმადიდა ძალა. მარა შურ გეშუღ დო თეიშახ ვედეთხუ, ონდო სამსონქ ვა უწუ, სოვრეშე უღუდ თე ძალა. თიქ დალილას უწუ: თუმა დღას ვამჭკირ, მუშენდა ნაზირ ვორექ. დიპჭკირუნქ-და, ძალას მივოდინუანქ. მუშმანწარას მეჩირთჷ სამსონქ დალილას თენა უწუნ, თაშ ვა რენო?!

დალილაქ ხეთე ქუგაგებაფუ ფილისტიმელეფს თე ამბე დო უწუ: ქიგებგჷ, სოვრეშე უღჷ თის თეშმადიდა ძალა. ჭიჭე ხანშა სამსონ მუშ კართეს ქუდარულუ დო ართ კოჩის თიშა თუმა მაჭკირაფუ. უკულ დალილაქ ქიმიოკიჟინ: სამსონ, ფილისტიმელეფქ ქუმორთეს! სამსონქ გემწოლ, მარა ძალა დინაფილ აფუდ. ფილისტიმელეფქ დობორკეს თინა, ჟირხოლო თოლ გელუღეს დო ციხეს ქიმთარაგუეს.

ართშა ანთასობით ფილისტიმელქ გეკიშაყარ მუნეფიშ ღორონთ დაგონიშ ტაძარს. თინეფ იძახუდეს: ჩქინ ღორონთიქ სამსონ ქეშამიჸოთეს ხეშა! გეგმიჸუნით, ჭიჭეს ქიბძიცანთ. თინეფქ სამსონ ჟირ სიმეტ შქას ქიგიორინუეს დო გაძიცანდეს. სამსონქ იეჰოვას ეხვეწ: იეჰოვა, რთხინქჷ, ხოლო ართშა ქომუჩ ძალა. თე დროს სამსონს თუმა კინ რდილ აფუდ. თიქ ტაძარიშ სიმეტეფს მთელ ძალათ ქიმიანჯირ; მთელ შენობაქ გეკოცუ დო არძაქ დოღურ, თინეფ შქას სამსონქ.