იეჰოვა სამუელს ეჩიებ

მღვდელმთავარ ელის ჟირ ქომოლსქუა ჸუნდჷ, მით კარავს მღვდელეფო მსახურენდეს. თინეფს ხოფნი დო ფინხას ჯოხოდეს. თინეფ ვამორჩილუდეს იეჰოვაშ კანონეფს დო ხალხის ხოლო მანგარ გლახათ ოქცუდეს. მუჟამსით ისრაელეფს შესაწირ მეუღუდეს იეჰოვაშა, ხოფნი დო ფინხას არძაშ უჯგუშ ხორცის მუნეფშო ეჭოფუნდეს. ელიქ ქიგეგ, მუს ორთუდეს მუშ სქუალეფ, მარა მუთუნ ვა უკეთებ თინეფიშ გიშასწორებელო. დუშვენდუო იეჰოვა, თე ირფელქ თაშ გეგრძელუკო?

მართალ რე, სამუელ ხოფნი დო ფინხასშე ბრელით უკლაშ რდჷ, მარა თინა ვემეჸუნდჷ თინეფიშ მაგალითის. იეჰოვას მანგარო ოხიოლუდ თენა. ართ სერს, სამუელს ლურდუნ თეშ, ქელასიმ, ნამდა მიდგარენ უძახუდ. თიქ ხელათ გედირთჷ, ელიშა მიდერულ დო უწუ: ამარ ვორექ. ელიქ უპასუხ: ვა დომძახებ სქანდა. მეუ, ქიდირულე. თიქ ხოლო დირთჷ დარულაფშა. მარა ხონარქ კინ ქელასიმ დო კინ მიდერულ ელიშა. სამუელს ხონარქ მასმაშა ხოლო ქელასიმუნ, ელიქ ქიმეხვად, ნამდა თენა იეჰოვაშ ხონარ რდჷ. ელიქ სამუელს უწუ, ნამდა თე ხონარს კინ ქიგეგენდ-და, თაშ ქუპასუხუკო: ქომწი, იეჰოვა, გირჩქილე სქან მსახურ!

სამუელქ დირთჷ ნორჩალშა. თის კინ ქელასიმ ხონარქ: სამუელ, სამუელ! თიქ უპასუხ: ქომწი, გირჩქილე სქან მსახურ! იეჰოვაქ თის უწუ: ელის გეგნოჩ, ნამდა თიშ დო თიშ ოჯახიშ დასაჯება მილამ, მუშენდა თის უჩქჷ, ნამდა მუშ სქუალეფ გლახა საქმეეფს ორთუნა ჩქიმ კარავს, მარა თეშ გიშასწორებელო მუთუნს ვართჷ. გოთანდუნ, სამუელქ, მუჭოთ ირდღასინ თეშ, კარავიშ კარეფ განჯჷ. თის მანგარო ოშქურუდ თიშა, ნამდა იეჰოვაშ ნარაგად გეგნოჩუკო მღვდელმთავარს, მარა ელიქ ქუდუძახ თის დო კითხჷ: სქუა, მუ გიწუ იეჰოვაქ? ირფელ ქომწი, მუთუნ ვამფულა. სამუელქ ხოლო ირფელ ქეჩუ ელის.

სამუელს წანეფ აძინუდ დო იეჰოვა ირიათო თიწკუმა რდჷ. მთელ ისრაელს არძას უჩქუდ, ნამდა იეჰოვას სამუელ აფუდ გიშაგორილ წინასწარმეტყველო დო მსაჯულო.