ᲒᲐᲙᲕᲔᲗᲘᲚ 36
იფთახიშ დოდვალირ პირობა
ისრაელეფქ კინ მიოტუეს იეჰოვა დო ტყურა ღორონთეფიშ თაყვანიშცემა ქიდიჭყეს. ამონელეფქ ისრაელეფს ქიგიანთხესინ, თე ტყურა ღორონთეფს ვა მახვარებუეს თინეფშა. ისრაელეფ ბრელ წანას წვალებურო ცხოვრენდეს. ბოლოს თინეფქ იეჰოვას უწუეს: შეფცოდით სქან წოხოლე. რთხინთჷ, დამირსხით ნტერეფიშ ხეშე. ისრაელეფქ განადგურეს მუნეფიშ კერპეფ დო კინ იეჰოვას ქუდუჭყეს თაყვანიშცემა. იეჰოვას ხოლო ვაკოდ, თინეფიშ წვალებაქ გეგრძელუკო.
ამონელეფიშ წინააღმდეგ ობრძოლებერო მაჩხუპერ იფთახიქ იჸუ გიშაგორილქ. თიქ იეჰოვას უწუ: ნტერეფშა გიმორჯგინაფუანთ-და, პირობას გარზენქ, ნამდა ჸუჩა დიფრთუქინ, პირველ ეწმაზადუნ თის, სი მეიძღვინენქ. იეჰოვაქ ქიმირჩქილუ იფთახიშ ლოცვა დო ბრძოლა მაგებაფუ.
იფთახიქ ჸუდეშა დირთუნ, თიშ აწაზადინშა პირველქ მუშ ცირასქუაქ გიმორთჷ, თინა იფთახიშ ართკაკალია სქუა რდჷ. თიქ სხაპუათ დო დაირაშ მეგამათ ეწაზად მუამუშის. მუს გაკეთენდ იფთახ? თის ვა გოჭყოლად იეჰოვაშა მეჩამილ პირობა დო თქუ: ოხ, სქუა! მუ ბღოლი?! იეჰოვაშა პირობა მაფჷ მეჩამილ. დოდვალირ სიტყვას ვეგნურთენ, კარავს ომსახურებელო სი ოკო გოიტუე შილოშა. ცირასქუაქ თის უწუ: მამა, იეჰოვაშა სიტყვა მეჩამილ ქუგაფუნ-და, ოკო შეასრულე თინა. ხვალე ართის რთხინქჷ, ჟირ თუთა ქომუჩ, ნამდა გვალაშა ჩქიმ მეგობრეფწკუმა ართო მიდაბრთე. დორთელს კარავშა მიდურქ. იფთახიშ ცირასქუა მთელ ცხოვრებას ართგურო ომსახურუდ იეჰოვას კარავს. ირ წანას მუშ მეგობრეფ ენიშეს შილოშა დო იძირუანდეს თის.
„მიდგას ქომოლსქუა ვარდა ოსურსქუა უჸორს ჩქიმ უმოსო, ვართ თინა რე ღირს, ჩქიმ მოწაფე რდასჷ“ (მათე 10:37).