ახალ წინამძღოლ დო ჟირ გაბედულ ოსურკოჩ

იესო ნავეშ სქუა იეჰოვაშ ხალხის ბრელ წანას ხელმძღვანელენდჷ. თინა 110 წანერ რდჷ, ღურუნ. ონდო ცოცხალ რდჷ, ისრაელეფ თაყვანს ცენდეს იეჰოვას. მარა იესო ნავეშ სქუაშ ღურაშ უკულ თინეფქ ქანაანელეფცალო კერპეფიშ თაყვანიშცემა ქიდიჭყეს. რახანს ისრაელეფქ მიოტუეს იეჰოვა, თიქ დუშვჷ, ნამდა ქანაანელეფიშ მეფექ, იაბინქ, ცხოვრება გუმწარუკო თინეფს. ათეშენ ხალხიქ იეჰოვას ქუდუჭყჷ ხვეწინ, ქიმეხვარუკო. იეჰოვაქ ქუმურჩქილუ თინეფს დო ახალ წინამძღოლ ქიგურინუ; თის ბარაკ ჯოხოდ. თინა ქიმეხვარებუდ ხალხის, დართესკო იეჰოვას.

იეჰოვაქ ბარაკშა წინასწარმეტყველ დებორა მიდაშქვჷ. თიქ ბარაკის გეგნოჩ იეჰოვაშ ნარაგად: გეჭოფ 10 000 კოჩ დო იაბინიშ ჯარს კიშონიშ ხევწკუმა ქუდოხვად. თექ გიორჯგინანქ სისერას, იაბინიშ ჯარიშ უნჩაშის. ბარაკიქ დებორას უწუ: სი მოლმაჸუნუქ-და, მიდურქ. დებორაქ უპასუხ: ქო, მიდგაჸუნუქ. მარა გიჩქუდას, სისერა სქან ხეშე ვა ღურუ. იეჰოვაქ თქუ, ნამდა თინა ოსურკოჩიშ ხეშე დოღურუ.

დებორაქ ბარაკის დო თიშ ჯარს თაბორიშ გვალაშა გეკაჸუნ, ნამდა ჩხუპშო მემზადესკო. სისერაქ თე ამბე ქიგეგუნ, ხეთეშე საბრძოლო ეტლეფ დო ჯარ გვალაშ თუდო, მინდორიას გეკოშაყარუ. დებორაქ ბარაკის უწუ: ამდღა იეჰოვა დიდებულო მუგოგებაფუანს თე ჩხუპის. ბარაკიქ დო თიშ 10 000 კოჩიქ გვალაშ წვანდშე ეყარეს დო სისერაშ ჯარწკუმა ოჩხუპებშა გიმილეს.

იეჰოვაქ კიშონიშ ხევ წყარით გეიოფშჷ. სისერაშ საბრძოლო ეტლეფქ ლეტას ქენოსქიდ. სისერაქ გეგმართჷ მუშ ეტლშე დო ინტჷ. ბარაკიქ დო თიშ ჯარიშკოჩეფქ გიორჯგინეს სისერაშ ჯარს, მარა სისერაქ ნტება ქაჭიშუ. თიქ ართ ოსურკოჩიშ, იაელიშ, კარავს დიტყობ. იაელქ ბჟა ქოჩჷ თის, ქუდანჯირუ დო ადიალა ქიმნაქუნ. შულადირ მაჩხუპერს ქუდარულ. იაელქ ქიმიოტყობ თის, კარავიშ გიომარგებელ წვანდამ კეტ დუდის ქაშაციკუ დო დოჸვილ.

ბარაკ სისერას გორუნდჷ დო იაელიშ კარავს ქიმიოდირთჷ. იაელქ გეგმორთჷ კარავშე დო ბარაკის უწუ: გემნორთ კარავშა დო ქუგოძირანქ თი კოჩის, მიდგას გორუნქ. ბარაკიქ ხოლო გემნორთჷ დო ქოძირ ღურელ სისერა. ბარაკიქ დო დებორაქ ობირეშით განადიდეს იეჰოვა, მუშენდა თიქ ისრაელეფს ნტერეფშა გიორჯგინაფუ. უკულიან 40 წანას ისრაელს მშვიდობა რდჷ.