იესო ნავეშ სქუა დო გაბაონელეფ

იერიხონიშ ეჭოფუაშ ამბე ქანაანს შხვა ერეფქ ხოლო ქიგეგეს. თინეფიშ მეფეეფქ გეგნოჭყვიდეს, დუდ გეკოდვესკო დო ართო ქებრძოლესკო ისრაელეფს. მარა გაბაონელეფქ შხვა გეგმა ქუდარსხუეს. თინეფქ ჯვეშ, შირილ ბარგ ქიმკიქუნეს, იესო ნავეშ სქუაშა ქიმერთეს დო უწუეს: შორ ქიანაშე ვორეთ მოულირ. გებგით იეჰოვაშ დო თი ირფელიშ გურშენ, მუთ თიქ თქვანო აკეთ ეგვიპტეს დო მოაბის. სიტყვა ქომუჩით, ნამდა ჩქინ დიხას ვეგიანთხუთ დო მანგიორ, ჩქი მოინალეეფო გეიდირთუთ.

იესო ნავეშ სქუაქ ქიდეჯერ თინეფიშ ნარაგად დო სიტყვა ქიმეჩ, ნამდა ვეგიანთხუდ თინეფიშ დიხას. სუმ დღაშ უკულ თიქ ქიგეგ, ნამდა თინეფ შორ ქიანაშე ვარინ, კინ ქანაანშე ჸოფენა. იესო ნავეშ სქუაქ გაბაონელეფს კითხჷ, მუშენ მაღორითია. თინეფქ უპასუხეს: მაშქურინეს. მიჩქუნა, ნამდა იეჰოვა, თქვან ღორონთ, ბრძოლენს თქვანო. რთხინთჷ, ვა პჸვილათ. იესო ნავეშ სქუაქ ვა გოტახ მუშ სიტყვა დო ცოცხალო ქიდიტუ თინეფ.

ჭიჭე ხანშა ქანაანელეფიშ ხუთ მეფექ დო თინეფიშ ჯარქ დარცქინეს გაბაონელეფს. იესო ნავეშ სქუაქ მუშ ჯარით გაბაონელეფიშ ორსხებშა მიდართჷ. თინეფ მთელ სერს შარას კუჩხით მიშეს დო ოჭმარეს იალონშა ქიდიჭყეს ჩხუპ ქანაანელეფწკუმა. ქანაანელეფ თევრე-თავრე მინტებუდეს. სოდგა ინტესინ, იეჰოვაქ ირდიხას ქიანაშმადიდა კირცხ მოუნჭჷ თინეფს დო მოსპჷ. თეშ უკულ იესო ნავეშ სქუაქ იეჰოვას თხუ, ნამდა ჩხანა გაჩერუკო. ჩხანა თეიშახ დღას ვა გაჩერებე. აბა მუშენ თხუ იესო ნავეშ სქუაქ იეჰოვას თიცალ მუდგარენიშ კეთება, მუთ აიშახ ვა მოხვალამე? მუშენდა თინა ონდუდ იეჰოვას დო ჯერდჷ, ნამდა თის ირფელ შეულებუდ. ქოთ თაშ ქუმოხვად, ჩხანას მთელ დღას ვენურთუმ, ონდო ისრაელეფქ ვეგიორჯგინეს ქანაანელეფიშ მეფეეფს დო თინეფიშ ჯარს.