მავითა სასჯელ

მოსექ დეპირ ფარაონს, ნამდა ანწ ვა ძირუნდ თის. მარა ულაშახ უწუ: ამსერ, შქა სერს, ფარაონიშ სქუაშე დოჭყაფილ მონეფიშ სქუალეფით თებულ, ეგვიპტეს არძა პირველ ქომოლსქუა დოღურუ.

იეჰოვაქ ისრაელეფს განსაკუთრებულ ოჭკუმალიშ მომზადება დავალ. ღორონთიქ თინეფს უწუ: დოჸვილით ართ წანერ მუმულ შხურ ვარდა თხა დო თიშ ზისხირ თქვან ჸუდეშ კარიშ ჩარჩოს ქოუსვით. ხორც დოჭვით დო ეიოჸუნაფალიშ უმშოიან ქობალწკუმა ართო ოჭკუმით. ბარგ ქიმკიქუნით, სანდალეფ ქიმიდვით დო მზათ რდათჷ ოულარო. ამსერ გუგათავისფალენთ. წარმოდგენილ ქუგაფუნო, მუნერ გახარებულეფ იჸუაფუდეს ისრაელეფ?!

შქა სერს იეჰოვაშ ანგელოზიქ არძა ჸუდე მილჷ ეგვიპტეს. თი ჸუდეეფს, ნამდგაშ კარიშ ჩარჩოს ზისხირ ვემკუსუდ, არძა პირველ ქომოლსქუაქ დოღურ. ანგელოზიქ თი ჸუდეეფ გეგშეტუ, ნამდგას ზისხირ მიკუსუდ. არძა ეგვიპტელ ოჯახის, ქონებიერს დოვარ უღონოს, პირველ ქომოლსქუაქ დოღურ. მარა ნამთინ ისრაელიშ სქუა ვა ღურე.

ქომოლსქუაქ ფარაონს ხოლო დოუღურ, მუდგაქ საბოლათ გეგნაჭყვიდირაფუ დათმობაშა ულა. თიქ ხეთეშე ქიჭანუ მოსე დო აარონ დო უწუ: მეუთ, დიწიმინდით თავრეშე! მეუთ დო თაყვან ცითჷ თქვან ღორონთის. გეჭოფით თქვან საქონელ დო მეუთ!

თიმ სერს, ეფშა თუთაშ თუდო, ისრაელეფქ ეყარეს დო ეგვიპტეშე გეგშართეს ოჯახეფიშ დო ტომეფიშ მიხედვით. თექ 600 000 ისრაელ ქომოლკოჩ დო ქიანაშ ოსურკათა დო ბაღანა რდჷ. თეს გეძინელ, თინეფს შხვა ხალხეფქ ხოლო ქაჸუნეს, ნამდა თინეფქ ხოლო ცესკო თაყვან იეჰოვას. მუთ იჸუნ, ისრაელეფ თავისფალეფ რდესჷ!

თიშ გაშინალო, მუჭო ირსხჷ იეჰოვაქ თინეფ, ირ წანას თი განსაკუთრებულ ოჭკუმალ ოკო მამზადესკო, ნამუთ იეჰოვაქ დავალ. თე ოჭკუმალს სახელო პასექიქ ქიგიადვჷ.