ᲒᲐᲙᲕᲔᲗᲘᲚ 20
უკულიან ამშვ სასჯელ
მოსექ დო აარონქ ქიმერთეს ფარაონშა, ნამდა ღორონთიშ სიტყვა გეგნოჩესკო: ჩქიმ ხალხის ვა გოუტენქ-და, მთელ დიხას მაჩამინჯე ჭანდეფს ქიმშუკათინუანქ. ეგვიპტელეფს, ქოთ ქონებიერეფს დო ქოთ უღონოეფს, ჸუდეეფშა ქუცუეს მაჩამინჯე ჭანდეფქ. ირდიხას ჭანდ ხედჷ. მარა გოშენიშ დიხას, სოდეთ ისრაელეფ ცხოვრენდეს, ართ კაკალ ჭანდ ხოლო ვა რდჷ. თე მანთხა სასჯელშე მოჸუნაფილ, სასჯელეფ ხვალე ეგვიპტელეფს გიოტირხუდეს. ფარაონქ მოსეს ეხვეწ: ქოთხი იეჰოვას, ჩამთხინუან თე ჭანდეფ დო გოუტენქ სქან ხალხის. მარა, მუჟამსით იეჰოვაქ მაშორ ჭანდეფ, ფარაონქ აზრ დითირუ. დღას ქიდიგურუანდუო ფარაონ ჭკუას?
იეჰოვაქ მოსეს უწუ, ფარაონ ჩქიმ ხალხის ვა გოუტენს-და, ეგვიპტელეფიშ არძა ცხოველ დელახებ დო დოღურუნია. ქოთ თაშ ქუმოხვად, მაჟია დღას ცხოველეფს ღურაქ ქიმშაკათ. მარა ისრაელეფიშ ნამთინ ცხოველ ვა ღურე. თე სასჯელიშ უმკუჯინუო, აჯამ ფარაონს იშენით ვა ულამუდ ისრაელეფიშ გოტება.
უკულ იეჰოვაქ მოსეს უწუ, კინ ქიმერთუკო ფარაონშა დო ტუტა ჰაერს გეიორღვუკო. ტუტაქ ტვერო გინირთჷ დო მთელ ეგვიპტეს მადვჷ. ტვერქ კანიშ ლახალა გურჩქინ ეგვიპტელეფს დო თინეფიშ ცხოველეფს, მუდგაშ გურშენ საშინელ ჭუეფ უღუდეს. მარა წერმიდგინ, ფარაონ იშენ ვა უტენდჷ ისრაელეფს.
იეჰოვაქ მოსე კინ ქიმუშქვჷ ფარაონს დო ქიმუჩინ: ხოლო ვა უტენქო ჩქიმ ხალხის? ჭუმან კირცხის ვოჭვემუანქ მთელ ეგვიპტეს. ქოთ თაშ ქუმოხვად, მაჟია დღას იეჰოვაქ კირცხ, ვალ დო გურგინ დო დაჩხირ გოუტუ ეგვიპტეშა. თეცალ მუდგარენ ეგვიპტეს აიშახ ვა მოხვალამე. მთელ მოსავალქ დო ჯალეფქ გენადგურ, მარა გოშენშა, სოდეთ ისრაელეფ ცხოვრენდეს, ვართ თე სასჯელს უცილებ. ფარაონქ მოსეს უწუ: ქეხვეწ იეჰოვას, ნამდა გაჩერას თე ირფელ დო გოიტენთ. მარა კირცხიქ დო ჭვემაქ მეჭყორდუნ, ფარაონქ თიმწუთის დითირუ აზრ.
თიმწკუმა მოსექ ფარაონს უწუ, ნამდა კოლეფ ოუჭკუმუნდეს ირფელს, მუდგაქ კირცხის გინუსქიდ. მუთ ჯალეფს დოვარ შხვადო რდჷ მიკოსქილადირ, ირფელ მილიონობით კოლქ ოჭკუმ. ფარაონქ მოსეს ეხვეწ: ქოთხი იეჰოვას, მაშორას თე კოლეფ. იეჰოვაქ კოლეფ მაშორუნ, ფარაონქ იშენით ვა გოუტუ ისრაელეფ.
იეჰოვაქ მოსეს უწუ, ხე ცაჸურე ქაჭოფუკო. უცფას ცაქ დეუჩარ. თიცალ უკმელაქ იჸუ, ნამდა სუმ დღას ეგვიპტელეფ მითინს დო მუთუნს ვარწყედეს. დღაშ სინთე ხვალე ისრაელეფს უღუდეს.
ფარაონქ მოსეს უწუ: მეუთ სი დო სქან ხალხიქ, ოღონც საქონელ თაქ ქიდიტეთ. მოსექ უპასუხ, საქონელ ოკო მიდეპჸუნათ, ნამდა ჩქინ ღორონთის მსხვერპლო შეპწირათია. ფარაონქ მანგარო გერისხჷ დო მოსეს დოუღვარუ: ქეწმოდინ თავრეშე! ხოლო ართშა ქორძირუნქ-და, გიჩქუდას, დორჸვილუნქ!
„კინ ქოძირუნთ განსხვავებას მართალ დო უბადო შქას, ღორონთიშ მსახურ დო თიშ შქას, მით თის ვამსახურ“ (მალაქია 3:18).