პირველ სუმ სასჯელ

ეგვიპტეს ისრაელეფს მონეფო ომუშებაფუანდეს. იეჰოვაქ მოსე დო აარონ მიდაშქვჷ ფარაონშა დო ქიმუჩინ: გოუტე ჩქიმ ხალხ, ნამდა თაყვან ფცანჷ უდაბნოს. ფარაონქ ამაყას უპასუხ: ვა მოინტერეს, მუს იჩიებ იეჰოვა, სოთინ ვა გოუტენქ ისრაელეფს. უკულ ფარაონქ ისრაელ მონეფს სამუშა ხოლო უმოსო მოუძინ. მარა იეჰოვა ჭკუას ქუდაგურუანდ თის. ქოიჩქუნო, მუჭო? თიქ ვით სასჯელ ქიგიოტახ ეგვიპტეს. იეჰოვაქ მოსეს უწუ: ფარაონ ველერჩქილუანს ჩქიმ ნარაგადის. ოჭმარეს თინა მალწყარ ნილოსწკუმა იჸუაფ. ქიმერთ დო ქოუწი, ნამდა ჩქიმ ხალხ ვა გოუტუნ თიშენ, მთელ მალწყარ ნილოს ზისხირო გინირთუნ-შო. მოსექ ხოლო დემორჩილ იეჰოვას დო მიდართჷ ფარაონშა. ფარაონქ მუშ თოლით ძირჷ, მუჭო გიაშქვჷ აარონქ კეტ ნილოსის დო მუჭო გინირთჷ თიქ ზისხირო. მალწყარ ნილოსიქ ჸორადილიშ შურ გოჩჷ, ჩხომეფქ გოჭყორდეს დო ნილოსიშ წყარ მეტო ვერგუდ ოშუმალო. მარა ფარაონ იშენ ვა უტენდჷ ისრაელეფს.

შქვით დღაშ უკულ, იეჰოვაქ კინ მიდაშქვჷ მოსე ფარაონშა დო ქიმუჩინ: ჩქიმ ხალხის ვა გოუტენქ-და, ეგვიპტეს გორდეფით გევოფშანქ. აარონქ კეტ ქიჭირინუ დო მთელ თი დიხას გორდეფქ ქოცუეს. ჸუდეეფს, კრაოტეფს, ჭურჭელს, ირდიხას გორდ ხედჷ. ფარაონქ ეხვეწ მოსეს, ნამდა იეჰოვაქ თე სასჯელ ჩუთხინუკო დო პირობა დოდვჷ, ნამდა გოუტენდ ისრაელეფს. ათეშენ იეჰოვაქ ჩუთხინუ თე სასჯელ ეგვიპტეს. ეგვიპტელეფ ღურელ გორდეფს შაყარანდეს დო ართიანს გიორზვენანდეს. მთელ ქიანას ჸორადილიშ შურ ინთხანდჷ. მარა ფარაონს ვართ ასე ულამუდ ისრაელეფიშ გოტება.

უკულ იეჰოვაქ უწუ მოსეს: აარონქ მუშ კეტ დიხას ქიგიაშქვას დო ტვერ ქინქო გეგნირთუ. ქინქ იჩამინუნ ფერ ჭიჭე მწერ რე. უცფას ირდიხას ქინქიქ ქოცუ. ფარაონს კინ მუშ ხალხიქ უწუ, თე სასჯელ ღორონთშე რენია. მარა თინა იშენით ვა უტენდჷ ისრაელეფს.