მოსექ იეჰოვაშ თაყვანიშცემა ისხუნუ

ეგვიპტეს უჩქუდეს, ნამდა იაკობ დო მუშ ოჯახ ისრაელეფ რდესჷ. იაკობიშ დო იოსებიშ ღურაშ უკულ, ეგვიპტეს ახალ ფარაონქ ქიდიჭყჷ მმართველობა. თის ოშქურუდ, ნამდა ისრაელეფ ეგვიპტელეფშე უმოს ძალიერეფო გინირთუდეს. ათეშენ ისრაელეფ მონეფო გინაშქვჷ. თინა ანძალენდჷ თინეფს, ანგურეფ გაკეთესკო დო ჸვანეფს ბრელ იმუშუესკო. მარა, მუთ უმოსის ომუშებაფუანდეს, თით უმოსო იძინანდჷ თინეფიშ რიცხვ. ფარაონს ვახუჯუდ თენა, ათეშენ ზოჯჷ, ნამდა არძა ახალდუნაბად ისრაელ ბოშ დოჸვილესკო. წარმოდგენილ ქუგაფუნო, მუჭო აშქურნედეს ისრაელეფს?

ართ ისრაელ ოსურს, იოქებედის, სქვამ ბოშიქ ქაშუ. იოქებედის სქუაშ თხილუა ოკოდ, ათეშენ კალათის ქენანჯირუ დო მალწყარ ნილოსის მცენარეეფ შქას დატყობინუ. ბაღანაშ და, მირიამ, გოხოლუას გერდჷ, ნამდა ქოძირუკო, მუ მოხვადუდ.

თე დროს ნილოსშა ობონშა ფარაონიშ ცირასქუაქ ქიმერთჷ დო კალათ ქოძირ. თე კალათის ინგარდუნ ფერ ბაღანა ქენახვილუ დო მანგარო ეცოდ. მირიამქ ფარაონიშ ცირასქუას კითხჷ: გოკონანო, მიდაბრთე დო დობგორე თიცალ ოსურ, ნამუთ ბაღანას მიკულუანს? ფარაონიშ ცირასქუაქ ქოვა ქოუწუნ, მირიამქ დიამუშ, იოქებედ, ქიმიჸუნ. ფარაონიშ ცირასქუაქ იოქებედის უწუ: გეჭოფ ბაღანა, ქიმკულე დო ფარას მა გინოიგანქ.

ბაღანაქ გემწირდუნ, იოქებედიქ თინა ფარაონიშ ცირასქუას ქიმუჸუნ. თიქ ბაღანას მოსე ქიგიოდვჷ დო მუშ სქუაცალო რდუნდჷ. მოსე პრინცცალო ირდუდ დო შეულებუდ, ირფელ ნოღვედუკო, მუდგას მიკორინუანდ. მარა მოსეს დღას ვა გოჭყოლად იეჰოვა. თის უჩქუდ, ნამდა სინამდვილეს ეგვიპტელ ვარინ, ისრაელ რდჷ. ათეშენ იეჰოვაშ მსახურება ისხუნუ.

40 წანერ რდუნ თეშ, მოსექ გეგნოჭყვიდ, ქიმეხვარუკო მუშ ხალხის. ართშა, მუჟამსით ქოძირ, მუჭო ლახუნდჷ ართ ეგვიპტელ ისრაელ მონას, თე ეგვიპტელს თეშ გიაშქვჷ, ნამდა თიქ ადგილს დოღურ. მოსექ ღურელ ქვიშას დონთხორ. ფარაონქ თე ამბე ქიგეგუნ, მოსეშ ჸვილუა მინდომ. მარა მოსექ მიდიანშა ინტჷ. თექ იეჰოვა ზრუნენდჷ თიშე.