ᲒᲐᲙᲕᲔᲗᲘᲚ 16
მი რდჷ იობ?
უციშ დიხას ცხოვრენდჷ ართ კოჩ, იობ, ნამუთ იეჰოვაშ ართგურ რდჷ. თის მანგარ დიდ ქონება უღუდ დო დიდ ოჯახ ჸუნდჷ. იობ კეთილ კოჩ რდჷ; თინა ოხვარუდ ღარიბეფს, ქომონჯღურელ ოსურკოჩეფს დო ომბოლ ბაღანეფს. მარა, რახანს იობ სწორას იქციებუდ, თენა თის ნიშნენდუო, ნამდა დღას ვეშეხვადუდ პრობლემეფს?
იობის სატანა ეშმაკ ოკვირუდ, მარა თის თენა ვა უჩქუდ. იეჰოვაქ სატანას უწუ: ქოძირიო ჩქიმ მსახურ იობ? მთელ ქიანას მითინ ვა რე თიცალ. თინა მირჩქილე დო თის ორთჷ, მუთ სწორ რე. სატანაქ უპასუხ: აბა მუ იჸი, სი თხილანქ თის დო ვარკენქ ჯგირობუას; სქანით ვარკჷ დიხეფ დო საქონელ. დაბა, მიდუღ ირფელ დო ქოძირუნქ, სქან მსახურება ხეთე ვემიოტუ-და. იეჰოვაქ უწუ: შეილებ გეგმოცადე იობ, მარა თიშ ჸვილუაშ უფლებას ვა გარზენქ! გიჩქუნო, მუშენ მეჩჷ იეჰოვაქ სატანას იობიშ გიმოცადებაშ უფლება? იეჰოვა დარწმუნებულ რდჷ, ნამდა იობ თე გამოცდას ვენიჭკირუდ.
სატანაქ იობის ართიანიშ მეჸუნელო ქიანაშ უბედრობა ქიგიოტახ. დუდშე თიქ სებელეფ ქიმუშქვჷ თის; თინეფქ იობის ორინჯ დო ვირეფ მიდუღეს. თეშ უკულ იობიშ არძა შხურქ დაჩხირს დიჭვჷ. უკულ თიშ მსახურეფს, მით აქლემეფს ულუანდეს, ქალდეველეფქ ქიგიანთხეს დუდის, დოჸვილეს დო აქლემეფ მიდეჸუნეს. უკულ არძაშ უფრაშიქ ქუმოხვად. იობიშ სქუალეფს დიარა უღუდეს, მუჟამსით უცფას ჸუდექ გეკოცუ დო თინეფ თუდო ქეთიჸუნუ. იობის არძა სქუაქ ართათ დუღურ. თინა განადგურებულ რდჷ, მარა იეჰოვაშა ოჭიშ ვა ურთინუაფ.
სატანას ოკოდ, იობიქ უმოსო დეტანჯუკო, ათეშენ მთელ სხეულს კანიშ ლახალა გოურჩქინ. იობის საშინელ ჭუა უღუდ. თის ვა უჩქუდ, მუშენ ოჭირუდ თე ირფელ, მარა იშენით იეჰოვაშ ართგურ რდჷ. ღორონთ ორწყედ თე ირფელს დო გურს უხარენდჷ თიშ ართგურობა.
უკულ სატანაქ იობ გეგმოცადუკონ თიშენ, სუმ კოჩ ქიმიაშქვჷ თიშა. თინეფქ იობის უწუეს: მუდგარენ გაფჷ დაშებულ, ფულუნქ დო ათეშენ ღორონთ გასაჯენს. იობიქ უპასუხ, გლახა მუთუნ ვამკეთებუნია. მარა, უკულ იფიქრჷ, ნამდა თე პრობლემეფ იეჰოვაქ შეუხვამილუ დო თქუ, ნამდა ღორონთ უსამართლოთ ოქცუდ.
ართ ახალგაზრდა კოჩ, ელიჰუ, ხონარ ვეკუღალუნ თეშ ურჩქილედ თინეფს. უკულ რაგად ქიდიჭყჷ დო თქუ: ნამთინს ვაითქუალუნა სიმართლე! იეჰოვა თიშე უმოს დიდებულ რე, ვინემ ჩქი ფიფქრენთ. თინა დღას ვემიქციებ უბადოთ. ირფელს ორწყე დო ადამიანეფს ოხვარ, ქუგურზან პრობლემეფს.
უკულ იეჰოვაქ ქუდურაგადუ იობის დო უწუ: სო რდჷ, მუჟამსით ცას დო დედამიწას ვოჭყანდჷ? მუშენ იჩიებუქ, ნამდა უსამართლოთ იფქციებუქ? რაგადანქ, მარა ვაიჩქ, მუ მუშენ ხვადუ. იობიქ აღიარ მუშ შეცდომა დო ღორონთის უწუ: მეფჩირთჷ. მუნარჩქილეფ მაფუდ სქანიშ გურშენ, მარა ასე ჯგირო გიჩინენქ. სი ვეშეილებუნ ფერ მუთუნ ვა რე. ქუმაპატი, მუთ ფთქვი.
სატანაშ გამოცდეფქ გეთუნ, იეჰოვაქ იობის ჯანმრთელობა დურთინუ დო თიშე ბრელით უმოს მუდგარენ მეჩჷ, ვინემ თეიშახ უღუდ. იობ ბრელ ხანს დო ბედნერო ცხოვრენდჷ. იეჰოვაქ თიშენ დაჯილდოვ იობ, ნამდა თიმწკუმა ხოლო ურჩქილედ იეჰოვას, მუჟამსით თენა მანგარ რთულ ოკეთებელ აფუდ. სი ხოლო ქიმიქციებუქო იობცალო დო მუდგაქ ვა მოხვადასინ, ქუდოსქიდუქო იეჰოვაშ ართგურ?
„თქვა გაიგონებუნა იობიშ მოთვინებაშ გურშენ დო თინა ხოლო გიჩქუნა, მუ აკეთ იეჰოვაქ თიშო“ (იაკობ 5:11).