ᲒᲐᲙᲕᲔᲗᲘᲚ 9
ღორონთშე დუნაპირებ ქომოლსქუა
აბრაამ დო სარა ბრელ ხანიშ დაქორწინებულეფ რდესჷ. თინეფქ ქალაქ ურს კომფორტულ ჸუდე დიტუეს დო კარავეფს ცხოვრენდეს, მარა სარა დღას ვა წყირწინუნდჷ თეშ გურშენ, მუშენდა ონდუდ იეჰოვას.
სარას თიშმანწარათ ოკოდ ბაღანა, ნამდა აბრაამს უწუ, ჩქიმ მსახურს, აგარს, სქანდე ბაღანა ქაშინ-და, ჩქიმო თინა სქუაცალო იჸუაფუნია. ჭიჭე ხანშა აგარს აბრაამშე ბოშიქ ქაშუ. თის ისმაელ ქიგიოდვეს.
ბრელ წანაშ უკულ, მუჟამსით აბრაამ 99 წანერ რდჷ დო სარა – 89, თინეფშა სუმ სტუმარქ ქიმერთჷ. აბრაამქ თინეფ მასვანჯეფშა ჯაშ თუდო ქუდახუნუ დო ოჭკუმალშა დაპატიჟ. ქოიჩქუნო მი რდესჷ თიშ სტუმარეფ? თინეფ ანგელოზეფ რდესჷ. თინეფქ აბრაამს უწუეს, წანას, თე დროს, სი დო სქან ოსურს ქომოლსქუა გაჸვენუნანია. სარაქ თინეფიშ ნარაგად კარავშე ქიგეგონ; თის ქელაძიცინ დო იფიქრჷ, თეშმახანა ოსურს მართალო ქუმაშინიაო სქუა?!
უკულიან წანას, სარას ქოთ ქაშუ ქომოლსქუაქ, მუჭოთ თენა იეჰოვაშ ანგელოზიქ უწუ. აბრაამქ თის ისაკ ქიგიოდვჷ, მუთ „ძიცას“ ნიშნენს.
ისაკ სოდგარენ ხუთ წანერ რდჷ, მუჟამსით სარაქ ქოძირ, მუჭო გაძიცანდჷ ისმაელ მუშ სქუას. სარაქ ისაკ დოთხილუკონ, აბრაამშა ქიმერთჷ დო თხუ, ნამდა აგარ დო ისმაელ ჸუდეშე გოუტუკო. დუდშე აბრაამს ვაკოდ თეშ კეთება, მარა იეჰოვაქ უწუ: ქუდუჯერ სარას. მა იბზრუნენქ ისმაელშე, მარა ისაკიშ საშვალებათ შისრულებ ჩქიმ არძა დუნაპირებ.
„რწმენათ სარაქ . . . ძალა მიღჷ გამნარყიშ ეიორჩქინალო, მუშენდა ართგურო მირჩქინ ღორონთ, მიდგაქ თენა დეპირ“ (ებრაელეფ 11:11).