Itthu Ninhudha nhu ni Eprofesiiya Aalontte Yakobi Ahalaka Vakhaani Okhwa—Mphantta 2

1. Eseeni nin’ya nhu woona yoosoma ela?

ANAMWANE a Yakobi yaahithumana, ekawiriyana itthu apaapaya yaalotta awa voohima dha awo. Nkhama noonne nhu yoosoma evinre, moolumo aalontte Yakobi voohima dha Ruubeni, Simiyooni, Levi ni Yuda, yaahaaxankiha. Woonawene awo yaaniikoha ele Yakobi aaya iye olotta voohima dha ale akina 8 yaahanle. Vano, nirowe noone itthu ninhudha nhu ni moolumo aalontte Yakobi voohima dha mwane Zebulooni, Isakaare, Dani, Kaadi, Aseeri, Nafitali, Yooseefi ni Benxami.a

ZEBULOONI

2. Eseeni aalontte Yakobi voohima dha Zebulooni ni moolumo awo yaakhwanenle dhai? (Maphattuwelo 49:13) (Moone-tho ekaaxa.)

² Nsome Maphattuwelo 49:13. Yakobi aalontte wiira nihimo na Zebulooni naaya omaka mittetthe dhaattamenle nsiisi wa nlima, mphantta wa onoorti wa Elapo Yoolaiheriwa. Ndho moolumo ala yaahaakhwanela, nuuvira iyaakha 200. Atthu a nihimo na Zebulooni yaahaakhela nttetthe waari eriyari ya nlima na oKalileya ni nlima Mediteraaniyu. Moise aahilotta airaka: “Nyuwo Zebuloni, mureriwe mmarottani mwanyu.” (Otum. 33:18) Woonawene Moise aahilotta moolumo ala wiira oonihere wiira atthu a nihimo na Zebulooni vanrowa waakhweela omweetta nakoso ni atthu a ilapo dhikina mwaha wa okhala eriyari ya malima maili. Voohaakanyera, atthu a nihimo na Zebulooni yaahikhalana mathowa ohakalala.

3. Eseeni en’ya onikhalihera okhala atthu ohakalala ni itthu nirinhuna?

³ Eseeni ninhudha nhu? Voohixikha opuro ninkhala nhu aahiidho makhalelo nhu, ootheene nhu nookhalana mathowa anniiriha okhala oohakalala. Ndho nihaana oxukhurela ni itthu nirinhuna wiira nihihiye okhala ohakalala. (Esal. 16:6; 24:5) Ivaara dhikina pooti woona okhala vookhweya opacera wuupuwelela itthu dhinnihalela, nikahiya woona itthu dhooreera nirinhuna. Masi ohiya opaka elo, moone itthu dhooreera nrinnyuna moovarihana ni makhalelo nnyu.—aGal. 6:4.

ISAKAARE

4. Eseeni Yakobi aalontte iye voohima dha Isakaare, ni moolumo awo yaakhwanenle dhai? (Maphattuwelo 49:14, 15) (Moone-tho ekaaxa.)

⁴ Nsome Maphattuwelo 49:14, 15. Yakobi aahinttottopela Isakaare mwaha wookhala nanteko ooluttuweliwa. Owo aahilikanyiha ni puuru a ikuru, mwaamunama yoowo onwerya okusa miritti dhoolemela. Nitho a Yakobi aalontte wiira Isakaare aamwaakhela elapo yooreera. Moovarihana ni moolumo a Yakobi, atthu a nihimo na Isakaare yaahaakhela nkhama erithi elapo yooreera ni yooruwerya waattamela nratthi Yordaani. (Yox. 19:22) Voohaakanyera, atthu a nihimo na Isakaare yaahiilipihera olima imatta elapo ele ni ovara miteko wiira yaakhalihere atthu akina. (1 Mam. 4:7, 17) Mwa ntakihero, okathi Baraakhi ni profeeta a nthiyana aaitthaniwa Deebora yaavekenla awa aisarayeeli wiira yaakhalihera owana ni Siisera, atthu a nihimo na Isakaare yaahivahererya wiira ekhalihere.—Makh. 5:15

5. Seeni nintthuneya nhu wiilipihera wiira nikhale ananteko ooluttuweliwa?

⁵ Eseeni ninhudha nhu? Yehova onnivaha efaita nteko nininvarela nhu ni nthiti wiira ninrumeele nkhama dhiidhaale oonenle iye nteko waavariwe ni nihimo na Isakaare. (Mus. 2:24) Mwa ntakihero, nkahaya muupuwele nteko muulupale anna anvara awa wiira ekhapelele muloko. (1 Tim. 3:1) Nnaamwi anna awo ehiwanihaka ekhotto ya veerutthuni, masi annipaka itthu dhootheene anwerya awa wiira yaakhapelela atthu a Muluku nkhalelo wa omunepani. (1 aKor. 5:1, 5; Yuda 17-23) Nitho anniilipihera olokihera ni olotta miyaha dhinlipiha muloko.—1 Tim. 5:17.

DANI

6. Nteko seeni yaakhenle awa atthu a nihimo na Dani? (Maphattuwelo 49:17, 18) (Moone-tho ekaaxa.)

⁶ Nsome Maphatuwelo 49:17, 18. Yakobi aahinlikanyiha Dani ni enowa yeelo enluma nipita na ekhavalo enrumeeliwa okhottoni mpakha nlipa oneettiha ekhavalo elo omora. Elo enoonihera wiira atthu a nihimo na Dani yaari oolipa nrima ni oolikana ene wiira ewane ni awanani a nloko na Isarayeeli. Mwa ntakihero, okathi aisarayeeli yeetta awa nkwaha erowaka Elapo Yoolaiheriwa, atthu a nihimo na Dani yaahihala “ottuli” wiira ekhapelele nloko nne. (Moth. 10:25) Voohaakanyera, atthu a nihimo na Dani yaanivara nteko wootepa otthuneya, nnaamwi yaahaawerye wooniwa ni aisarayeeli ootheene.

7. Eseeni ninhinreera oliyala vaavo ninaakhela yoothanleliwa mmutthekesoni mwa Yehova?

⁷ Eseeni ninhudha nhu? Niire mwaataka wiilipihera ovara nteko wiira mwaakhwanihera yoothanleliwa nnyu, nuumala moona wiira khaavo oone wiilipihera winyu? Woonawene nyuwo mwaataka wiivahererya okhalihera oreerihiwa aahiidho okociheriwa Empa ya Omwene, wiivahererya okhalihera miteko okathi wa asembeleiya ni konkereesu aahiidho okhalihera miteko dhikina. Akhala wiira moopaka elo, ninnoottottopelani vawaatta! Nhiliyale wiira Yehova onnivaha efaita miteko dhootheene nninvarela nnyu. Owo onnihakalala vawaatta vaavo onoona iye wiira munniilipihera waakhwanihera yoothaleliwa nnyu, ohiya mwaha wa otthuna wooniwa aahiidho ottottopeliwa ni atthu akina, masi okhala wiira munnimpheta vawaatta.—Math. 6:1-4.

KAADI

8. Eseeni yaairiha elapo yaakhenle awa nkhama eritthi atthu a nihimo na Kaadi otupheliwa ivaara dhawaatta? (Maphattuwelo 49:19) (Moone-tho ekaaxa.)

⁸ Nsome Maphattuwelo 49:19. Alottaka voohima dha Kaadi, Yakobi aalontte wiira aatupheliwa ni alavilavi. Nuumala ovira iyaakha 200, atthu nihimo na Kaadi yaahimaka mphantta onkhuma ndhuwa wa nratthi Yordaani, opuro yoowo yaavahana awa mulaano ni maloko makina yaari awanani. Ndho okhala wiira yaakhala vakhiviru ni awanani-ya, elo yaamwakhweihera alavilavi waatuphela. Masi hata eri dhiidho, atthu a nihimo na Kaadi yaahithanla okhala elapo ele okhala wiira yaahikhalana mapuro awaatta ooreerela ociha inama. (Moth. 32:1, 5) Voohaakanyera, atthu a nihimo na Kaadi yaari oolipa nrima. Ohiya-vo, awo yaaninroromela Yehova wiira amwaakhalihera waakhihera elapo ele aavanhe iye wiira ehikusiwe ni alavilavi. Nitho mwa iyaakha dhawaatta, awo yaahaaruma anakhotto-ya wiira ekhalihere mahimo makina okusa mittetthe dhikina dha Elapo Yoolaiheriwa dhaari mphantta omputuwela ndhuwa wa nratthi Yordaani. (Moth. 32:16-19) Awo yaahipaka elo okhala wiira yaaninroromela Yehova wiira amwaakhepelela adhaariya vamodha ni ana okathi yaarowa awa okhala okhottoni. Ndho Yehova aahaareeliha mwaha wookhala oolipa nrima ni waakhulela opaka itthu dhikina wiira yaakhalihera atthu akina.—Yox. 22:1-4.

9. Akhala wiira ninonroromela Yehova, eseeni nin’ya nhu opaka?

⁹ Eseeni ninhudha nhu? Akhala wiira ninonroromela Yehova, khaninrowa ohiya onrumeela hata okathi wooxankiha. (Esal. 37:3) Nnaamwi olelo-va ohikhweyaka, anna ni arokora awaatta anniivahererya okhalihera nteko wooteka, othamela mittetthe dhothowa anamalaleerya aahiidho ovara miteko dhikina wiira ekhalihere ntthenkeso wa Yehova. Awo annipaka elo okhala wiira anniroromela Yehova wiira onawaakhapelela okathi wootheene.—Esal. 23:1.

ASEERI

10. Eseeni atthu a nihimo na Aseeri yaahin’ye awa opaka? (Maphattuwelo 49:20) (Moone-tho ekaaxa.)

¹⁰ Nsome Maphattuwelo 49:20. Yakobi aalontte wiira nihimo na Aseeri nankhala noothaaciri. Ndho ti yeelo yaairanen’ye. Nttetthe waavahiwe nihimo na Aseeri nkhama erithi wahela mpuwa ilapo dhooruwerya dha wiisarayeeli. (Otum. 33:24) Nitho elapo yaakhala atthu a nihimo na Aseeri yaahikuvela Nlima Mediteraaniyu ni epatari yuulupale eettiwa nakoso ya oSidooni. Masi mooriipiha nrima, atthu a nihimo na Aseeri yaahaahiya akanaani ekhalaka elapo ele. (Makh. 1:31, 32) Woonawene mweettelo woonanara wa akanaani ni oothaaciri, waahiwiiriha atthu a nihimo na Aseeri ohiya okhalela nthiti okhalihera okokhorela weekhweeli. Mwa ntakihero, okathi Baraakhi aavekenle iye nikhalihero aisarayeeli wiira awane ni akanaani, atthu a nihimo na Aseeri yaahikhootta wiivaherenrye wiira ekhalihere. Tivondho awo yaahiyeleela woona mwiiriirya Yehova aapanke iye wiira aakhalihere aisarayeeli waaxira akanaani ‘waattamela maadhi a oMexiidu.’ (Makh. 5:19-21) Woonawene atthu a nihimo na Aseeri yaahuuliwa muru, nuumala omwiiwa Baraakhi vamodha ni Deebora yiipaka ncipo mwaha wa waawerya akanaani, yiiraka: ‘Aseeri aahanle nsirisiri wa nlima.’—Makh. 5:17.

11. Seeni nintthuneya nhu wiilipihera okhalana moonelo wooreera voohima dha nsurukhu?

¹¹ Eseeni ninhudha nhu? Hiyo nintthuna opaka itthu dhootheene ninwerya nhu wiira ninrumeele Yehova. Masi wiira niwerye nipake elo, nihaana okhala ephoole wiira nihihapusiwe ni moonelo wa atthu a moolumwinkuni ola yaawo anuupuwela wiira etthu yootepa otthuneya mweekumini okhala nsurukhu ni mireerelo dhawaatta. (Mir. 18:11) Ndho nnaamwi okhalana nsurukhu ori vootthuneya wiira nithume itthu dhinnithowa, masi nihaana wiilipihera okhalana moonelo wooreera voohima dha nsurukhu. (Mus. 7:12; aHeb. 13:5) Ohiya-vo, nihihiye itthu dha veerutthuni dhivukulaka okathi ni ikuru dhihu, naaya nhu orumeela wiira ninvarele nteko Yehova. Tivondho, nipake itthu dhootheene ninwerya nenna-va wiira ninrumeele Yehova, nikhupaliki wiira onoonivaha ekumi yooreera ni yoohakalaliha nhoolo.—Esal. 4:8.

NAFITALI

12. Moolumo a Yakobi voohima dha Nafitali yaakhwanenle dhai? (Maphattuwelo 49:21) (Moone-tho ekaaxa.)

¹² Nsome Maphattuwelo 49:21. (Tradução do Novo da Bíblia Sagrada.) Yakobi aalontte wiira Nafitali aalotta ‘moolumo ooreera.’ Woonawene elo entaphulela moolumo Yeesu aalotta iye okathi aavara iye nteko woolaleerya. Okhala wiira Yeesu aanidhuweliwa okhala nhudhihi ooloka, owo aahiviriha okathi alaleeryaka epooma ya oKafarnawu yeelo yaari mpuwa wa nttetthe waavahiwe nihimo na Nafitali. Tivondho elo yiitthaniwa awa okhala ‘epooma-ye.’ (Math. 4:13; 9:1; Yohani 7:46) Nitho Yesaaya aalontte wiira Yeesu ankhala ‘waarya wuulupale’ eriyari ya atthu a nihimo na Zebulooni ni Nafitali. (Yes. 9:1, 2) Ndho oreela wa moopora Yeesu aahudhiha iye, owo aari ‘nthuko weekhweeli, yoowo wamwaleela atthu a makhalelo ootheene.’—Yohani 1:9.

13. Nin’ya owerya dhai olotta moolumo akhanle onhakalaliha Yehova?

¹³ Eseeni ninhudha nhu? Yehova oniwiriyana itthu ninlotta nhu ni moopora ninlotta nhu. Ndho, nin’ya owerya olotta moolumo ooreera akhanle onhakalaliha Yehova? Ninoowerya opaka elo niilipiheraka okathi wootheene olotta ekhweeli. (Esal. 15:1, 2) Ohiya-vo, ninoowerya waalipiha atthu akina, naattottopelaka vaavo ampaka awa itthu dhooreera ni nixakaka olotta dhoovonya dha atthu akina aahiidho wiidhiliha. (aEefe. 4:29) Nitho ninoowerya opaka elo, niilipiheraka opaka marukunuso moopora nimpacera nhu ovaanela ni atthu wiira niwerye waalaleerya.

YOOSEEFI

14. Eprofesiiya yaalotta voohima dha Yooseefi yaakhwanenle dhai? (Maphattuwelo 49:22, 26) (Moone-tho ekaaxa.)

¹⁴ Nsome Maphattuwelo 49:22, 26. Woonawene Yakobi aahihakalala vawaatta mwaha wa Yooseefi. Yehova ‘aahinthanla eriyari ya adhinne’ wiira anrumeele mwa enamuna yavameekhaaya. Yakobi aahimwiitthana Yooseefi okhala ‘erintta yawiima’. Ndho ni moolumo makina, Yakobi aari nkhama nttaikho ni Yooseefi nkhama erintta. Yooseefi ari mwaana oopacera oyariwa ni Rakeeli yoowo Yakobi ampheta iye vawaatta. Yakobi aalontte wiira Yooseefi amwaakhela erithi yuulupale ya Ruubeni yoowo aari mwaana oopacera oyariwa ni Liiya. (Maph. 48:5, 6; 1 Wah. 5:1, 2) Eprofesiiya ela yaakhwanenle dhai? Odhuulu wa anamwane a Yooseefi, Efrayiimi ni Manase, waahikhalihiwa mahimo maili a Wiisarayeeli ni waahaakhela mittetthe dhoovirikana Elapo Yoolaiheriwa.—Maph. 49:25; Yox. 14:4.

15. Yooseefi aavilenle dhai ohixariya?

¹⁵ Nitho Yakobi aalontte wiira awanani ‘yammulika [Yooseefi] ni yammutuphela.’ (Maph. 49:23) Ndho awanani anromoliwa-va anihimmwa adhuulupaleye Yooseefi yaawo yankhalela nrima ni yaakhumihenrye mixankiho dhawaatta mwaha wa onthokorerya voohixariya. Masi Yooseefi khaapwehere mathowa adhuulupaleye ni khanvanhe nthowa Yehova mwaha wa itthu dhaakhumelenle. Ohiya-vo, Yakobi aalontte wiira: ‘Munra wa [Yooseefi] ti woolipa nlelo ni miyoono-dhe dhoolipihiwa.’ (Maph. 49:24) Yooseefi khaahin’ye onroromela Yehova okathi aaviriha iye mixankiho. Nitho ohiya pahi waalevelela adhuulupaleye etthu yaapaka awa, owo aahaathokorerya mooreera nrima. (Maph. 47:11, 12) Yooseefi aahirumeela mixankiho aaviriha iye wiira dhinreerihe aahiidho onkhalihera okhala ntthu ooloka. (Esal. 105:17-19) Ndho mwaha wa opaka elo, Yehova aahinrumeela wiira apake itthu dhawaatta dhootikiniha.

16. Nin’ya owerya dhai ontakiha Yooseefi okathi dhinniphwanya awa mixankiho?

¹⁶ Eseeni ninhudha nhu? Nihikhala-khale nihiyaka mixankiho iniirihaka onttaivela Yehova ni onkhala ottaiwene ni anna ni arokora. Nitho nhiliyale wiira Yehova pooti orumeela okathi dhinniphwanya awa itthu ineehererya waamini wihu wiira annihudhihe. (aHeb. 12:7.) Okathi owo, Yehova pooti onikhalihera okhalana ni wunnuwihera mikhalelo dha ekiristau, nkhama omoriwa ikharari ni olevelela. (aHeb. 12:11) Ndho nikhupali ni nrima wootheene wiira naahihiye ovilela mixankiho Yehova onoonitthuvela nhoolo nkhama dhiidhaale antthuvenle iye Yooseefi.

BENXAMI

17. Eprofesiiya voohima dha Benxami yaakhwanenle dhai? (Maphattuwelo 49:27) (Moone-tho ekaaxa.)

¹⁷ Nsome Maphattuwelo 49:27. Alottaka voohima dha Benxami, Yakobi aalontte wiira atthu a nihimo na Benxami yankhala anakhotto oowali nkhama mwiici. (Makh. 20:15, 16; 1 Wah. 12:2) Mwa ntakihero, nihiku nimodha ‘ohiihiyu’ nlopwana mmodha a nihimo na Benxami aaitthaniwa Sawuli aahithanliwa wiira akhale mwene oopacera a wiisarayeli. Owo aahoonihera okhala nakhotto oowali awanaka ni afilisti. (1 Sam. 9:15-17, 21) Nitho “ohiyu” omodha, piyamwene Esteeri ni Mordekaayi yaawo yaari a nihimo na Benxami, yaahiwoopola aisarayeeli wiira ehiipiwe ni atthu oPersiya.—Esth. 2:5-7; 8:3; 10:3.

18. Nin’ya owerya dhai otakiha ororomeleya wa nihimo na Benxami?

¹⁸ Eseeni ninhudha nhu? Voohaakanyera atthu a nihimo na Benxami yaahihakalala vawaatta nuumala omoona Sawuli yoowo aari a nihimo-na akhalihiwe mwene. Nuumala Yehova aahipaka marukunuso anthanla Davidi a nihimo na Yuda wiira akhale mwene. Masi hata eri dhiidho, atthu a nihimo na Benxami yaahikhalihera marukunuso awo ni nrima wootheene. (2 Sam. 3:17-19) Nuuvira iyaakha vakhaani, mahimo makina yaahaarukunuwela atthu anihimo na Yuda. Masi atthu a nihimo na Benxami yaahoonihera okhala oororomeleya yaakhalihera atthu a nihimo na Yuda vamodha ni mwene aathanliwe ni Yehova. (1 Mam. 11:31, 32; 12:19, 21) Ndho nittharaka ntakihero na nihimo na Benxami, nihihiye waakhalihera moororomeleya ale Yehova onaathanla iye olelo-va wiira eweettihe atthu-ye.—1 aTes. 5:12.

19. Eseeni ninhudha nhu ni eprofesiiya aalontte Yakobi ahalaka vakhaani okhwa?

¹⁹ Voohaakanyera eprofesiiya aalontte Yakobi ahalaka vakhaani okhwa enninihudhiha itthu dhawaatta. Woona moopora moolumo awo yaakhwanenla awa, annilipiha waamini wihu wiira iprofesiiya dhikina dhiri mbibiiliyani dhinawaakhwanela. Nitho woona moopora anamwane a Yakobi yaareelihiwa awa enninikhalihera woona etthu ninreerela nhu opaka wiira niwerye onhakalaliha Yehova.