Itthu Ninhudha nhu ni Eprofesiiya Aalontte Yakobi Ahalaka Vakhaani Okhwa—Mphantta 1

1-2. Eseeni Yakobi aapanke iye nuumala woona wiira ahalaka vakhaani okhwa, ni mwaha wa seeni? (Moone-tho efootu ya ekaapa.)

NUUMALA Yakobi wuuluvala, aahithaama vamodha ni emudhi-ye yootheene akhumaka oKanaani arowaka wEexiitu. Owo aahinrumeela Yehova moororomeleya opuro owo mwa iyaakha 17. (Maph. 47:28) Okhala wiira Yakobi uupuwela wiira mwane Yooseefi aahuukhwa, owo aahihakalala vawaatta nuumala omoona. Ohiya-vo, Yakobi aahitthikela-tho okhala vamodha ni ane ootheene. Ndho nuumala woona wiira aahala vakhaani okhwa, Yakobi aahiwiitthana ane ootheene wiira epake nthukumano wootepa otthuneya wa emudhi wiira aaleele etthu yootepa otthuneya.—Maph. 49:28.

² Okathi ole, yaari yoolema nhooleli ettheko nuumala odhuwela wiira aahala vakhaani okhwa waathukumanya atthu ootheene a ettheko-ye wiira aavahe malakihero. (Yes. 38:1, Tradução do Novo Mundo da Bíblia Sagrada) Nitho nthukumano owo, aninthanle ole aaya okhala nhooleli a emudhi nuumala owo okhwa.

3. Moovarihana ni Maphattuwelo 49:1, 2, seeni moolumo a Yakobi yaari awa ootepa ootthuneya?

³ Nsome Maphattuwelo 49:1, 2. Masi nthukumano ola waari woovirikana ni ole waalamaleliwe, okhala wiira Yakobi aari nkhama profeeta. Ndho okathi owo, Yakobi akhaliheriwaka ni Yehova aahaaleela ane itthu dhootepa otthuneya dhaaya waakhumelela nhoolo vamodha ni odhuulu-ya. Tivondho ivaara dhikina moolumo a Yakobi anthokoreriwa awa okhala eprofesiiya aalontte iye ahalaka vakhaani okhwa.

4. Etthu seeni Yakobi aalontte iye, ni eseeni nin’ya nhu ohudha? (Moone-tho ekaaxa eni: “Emudhi ya Yakobi.”)

⁴ Yoosoma ela, nin’ya othokorerya etthu Yakobi aalontte iye voohima dha ane asese: Ruubeni, Simeyooni, Levi ni Yuda. Nitho yoosoma enttharelana, ninoothokorerya itthu Yakobi aalontte iye voohima dha ane akina 8. Nkhama nin’ya nhu woona, Yakobi khaalontte pahi itthu dhaaya waakhumelela ane, masi-tho aahilotta voohima dha odhuulu-ya yoowo waaya okhala nloko na aisarayeeli. Ndho okathi ninsoma nhu dhawiiraneya dha nloko na aisarayeeli, ninniwerya woona wiira moolumo a eprofesiiya ya Yakobi ahaakhwanela. Nitho vaavo nin’ya nhu othokorerya moolumo a Yakobi, ninawoona itthu dhootepa otthuneya ninhudha nhu dheidho ikhanle onikhalihera onhakalaliha Tiithi nhu a wiirimu, Yehova.

RUUBENI

5. Iparakha seeni woonawene Ruubeni aalipelala iye nuumala ni apaapaye okhwa?

⁵ Woopacera, Yakobi aahinleela mwane Ruubeni, airaka: ‘Nyuwo mwa mwanaka oopacera.’ (Maph. 49:3) Okhala wiira Ruubeni aari mwaana oopacera oyariwa woonawene aanilipelela orithi mireerelo dhawaatta dha apaapaye waaxira ahimaye akina. Nitho woonawene owo aanilipelela wiira nuumala apaapaye okhwa ankhala nhooleli a emudhi ele ni anvaha eparakha elo odhuulu-ye.

6. Eseeni yaamwiirinhe Ruubeni oyeleela eparakha ya orithi mireerelo dhawaatta dha apaapaye nkhama mwaana oopacera oyariwa? (Maphattuwelo 49:3, 4)

⁶ Masi nnaamwi Ruubeni aarina ehakhi ya orithi mireerelo dhawaatta dha apaapaye nkhama mwaana oopacera oyariwa, owo aahiyeleela eparakha elo. (1 Wah. 5:1) Mwaha wa seeni? Okhala wiira nuuvira iyaakha vakhaani Rakeeli akhwiye, Ruubeni aahirupa ni Biliha, yoowo aari nrumeyi a Rakeeli ni ekuso ya Yakobi. (Maph. 35:19, 22) Eseeni yaamwiirihe Ruubeni opaka elo? Ruubeni aari mwaana a Yakobi an’yanre iye ni nthiyana nkina aaitthaniwa Liiya. Woonawene Ruubeni aahirupa ni Biliha wiira Yakobi ahiye ompheta Biliha ni apacere waapheta amaamaye. Aahiidho woonawene Ruubeni aaroodhiveliwa ni Biliha ahikawerya wiihiiha. Masi voohixikha nthowa naamwiirinhe opaka elo, etthu aapanke iye yaahinanara vawaatta Yehova vamodha ni apaapaye.—Nsome Maphattuwelo 49:3, 4.

7. Eseeni yaankhumelenle Ruubeni vamodha ni odhuulu-ye? (Moone-tho ekaaxa eni: “Eprofesiiya Aalontte Yakobi Ahalaka Vakhaani Okhwa.”)

⁷ Yakobi aahinleela Ruubeni wiira: ‘[Nyuwo] moohonona ottittimihiwa winyu.’ Voohaakanyera moolumo ala ahaakhwanela. Biibiliya khaninlotta ndhuulu a Ruubeni otanke okhala mwene, nankuttho aahiidho profeeta. Masi elo khentaphulela wiira Yakobi aahinnyanyala moomalela mwane Ruubeni. Ndho nuuvira okathi odhuulu wa Ruubeni waahikhala nihimo na nloko na wiisarayeeli. (Yox. 12:6) Ivaara dhikina Ruubeni aahoonihera mikhalelo dhooreera ni Biibiliya khanlotta wiira owo aahitthikela opaka orupihana woohiloka.—Maph. 37:20-22; 42:37.

8. Eseeni ninhudha nhu ni ntakihero Ruubeni?

⁸ Eseeni ninhudha nhu? Nihaana wiilipihera okhala atthu awiihiiha ni okhootta mweettelo woonanara wa orupihana woohiloka. Okathi nineehereriwa nhu opaka etampi, nihaana wuupuwelela moopora yoothanla elo en’ya awa onriipiha nrima Yehova, amudhi nhu ni atthu akina. Nitho nihiliyale wiira ‘ele ninaala nhu, ti yeelo nin’ya nhu ohepha.’ (aGal. 6:7) Ohiya-vo, etthu enkhumelenle Ruubeni enninuupusera omoriwa ikharari wa Yehova. Ndho nnaamwi Yehova ahinaakihera mixankiho dhinkhumelela mwaha wa dhoovonya dhihu, owo onnninilevelela ni onninireeliha vaavo ninttharuwa nhu ni niniilipihera nhu opaka itthu dhooreera.

SIMEYOONI NI LEVI

9. Eseeni yaamwiirinhe Yakobi arumeela moolumo ootakhaliha okathi aalotta iye voohima dha Simeyooni ni Levi? (Maphattuwelo 49:5-7)

⁹ Nsome Maphattuwelo 49:5-7. Moottharelana, Yakobi aahilotta voohima dha Simeyooni ni Levi. Owo aahipaka elo arumeelaka moolumo ootakhaliha anoonihera wiira awo yaahipaka etthu yaahaadhivenle. Iyaakha vakhaani ottuli, Dina mwaana a Yakobi aahitupheliwa ni mmiravo mmodha a oKana aaitthaniwa Sikeemi. Ekhweeli wiira nuumala wiiraneya elo, anamwane ootheene a Yakobi yaahinanariwa mwaha etthu iirihiwe nrokoriya. Masi Simeyooni ni Levi yaahitepa onanariwa mpakha elo owiiriha opaka etthu yootakhala. Awo yaahinwoka Sikeemi vamodha ni alopwana ootheene a oKana elottaka wiira yaamwaataana naawo akhala wiira yaamwaakhulela owulihiwa. Nuumala-vo, awo yaahaakhulela. Masi nlelo yoonaka owereya mwaha wa owula naanaano, Simeyooni ni Levi ‘yaahikusa ikatana-dha erowa epooma elo, yeelo yaahakhapeleliwe ewiipha alopwana ootheene.’—Maph. 34:25-29.

10. Moolumo a eprofesiiya ya Yakobi voohima dha Simeyooni ni Levi yaakhwanenle dhai? (Moone-tho ekaaxa eni: “Eprofesiiya Aalontte Yakobi Ahalaka Vakhaani Okhwa.”)

¹⁰ Yakobi aahinanariwa vawaatta mwaha wa ane aili opaka etthu yootakhala. Owo aalontte wiira odhuulu wa Simeyooni ni Levi wammwara-mwareya elapo yootheene ya wiisarayeeli. Moolumo ala yaahaakhwanela nuuvira iyaakha 200, okathi aisarayeeli yaakhenla awa Elapo Yoolaiheriwa. Nihimo na Simeyooni naahaakhela nkhama erithi ipooma dhaari mpuwa wa nttetthe wa nihimo na Yuda. (Yox. 19:1) Nitho nihimo na Levi naahirithi ipooma 48 dheidho dhaamwarenle mapuro oovirikana a wiisarayeeli.—Yox. 21:41.

11. Itthu seeni dhooreera atthu a nihimo na Simeyooni ni Levi yaapanke awa?

¹¹ Odhuulu wa Simeyooni ni Levi khiwaatthikele opaka dhoovonya dhimodharu yaapanka awa ahavire-ya. Atthu a nihimo na Levi yaahikhalihera moororomeleya okokhorela wooloka. Okathi Moise aari iye vadhulu va mwaako Sinaayi, aisarayeeli awaatta yaahipaka elatarato epacera okokhorela. Masi atthu a nihimo na Levi yaahikhoota opaka elo ni yaahinkhalihera Moise owiipha atthu ootheene yaakokhorele elatarato. (Okhu. 32:26-29) Ohiya-vo, Yehova aahaathanla alopwana a nihimo na Levi aavaha eparakha yavameekhaaya ya onrumeela nkhama anankuttho. (Okhu. 40:12-15; Moth. 3:11, 12) Nitho nuuvira okathi, atthu a nihimo na Simeyooni yaahipaka yootthuna ya Yehova yaakhaliheraka moolipa nrima atthu a nihimo na Yuda owana ni akanaani wiira ekuse Elapo Yoolaiheriwa.—Makh. 1:3, 17.

12. Eseeni ninhudha nhu ni ntakihero na Simeyooni ni Levi?

¹² Eseeni ninhudha nhu? Ekhweeli wiira kahi etthu yootakhala onanariwa vaavo nnoona nnyu wiira nyuwo aahiidho ntthu nnimpheta nnyu onthokoreriwa iye vootakhala. Masi nhikhala-khale nhiyaka onanariwa iwo owiirihakani opaka dhoothanla aahiidho opaka itthu dhootakhala. (Esal. 4:4) Ohiya-vo, nihiliyale wiira Yehova khanhakalala vaavo ommoona iye ntthu alottaka aahiidho apakaka itthu dhootakhala mwaha woonanariwa. (Yak. 1:20) Ndho vaavo ntthu mmodha mmulokoni aahiidho ota onnithokorerya iye voohixariya, nihaana wiilipihera otthara malakihero a mbiibiliyani. Akhala wiira ninoopaka elo, enoonikhalihera oxaka olotta moolumo aahiidho opaka etthu ekhanle waakhumihera mixankiho atthu akina. (aRoma 12:17, 19; 1 Ped. 3:9) Ohiya-vo, hata anaan’yari nnyu epakaka itthu ininnanara Yehova, nhiliyale wiira elo khantaphulela wiira nhaana otthara ntakihero-na noohiloka. Nitho nhikhala-khale muupuweleka wiira khamunwerya onhakalaliha Yehova ni waakhela mareeliho-ye. Voohaakanyera, Yehova onooreeliha wiilipihera winyu orowa vahoolo ni opaka itthu dhooreera.

YUDA

13. Eseeni woonawene yaamwiirinhe Yuda oxanka nuumala ophiya ekwaha wiira apaapaye elotte itthu dhaaya onkhumelela?

¹³ Vano yaahiphiya ekwaha ya Yuda wiira apaapaye elotte itthu dhaaya onkhumelela. Woonawene nuumala Yuda wiiwa moolumo ootheene ootakhaliha Yakobi aalontte iye voohima dha adhuulupaleye, aahixanka. Okhala wiira owo aahipaka dhoovonya dhuulupale. Mwa ntakihero, owo aakhalihera adhuulupaleye akusaka mireerelo dha epooma ya oSikeemi. (Maph. 34:27) Nitho Yuda aari vamodha ni adhuulupaleye vaavo yaathumiha awa Yooseefi nkhama epottha ni okathi yaawotontha awa apaapaya wiira aahikhuuriwa ni enama yawoopiha. (Maph. 37:31-33) Nuuvira okathi, Yuda aahirupa ni mwaara a mwane aaitthaniwa Tamaare, uupuwelaka wiira aari namararuwa.—Maph. 38:15-18.

14. Itthu seeni dhooreera Yuda aapanke iye? (Maphattuwelo 49:8, 9)

¹⁴ Masi moovirikana ni ele Yuda uupuwela iye, Yakobi aahireeliha ni nttottopela. (Nsome Maphattuwelo 49:8, 9.) Yuda aahoonihera wiira aanivaha efaita moonelo wa apaapaye yaawo yaari awuuluvala. Nitho aahoonihera omoriwa ikharari ankhaliheraka nhimaye Benxami.—Maph. 44:18, 30-34.

15. Oreelihiwa wa Yuda waakhwanenle dhai?

¹⁵ Yakobi aalontte wiira Yuda aankhala nhooleli adhuulupaleye. Masi wiira yaahaakhwanela eprofesiiya ela dhaahivira iyaakha dhawaatta. Yuda onniromoliwa evaara yoopacera okhala nhooleli nuuvira iyaakha 200. Mwa ntakihero, okathi atthu a nloko na Isarayeeli yaakhumme awa wEexiitu eviraka moothakoni erowaka Elapo Yoolaiheriwa, atthu a nihimo na Yuda yaahirowa ohoolo wa nloko na Isarayeeli. (Moth. 10:14) Nuuvira iyaakha vakhaani, nihimo na Yuda naahihoolela ekhotto ya owana na akanaani wiira aisarayeeli ekuse Elapo Yoolaiheriwa. (Makh. 1:1, 2) Nitho Davidi yoowo aari mwene muulupale a nloko na Isarayeeli, aakhumme nihimo na Yuda. Masi nlelo dhookhala inamuna dhikina yaakhwanenla awa eprofesiiya ya Yakobi voohima dha Yuda.

16. Eprofesiiya eri Maphattuwelo 49:10 yaakhwanenle dhai? (Moone-tho ekaaxa eni: “Eprofesiiya Aalontte Yakobi Ahalaka Vakhaani Okhwa.”)

¹⁶ Yakobi aalontte wiira eriyari ya nihimo na Yuda aankhumelela Mwene ahaarowa waakhiwa omwene. (Nsome Maphattuwelo 49:10.) Mwene owo ti Yeesu Kiriistu, yoowo Yakobi aamwiitthanne iye okhala Silo. Nilottaka voohima dha Yeesu, nlaikha nimodha naalontte wiira: ‘Yehova Muluku onoonvaha ehice ya tiithye, Davidi.’ (Luka 1:32, 33) Nitho Yeesu onniitthaniwa okhala ‘Mwatto a nihimo na Yuda.’—Wiis. 5:5.

17. Nin’ya owerya dhai ontakiha Yehova oreela wa moopora ninwoonela nhu atthu akina?

¹⁷ Eseeni ninhudha nhu? Yehova aahinreeliha vawaatta Yuda nnaamwi khalai aapanke dhoovonya dhuulupale. Masi niire adhuulupaleye yaahiikoha nthowa naamwiirihe Yehova opaka elo? Hata nihidhuwelaka etthu yuupuwela awa, ninnikhupali wiira Yehova aahoona etthu yooreera aapanke Yuda yeelo yaamwiirinhe onreeliha. Nin’ya owerya dhai otthara ntakihero na Yehova? Vaavo munna aahiidho nrokora mmodha onvahiwa iye eparakha yavameekhaaya, woonawene hiyo pooti opacera olipela dhoovonya-dhe. Ndho akhala wiira elo enawiiraneya, nihaana wuupuwelela wiira Yehova onnihakalala ni mikhalelo dhooreera dha munna owo aahiidho arokora. Yehova onoona mikhalelo dhihu dhooreera. Ndho nihaana wiilipihera opaka etthu emodharu.

18. Seeni nintthuneya nhu okhala atthu oopisa nrima?

¹⁸ Nitho yawiiraneya ya Yuda eninnihudhiha etthu ekina yootepa otthuneya, ori okhala oopisa nrima. Okathi wootheene Yehova onnaakhwanihera dhoolaihera-dhe, masi ivaara dhikina owo pooti opaka elo mwa enamuna yoovirikana aahiidho okathi nihaalipelela nhu. Woopacerani, atthu yaahoolela nloko na Isarayeeli khiyaari a nihimo na Yuda. Masi hata eri dhiidho, atthu a nihimo na Yuda yaahakhalihera moororomeleya ale yaathanliwe ni Yehova wiira yaahoolele atthu-ye, nkhama Moise yoowo aari a nihimo na Levi, Yooxuuwa yoowo aari a nihimo na Efarayiimi ni mwene Sawuli yoowo aari a nihimo na Benxami. Nitho olelo-va nihaana waakhalihera moororomeleya ale Yehova onaathanla iye wiira eneettihe.—aHeb. 6:12.

19. Eseeni ninhudha nhu voohima dha Yehova ni eprofesiiya aalontte Yakobi ahalaka vakhaani okhwa?

¹⁹ Ndho mpakha-va, eseeni ninhudha nhu ni eprofesiiya aalontte Yakobi ahalaka vakhaani okhwa? Ennooneya wiira ‘Muluku khanoona itthu nkhama pinaatamu onoona iye.’ (1 Sam. 16:7) Yehova, Muluku oopisa nrima ni oolevelela. Hata Yehova aahaakhulelaka mweettelo woonanara, owo onnidhuwela wiira arumeyi-ye toohimalela. Nitho Yehova pooti waareeliha ale apanke itampi dhuulupale khalai akhala wiira anoonihera ottharuwa ni nrima wootheene ni annitthikela opaka itthu dhooreera. Yoosoma enttharelana, nin’ya othokorerya ele Yakobi aalontte iye voohima dha ane akina 8.